၅. သံသဋ္ဌဝါရော

၁-၄. ပစ္စယာနုလောမာဒိ

၇၃. အာသဝသမ္ပယုတ္တံ ဓမ္မံ သံသဋ္ဌော အာသဝသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

ဟေတုယာ ဆ၊ အာရမ္မဏေ ဆ၊ အဓိပတိယာ ဆ (သဗ္ဗတ္ထ ဆ)၊ ဝိပါကေ ဧကံ။ပေ။ အဝိဂတေ ဆ.

အာသဝသမ္ပယုတ္တံ ဓမ္မံ သံသဋ္ဌော အာသဝဝိပ္ပယုတ္တော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ သံသဋ္ဌော ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

အာသဝဝိပ္ပယုတ္တံ ဓမ္မံ သံသဋ္ဌော အာသဝဝိပ္ပယုတ္တော ဓမ္မော ဥပ္ပဇ္ဇတိ နဟေတုပစ္စယာ။ပေ။.

နဟေတုယာ ဒွေ၊ နအဓိပတိယာ ဆ၊ နပုရေဇာတေ ဆ၊ နပစ္ဆာဇာတေ ဆ၊ နအာသေဝနေ ဆ၊ နကမ္မေ စတ္တာရိ၊ နဝိပါကေ ဆ၊ နဈာနေ ဧကံ၊ နမဂ္ဂေ ဧကံ၊ နဝိပ္ပယုတ္တေ ဆ (ဧဝံ ဣတရေပိ ဒွေ ဂဏနာ ကာတဗ္ဗာ).