၁. ဝိဘင်္ဂဝါရော

ဟေတုပစ္စယော

၆၆. အာသဝသမ္ပယုတ္တံ ဓမ္မံ ပစ္စယာ အာသဝသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (ပဋိစ္စဝါရသဒိသော).

အာသဝဝိပ္ပယုတ္တံ ဓမ္မံ ပစ္စယာ အာသဝဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – အာသဝဝိပ္ပယုတ္တံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ဒေါမနဿသဟဂတံ ဝိစိကိစ္ဆာသဟဂတံ ဥဒ္ဓစ္စသဟဂတံ မောဟံ ပစ္စယာ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။ ခန္ဓေ ပစ္စယာ ဝတ္ထု၊ ဝတ္ထုံ ပစ္စယာ ခန္ဓာ၊ ဧကံ မဟာဘူတံ။ပေ။ မဟာဘူတေ ပစ္စယာ စိတ္တသမုဋ္ဌာနံ ရူပံ၊ ကဋတ္တာရူပံ၊ ဥပါဒါရူပံ. ဝတ္ထုံ ပစ္စယာ အာသဝဝိပ္ပယုတ္တာ ခန္ဓာ၊ ဝတ္ထုံ ပစ္စယာ ဒေါမနဿသဟဂတော မောဟော. (၁)

အာသဝဝိပ္ပယုတ္တံ ဓမ္မံ ပစ္စယာ အာသဝသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဝတ္ထုံ ပစ္စယာ အာသဝသမ္ပယုတ္တကာ ခန္ဓာ၊ ဒေါမနဿသဟဂတံ ဝိစိကိစ္ဆာသဟဂတံ ဥဒ္ဓစ္စသဟဂတံ မောဟံ ပစ္စယာ သမ္ပယုတ္တကာ ခန္ဓာ. (၂)

အာသဝဝိပ္ပယုတ္တံ ဓမ္မံ ပစ္စယာ အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ – ဝတ္ထုံ ပစ္စယာ အာသဝသမ္ပယုတ္တကာ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ၊ ဒေါမနဿသဟဂတံ ဝိစိကိစ္ဆာသဟဂတံ ဥဒ္ဓစ္စသဟဂတံ မောဟံ ပစ္စယာ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ၊ ဝတ္ထုံ ပစ္စယာ ဒေါမနဿသဟဂတာ ခန္ဓာ စ မောဟော စ. (၃)

၆၇. အာသဝသမ္ပယုတ္တဉ္စ အာသဝဝိပ္ပယုတ္တဉ္စ ဓမ္မံ ပစ္စယာ အာသဝသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – အာသဝသမ္ပယုတ္တံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ။ပေ။ ဒေါမနဿသဟဂတံ ဝိစိကိစ္ဆာသဟဂတံ ဥဒ္ဓစ္စသဟဂတံ ဧကံ ခန္ဓဉ္စ မောဟဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ။ပေ။. (၁)

အာသဝသမ္ပယုတ္တဉ္စ အာသဝဝိပ္ပယုတ္တဉ္စ ဓမ္မံ ပစ္စယာ အာသဝဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – အာသဝသမ္ပယုတ္တေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ ဒေါမနဿသဟဂတေ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ မောဟဉ္စ ပစ္စယာ စိတ္တသမုဋ္ဌာနံ ရူပံ၊ ဒေါမနဿသဟဂတေ ခန္ဓေ စ ဝတ္ထုဉ္စ ပစ္စယာ ဒေါမနဿသဟဂတော မောဟော. (၂)

အာသဝသမ္ပယုတ္တဉ္စ အာသဝဝိပ္ပယုတ္တဉ္စ ဓမ္မံ ပစ္စယာ အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ – အာသဝသမ္ပယုတ္တံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ။ပေ။ အာသဝသမ္ပယုတ္တေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ ဒေါမနဿသဟဂတံ ဝိစိကိစ္ဆာသဟဂတံ ဥဒ္ဓစ္စသဟဂတံ ဧကံ ခန္ဓဉ္စ မောဟဉ္စ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ဒေါမနဿသဟဂတံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ မောဟော စ။ပေ။ ဒွေ ခန္ဓေ။ပေ။. (၃)

အာရမ္မဏပစ္စယာဒိ

၆၈. အာသဝသမ္ပယုတ္တံ ဓမ္မံ ပစ္စယာ အာသဝသမ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ။ တီဏိ (ပဋိစ္စဝါရသဒိသာ).

အာသဝဝိပ္ပယုတ္တံ ဓမ္မံ ပစ္စယာ အာသဝဝိပ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ – အာသဝဝိပ္ပယုတ္တံ ဧကံ ခန္ဓံ ပစ္စယာ တယော ခန္ဓာ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ ဝတ္ထုံ ပစ္စယာ ခန္ဓာ၊ စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ပစ္စယာ ကာယဝိညာဏံ၊ ဝတ္ထုံ ပစ္စယာ အာသဝဝိပ္ပယုတ္တာ ခန္ဓာ၊ ဝတ္ထုံ ပစ္စယာ ဒေါမနဿသဟဂတော ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

အာသဝဝိပ္ပယုတ္တံ ဓမ္မံ ပစ္စယာ အာသဝသမ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ – ဝတ္ထုံ ပစ္စယာ အာသဝသမ္ပယုတ္တကာ ခန္ဓာ၊ ဒေါမနဿသဟဂတံ ဝိစိကိစ္ဆာသဟဂတံ ဥဒ္ဓစ္စသဟဂတံ မောဟံ ပစ္စယာ သမ္ပယုတ္တကာ ခန္ဓာ. (၂)

အာသဝဝိပ္ပယုတ္တံ ဓမ္မံ ပစ္စယာ အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ ဥပ္ပဇ္ဇန္တိ အာရမ္မဏပစ္စယာ – ဝတ္ထုံ ပစ္စယာ ဒေါမနဿသဟဂတာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ မောဟော စ. (၃)

၆၉. အာသဝသမ္ပယုတ္တဉ္စ အာသဝဝိပ္ပယုတ္တဉ္စ ဓမ္မံ ပစ္စယာ အာသဝသမ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ – အာသဝသမ္ပယုတ္တံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ။ပေ။. (၁)

အာသဝသမ္ပယုတ္တဉ္စ အာသဝဝိပ္ပယုတ္တဉ္စ ဓမ္မံ ပစ္စယာ အာသဝဝိပ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ – ဒေါမနဿသဟဂတေ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ ဝတ္ထုဉ္စ ပစ္စယာ ဒေါမနဿသဟဂတော ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၂)

အာသဝသမ္ပယုတ္တဉ္စ အာသဝဝိပ္ပယုတ္တဉ္စ ဓမ္မံ ပစ္စယာ အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ ဥပ္ပဇ္ဇန္တိ အာရမ္မဏပစ္စယာ – ဒေါမနဿသဟဂတံ ဝိစိကိစ္ဆာသဟဂတံ ဥဒ္ဓစ္စသဟဂတံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ မောဟော စ။ပေ။ ဒွေ ခန္ဓေ။ပေ။ အဓိပတိပစ္စယာ။ အနန္တရပစ္စယာ။ပေ။ အဝိဂတပစ္စယာ. (၃)