၁. ဝိဘင်္ဂဝါရော

ဟေတုပစ္စယော

၁. အာသဝံ ဓမ္မံ ပဋိစ္စ အာသဝေါ ဓမ္မော ဥပ္ပဇ္ဇတိ ဟေတုပစ္စယာ – ကာမာသဝံ ပဋိစ္စ ဒိဋ္ဌာသဝေါ အဝိဇ္ဇာသဝေါ၊ ဒိဋ္ဌာသဝံ ပဋိစ္စ ကာမာသဝေါ အဝိဇ္ဇာသဝေါ၊ အဝိဇ္ဇာသဝံ ပဋိစ္စ ကာမာသဝေါ ဒိဋ္ဌာသဝေါ၊ ဘဝါသဝံ ပဋိစ္စ အဝိဇ္ဇာသဝေါ၊ ဒိဋ္ဌာသဝံ ပဋိစ္စ အဝိဇ္ဇာသဝေါ (ဧကေကမ္ပိ စက္ကံ ကာတဗ္ဗံ). (၁)

အာသဝံ ဓမ္မံ ပဋိစ္စ နောအာသဝေါ ဓမ္မော ဥပ္ပဇ္ဇတိ ဟေတုပစ္စယာ – အာသဝံ ပဋိစ္စ အာသဝသမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ. (၂)

အာသဝံ ဓမ္မံ ပဋိစ္စ အာသဝေါ စ နောအာသဝေါ စ ဓမ္မာ ဥပ္ပဇ္ဇန္တိ ဟေတုပစ္စယာ – ကာမာသဝံ ပဋိစ္စ ဒိဋ္ဌာသဝေါ အဝိဇ္ဇာသဝေါ သမ္ပယုတ္တကာ စ ခန္ဓာ စိတ္တသမုဋ္ဌာနဉ္စ ရူပံ (စက္ကံ). (၃)

၂. နောအာသဝံ ဓမ္မံ ပဋိစ္စ နောအာသဝေါ ဓမ္မော ဥပ္ပဇ္ဇတိ ဟေတုပစ္စယာ – နောအာသဝံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနံ ရူပံ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဧကံ မဟာဘူတံ။ပေ။ မဟာဘူတေ ပဋိစ္စ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ. (၁)

နောအာသဝံ ဓမ္မံ ပဋိစ္စ အာသဝေါ ဓမ္မော ဥပ္ပဇ္ဇတိ ဟေတုပစ္စယာ – နောအာသဝေ ခန္ဓေ ပဋိစ္စ အာသဝါ. (၂)

နောအာသဝံ ဓမ္မံ ပဋိစ္စ အာသဝေါ စ နောအာသဝေါ စ ဓမ္မာ ဥပ္ပဇ္ဇန္တိ ဟေတုပစ္စယာ – နောအာသဝံ ဧကံ ခန္ဓံ ပဋိစ္စ တယော ခန္ဓာ အာသဝါ စ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။. (၃)

၃. အာသဝဉ္စ နောအာသဝဉ္စ ဓမ္မံ ပဋိစ္စ အာသဝေါ ဓမ္မော ဥပ္ပဇ္ဇတိ ဟေတုပစ္စယာ – ကာမာသဝဉ္စ သမ္ပယုတ္တကေ စ ခန္ဓေ ပဋိစ္စ ဒိဋ္ဌာသဝေါ အဝိဇ္ဇာသဝေါ (စက္ကံ ဗန္ဓိတဗ္ဗံ). (၁)

အာသဝဉ္စ နောအာသဝဉ္စ ဓမ္မံ ပဋိစ္စ နောအာသဝေါ ဓမ္မော ဥပ္ပဇ္ဇတိ ဟေတုပစ္စယာ – နောအာသဝံ ဧကံ ခန္ဓဉ္စ အာသဝေ စ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။. (၂)

အာသဝဉ္စ နောအာသဝဉ္စ ဓမ္မံ ပဋိစ္စ အာသဝေါ စ နောအာသဝေါ စ ဓမ္မာ ဥပ္ပဇ္ဇန္တိ ဟေတုပစ္စယာ – နောအာသဝံ ဧကံ ခန္ဓဉ္စ ကာမာသဝဉ္စ ပဋိစ္စ တယော ခန္ဓာ ဒိဋ္ဌာသဝေါ အဝိဇ္ဇာသဝေါ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ စ။ပေ။ (စက္ကံ. သံခိတ္တံ). (၃)