၁. ဝိဘင်္ဂဝါရော

ဟေတုပစ္စယော

၄၈. အာသဝသမ္ပယုတ္တံ ဓမ္မံ ပဋိစ္စ အာသဝသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – အာသဝသမ္ပယုတ္တံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။. (၁)

အာသဝသမ္ပယုတ္တံ ဓမ္မံ ပဋိစ္စ အာသဝဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – အာသဝသမ္ပယုတ္တေ ခန္ဓေ ပဋိစ္စ စိတ္တသမုဋ္ဌာနံ ရူပံ၊ ဒေါမနဿသဟဂတေ ခန္ဓေ ပဋိစ္စ မောဟော စိတ္တသမုဋ္ဌာနဉ္စ ရူပံ. (၂)

အာသဝသမ္ပယုတ္တံ ဓမ္မံ ပဋိစ္စ အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ – အာသဝသမ္ပယုတ္တံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ဒေါမနဿသဟဂတံ ဧကံ ခန္ဓံ ပဋိစ္စ တယော ခန္ဓာ မောဟော စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။. (၃)

၄၉. အာသဝဝိပ္ပယုတ္တံ ဓမ္မံ ပဋိစ္စ အာသဝဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – အာသဝဝိပ္ပယုတ္တံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ဒေါမနဿသဟဂတံ ဝိစိကိစ္ဆာသဟဂတံ ဥဒ္ဓစ္စသဟဂတံ မောဟံ ပဋိစ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဧကံ မဟာဘူတံ ပဋိစ္စ တယော မဟာဘူတာ၊ တယော မဟာဘူတေ ပဋိစ္စ ဧကံ မဟာဘူတံ၊ ဒွေ မဟာဘူတေ ပဋိစ္စ ဒွေ မဟာဘူတာ၊ မဟာဘူတေ ပဋိစ္စ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ. (၁)

အာသဝဝိပ္ပယုတ္တံ ဓမ္မံ ပဋိစ္စ အာသဝသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဒေါမနဿသဟဂတံ ဝိစိကိစ္ဆာသဟဂတံ ဥဒ္ဓစ္စသဟဂတံ မောဟံ ပဋိစ္စ သမ္ပယုတ္တကာ ခန္ဓာ. (၂)

အာသဝဝိပ္ပယုတ္တံ ဓမ္မံ ပဋိစ္စ အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ – ဒေါမနဿသဟဂတံ ဝိစိကိစ္ဆာသဟဂတံ ဥဒ္ဓစ္စသဟဂတံ မောဟံ ပဋိစ္စ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ. (၃)

၅၀. အာသဝသမ္ပယုတ္တဉ္စ အာသဝဝိပ္ပယုတ္တဉ္စ ဓမ္မံ ပဋိစ္စ အာသဝသမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – ဒေါမနဿသဟဂတံ ဝိစိကိစ္ဆာသဟဂတံ ဥဒ္ဓစ္စသဟဂတံ ဧကံ ခန္ဓဉ္စ မောဟဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။. (၁)

အာသဝသမ္ပယုတ္တဉ္စ အာသဝဝိပ္ပယုတ္တဉ္စ ဓမ္မံ ပဋိစ္စ အာသဝဝိပ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ – အာသဝသမ္ပယုတ္တေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ၊ ဒေါမနဿသဟဂတေ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ မောဟဉ္စ ပဋိစ္စ စိတ္တသမုဋ္ဌာနံ ရူပံ. (၂)

အာသဝသမ္ပယုတ္တဉ္စ အာသဝဝိပ္ပယုတ္တဉ္စ ဓမ္မံ ပဋိစ္စ အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ – ဒေါမနဿသဟဂတံ ဝိစိကိစ္ဆာသဟဂတံ ဥဒ္ဓစ္စသဟဂတံ ဧကံ ခန္ဓဉ္စ မောဟဉ္စ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ၊ ဒွေ ခန္ဓေ။ပေ။. (၃)

အာရမ္မဏပစ္စယော

၅၁. အာသဝသမ္ပယုတ္တံ ဓမ္မံ ပဋိစ္စ အာသဝသမ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ – အာသဝသမ္ပယုတ္တံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။. (၁)

အာသဝသမ္ပယုတ္တံ ဓမ္မံ ပဋိစ္စ အာသဝဝိပ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ – ဒေါမနဿသဟဂတေ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ မောဟော. (၂)

အာသဝသမ္ပယုတ္တံ ဓမ္မံ ပဋိစ္စ အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ ဥပ္ပဇ္ဇန္တိ အာရမ္မဏပစ္စယာ – ဒေါမနဿသဟဂတံ ဝိစိကိစ္ဆာသဟဂတံ ဥဒ္ဓစ္စသဟဂတံ ဧကံ ခန္ဓံ ပဋိစ္စ တယော ခန္ဓာ မောဟော စ။ပေ။ ဒွေ ခန္ဓေ။ပေ။. (၃)

၅၂. အာသဝဝိပ္ပယုတ္တံ ဓမ္မံ ပဋိစ္စ အာသဝဝိပ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ – အာသဝဝိပ္ပယုတ္တံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ ဝတ္ထုံ ပဋိစ္စ ခန္ဓာ. (၁) အာသဝဝိပ္ပယုတ္တံ ဓမ္မံ ပဋိစ္စ အာသဝသမ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ – ဒေါမနဿသဟဂတံ ဝိစိကိစ္ဆာသဟဂတံ ဥဒ္ဓစ္စသဟဂတံ မောဟံ ပဋိစ္စ သမ္ပယုတ္တကာ ခန္ဓာ. (၂)

အာသဝသမ္ပယုတ္တဉ္စ အာသဝဝိပ္ပယုတ္တဉ္စ ဓမ္မံ ပဋိစ္စ အာသဝသမ္ပယုတ္တော ဓမ္မော ဥပ္ပဇ္ဇတိ အာရမ္မဏပစ္စယာ – ဒေါမနဿသဟဂတံ ဝိစိကိစ္ဆာသဟဂတံ ဥဒ္ဓစ္စသဟဂတံ ဧကံ ခန္ဓဉ္စ မောဟဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။. (၁)

အဓိပတိပစ္စယော

၅၃. အာသဝသမ္ပယုတ္တံ ဓမ္မံ ပဋိစ္စ အာသဝသမ္ပယုတ္တော ဓမ္မော ဥပ္ပဇ္ဇတိ အဓိပတိပစ္စယာ။ တီဏိ.

အာသဝဝိပ္ပယုတ္တံ ဓမ္မံ ပဋိစ္စ အာသဝဝိပ္ပယုတ္တော ဓမ္မော ဥပ္ပဇ္ဇတိ အဓိပတိပစ္စယာ – အာသဝဝိပ္ပယုတ္တံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ဒေါမနဿသဟဂတံ မောဟံ ပဋိစ္စ စိတ္တသမုဋ္ဌာနံ ရူပံ၊ ဧကံ မဟာဘူတံ။ပေ။ မဟာဘူတေ ပဋိစ္စ စိတ္တသမုဋ္ဌာနံ ရူပံ ဥပါဒါရူပံ. (၁)

အာသဝဝိပ္ပယုတ္တံ ဓမ္မံ ပဋိစ္စ အာသဝသမ္ပယုတ္တော ဓမ္မော ဥပ္ပဇ္ဇတိ အဓိပတိပစ္စယာ – ဒေါမနဿသဟဂတံ မောဟံ ပဋိစ္စ သမ္ပယုတ္တကာ ခန္ဓာ. (၂)

အာသဝဝိပ္ပယုတ္တံ ဓမ္မံ ပဋိစ္စ အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ ဥပ္ပဇ္ဇန္တိ အဓိပတိပစ္စယာ – ဒေါမနဿသဟဂတံ မောဟံ ပဋိစ္စ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ. (၃)

၅၄. အာသဝသမ္ပယုတ္တဉ္စ အာသဝဝိပ္ပယုတ္တဉ္စ ဓမ္မံ ပဋိစ္စ အာသဝသမ္ပယုတ္တော ဓမ္မော ဥပ္ပဇ္ဇတိ အဓိပတိပစ္စယာ – ဒေါမနဿသဟဂတံ ဧကံ ခန္ဓဉ္စ မောဟဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။. (၁)

အာသဝသမ္ပယုတ္တဉ္စ အာသဝဝိပ္ပယုတ္တဉ္စ ဓမ္မံ ပဋိစ္စ အာသဝဝိပ္ပယုတ္တော ဓမ္မော ဥပ္ပဇ္ဇတိ အဓိပတိပစ္စယာ – အာသဝသမ္ပယုတ္တေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ၊ ဒေါမနဿသဟဂတေ ခန္ဓေ စ မောဟဉ္စ ပဋိစ္စ စိတ္တသမုဋ္ဌာနံ ရူပံ. (၂)

အာသဝသမ္ပယုတ္တဉ္စ အာသဝဝိပ္ပယုတ္တဉ္စ ဓမ္မံ ပဋိစ္စ အာသဝသမ္ပယုတ္တော စ အာသဝဝိပ္ပယုတ္တော စ ဓမ္မာ ဥပ္ပဇ္ဇန္တိ အဓိပတိပစ္စယာ – ဒေါမနဿသဟဂတံ ဧကံ ခန္ဓဉ္စ မောဟဉ္စ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။. (၃)

(ဧဝံ သဗ္ဗေ ပစ္စယာ ဝိတ္ထာရေတဗ္ဗာ. သံခိတ္တံ.)