၁. ဝိဘင်္ဂဝါရော

ဟေတုပစ္စယော

၁၀. အာသဝံ ဓမ္မံ ပစ္စယာ အာသဝေါ ဓမ္မော ဥပ္ပဇ္ဇတိ ဟေတုပစ္စယာ (အာသဝမူလကံ တီဏိ၊ ပဋိစ္စသဒိသာ).

နောအာသဝံ ဓမ္မံ ပစ္စယာ နောအာသဝေါ ဓမ္မော ဥပ္ပဇ္ဇတိ ဟေတုပစ္စယာ – နောအာသဝံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ ခန္ဓေ ပစ္စယာ ဝတ္ထု၊ ဝတ္ထုံ ပစ္စယာ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ၊ ဝတ္ထုံ ပစ္စယာ နောအာသဝါ ခန္ဓာ. (၁)

နောအာသဝံ ဓမ္မံ ပစ္စယာ အာသဝေါ ဓမ္မော ဥပ္ပဇ္ဇတိ ဟေတုပစ္စယာ – နောအာသဝေ ခန္ဓေ ပစ္စယာ အာသဝါ၊ ဝတ္ထုံ ပစ္စယာ အာသဝါ. (၂)

နောအာသဝံ ဓမ္မံ ပစ္စယာ အာသဝေါ စ နောအာသဝေါ စ ဓမ္မာ ဥပ္ပဇ္ဇန္တိ ဟေတုပစ္စယာ – နောအာသဝံ ဧကံ ခန္ဓံ ပစ္စယာ တယော ခန္ဓာ အာသဝါ စ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ဝတ္ထုံ ပစ္စယာ အာသဝါ သမ္ပယုတ္တကာ စ ခန္ဓာ. (၃)

၁၁. အာသဝဉ္စ နောအာသဝဉ္စ ဓမ္မံ ပစ္စယာ အာသဝေါ ဓမ္မော ဥပ္ပဇ္ဇတိ ဟေတုပစ္စယာ – ကာမာသဝဉ္စ သမ္ပယုတ္တကေ စ ခန္ဓေ ပစ္စယာ ဒိဋ္ဌာသဝေါ အဝိဇ္ဇာသဝေါ (စက္ကံ). ကာမာသဝဉ္စ ဝတ္ထုဉ္စ ပစ္စယာ ဒိဋ္ဌာသဝေါ အဝိဇ္ဇာသဝေါ (စက္ကံ). (၁)

အာသဝဉ္စ နောအာသဝဉ္စ ဓမ္မံ ပစ္စယာ နောအာသဝေါ ဓမ္မော ဥပ္ပဇ္ဇတိ ဟေတုပစ္စယာ – နောအာသဝံ ဧကံ ခန္ဓဉ္စ အာသဝေ စ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ အာသဝဉ္စ ဝတ္ထုဉ္စ ပစ္စယာ နောအာသဝါ ခန္ဓာ. (၂)

အာသဝဉ္စ နောအာသဝဉ္စ ဓမ္မံ ပစ္စယာ အာသဝေါ စ နောအာသဝေါ စ ဓမ္မာ ဥပ္ပဇ္ဇန္တိ ဟေတုပစ္စယာ – နောအာသဝံ ဧကံ ခန္ဓဉ္စ ကာမာသဝဉ္စ ပစ္စယာ တယော ခန္ဓာ ဒိဋ္ဌာသဝေါ အဝိဇ္ဇာသဝေါ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ (စက္ကံ). ကာမာသဝဉ္စ ဝတ္ထုဉ္စ ပစ္စယာ ဒိဋ္ဌာသဝေါ အဝိဇ္ဇာသဝေါ သမ္ပယုတ္တကာ စ ခန္ဓာ (စက္ကံ. သံခိတ္တံ). (၃)