၁. ဝိဘင်္ဂဝါရော

ဟေတုပစ္စယော

၁၀၁. ရူပိံ ဓမ္မံ ပစ္စယာ ရူပီ ဓမ္မော ဥပ္ပဇ္ဇတိ ဟေတုပစ္စယာ – ဧကံ မဟာဘူတံ။ပေ။ (ပဋိစ္စသဒိသံ). (၁)

ရူပိံ ဓမ္မံ ပစ္စယာ အရူပီ ဓမ္မော ဥပ္ပဇ္ဇတိ ဟေတုပစ္စယာ – ဝတ္ထုံ ပစ္စယာ အရူပိနော ခန္ဓာ၊ ပဋိသန္ဓိက္ခဏေ။ပေ။. (၂)

ရူပိံ ဓမ္မံ ပစ္စယာ ရူပီ စ အရူပီ စ ဓမ္မာ ဥပ္ပဇ္ဇန္တိ ဟေတုပစ္စယာ – ဝတ္ထုံ ပစ္စယာ အရူပိနော ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။ (ဧဝံ အဝသေသာ ပဉှာ၊ ပဝတ္တိပဋိသန္ဓိ ဝိဘဇိတဗ္ဗာ). (၃)

အာရမ္မဏပစ္စယော

၁၀၂. ရူပိံ ဓမ္မံ ပစ္စယာ အရူပီ ဓမ္မော ဥပ္ပဇ္ဇတိ အာရမ္မဏပစ္စယာ – စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ပစ္စယာ ကာယဝိညာဏံ၊ ဝတ္ထုံ ပစ္စယာ အရူပိနော ခန္ဓာ၊ ပဋိသန္ဓိက္ခဏေ။ပေ။. (၁)

အရူပိံ ဓမ္မံ ပစ္စယာ အရူပီ ဓမ္မော ဥပ္ပဇ္ဇတိ အာရမ္မဏပစ္စယာ – အရူပိံ ဧကံ ခန္ဓံ။ပေ။ ဒွေ ခန္ဓေ။ပေ။. (၂)

ရူပိဉ္စ အရူပိဉ္စ ဓမ္မံ ပစ္စယာ အရူပီ ဓမ္မော ဥပ္ပဇ္ဇတိ အာရမ္မဏပစ္စယာ – စက္ခုဝိညာဏသဟဂတံ ဧကံ ခန္ဓဉ္စ စက္ခာယတနဉ္စ ပစ္စယာ တယော ခန္ဓာ။ပေ။ ဒွေ ခန္ဓေ ။ပေ။ ကာယဝိညာဏသဟဂတံ။ပေ။ အရူပိံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ။ပေ။ (သံခိတ္တံ). (၃)