၁. ဝိဘင်္ဂဝါရော

ဟေတုပစ္စယော

၈. သပ္ပစ္စယော ဓမ္မော သပ္ပစ္စယဿ ဓမ္မဿ ဟေတုပစ္စယေန ပစ္စယော – သပ္ပစ္စယာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။.

အာရမ္မဏပစ္စယော

၉. သပ္ပစ္စယော ဓမ္မော သပ္ပစ္စယဿ ဓမ္မဿ အာရမ္မဏပစ္စယေန ပစ္စယော – ဒါနံ ဒတွာ၊ သီလံ သမာဒိယိတွာ၊ ဥပေါသထကမ္မံ ကတွာ တံ ပစ္စဝေက္ခတိ၊ ပုဗ္ဗေ သုစိဏ္ဏာနိ။ပေ။ ဈာနာ ဝုဋ္ဌဟိတွာ။ပေ။ အရိယာ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခန္တိ၊ ဖလံ ပစ္စဝေက္ခန္တိ၊ ပဟီနေ ကိလေသေ။ပေ။ ဝိက္ခမ္ဘိတေ ကိလေသေ။ပေ။ ပုဗ္ဗေ သမုဒါစိဏ္ဏေ ကိလေသေ ဇာနန္တိ၊ စက္ခုံ။ပေ။ ဝတ္ထုံ။ သပ္ပစ္စယေ ခန္ဓေ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. စေတောပရိယဉာဏေန သပ္ပစ္စယစိတ္တသမင်္ဂိဿ စိတ္တံ ဇာနာတိ၊ အာကာသာနဉ္စာယတနံ ဝိညာဏဉ္စာယတနဿ။ပေ။ အာကိဉ္စညာယတနံ နေဝသညာနာသညာယတနဿ။ပေ။ ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ။ပေ။ သပ္ပစ္စယာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၁)

အပ္ပစ္စယော ဓမ္မော သပ္ပစ္စယဿ ဓမ္မဿ အာရမ္မဏပစ္စယေန ပစ္စယော – အရိယာ နိဗ္ဗာနံ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ၊ အာဝဇ္ဇနာယ အာရမ္မဏပစ္စယေန ပစ္စယော. (၁)

အဓိပတိပစ္စယော

၁၀. သပ္ပစ္စယော ဓမ္မော သပ္ပစ္စယဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဒါနံ ဒတွာ သီလံ။ပေ။ ဥပေါသထကမ္မံ ကတွာ တံ ဂရုံ ကတွာ ပစ္စဝေက္ခတိ၊ ပုဗ္ဗေ။ပေ။ ဈာနာ။ပေ။ အရိယာ မဂ္ဂါ ဝုဋ္ဌဟိတွာ မဂ္ဂံ ဂရုံ ကတွာ ပစ္စဝေက္ခန္တိ၊ ဖလံ ဂရုံ ကတွာ။ပေ။ စက္ခုံ။ပေ။ ဝတ္ထုံ။ သပ္ပစ္စယေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. သဟဇာတာဓိပတိ – သပ္ပစ္စယာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၁)

အပ္ပစ္စယော ဓမ္မော သပ္ပစ္စယဿ ဓမ္မဿ အဓိပတိပစ္စယေန ပစ္စယော. အာရမ္မဏာဓိပတိ – အရိယာ နိဗ္ဗာနံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ အဓိပတိပစ္စယေန ပစ္စယော. (၁)

အနန္တရပစ္စယာဒိ

၁၁. သပ္ပစ္စယော ဓမ္မော သပ္ပစ္စယဿ ဓမ္မဿ အနန္တရပစ္စယေန ပစ္စယော။ပေ။ ဥပနိဿယပစ္စယေန ပစ္စယော။ပေ။ (ဒွေ ပဉှာ ဥပနိဿယမူလံ) ပုရေဇာတပစ္စယေန ပစ္စယော။ပေ။ အဝိဂတပစ္စယေန ပစ္စယော (သဗ္ဗတ္ထ ဧကာယေဝ ပဉှာ).