၁. ဝိဘင်္ဂဝါရော

ဟေတုပစ္စယော

၉၃. ရူပိံ ဓမ္မံ ပဋိစ္စ ရူပီ ဓမ္မော ဥပ္ပဇ္ဇတိ ဟေတုပစ္စယာ – ဧကံ မဟာဘူတံ ပဋိစ္စ တယော မဟာဘူတာ။ပေ။ ဒွေ မဟာဘူတေ။ပေ။ မဟာဘူတေ ပဋိစ္စ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ. (၁)

ရူပိံ ဓမ္မံ ပဋိစ္စ အရူပီ ဓမ္မော ဥပ္ပဇ္ဇတိ ဟေတုပစ္စယာ – ပဋိသန္ဓိက္ခဏေ ဝတ္ထုံ ပဋိစ္စ အရူပိနော ခန္ဓာ. (၂)

ရူပိံ ဓမ္မံ ပဋိစ္စ ရူပီ စ အရူပီ စ ဓမ္မာ ဥပ္ပဇ္ဇန္တိ ဟေတုပစ္စယာ – ပဋိသန္ဓိက္ခဏေ ဝတ္ထုံ ပဋိစ္စ အရူပိနော ခန္ဓာ၊ မဟာဘူတေ ပဋိစ္စ ကဋတ္တာရူပံ. (၃)

၉၄. အရူပိံ ဓမ္မံ ပဋိစ္စ အရူပီ ဓမ္မော ဥပ္ပဇ္ဇတိ ဟေတုပစ္စယာ – အရူပိံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. (၁)

အရူပိံ ဓမ္မံ ပဋိစ္စ ရူပီ ဓမ္မော ဥပ္ပဇ္ဇတိ ဟေတုပစ္စယာ – အရူပိနော ခန္ဓေ ပဋိစ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။. (၂)

အရူပိံ ဓမ္မံ ပဋိစ္စ ရူပီ စ အရူပီ စ ဓမ္မာ ဥပ္ပဇ္ဇန္တိ ဟေတုပစ္စယာ – အရူပိံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. (၃)

၉၅. ရူပိဉ္စ အရူပိဉ္စ ဓမ္မံ ပဋိစ္စ ရူပီ ဓမ္မော ဥပ္ပဇ္ဇတိ ဟေတုပစ္စယာ – အရူပိနော ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။. (၁)

ရူပိဉ္စ အရူပိဉ္စ ဓမ္မံ ပဋိစ္စ အရူပီ ဓမ္မော ဥပ္ပဇ္ဇတိ ဟေတုပစ္စယာ – ပဋိသန္ဓိက္ခဏေ အရူပိံ ဧကံ ခန္ဓဉ္စ ဝတ္ထုဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။. (၂)

ရူပိဉ္စ အရူပိဉ္စ ဓမ္မံ ပဋိစ္စ ရူပီ စ အရူပီ စ ဓမ္မာ ဥပ္ပဇ္ဇန္တိ ဟေတုပစ္စယာ – ပဋိသန္ဓိက္ခဏေ အရူပိံ ဧကံ ခန္ဓဉ္စ ဝတ္ထုဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ အရူပိနော ခန္ဓေ စ မဟာဘူတေ စ ပဋိစ္စ ကဋတ္တာရူပံ (သံခိတ္တံ). (၃)