၁. ဝိဘင်္ဂဝါရော

ဟေတုပစ္စယော

၆၅. သပ္ပဋိဃံ ဓမ္မံ ပစ္စယာ သပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အပ္ပဋိဃံ ဓမ္မံ ပစ္စယာ အပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ – အပ္ပဋိဃံ ဧကံ ခန္ဓံ ပစ္စယာ တယော ခန္ဓာ အပ္ပဋိဃံ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ ။ပေ။ အာပေါဓာတုံ ပစ္စယာ အပ္ပဋိဃံ စိတ္တသမုဋ္ဌာနံ ရူပံ၊ ကဋတ္တာရူပံ၊ ဥပါဒါရူပံ၊ အာပေါဓာတုံ ပစ္စယာ ဣတ္ထိန္ဒြိယံ။ပေ။ ကဗဠီကာရော အာဟာရော၊ ဝတ္ထုံ ပစ္စယာ အပ္ပဋိဃာ ခန္ဓာ. (၁)

(အဝသေသာ ပဉ္စ ပဉှာ ပဋိစ္စဝါရသဒိသာ.)

အာရမ္မဏပစ္စယာဒိ

၆၆. သပ္ပဋိဃံ ဓမ္မံ ပစ္စယာ အပ္ပဋိဃော ဓမ္မော ဥပ္ပဇ္ဇတိ အာရမ္မဏပစ္စယာ – စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ပစ္စယာ ကာယဝိညာဏံ. (၁)

အပ္ပဋိဃံ ဓမ္မံ ပစ္စယာ အပ္ပဋိဃော ဓမ္မော ဥပ္ပဇ္ဇတိ အာရမ္မဏပစ္စယာ – အပ္ပဋိဃံ ဧကံ ခန္ဓံ ပစ္စယာ တယော ခန္ဓာ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ ဝတ္ထုံ ပစ္စယာ အပ္ပဋိဃာ ခန္ဓာ. (၁)

သပ္ပဋိဃဉ္စ အပ္ပဋိဃဉ္စ ဓမ္မံ ပစ္စယာ အပ္ပဋိဃော ဓမ္မော ဥပ္ပဇ္ဇတိ အာရမ္မဏပစ္စယာ – စက္ခုဝိညာဏသဟဂတံ ဧကံ ခန္ဓဉ္စ စက္ခာယတနဉ္စ ပစ္စယာ တယော ခန္ဓာ။ပေ။ ကာယဝိညာဏသဟဂတံ ဧကံ ခန္ဓဉ္စ ကာယာယတနဉ္စ ပစ္စယာ တယော ခန္ဓာ။ပေ။ အဓိပတိပစ္စယာ။ (သံခိတ္တံ) အဝိဂတပစ္စယာ.