၁. ဝိဘင်္ဂဝါရော

နဟေတုပစ္စယော

၆၀. သပ္ပဋိဃံ ဓမ္မံ ပဋိစ္စ သပ္ပဋိဃော ဓမ္မော ဥပ္ပဇ္ဇတိ နဟေတုပစ္စယာ။ တီဏိ.

အပ္ပဋိဃံ ဓမ္မံ ပဋိစ္စ အပ္ပဋိဃော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ အပ္ပဋိဃံ ဧကံ ခန္ဓံ ပဋိစ္စ တယော ခန္ဓာ အပ္ပဋိဃံ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ အဟေတုကပဋိသန္ဓိက္ခဏေ။ပေ။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ အာပေါဓာတုံ ပဋိစ္စ အပ္ပဋိဃံ စိတ္တသမုဋ္ဌာနံ ရူပံ၊ ကဋတ္တာရူပံ၊ ဥပါဒါရူပံ၊ အာပေါဓာတုံ ပဋိစ္စ ဣတ္ထိန္ဒြိယံ။ပေ။ ကဗဠီကာရော အာဟာရော။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ။ အာပေါဓာတုံ ပဋိစ္စ အပ္ပဋိဃံ ကဋတ္တာရူပံ ဥပါဒါရူပံ၊ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

(အပ္ပဋိဃမူလကံ ဣတရေပိ ဒွေ ပဉှာ ကာတဗ္ဗာ. ဃဋနေပိ တီဏိ ပဉှာ ကာတဗ္ဗာ. အဇ္ဈတ္တိကာ ဗာဟိရာ မဟာဘူတာ သဗ္ဗေ ဇာနိတွာ ကာတဗ္ဗာ.)

နအာရမ္မဏပစ္စယာဒိ

၆၁. သပ္ပဋိဃံ ဓမ္မံ ပဋိစ္စ သပ္ပဋိဃော ဓမ္မော ဥပ္ပဇ္ဇတိ နအာရမ္မဏပစ္စယာ (သဗ္ဗံ သံခိတ္တံ)။ နောဝိဂတပစ္စယာ.