၁. ဝိဘင်္ဂဝါရော

ဟေတုပစ္စယော

၅၃. သပ္ပဋိဃံ ဓမ္မံ ပဋိစ္စ သပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ – သပ္ပဋိဃံ ဧကံ မဟာဘူတံ ပဋိစ္စ ဒွေ မဟာဘူတာ၊ ဒွေ မဟာဘူတေ ပဋိစ္စ ဧကံ မဟာဘူတံ၊ သပ္ပဋိဃေ မဟာဘူတေ ပဋိစ္စ သပ္ပဋိဃံ စိတ္တသမုဋ္ဌာနံ ရူပံ၊ ကဋတ္တာရူပံ၊ ဥပါဒါရူပံ၊ ဖောဋ္ဌဗ္ဗာယတနံ ပဋိစ္စ စက္ခာယတနံ။ပေ။ ရသာယတနံ. (၁)

သပ္ပဋိဃံ ဓမ္မံ ပဋိစ္စ အပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ – သပ္ပဋိဃေ မဟာဘူတေ ပဋိစ္စ အာပေါဓာတု၊ သပ္ပဋိဃေ မဟာဘူတေ ပဋိစ္စ အပ္ပဋိဃံ စိတ္တသမုဋ္ဌာနံ ရူပံ၊ ကဋတ္တာရူပံ၊ ဥပါဒါရူပံ၊ ဖောဋ္ဌဗ္ဗာယတနံ ပဋိစ္စ အာပေါဓာတု ဣတ္ထိန္ဒြိယံ။ပေ။ ကဗဠီကာရော အာဟာရော. (၂)

သပ္ပဋိဃံ ဓမ္မံ ပဋိစ္စ သပ္ပဋိဃော စ အပ္ပဋိဃော စ ဓမ္မာ ဥပ္ပဇ္ဇန္တိ ဟေတုပစ္စယာ – သပ္ပဋိဃံ ဧကံ မဟာဘူတံ ပဋိစ္စ ဒွေ မဟာဘူတာ အာပေါဓာတု စ၊ ဒွေ မဟာဘူတေ။ပေ။ သပ္ပဋိဃေ မဟာဘူတေ ပဋိစ္စ သပ္ပဋိဃဉ္စ အပ္ပဋိဃဉ္စ စိတ္တသမုဋ္ဌာနံ ရူပံ၊ ကဋတ္တာရူပံ၊ ဥပါဒါရူပံ၊ ဖောဋ္ဌဗ္ဗာယတနံ ပဋိစ္စ စက္ခာယတနံ။ပေ။ ရသာယတနံ အာပေါဓာတု ဣတ္ထိန္ဒြိယံ။ပေ။ ကဗဠီကာရော အာဟာရော. (၃)

၅၄. အပ္ပဋိဃံ ဓမ္မံ ပဋိစ္စ အပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ – အပ္ပဋိဃံ ဧကံ ခန္ဓံ ပဋိစ္စ တယော ခန္ဓာ အပ္ပဋိဃံ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ အာပေါဓာတုံ ပဋိစ္စ အပ္ပဋိဃံ စိတ္တသမုဋ္ဌာနံ ရူပံ၊ ကဋတ္တာရူပံ၊ ဥပါဒါရူပံ၊ အာပေါဓာတုံ ပဋိစ္စ ဣတ္ထိန္ဒြိယံ။ပေ။ ကဗဠီကာရော အာဟာရော. (၁)

အပ္ပဋိဃံ ဓမ္မံ ပဋိစ္စ သပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ – အပ္ပဋိဃေ ခန္ဓေ ပဋိစ္စ သပ္ပဋိဃံ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။ အာပေါဓာတုံ ပဋိစ္စ သပ္ပဋိဃာ မဟာဘူတာ၊ အာပေါဓာတုံ ပဋိစ္စ သပ္ပဋိဃံ စိတ္တသမုဋ္ဌာနံ ရူပံ၊ ကဋတ္တာရူပံ၊ ဥပါဒါရူပံ၊ အာပေါဓာတုံ ပဋိစ္စ စက္ခာယတနံ။ပေ။ ဖောဋ္ဌဗ္ဗာယတနံ. (၂)

အပ္ပဋိဃံ ဓမ္မံ ပဋိစ္စ သပ္ပဋိဃော စ အပ္ပဋိဃော စ ဓမ္မာ ဥပ္ပဇ္ဇန္တိ ဟေတုပစ္စယာ – အပ္ပဋိဃံ ဧကံ ခန္ဓံ ပဋိစ္စ တယော ခန္ဓာ သပ္ပဋိဃဉ္စ အပ္ပဋိဃဉ္စ စိတ္တသမုဋ္ဌာနံ ရူပံ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ အာပေါဓာတုံ ပဋိစ္စ သပ္ပဋိဃဉ္စ အပ္ပဋိဃဉ္စ စိတ္တသမုဋ္ဌာနံ ရူပံ၊ ကဋတ္တာရူပံ၊ ဥပါဒါရူပံ၊ အာပေါဓာတုံ ပဋိစ္စ စက္ခာယတနံ။ပေ။ ဖောဋ္ဌဗ္ဗာယတနံ၊ ဣတ္ထိန္ဒြိယံ။ပေ။ ကဗဠီကာရော အာဟာရော. (၃)

၅၅. သပ္ပဋိဃဉ္စ အပ္ပဋိဃဉ္စ ဓမ္မံ ပဋိစ္စ သပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ – အပ္ပဋိဃေ ခန္ဓေ စ မဟာဘူတေ စ ပဋိစ္စ သပ္ပဋိဃံ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။ သပ္ပဋိဃံ ဧကံ မဟာဘူတဉ္စ အာပေါဓာတုဉ္စ ပဋိစ္စ ဒွေ မဟာဘူတာ။ပေ။ သပ္ပဋိဃေ မဟာဘူတေ စ အာပေါဓာတုဉ္စ ပဋိစ္စ သပ္ပဋိဃံ စိတ္တသမုဋ္ဌာနံ ရူပံ၊ ကဋတ္တာရူပံ၊ ဥပါဒါရူပံ၊ ဖောဋ္ဌဗ္ဗာယတနဉ္စ အာပေါဓာတုဉ္စ ပဋိစ္စ စက္ခာယတနံ။ပေ။. (၁)

သပ္ပဋိဃဉ္စ အပ္ပဋိဃဉ္စ ဓမ္မံ ပဋိစ္စ အပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ – အပ္ပဋိဃေ ခန္ဓေ စ မဟာဘူတေ စ ပဋိစ္စ အပ္ပဋိဃံ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ အပ္ပဋိဃေ ခန္ဓေ စ မဟာဘူတေ စ ပဋိစ္စ အပ္ပဋိဃံ ကဋတ္တာရူပံ၊ ဖောဋ္ဌဗ္ဗာယတနဉ္စ အာပေါဓာတုဉ္စ ပဋိစ္စ အပ္ပဋိဃံ စိတ္တသမုဋ္ဌာနံ ရူပံ၊ ကဋတ္တာရူပံ၊ ဥပါဒါရူပံ၊ ဖောဋ္ဌဗ္ဗာယတနဉ္စ အာပေါဓာတုဉ္စ ပဋိစ္စ ဣတ္ထိန္ဒြိယံ။ပေ။ ကဗဠီကာရော အာဟာရော. (၂)

သပ္ပဋိဃဉ္စ အပ္ပဋိဃဉ္စ ဓမ္မံ ပဋိစ္စ သပ္ပဋိဃော စ အပ္ပဋိဃော စ ဓမ္မာ ဥပ္ပဇ္ဇန္တိ ဟေတုပစ္စယာ – အပ္ပဋိဃေ ခန္ဓေ စ မဟာဘူတေ စ ပဋိစ္စ သပ္ပဋိဃဉ္စ အပ္ပဋိဃဉ္စ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။ အပ္ပဋိဃေ ခန္ဓေ စ မဟာဘူတေ စ ပဋိစ္စ သပ္ပဋိဃဉ္စ အပ္ပဋိဃဉ္စ ကဋတ္တာရူပံ၊ ဖောဋ္ဌဗ္ဗာယတနဉ္စ အာပေါဓာတုဉ္စ ပဋိစ္စ သပ္ပဋိဃဉ္စ အပ္ပဋိဃဉ္စ စိတ္တသမုဋ္ဌာနံ ရူပံ၊ ကဋတ္တာရူပံ၊ ဥပါဒါရူပံ၊ ဖောဋ္ဌဗ္ဗာယတနဉ္စ အာပေါဓာတုဉ္စ ပဋိစ္စ စက္ခာယတနံ။ပေ။ ရသာယတနံ၊ ဣတ္ထိန္ဒြိယံ။ပေ။ ကဗဠီကာရော အာဟာရော. (၃)

အာရမ္မဏပစ္စယော

၅၆. အပ္ပဋိဃံ ဓမ္မံ ပဋိစ္စ အပ္ပဋိဃော ဓမ္မော ဥပ္ပဇ္ဇတိ အာရမ္မဏပစ္စယာ – အပ္ပဋိဃံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ ဝတ္ထုံ ပဋိစ္စ ခန္ဓာ.

အဓိပတိပစ္စယာဒိ

၅၇. သပ္ပဋိဃံ ဓမ္မံ ပဋိစ္စ အပ္ပဋိဃော ဓမ္မော ဥပ္ပဇ္ဇတိ အဓိပတိပစ္စယာ (ပဋိသန္ဓိ ဝဇ္ဇေတဗ္ဗာ၊ ကဋတ္တာရူပါ စ)။ အနန္တရပစ္စယာ။ သမနန္တရပစ္စယာ။ သဟဇာတပစ္စယာ (သဗ္ဗေ မဟာဘူတာ ကာတဗ္ဗာ)။ အညမညပစ္စယာ – သပ္ပဋိဃံ ဧကံ မဟာဘူတံ ပဋိစ္စ ဒွေ မဟာဘူတာ၊ ဒွေ မဟာဘူတေ။ပေ။. (၁)

သပ္ပဋိဃံ ဓမ္မံ ပဋိစ္စ အပ္ပဋိဃော ဓမ္မော ဥပ္ပဇ္ဇတိ အညမညပစ္စယာ – သပ္ပဋိဃေ မဟာဘူတေ ပဋိစ္စ အာပေါဓာတု။ပေ။. (၂)

သပ္ပဋိဃံ ဓမ္မံ ပဋိစ္စ သပ္ပဋိဃော စ အပ္ပဋိဃော စ ဓမ္မာ ဥပ္ပဇ္ဇန္တိ အညမညပစ္စယာ – သပ္ပဋိဃံ ဧကံ မဟာဘူတံ ပဋိစ္စ ဒွေ မဟာဘူတာ အာပေါဓာတု စ၊ ဒွေ မဟာဘူတေ။ပေ။. (၃)

၅၈. အပ္ပဋိဃံ ဓမ္မံ ပဋိစ္စ အပ္ပဋိဃော ဓမ္မော ဥပ္ပဇ္ဇတိ အညမညပစ္စယာ – အပ္ပဋိဃံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ. (၁)

အပ္ပဋိဃံ ဓမ္မံ ပဋိစ္စ သပ္ပဋိဃော ဓမ္မော ဥပ္ပဇ္ဇတိ အညမညပစ္စယာ – အာပေါဓာတုံ ပဋိစ္စ သပ္ပဋိဃာ မဟာဘူတာ (ဣမေ အဇ္ဈတ္တိကဗာဟိရာ မဟာဘူတာ ကာတဗ္ဗာ). (၂)

သပ္ပဋိဃဉ္စ အပ္ပဋိဃဉ္စ ဓမ္မံ ပဋိစ္စ သပ္ပဋိဃော ဓမ္မော ဥပ္ပဇ္ဇတိ အညမညပစ္စယာ – သပ္ပဋိဃံ ဧကံ မဟာဘူတဉ္စ အာပေါဓာတုဉ္စ ပဋိစ္စ ဒွေ မဟာဘူတာ။ပေ။ နိဿယပစ္စယာ။ပေ။ အဝိဂတပစ္စယာ.