၁. ဝိဘင်္ဂဝါရော

ဟေတုပစ္စယော

၃၄. အနိဒဿနော ဓမ္မော အနိဒဿနဿ ဓမ္မဿ ဟေတုပစ္စယေန ပစ္စယော – အနိဒဿနာ ဟေတူ သမ္ပယုတ္တကာနံ ခန္ဓာနံ အနိဒဿနာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၁)

အနိဒဿနော ဓမ္မော သနိဒဿနဿ ဓမ္မဿ ဟေတုပစ္စယေန ပစ္စယော – အနိဒဿနာ ဟေတူ သနိဒဿနာနံ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၂)

အနိဒဿနော ဓမ္မော သနိဒဿနဿ စ အနိဒဿနဿ စ ဓမ္မဿ ဟေတုပစ္စယေန ပစ္စယော – အနိဒဿနာ ဟေတူ သမ္ပယုတ္တကာနံ ခန္ဓာနံ သနိဒဿနာနဉ္စ အနိဒဿနာနဉ္စ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၃)

အာရမ္မဏပစ္စယော

၃၅. သနိဒဿနော ဓမ္မော အနိဒဿနဿ ဓမ္မဿ အာရမ္မဏပစ္စယေန ပစ္စယော – သနိဒဿနံ ရူပံ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ရူပါယတနံ စက္ခုဝိညာဏဿ အာရမ္မဏပစ္စယေန ပစ္စယော၊ သနိဒဿနာ ခန္ဓာ ဣဒ္ဓိဝိဓဉာဏဿ၊ ပုဗ္ဗေနိဝါသာနုဿတိဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၁)

အနိဒဿနော ဓမ္မော အနိဒဿနဿ ဓမ္မဿ အာရမ္မဏပစ္စယေန ပစ္စယော – ဒါနံ ဒတွာ သီလံ။ပေ။ ဥပေါသထကမ္မံ ကတွာ တံ ပစ္စဝေက္ခတိ၊ ပုဗ္ဗေ သုစိဏ္ဏာနိ ပစ္စဝေက္ခတိ၊ ဈာနာ ဝုဋ္ဌဟိတွာ။ပေ။ အရိယာ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခန္တိ၊ ဖလံ ပစ္စဝေက္ခန္တိ၊ နိဗ္ဗာနံ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ၊ အာဝဇ္ဇနာယ အာရမ္မဏပစ္စယေန ပစ္စယော၊ အရိယာ ပဟီနေ ကိလေသေ ပစ္စဝေက္ခန္တိ၊ ဝိက္ခမ္ဘိတေ ကိလေသေ။ပေ။ ပုဗ္ဗေ။ပေ။ စက္ခုံ။ပေ။ ကာယံ။ သဒ္ဒေ။ပေ။ ဝတ္ထုံ အနိဒဿနေ ခန္ဓေ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗာယ သောတဓာတုယာ သဒ္ဒံ သုဏာတိ၊ စေတောပရိယဉာဏေန အနိဒဿနစိတ္တသမင်္ဂိဿ စိတ္တံ ဇာနာတိ၊ အာကာသာနဉ္စာယတနံ ဝိညာဏဉ္စာယတနဿ။ပေ။ အာကိဉ္စညာယတနံ နေဝသညာနာသညာယတနဿ။ပေ။ သဒ္ဒါယတနံ သောတဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ။ပေ။ အနိဒဿနာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၁)

အဓိပတိပစ္စယော

၃၆. သနိဒဿနော ဓမ္မော အနိဒဿနဿ ဓမ္မဿ အဓိပတိပစ္စယေန ပစ္စယော. အာရမ္မဏာဓိပတိ – သနိဒဿနံ ရူပံ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. (၁)

အနိဒဿနော ဓမ္မော အနိဒဿနဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဒါနံ ဒတွာ သီလံ။ပေ။ ဥပေါသထကမ္မံ ကတွာ တံ ဂရုံ ကတွာ ပစ္စဝေက္ခတိ၊ ပုဗ္ဗေ သုစိဏ္ဏာနိ။ပေ။ ဈာနာ ဝုဋ္ဌဟိတွာ။ပေ။ အရိယာ မဂ္ဂါ ဝုဋ္ဌဟိတွာ မဂ္ဂံ ဂရုံ ကတွာ ပစ္စဝေက္ခန္တိ၊ ဖလံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ အဓိပတိပစ္စယေန ပစ္စယော၊ စက္ခုံ။ပေ။ ဝတ္ထုံ အနိဒဿနေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. သဟဇာတာဓိပတိ – အနိဒဿနာဓိပတိ သမ္ပယုတ္တကာနံ ခန္ဓာနံ အနိဒဿနာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၁)

အနိဒဿနော ဓမ္မော သနိဒဿနဿ ဓမ္မဿ အဓိပတိပစ္စယေန ပစ္စယော. သဟဇာတာဓိပတိ – အနိဒဿနာဓိပတိ သနိဒဿနာနံ စိတ္တသမုဋ္ဌာနာနံ ရူပါနံ အဓိပတိပစ္စယေန ပစ္စယော. (၂)

အနိဒဿနော ဓမ္မော သနိဒဿနဿ စ အနိဒဿနဿ စ ဓမ္မဿ အဓိပတိပစ္စယေန ပစ္စယော. သဟဇာတာဓိပတိ – အနိဒဿနာဓိပတိ သမ္ပယုတ္တကာနံ ခန္ဓာနံ သနိဒဿနာနဉ္စ အနိဒဿနာနဉ္စ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၃)

အနန္တရပစ္စယော

၃၇. အနိဒဿနော ဓမ္မော အနိဒဿနဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ အနိဒဿနာ ခန္ဓာ ပစ္ဆိမာနံ ပစ္ဆိမာနံ အနိဒဿနာနံ ခန္ဓာနံ အနန္တရပစ္စယေန ပစ္စယော၊ အနုလောမံ ဂေါတြဘုဿ။ပေ။ ဂေါတြဘု မဂ္ဂဿ။ပေ။ နေဝသညာနာသညာယတနံ ဖလသမာပတ္တိယာ အနန္တရပစ္စယေန ပစ္စယော. (၁)

သမနန္တရပစ္စယာဒိ

၃၈. အနိဒဿနော ဓမ္မော အနိဒဿနဿ ဓမ္မဿ သမနန္တရပစ္စယေန ပစ္စယော။ သဟဇာတပစ္စယေန ပစ္စယော။ တီဏိ။ အညမညပစ္စယေန ပစ္စယော။ ဧကံ။ နိဿယပစ္စယေန ပစ္စယော။ တီဏိ.

ဥပနိဿယပစ္စယော

၃၉. သနိဒဿနော ဓမ္မော အနိဒဿနဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ ပကတူပနိဿယော။ပေ။. ပကတူပနိဿယော – ဝဏ္ဏသမ္ပဒံ ပတ္ထယမာနော ဒါနံ။ပေ။ သီလံ။ပေ။ ဥပေါသထကမ္မံ ကရောတိ၊ ဝဏ္ဏသမ္ပဒါ သဒ္ဓါယ။ပေ။ ပတ္ထနာယ။ ကာယိကဿ သုခဿ၊ ကာယိကဿ ဒုက္ခဿ၊ မဂ္ဂဿ၊ ဖလသမာပတ္တိယာ ဥပနိဿယပစ္စယေန ပစ္စယော. (၁)

အနိဒဿနော ဓမ္မော အနိဒဿနဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – သဒ္ဓံ ဥပနိဿာယ ဒါနံ ဒေတိ။ပေ။ သမာပတ္တိံ ဥပ္ပါဒေတိ၊ မာနံ ဇပ္ပေတိ၊ ဒိဋ္ဌိံ ဂဏှာတိ၊ သီလံ။ပေ။ သေနာသနံ ဥပနိဿာယ ဒါနံ ဒေတိ။ပေ။ သံဃံ ဘိန္ဒတိ၊ သဒ္ဓါ။ပေ။ သေနာသနံ သဒ္ဓါယ။ပေ။ ဖလသမာပတ္တိယာ ဥပနိဿယပစ္စယေန ပစ္စယော. (၁)

ပုရေဇာတပစ္စယော

၄၀. သနိဒဿနော ဓမ္မော အနိဒဿနဿ ဓမ္မဿ ပုရေဇာတပစ္စယေန ပစ္စယော – သနိဒဿနံ ရူပံ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ရူပါယတနံ စက္ခုဝိညာဏဿ ပုရေဇာတပစ္စယေန ပစ္စယော. (၁)

အနိဒဿနော ဓမ္မော အနိဒဿနဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ဝတ္ထုံ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗာယ သောတဓာတုယာ သဒ္ဒံ သုဏာတိ၊ သဒ္ဒါယတနံ သောတဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ ပုရေဇာတပစ္စယေန ပစ္စယော. ဝတ္ထုပုရေဇာတံ – စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ။ပေ။ ဝတ္ထု အနိဒဿနာနံ ခန္ဓာနံ ပုရေဇာတပစ္စယေန ပစ္စယော. (၁)

သနိဒဿနော စ အနိဒဿနော စ ဓမ္မာ အနိဒဿနဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. ရူပါယတနဉ္စ ဝတ္ထု စ အနိဒဿနာနံ ခန္ဓာနံ ပုရေဇာတပစ္စယေန ပစ္စယော၊ ရူပါယတနဉ္စ စက္ခာယတနဉ္စ စက္ခုဝိညာဏဿ ပုရေဇာတပစ္စယေန ပစ္စယော. (၁)

ပစ္ဆာဇာတပစ္စယော

၄၁. အနိဒဿနော ဓမ္မော အနိဒဿနဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ အနိဒဿနာ ခန္ဓာ ပုရေဇာတဿ ဣမဿ အနိဒဿနဿ ကာယဿ ပစ္ဆာဇာတပစ္စယေန ပစ္စယော. (၁)

အနိဒဿနော ဓမ္မော သနိဒဿနဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ အနိဒဿနာ ခန္ဓာ ပုရေဇာတဿ ဣမဿ သနိဒဿနဿ ကာယဿ ပစ္ဆာဇာတပစ္စယေန ပစ္စယော. (၂)

အနိဒဿနော ဓမ္မော သနိဒဿနဿ စ အနိဒဿနဿ စ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ အနိဒဿနာ ခန္ဓာ ပုရေဇာတဿ ဣမဿ သနိဒဿနဿ စ အနိဒဿနဿ စ ကာယဿ ပစ္ဆာဇာတပစ္စယေန ပစ္စယော. (၃)

အာသေဝနပစ္စယော

၄၂. အနိဒဿနော ဓမ္မော အနိဒဿနဿ ဓမ္မဿ အာသေဝနပစ္စယေန ပစ္စယော – ပုရိမာ ပုရိမာ အနိဒဿနာ ခန္ဓာ ပစ္ဆိမာနံ ပစ္ဆိမာနံ အနိဒဿနာနံ ခန္ဓာနံ။ပေ။ အနုလောမံ ဂေါတြဘုဿ။ အနုလောမံ ဝေါဒါနဿ။ ဂေါတြဘု မဂ္ဂဿ။ ဝေါဒါနံ မဂ္ဂဿ အာသေဝနပစ္စယေန ပစ္စယော. (၁)

ကမ္မပစ္စယော

၄၃. အနိဒဿနော ဓမ္မော အနိဒဿနဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – အနိဒဿနာ စေတနာ သမ္ပယုတ္တကာနံ ခန္ဓာနံ အနိဒဿနာနဉ္စ စိတ္တသမုဋ္ဌာနာနံ ရူပါနံ ကမ္မပစ္စယေန ပစ္စယော၊ ပဋိသန္ဓိက္ခဏေ။ပေ။. နာနာက္ခဏိကာ – အနိဒဿနာ စေတနာ ဝိပါကာနံ ခန္ဓာနံ အနိဒဿနာနဉ္စ ကဋတ္တာရူပါနံ ကမ္မပစ္စယေန ပစ္စယော. (၁)

အနိဒဿနော ဓမ္မော သနိဒဿနဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ (ဝိတ္ထာရေတဗ္ဗံ). (၂)

အနိဒဿနော ဓမ္မော သနိဒဿနဿ စ အနိဒဿနဿ စ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ (ဝိတ္ထာရေတဗ္ဗံ). (၃)

ဝိပါကပစ္စယာဒိ

၄၄. အနိဒဿနော ဓမ္မော အနိဒဿနဿ ဓမ္မဿ ဝိပါကပစ္စယေန ပစ္စယော။ တီဏိ။ အာဟာရပစ္စယေန ပစ္စယော။ တီဏိ (တီသုပိ ကဗဠီကာရော အာဟာရော ကာတဗ္ဗော)။ ဣန္ဒြိယပစ္စယေန ပစ္စယော။ တီဏိ (တီသုပိ ရူပဇီဝိတိန္ဒြိယံ)။ ဈာနပစ္စယေန ပစ္စယော။ တီဏိ။ မဂ္ဂပစ္စယေန ပစ္စယော။ တီဏိ။ သမ္ပယုတ္တပစ္စယေန ပစ္စယော။ ဧကံ.

ဝိပ္ပယုတ္တပစ္စယော

၄၅. အနိဒဿနော ဓမ္မော အနိဒဿနဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ. သဟဇာတာ – အနိဒဿနာ ခန္ဓာ အနိဒဿနာနံ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော၊ ပဋိသန္ဓိက္ခဏေ အနိဒဿနာ ခန္ဓာ အနိဒဿနာနံ ကဋတ္တာရူပါနံ ဝိပ္ပယုတ္တပစ္စယေန ပစ္စယော၊ ခန္ဓာ ဝတ္ထုဿ ဝိပ္ပယုတ္တပစ္စယေန ပစ္စယော၊ ဝတ္ထု ခန္ဓာနံ ဝိပ္ပယုတ္တပစ္စယေန ပစ္စယော. ပုရေဇာတံ – စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ။ပေ။ ဝတ္ထု အနိဒဿနာနံ ခန္ဓာနံ ဝိပ္ပယုတ္တပစ္စယေန ပစ္စယော. ပစ္ဆာဇာတာ – အနိဒဿနာ ခန္ဓာ ပုရေဇာတဿ ဣမဿ အနိဒဿနဿ ကာယဿ ဝိပ္ပယုတ္တပစ္စယေန ပစ္စယော. (၁)

အနိဒဿနော ဓမ္မော သနိဒဿနဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ. သဟဇာတာ – အနိဒဿနာ ခန္ဓာ သနိဒဿနာနံ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော၊ ပဋိသန္ဓိက္ခဏေ။ပေ။. ပစ္ဆာဇာတာ – အနိဒဿနာ ခန္ဓာ ပုရေဇာတဿ ဣမဿ သနိဒဿနဿ ကာယဿ ဝိပ္ပယုတ္တပစ္စယေန ပစ္စယော. (၂)

အနိဒဿနော ဓမ္မော သနိဒဿနဿ စ အနိဒဿနဿ စ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ. သဟဇာတာ – အနိဒဿနာ ခန္ဓာ သနိဒဿနာနဉ္စ အနိဒဿနာနဉ္စ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော၊ ပဋိသန္ဓိက္ခဏေ။ပေ။. ပစ္ဆာဇာတာ – အနိဒဿနာ ခန္ဓာ ပုရေဇာတဿ ဣမဿ သနိဒဿနဿ စ အနိဒဿနဿ စ ကာယဿ ဝိပ္ပယုတ္တပစ္စယေန ပစ္စယော. (၃)

အတ္ထိပစ္စယာဒိ

၄၆. သနိဒဿနော ဓမ္မော အနိဒဿနဿ ဓမ္မဿ အတ္ထိပစ္စယေန ပစ္စယော – သနိဒဿနံ ရူပံ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ရူပါယတနံ စက္ခုဝိညာဏဿ အတ္ထိပစ္စယေန ပစ္စယော. (၁)

အနိဒဿနော ဓမ္မော အနိဒဿနဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. သဟဇာတော – အနိဒဿနော ဧကော ခန္ဓော တိဏ္ဏန္နံ ခန္ဓာနံ အနိဒဿနာနဉ္စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော။ပေ။ ဒွေ ခန္ဓေ။ပေ။ (သံခိတ္တံ. ယာဝ အသညသတ္တာ). ပုရေဇာတံ – စက္ခုံ။ပေ။ ဝတ္ထုံ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗာယ သောတဓာတုယာ သဒ္ဒံ သုဏာတိ၊ သဒ္ဒါယတနံ သောတဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ။ပေ။ စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ။ပေ။ ဝတ္ထု အနိဒဿနာနံ ခန္ဓာနံ အတ္ထိပစ္စယေန ပစ္စယော. ပစ္ဆာဇာတာ – အနိဒဿနာ ခန္ဓာ ပုရေဇာတဿ ဣမဿ အနိဒဿနဿ ကာယဿ အတ္ထိပစ္စယေန ပစ္စယော၊ ကဗဠီကာရော အာဟာရော ဣမဿ အနိဒဿနဿ ကာယဿ အတ္ထိပစ္စယေန ပစ္စယော၊ ရူပဇီဝိတိန္ဒြိယံ အနိဒဿနာနံ ကဋတ္တာရူပါနံ အတ္ထိပစ္စယေန ပစ္စယော. (၁)

အနိဒဿနော ဓမ္မော သနိဒဿနဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. သဟဇာတာ – အနိဒဿနာ ခန္ဓာ သနိဒဿနာနံ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော၊ ပဋိသန္ဓိက္ခဏေ။ပေ။ မဟာဘူတာ သနိဒဿနာနံ စိတ္တသမုဋ္ဌာနာနံ ရူပါနံ ကဋတ္တာရူပါနံ ဥပါဒါရူပါနံ အတ္ထိပစ္စယေန ပစ္စယော။ပေ။ ဗာဟိရာ။ အာဟာရသမုဋ္ဌာနာ။ ဥတုသမုဋ္ဌာနာ။ အသညသတ္တာနံ မဟာဘူတာ သနိဒဿနာနံ ကဋတ္တာရူပါနံ၊ ဥပါဒါရူပါနံ အတ္ထိပစ္စယေန ပစ္စယော. ပစ္ဆာဇာတာ – အနိဒဿနာ ခန္ဓာ ပုရေဇာတဿ ဣမဿ သနိဒဿနဿ ကာယဿ အတ္ထိပစ္စယေန ပစ္စယော၊ ကဗဠီကာရော အာဟာရော ဣမဿ သနိဒဿနဿ ကာယဿ အတ္ထိပစ္စယေန ပစ္စယော၊ ရူပဇီဝိတိန္ဒြိယံ သနိဒဿနာနံ ကဋတ္တာရူပါနံ အတ္ထိပစ္စယေန ပစ္စယော. (၂)

အနိဒဿနော ဓမ္မော သနိဒဿနဿ စ အနိဒဿနဿ စ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. သဟဇာတော – အနိဒဿနော ဧကော ခန္ဓော တိဏ္ဏန္နံ ခန္ဓာနံ သနိဒဿနာနဉ္စ အနိဒဿနာနဉ္စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော။ပေ။ ဒွေ ခန္ဓာ။ပေ။ ပဋိသန္ဓိက္ခဏေ။ပေ။ မဟာဘူတာ သနိဒဿနာနဉ္စ အနိဒဿနာနဉ္စ စိတ္တသမုဋ္ဌာနာနံ ရူပါနံ၊ ကဋတ္တာရူပါနံ၊ ဥပါဒါရူပါနံ အတ္ထိပစ္စယေန ပစ္စယော၊ ဗာဟိရာ။ အာဟာရသမုဋ္ဌာနာ။ ဥတုသမုဋ္ဌာနာ။ အသညသတ္တာနံ မဟာဘူတာ သနိဒဿနာနဉ္စ အနိဒဿနာနဉ္စ ကဋတ္တာရူပါနံ ဥပါဒါရူပါနံ အတ္ထိပစ္စယေန ပစ္စယော. (၃)

၄၇. သနိဒဿနော စ အနိဒဿနော စ ဓမ္မာ အနိဒဿနဿ ဓမ္မဿ အတ္ထိပစ္စယေန ပစ္စယော. ပုရေဇာတံ – ရူပါယတနဉ္စ ဝတ္ထု စ အနိဒဿနာနံ ခန္ဓာနံ အတ္ထိပစ္စယေန ပစ္စယော၊ ရူပါယတနဉ္စ စက္ခာယတနဉ္စ စက္ခုဝိညာဏဿ အတ္ထိပစ္စယေန ပစ္စယော.

နတ္ထိပစ္စယေန ပစ္စယော။ ဝိဂတပစ္စယေန ပစ္စယော။ အဝိဂတပစ္စယေန ပစ္စယော.