၁-၄. ပစ္စယာနုလောမာဒိ

၁. သပ္ပစ္စယံ ဓမ္မံ ပဋိစ္စ သပ္ပစ္စယော ဓမ္မော ဥပ္ပဇ္ဇတိ ဟေတုပစ္စယာ – သပ္ပစ္စယံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဧကံ မဟာဘူတံ။ပေ။ မဟာဘူတေ ပဋိစ္စ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ.

သပ္ပစ္စယံ ဓမ္မံ ပဋိစ္စ သပ္ပစ္စယော ဓမ္မော ဥပ္ပဇ္ဇတိ အာရမ္မဏပစ္စယာ။ပေ။ အဝိဂတပစ္စယာ.

၂. ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ.

အနုလောမံ.

၃. သပ္ပစ္စယံ ဓမ္မံ ပဋိစ္စ သပ္ပစ္စယော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ သပ္ပစ္စယံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ၊ ဒွေ ခန္ဓေ။ပေ။ အဟေတုကပဋိသန္ဓိက္ခဏေ ။ပေ။ (ယာဝ အသညသတ္တာ) ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော (သံခိတ္တံ).

၄. နဟေတုယာ ဧကံ၊ နအာရမ္မဏေ ဧကံ၊ နအဓိပတိယာ ဧကံ။ပေ။ နောဝိဂတေ ဧကံ.

ပစ္စနီယံ.

၅. ဟေတုပစ္စယာ နအာရမ္မဏေ ဧကံ၊ နအဓိပတိယာ ဧကံ။ပေ။ နောဝိဂတေ ဧကံ.

အနုလောမပစ္စနီယံ.

၆. နဟေတုပစ္စယာ အာရမ္မဏေ ဧကံ အနန္တရေ ဧကံ။ပေ။ အဝိဂတေ ဧကံ.

ပစ္စနီယာနုလောမံ.