၁. ဝိဘင်္ဂဝါရော

ဟေတုပစ္စယော

၁၄၀. လောကိယံ ဓမ္မံ ပစ္စယာ လောကိယော ဓမ္မော ဥပ္ပဇ္ဇတိ ဟေတုပစ္စယာ – လောကိယံ ဧကံ ခန္ဓံ ပစ္စယာ။ပေ။ ဧကံ မဟာဘူတံ။ပေ။ မဟာဘူတေ ပစ္စယာ စိတ္တသမုဋ္ဌာနံ ရူပံ၊ ကဋတ္တာရူပံ၊ ဥပါဒါရူပံ၊ ဝတ္ထုံ ပစ္စယာ လောကိယာ ခန္ဓာ. (၁)

လောကိယံ ဓမ္မံ ပစ္စယာ လောကုတ္တရော ဓမ္မော ဥပ္ပဇ္ဇတိ ဟေတုပစ္စယာ – ဝတ္ထုံ ပစ္စယာ လောကုတ္တရာ ခန္ဓာ. (၂)

လောကိယံ ဓမ္မံ ပစ္စယာ လောကိယော စ လောကုတ္တရော စ ဓမ္မာ ဥပ္ပဇ္ဇန္တိ ဟေတုပစ္စယာ – ဝတ္ထုံ ပစ္စယာ လောကုတ္တရာ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ. (၃)

၁၄၁. လောကုတ္တရံ ဓမ္မံ ပစ္စယာ လောကုတ္တရော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

လောကိယဉ္စ လောကုတ္တရဉ္စ ဓမ္မံ ပစ္စယာ လောကိယော ဓမ္မော ဥပ္ပဇ္ဇတိ ဟေတုပစ္စယာ – လောကုတ္တရေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ. (၁)

လောကိယဉ္စ လောကုတ္တရဉ္စ ဓမ္မံ ပစ္စယာ လောကုတ္တရော ဓမ္မော ဥပ္ပဇ္ဇတိ ဟေတုပစ္စယာ – လောကုတ္တရံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ။ပေ။. (၂)

လောကိယဉ္စ လောကုတ္တရဉ္စ ဓမ္မံ ပစ္စယာ လောကိယော စ လောကုတ္တရော စ ဓမ္မာ ဥပ္ပဇ္ဇန္တိ ဟေတုပစ္စယာ – လောကုတ္တရံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ။ပေ။ လောကုတ္တရေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ (သံခိတ္တံ). (၃)