၁. ဝိဘင်္ဂဝါရော

ဟေတုပစ္စယော

၁၃၃. လောကိယံ ဓမ္မံ ပဋိစ္စ လောကိယော ဓမ္မော ဥပ္ပဇ္ဇတိ ဟေတုပစ္စယာ – လောကိယံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဧကံ မဟာဘူတံ။ပေ။ မဟာဘူတေ ပဋိစ္စ စိတ္တသမုဋ္ဌာနံ ရူပံ၊ ကဋတ္တာရူပံ၊ ဥပါဒါရူပံ. (၁)

၁၃၄. လောကုတ္တရံ ဓမ္မံ ပဋိစ္စ လောကုတ္တရော ဓမ္မော ဥပ္ပဇ္ဇတိ ဟေတုပစ္စယာ – လောကုတ္တရံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။. (၁)

လောကုတ္တရံ ဓမ္မံ ပဋိစ္စ လောကိယော ဓမ္မော ဥပ္ပဇ္ဇတိ ဟေတုပစ္စယာ – လောကုတ္တရေ ခန္ဓေ ပဋိစ္စ စိတ္တသမုဋ္ဌာနံ ရူပံ. (၂)

လောကုတ္တရံ ဓမ္မံ ပဋိစ္စ လောကိယော စ လောကုတ္တရော စ ဓမ္မာ ဥပ္ပဇ္ဇန္တိ ဟေတုပစ္စယာ – လောကုတ္တရံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။. (၃)

လောကိယဉ္စ လောကုတ္တရဉ္စ ဓမ္မံ ပဋိစ္စ လောကိယော ဓမ္မော ဥပ္ပဇ္ဇတိ ဟေတုပစ္စယာ – လောကုတ္တရေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ (သံခိတ္တံ). (၁)