၂. သင်္ချာဝါရော

သုဒ္ဓံ

၁၂၈. ဟေတုယာ တီဏိ၊ အာရမ္မဏေ ဒွေ၊ အဓိပတိယာ စတ္တာရိ၊ အနန္တရေ ဧကံ၊ သမနန္တရေ ဧကံ၊ သဟဇာတေ သတ္တ၊ အညမညေ ဆ၊ နိဿယေ သတ္တ၊ ဥပနိဿယေ ဒွေ၊ ပုရေဇာတေ ဧကံ၊ ပစ္ဆာဇာတေ ဧကံ အာသေဝနေ ဧကံ၊ ကမ္မေ တီဏိ၊ ဝိပါကေ တီဏိ၊ အာဟာရေ စတ္တာရိ၊ ဣန္ဒြိယေ ဆ၊ ဈာနေ တီဏိ၊ မဂ္ဂေ တီဏိ၊ သမ္ပယုတ္တေ ဧကံ၊ ဝိပ္ပယုတ္တေ ဒွေ၊ အတ္ထိယာ သတ္တ၊ နတ္ထိယာ ဧကံ၊ ဝိဂတေ ဧကံ၊ အဝိဂတေ သတ္တ.

အနုလောမံ.

ပစ္စနီယုဒ္ဓါရော

၁၂၉. ရူပီ ဓမ္မော ရူပိဿ ဓမ္မဿ သဟဇာတပစ္စယေန ပစ္စယော။ အာဟာရပစ္စယေန ပစ္စယော။ ဣန္ဒြိယပစ္စယေန ပစ္စယော. (၁)

ရူပီ ဓမ္မော အရူပိဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ပုရေဇာတပစ္စယေန ပစ္စယော. (၂)

အရူပီ ဓမ္မော အရူပိဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ကမ္မပစ္စယေန ပစ္စယော. (၁)

အရူပီ ဓမ္မော ရူပိဿ ဓမ္မဿ သဟဇာတပစ္စယေန ပစ္စယော။ ပစ္ဆာဇာတပစ္စယေန ပစ္စယော။ ကမ္မပစ္စယေန ပစ္စယော. (၂)

အရူပီ ဓမ္မော ရူပိဿ စ အရူပိဿ စ ဓမ္မဿ သဟဇာတပစ္စယေန ပစ္စယော။ ကမ္မပစ္စယေန ပစ္စယော. (၃)

ရူပီ စ အရူပီ စ ဓမ္မာ ရူပိဿ ဓမ္မဿ သဟဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. (၁)

ရူပီ စ အရူပီ စ ဓမ္မာ အရူပိဿ ဓမ္မဿ သဟဇာတံ၊ ပုရေဇာတံ. (၂)