၁. ဝိဘင်္ဂဝါရော

ဟေတုပစ္စယော

၉၈. ဥပါဒါနော စေဝ ဥပါဒါနိယော စ ဓမ္မော ဥပါဒါနဿ စေဝ ဥပါဒါနိယဿ စ ဓမ္မဿ ဟေတုပစ္စယေန ပစ္စယော – ဥပါဒါနာ စေဝ ဥပါဒါနိယာ စ ဟေတူ သမ္ပယုတ္တကာနံ ဥပါဒါနာနံ ဟေတုပစ္စယေန ပစ္စယော. (၁)

ဥပါဒါနော စေဝ ဥပါဒါနိယော စ ဓမ္မော ဥပါဒါနိယဿ စေဝ နော စ ဥပါဒါနဿ ဓမ္မဿ ဟေတုပစ္စယေန ပစ္စယော – ဥပါဒါနာ စေဝ ဥပါဒါနိယာ စ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော (ဥပါဒါနဒုကသဒိသာ နိန္နာနာ၊ နဝ ပဉှာ).

အာရမ္မဏပစ္စယော

၉၉. ဥပါဒါနော စေဝ ဥပါဒါနိယော စ ဓမ္မော ဥပါဒါနဿ စေဝ ဥပါဒါနိယဿ စ ဓမ္မဿ အာရမ္မဏပစ္စယေန ပစ္စယော – ဥပါဒါနေ အာရဗ္ဘ ဥပါဒါနာ ဥပ္ပဇ္ဇန္တိ။ တီဏိ.

ဥပါဒါနိယော စေဝ နော စ ဥပါဒါနော ဓမ္မော ဥပါဒါနိယဿ စေဝ နော စ ဥပါဒါနဿ ဓမ္မဿ အာရမ္မဏပစ္စယေန ပစ္စယော – ဒါနံ။ပေ။ ဈာနာ ဝုဋ္ဌဟိတွာ ဈာနံ ပစ္စဝေက္ခတိ၊ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဝိစိကိစ္ဆာ ဥဒ္ဓစ္စံ ဒေါမနဿံ ဥပ္ပဇ္ဇတိ၊ အရိယာ ဂေါတြဘုံ ပစ္စဝေက္ခန္တိ၊ ဝေါဒါနံ ပစ္စဝေက္ခန္တိ၊ ပဟီနေ ကိလေသေ။ပေ။ ဝိက္ခမ္ဘိတေ ကိလေသေ။ပေ။ ပုဗ္ဗေ သမုဒါစိဏ္ဏေ။ပေ။ စက္ခုံ။ပေ။ ဝတ္ထုံ။ပေ။ (သံခိတ္တံ) အနာဂတံသဉာဏဿ အာဝဇ္ဇနာယ အာရမ္မဏပစ္စယေန ပစ္စယော. (၁)

ဥပါဒါနိယော စေဝ နော စ ဥပါဒါနော ဓမ္မော ဥပါဒါနဿ စေဝ ဥပါဒါနိယဿ စ ဓမ္မဿ အာရမ္မဏပစ္စယေန ပစ္စယော (သံခိတ္တံ၊ ဣတရေ ဒွေ ဥပါဒါနဒုကသဒိသာ). (၃)

ဥပါဒါနော စေဝ ဥပါဒါနိယော စ ဥပါဒါနိယော စေဝ နော စ ဥပါဒါနော စ ဓမ္မာ ဥပါဒါနဿ စေဝ ဥပါဒါနိယဿ စ ဓမ္မဿ အာရမ္မဏပစ္စယေန ပစ္စယော။ တီဏိ (ဟေဋ္ဌာ အဓိပတိ တီဏိ၊ ဥပါဒါနဒုကသဒိသာ).

အဓိပတိပစ္စယော

၁၀၀. ဥပါဒါနိယော စေဝ နော စ ဥပါဒါနော ဓမ္မော ဥပါဒါနိယဿ စေဝ နော စ ဥပါဒါနဿ စ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဒါနံ။ပေ။ ဈာနာ ဝုဋ္ဌဟိတွာ ဈာနံ ဂရုံ ကတွာ ပစ္စဝေက္ခတိ၊ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ သေက္ခာ ဂေါတြဘုံ ဂရုံ ကတွာ။ပေ။ ဝေါဒါနံ။ပေ။ စက္ခုံ။ပေ။ ဝတ္ထုံ ဥပါဒါနိယေ စေဝ နော စ ဥပါဒါနေ ခန္ဓေ ဂရုံ ကတွာ ဥပါဒါနိယာ စေဝ နော စ ဥပါဒါနာ ခန္ဓာ ဥပ္ပဇ္ဇန္တိ. သဟဇာတာဓိပတိ – ဥပါဒါနိယာ စေဝ နော စ ဥပါဒါနာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော (အဝသေသာ ဒွေပိ အာရမ္မဏာဓိပတိ သဟဇာတာဓိပတိပိ ဥပါဒါနဒုကသဒိသာ). (၃)

(ဃဋနာ အဓိပတိ တီဏိ၊ ဥပါဒါနဒုကသဒိသာ. သဗ္ဗေ ပစ္စယာ ဥပါဒါနဒုကသဒိသာ. ဥပါဒါနိယေ လောကုတ္တရံ နတ္ထိ၊ ပစ္စနီယမ္ပိ ဣတရေ ဒွေ ဂဏနာပိ ဥပါဒါနဒုကသဒိသံ.)

ဥပါဒါနဥပါဒါနိယဒုကံ နိဋ္ဌိတံ.