၂. သင်္ချာဝါရော

သုဒ္ဓံ

၁၅၁. ဟေတုယာ တီဏိ၊ အာရမ္မဏေ နဝ၊ အဓိပတိယာ နဝ၊ အနန္တရေ နဝ၊ သမနန္တရေ နဝ၊ သဟဇာတေ နဝ၊ အညမညေ နဝ၊ နိဿယေ နဝ၊ ဥပနိဿယေ နဝ၊ အာသေဝနေ နဝ၊ ကမ္မေ တီဏိ၊ ဝိပါကေ နဝ၊ အာဟာရေ တီဏိ၊ ဣန္ဒြိယေ နဝ၊ ဈာနေ တီဏိ၊ မဂ္ဂေ နဝ၊ သမ္ပယုတ္တေ နဝ၊ အတ္ထိယာ နဝ၊ နတ္ထိယာ နဝ၊ ဝိဂတေ နဝ၊ အဝိဂတေ နဝ (ဧဝံ ဂဏေတဗ္ဗံ).

အနုလောမံ.

ပစ္စနီယုဒ္ဓါရော

၁၅၂. ဟေတု စေဝ သဟေတုကော စ ဓမ္မော ဟေတုဿ စေဝ သဟေတုကဿ စ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော. (၁)

ဟေတု စေဝ သဟေတုကော စ ဓမ္မော သဟေတုကဿ စေဝ န စ ဟေတုဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော. (၂)

ဟေတု စေဝ သဟေတုကော စ ဓမ္မော ဟေတုဿ စေဝ သဟေတုကဿ စ သဟေတုကဿ စေဝ န စ ဟေတုဿ စ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော. (၃)

၁၅၃. သဟေတုကော စေဝ န စ ဟေတု ဓမ္မော သဟေတုကဿ စေဝ န စ ဟေတုဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ကမ္မပစ္စယေန ပစ္စယော. (၁)

သဟေတုကော စေဝ န စ ဟေတု ဓမ္မော ဟေတုဿ စေဝ သဟေတုကဿ စ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ကမ္မပစ္စယေန ပစ္စယော. (၂)

သဟေတုကော စေဝ န စ ဟေတု ဓမ္မော ဟေတုဿ စေဝ သဟေတုကဿ စ သဟေတုကဿ စေဝ န စ ဟေတုဿ စ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ကမ္မပစ္စယေန ပစ္စယော. (၃)

၁၅၄. ဟေတု စေဝ သဟေတုကော စ သဟေတုကော စေဝ န စ ဟေတု စ ဓမ္မာ ဟေတုဿ စေဝ သဟေတုကဿ စ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော. (၁)

ဟေတု စေဝ သဟေတုကော စ သဟေတုကော စေဝ န စ ဟေတု စ ဓမ္မာ သဟေတုကဿ စေဝ န စ ဟေတုဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော. (၂)

ဟေတု စေဝ သဟေတုကော စ သဟေတုကော စေဝ န စ ဟေတု စ ဓမ္မာ ဟေတုဿ စေဝ သဟေတုကဿ စ သဟေတုကဿ စေဝ န စ ဟေတုဿ စ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော. (၃)