၁. ဝိဘင်္ဂဝါရော
ဟေတုပစ္စယော
၉၆. သဟေတုကော ဓမ္မော သဟေတုကဿ ဓမ္မဿ ဟေတုပစ္စယေန ပစ္စယော – သဟေတုကာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၁)
သဟေတုကော ဓမ္မော အဟေတုကဿ ဓမ္မဿ ဟေတုပစ္စယေန ပစ္စယော – သဟေတုကာ ဟေတူ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၂)
သဟေတုကော ဓမ္မော သဟေတုကဿ စ အဟေတုကဿ စ ဓမ္မဿ ဟေတုပစ္စယေန ပစ္စယော – သဟေတုကာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၃)
၉၇. အဟေတုကော ဓမ္မော အဟေတုကဿ ဓမ္မဿ ဟေတုပစ္စယေန ပစ္စယော – ဝိစိကိစ္ဆာသဟဂတော ဥဒ္ဓစ္စသဟဂတော မောဟော စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော. (၁)
အဟေတုကော ဓမ္မော သဟေတုကဿ ဓမ္မဿ ဟေတုပစ္စယေန ပစ္စယော – ဝိစိကိစ္ဆာသဟဂတော ဥဒ္ဓစ္စသဟဂတော မောဟော သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော. (၂)
အဟေတုကော ဓမ္မော သဟေတုကဿ စ အဟေတုကဿ စ ဓမ္မဿ ဟေတုပစ္စယေန ပစ္စယော – ဝိစိကိစ္ဆာသဟဂတော ဥဒ္ဓစ္စသဟဂတော မောဟော သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. (၃)
အာရမ္မဏပစ္စယော
၉၈. သဟေတုကော ဓမ္မော သဟေတုကဿ ဓမ္မဿ အာရမ္မဏပစ္စယေန ပစ္စယော – ဒါနံ ဒတွာ သီလံ။ပေ။ ဥပေါသထကမ္မံ ကတွာ တံ ပစ္စဝေက္ခတိ၊ ပုဗ္ဗေ သုစိဏ္ဏာနိ ပစ္စဝေက္ခတိ၊ ဈာနာ ဝုဋ္ဌဟိတွာ ဈာနံ ပစ္စဝေက္ခတိ. အရိယာ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခန္တိ၊ ဖလံ ပစ္စဝေက္ခန္တိ. ပဟီနေ ကိလေသေ။ပေ။ ဝိက္ခမ္ဘိတေ ကိလေသေ။ပေ။ ပုဗ္ဗေ။ပေ။ သဟေတုကေ ခန္ဓေ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ကုသလာကုသလေ နိရုဒ္ဓေ သဟေတုကော ဝိပါကော တဒါရမ္မဏတာ ဥပ္ပဇ္ဇတိ၊ စေတောပရိယဉာဏေန သဟေတုကစိတ္တသမင်္ဂိဿ စိတ္တံ ဇာနန္တိ. အာကာသာနဉ္စာယတနံ ဝိညာဏဉ္စာယတနဿ။ပေ။ အာကိဉ္စညာယတနံ နေဝသညာနာသညာယတနဿ။ပေ။ သဟေတုကာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ အာရမ္မဏပစ္စယေန ပစ္စယော၊ သဟေတုကေ ခန္ဓေ အာရဗ္ဘ သဟေတုကာ ခန္ဓာ ဥပ္ပဇ္ဇန္တိ. (၁)
သဟေတုကော ဓမ္မော အဟေတုကဿ ဓမ္မဿ အာရမ္မဏပစ္စယေန ပစ္စယော – သဟေတုကေ ခန္ဓေ အနိစ္စတော ။ပေ။ ဒေါမနဿံ ဥပ္ပဇ္ဇတိ၊ ကုသလာကုသလေ နိရုဒ္ဓေ အဟေတုကော ဝိပါကော တဒါရမ္မဏတာ ဥပ္ပဇ္ဇတိ၊ သဟေတုကေ ခန္ဓေ အာရဗ္ဘ အဟေတုကာ ခန္ဓာ စ မောဟော စ ဥပ္ပဇ္ဇန္တိ. (၂)
သဟေတုကော ဓမ္မော သဟေတုကဿ စ အဟေတုကဿ စ ဓမ္မဿ အာရမ္မဏပစ္စယေန ပစ္စယော – သဟေတုကေ ခန္ဓေ အာရဗ္ဘ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ ဥပ္ပဇ္ဇန္တိ. (၃)
၉၉. အဟေတုကော ဓမ္မော အဟေတုကဿ ဓမ္မဿ အာရမ္မဏပစ္စယေန ပစ္စယော – နိဗ္ဗာနံ အာဝဇ္ဇနာယ အာရမ္မဏပစ္စယေန ပစ္စယော၊ စက္ခုံ။ပေ။ ဝတ္ထုံ။ အဟေတုကေ ခန္ဓေ စ မောဟဉ္စ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ကုသလာကုသလေ နိရုဒ္ဓေ အဟေတုကော ဝိပါကော တဒါရမ္မဏတာ ဥပ္ပဇ္ဇတိ၊ ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ။ပေ။ အဟေတုကေ ခန္ဓေ စ မောဟဉ္စ အာရဗ္ဘ အဟေတုကာ ခန္ဓာ စ မောဟော စ ဥပ္ပဇ္ဇန္တိ. (၁)
အဟေတုကော ဓမ္မော သဟေတုကဿ ဓမ္မဿ အာရမ္မဏပစ္စယေန ပစ္စယော – အရိယာ နိဗ္ဗာနံ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ အာရမ္မဏပစ္စယေန ပစ္စယော. အရိယာ အဟေတုကေ ပဟီနေ ကိလေသေ ပစ္စဝေက္ခန္တိ၊ ဝိက္ခမ္ဘိတေ ကိလေသေ။ပေ။ ပုဗ္ဗေ။ပေ။ စက္ခုံ။ပေ။ ဝတ္ထုံ။ပေ။ အဟေတုကေ ခန္ဓေ စ မောဟဉ္စ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ကုသလာကုသလေ နိရုဒ္ဓေ သဟေတုကော ဝိပါကော တဒါရမ္မဏတာ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ၊ စေတောပရိယဉာဏေန အဟေတုကစိတ္တသမင်္ဂိဿ စိတ္တံ ဇာနန္တိ၊ အဟေတုကာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ အနာဂတံသဉာဏဿ အာရမ္မဏပစ္စယေန ပစ္စယော၊ အဟေတုကေ ခန္ဓေ စ မောဟဉ္စ အာရဗ္ဘ သဟေတုကာ ခန္ဓာ ဥပ္ပဇ္ဇန္တိ. (၂)
အဟေတုကော ဓမ္မော သဟေတုကဿ စ အဟေတုကဿ စ ဓမ္မဿ အာရမ္မဏပစ္စယေန ပစ္စယော – စက္ခုံ အာရဗ္ဘ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ ဥပ္ပဇ္ဇန္တိ၊ သောတံ ။ပေ။ ဝတ္ထုံ။ အဟေတုကေ ခန္ဓေ စ မောဟဉ္စ အာရဗ္ဘ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ ဥပ္ပဇ္ဇန္တိ. (၃)
၁၀၀. သဟေတုကော စ အဟေတုကော စ ဓမ္မာ သဟေတုကဿ ဓမ္မဿ အာရမ္မဏပစ္စယေန ပစ္စယော – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ မောဟဉ္စ အာရဗ္ဘ သဟေတုကာ ခန္ဓာ ဥပ္ပဇ္ဇန္တိ. (၁)
သဟေတုကော စ အဟေတုကော စ ဓမ္မာ အဟေတုကဿ ဓမ္မဿ အာရမ္မဏပစ္စယေန ပစ္စယော – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ မောဟဉ္စ အာရဗ္ဘ အဟေတုကာ ခန္ဓာ စ မောဟော စ ဥပ္ပဇ္ဇန္တိ. (၂)
သဟေတုကော စ အဟေတုကော စ ဓမ္မာ သဟေတုကဿ စ အဟေတုကဿ စ ဓမ္မဿ အာရမ္မဏပစ္စယေန ပစ္စယော – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ မောဟဉ္စ အာရဗ္ဘ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ ဥပ္ပဇ္ဇန္တိ. (၃)
အဓိပတိပစ္စယော
၁၀၁. သဟေတုကော ဓမ္မော သဟေတုကဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဒါနံ ဒတွာ သီလံ။ပေ။ ဥပေါသထကမ္မံ ကတွာ တံ ဂရုံ ကတွာ ပစ္စဝေက္ခတိ၊ ဈာနာ။ပေ။ အရိယာ မဂ္ဂါ ဝုဋ္ဌဟိတွာ မဂ္ဂံ ဂရုံ ကတွာ။ပေ။ ဖလံ။ပေ။ သဟေတုကေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. သဟဇာတာဓိပတိ – သဟေတုကာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော. (၁)
သဟေတုကော ဓမ္မော အဟေတုကဿ ဓမ္မဿ အဓိပတိပစ္စယေန ပစ္စယော. သဟဇာတာဓိပတိ – သဟေတုကာဓိပတိ စိတ္တသမုဋ္ဌာနာနံ ရူပါနံ အဓိပတိပစ္စယေန ပစ္စယော. (၂)
သဟေတုကော ဓမ္မော သဟေတုကဿ စ အဟေတုကဿ စ ဓမ္မဿ အဓိပတိပစ္စယေန ပစ္စယော. သဟဇာတာဓိပတိ – သဟေတုကာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၃)
အဟေတုကော ဓမ္မော သဟေတုကဿ ဓမ္မဿ အဓိပတိပစ္စယေန ပစ္စယော. အာရမ္မဏာဓိပတိ – အရိယာ နိဗ္ဗာနံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ အဓိပတိပစ္စယေန ပစ္စယော၊ စက္ခုံ။ပေ။ ဝတ္ထုံ။ အဟေတုကေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. (၁)
အနန္တရပစ္စယော
၁၀၂. သဟေတုကော ဓမ္မော သဟေတုကဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ သဟေတုကာ ခန္ဓာ ပစ္ဆိမာနံ ပစ္ဆိမာနံ သဟေတုကာနံ ခန္ဓာနံ အနန္တရပစ္စယေန ပစ္စယော၊ အနုလောမံ ဂေါတြဘုဿ။ အနုလောမံ ဝေါဒါနဿ။ ဂေါတြဘု မဂ္ဂဿ။ ဝေါဒါနံ မဂ္ဂဿ။ မဂ္ဂေါ ဖလဿ။ ဖလံ ဖလဿ။ အနုလောမံ ဖလသမာပတ္တိယာ။ နိရောဓာ ဝုဋ္ဌဟန္တဿ နေဝသညာနာသညာယတနံ ဖလသမာပတ္တိယာ အနန္တရပစ္စယေန ပစ္စယော. (၁)
သဟေတုကော ဓမ္မော အဟေတုကဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ ပစ္ဆိမဿ ပစ္ဆိမဿ ဝိစိကိစ္ဆာသဟဂတဿ ဥဒ္ဓစ္စသဟဂတဿ မောဟဿ အနန္တရပစ္စယေန ပစ္စယော၊ သဟေတုကံ စုတိစိတ္တံ အဟေတုကဿ ဥပပတ္တိစိတ္တဿ အနန္တရပစ္စယေန ပစ္စယော၊ သဟေတုကံ ဘဝင်္ဂံ အာဝဇ္ဇနာယ အနန္တရပစ္စယေန ပစ္စယော၊ သဟေတုကံ ဘဝင်္ဂံ အဟေတုကဿ ဘဝင်္ဂဿ အနန္တရပစ္စယေန ပစ္စယော၊ သဟေတုကာ ခန္ဓာ အဟေတုကဿ ဝုဋ္ဌာနဿ အနန္တရပစ္စယေန ပစ္စယော. (၂)
သဟေတုကော ဓမ္မော သဟေတုကဿ စ အဟေတုကဿ စ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ ပစ္ဆိမာနံ ပစ္ဆိမာနံ ဝိစိကိစ္ဆာသဟဂတာနံ ဥဒ္ဓစ္စသဟဂတာနံ ခန္ဓာနံ မောဟဿ စ အနန္တရပစ္စယေန ပစ္စယော. (၃)
၁၀၃. အဟေတုကော ဓမ္မော အဟေတုကဿ ဓမ္မဿ အနန္တရပစ္စယေန ပစ္စယော – ပုရိမော ပုရိမော ဝိစိကိစ္ဆာသဟဂတော ဥဒ္ဓစ္စသဟဂတော မောဟော ပစ္ဆိမဿ ပစ္ဆိမဿ ဝိစိကိစ္ဆာသဟဂတဿ ဥဒ္ဓစ္စသဟဂတဿ မောဟဿ အနန္တရပစ္စယေန ပစ္စယော၊ ပုရိမာ ပုရိမာ အဟေတုကာ ခန္ဓာ ပစ္ဆိမာနံ ပစ္ဆိမာနံ အဟေတုကာနံ ခန္ဓာနံ အနန္တရပစ္စယေန ပစ္စယော၊ အာဝဇ္ဇနာ ပဉ္စန္နံ ဝိညာဏာနံ အနန္တရပစ္စယေန ပစ္စယော. (၁)
အဟေတုကော ဓမ္မော သဟေတုကဿ ဓမ္မဿ အနန္တရပစ္စယေန ပစ္စယော – ပုရိမော ပုရိမော ဝိစိကိစ္ဆာသဟဂတော ဥဒ္ဓစ္စသဟဂတော မောဟော ပစ္ဆိမာနံ ပစ္ဆိမာနံ ဝိစိကိစ္ဆာသဟဂတာနံ ဥဒ္ဓစ္စသဟဂတာနံ ခန္ဓာနံ အနန္တရပစ္စယေန ပစ္စယော၊ အဟေတုကံ စုတိစိတ္တံ သဟေတုကဿ ဥပပတ္တိစိတ္တဿ အနန္တရပစ္စယေန ပစ္စယော၊ အဟေတုကံ ဘဝင်္ဂံ သဟေတုကဿ ဘဝင်္ဂဿ အနန္တရပစ္စယေန ပစ္စယော၊ အာဝဇ္ဇနာ သဟေတုကာနံ ခန္ဓာနံ အနန္တရပစ္စယေန ပစ္စယော၊ အဟေတုကာ ခန္ဓာ သဟေတုကဿ ဝုဋ္ဌာနဿ အနန္တရပစ္စယေန ပစ္စယော. (၂)
အဟေတုကော ဓမ္မော သဟေတုကဿ စ အဟေတုကဿ စ ဓမ္မဿ အနန္တရပစ္စယေန ပစ္စယော – ပုရိမော ပုရိမော ဝိစိကိစ္ဆာသဟဂတော ဥဒ္ဓစ္စသဟဂတော မောဟော ပစ္ဆိမာနံ ပစ္ဆိမာနံ ဝိစိကိစ္ဆာသဟဂတာနံ ဥဒ္ဓစ္စသဟဂတာနံ ခန္ဓာနံ မောဟဿ စ အနန္တရပစ္စယေန ပစ္စယော၊ အာဝဇ္ဇနာ ဝိစိကိစ္ဆာသဟဂတာနံ ဥဒ္ဓစ္စသဟဂတာနံ ခန္ဓာနံ မောဟဿ စ အနန္တရပစ္စယေန ပစ္စယော. (၃)
၁၀၄. သဟေတုကော စ အဟေတုကော စ ဓမ္မာ သဟေတုကဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ ပစ္ဆိမာနံ ပစ္ဆိမာနံ ဝိစိကိစ္ဆာသဟဂတာနံ ဥဒ္ဓစ္စသဟဂတာနံ ခန္ဓာနံ အနန္တရပစ္စယေန ပစ္စယော. (၁)
သဟေတုကော စ အဟေတုကော စ ဓမ္မာ အဟေတုကဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ ပစ္ဆိမဿ ပစ္ဆိမဿ ဝိစိကိစ္ဆာသဟဂတဿ ဥဒ္ဓစ္စသဟဂတဿ မောဟဿ အနန္တရပစ္စယေန ပစ္စယော၊ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ အဟေတုကဿ ဝုဋ္ဌာနဿ အနန္တရပစ္စယေန ပစ္စယော. (၂)
သဟေတုကော စ အဟေတုကော စ ဓမ္မာ သဟေတုကဿ စ အဟေတုကဿ စ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ ပစ္ဆိမာနံ ပစ္ဆိမာနံ ဝိစိကိစ္ဆာသဟဂတာနံ ဥဒ္ဓစ္စသဟဂတာနံ ခန္ဓာနံ မောဟဿ စ အနန္တရပစ္စယေန ပစ္စယော. (၃)
သဟဇာတပစ္စယာဒိ
၁၀၅. သဟေတုကော ဓမ္မော သဟေတုကဿ ဓမ္မဿ သဟဇာတပစ္စယေန ပစ္စယော (ပဋိစ္စဝါရေ သဟဇာတသဒိသံ၊ ဣဟ ဃဋနာ နတ္ထိ)။ အညမညပစ္စယေန ပစ္စယော (ပဋိစ္စဝါရသဒိသံ)။ နိဿယပစ္စယေန ပစ္စယော (ပဋိစ္စဝါရေ နိဿယပစ္စယသဒိသံ၊ ဣဟ ဃဋနာ နတ္ထိ).
ဥပနိဿယပစ္စယော
၁၀၆. သဟေတုကော ဓမ္မော သဟေတုကဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – သဟေတုကာ ခန္ဓာ သဟေတုကာနံ ခန္ဓာနံ ဥပနိဿယပစ္စယေန ပစ္စယော. (၁)
သဟေတုကော ဓမ္မော အဟေတုကဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။. ပကတူပနိဿယော – သဟေတုကာ ခန္ဓာ အဟေတုကာနံ ခန္ဓာနံ မောဟဿ စ ဥပနိဿယပစ္စယေန ပစ္စယော. (၂)
သဟေတုကော ဓမ္မော သဟေတုကဿ စ အဟေတုကဿ စ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။. ပကတူပနိဿယော – သဟေတုကာ ခန္ဓာ ဝိစိကိစ္ဆာသဟဂတာနံ ဥဒ္ဓစ္စသဟဂတာနံ ခန္ဓာနံ မောဟဿ စ ဥပနိဿယပစ္စယေန ပစ္စယော. (၃)
၁၀၇. အဟေတုကော ဓမ္မော အဟေတုကဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ကာယိကံ သုခံ ကာယိကဿ သုခဿ၊ ကာယိကဿ ဒုက္ခဿ၊ မောဟဿ စ ဥပနိဿယပစ္စယေန ပစ္စယော၊ ကာယိကံ ဒုက္ခံ။ ဥတု။ ဘောဇနံ။ သေနာသနံ ကာယိကဿ သုခဿ၊ ကာယိကဿ ဒုက္ခဿ၊ မောဟဿ စ ဥပနိဿယပစ္စယေန ပစ္စယော၊ မောဟော ကာယိကဿ သုခဿ၊ ကာယိကဿ ဒုက္ခဿ၊ မောဟဿ စ ဥပနိဿယပစ္စယေန ပစ္စယော၊ ကာယိကံ သုခံ။ ကာယိကံ ဒုက္ခံ။ ဥတု။ ဘောဇနံ၊ သေနာသနံ၊ မောဟော စ ကာယိကဿ သုခဿ၊ ကာယိကဿ ဒုက္ခဿ၊ မောဟဿ စ ဥပနိဿယပစ္စယေန ပစ္စယော. (၁)
အဟေတုကော ဓမ္မော သဟေတုကဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ကာယိကံ သုခံ ဥပနိဿာယ ဒါနံ ဒေတိ။ပေ။ သံဃံ ဘိန္ဒတိ၊ ကာယိကံ ဒုက္ခံ။ ဥတုံ။ ဘောဇနံ။ သေနာသနံ။ မောဟံ ဥပနိဿာယ ဒါနံ ဒေတိ။ပေ။ သံဃံ ဘိန္ဒတိ၊ ကာယိကံ သုခံ။ပေ။ မောဟော စ သဒ္ဓါယ။ပေ။ ပညာယ ရာဂဿ။ပေ။ ပတ္ထနာယ မဂ္ဂဿ ဖလသမာပတ္တိယာ ဥပနိဿယပစ္စယေန ပစ္စယော. (၂)
အဟေတုကော ဓမ္မော သဟေတုကဿ စ အဟေတုကဿ စ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ကာယိကံ သုခံ မောဟော စ ဝိစိကိစ္ဆာသဟဂတာနံ ဥဒ္ဓစ္စသဟဂတာနံ ခန္ဓာနံ မောဟဿ စ ဥပနိဿယပစ္စယေန ပစ္စယော. (၃)
၁၀၈. သဟေတုကော စ အဟေတုကော စ ဓမ္မာ သဟေတုကဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ သဟေတုကာနံ ခန္ဓာနံ ဥပနိဿယပစ္စယေန ပစ္စယော. (၁)
သဟေတုကော စ အဟေတုကော စ ဓမ္မာ အဟေတုကဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ အဟေတုကာနံ ခန္ဓာနံ မောဟဿ စ ဥပနိဿယပစ္စယေန ပစ္စယော. (၂)
သဟေတုကော စ အဟေတုကော စ ဓမ္မာ သဟေတုကဿ စ အဟေတုကဿ စ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ ဝိစိကိစ္ဆာသဟဂတာနံ ဥဒ္ဓစ္စသဟဂတာနံ ခန္ဓာနံ မောဟဿ စ ဥပနိဿယပစ္စယေန ပစ္စယော. (၃)
ပုရေဇာတပစ္စယော
၁၀၉. အဟေတုကော ဓမ္မော အဟေတုကဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ဝတ္ထုံ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ကုသလာကုသလေ နိရုဒ္ဓေ အဟေတုကော ဝိပါကော တဒါရမ္မဏတာ ဥပ္ပဇ္ဇတိ၊ ရူပါယတနံ စက္ခုဝိညာဏဿ ။ပေ။ ဖောဋ္ဌဗ္ဗာယတနံ ကာယဝိညာဏဿ ပုရေဇာတပစ္စယေန ပစ္စယော. ဝတ္ထုပုရေဇာတံ – စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ။ ပုရေဇာတံ ဝတ္ထု အဟေတုကာနံ ခန္ဓာနံ မောဟဿ စ ပုရေဇာတပစ္စယေန ပစ္စယော. (၁)
အဟေတုကော ဓမ္မော သဟေတုကဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ဝတ္ထုံ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ကုသလာကုသလေ နိရုဒ္ဓေ သဟေတုကော ဝိပါကော တဒါရမ္မဏတာ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. ဝတ္ထုပုရေဇာတံ – ဝတ္ထု သဟေတုကာနံ ခန္ဓာနံ ပုရေဇာတပစ္စယေန ပစ္စယော. (၂)
အဟေတုကော ဓမ္မော သဟေတုကဿ စ အဟေတုကဿ စ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ဝတ္ထုံ အာရဗ္ဘ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ ဥပ္ပဇ္ဇန္တိ. ဝတ္ထုပုရေဇာတံ – ဝတ္ထု ဝိစိကိစ္ဆာသဟဂတာနံ ဥဒ္ဓစ္စသဟဂတာနံ ခန္ဓာနံ မောဟဿ စ ပုရေဇာတပစ္စယေန ပစ္စယော. (၃)
ပစ္ဆာဇာတပစ္စယာဒိ
၁၁၀. သဟေတုကော ဓမ္မော အဟေတုကဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ သဟေတုကာ ခန္ဓာ ပုရေဇာတဿ ဣမဿ ကာယဿ ပစ္ဆာဇာတပစ္စယေန ပစ္စယော. (၁)
အဟေတုကော ဓမ္မော အဟေတုကဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ အဟေတုကာ ခန္ဓာ စ မောဟော စ ပုရေဇာတဿ ဣမဿ ကာယဿ ပစ္ဆာဇာတပစ္စယေန ပစ္စယော. (၁)
သဟေတုကော စ အဟေတုကော စ ဓမ္မာ အဟေတုကဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ ပုရေဇာတဿ ဣမဿ ကာယဿ ပစ္ဆာဇာတပစ္စယေန ပစ္စယော. (၁)
သဟေတုကော ဓမ္မော သဟေတုကဿ ဓမ္မဿ အာသေဝနပစ္စယေန ပစ္စယော (အနန္တရသဒိသံ. အာဝဇ္ဇနမ္ပိ ဘဝင်္ဂမ္ပိ နတ္ထိ၊ အာသေဝနပစ္စယေ ဝဇ္ဇေတဗ္ဗာ နဝပိ ).
ကမ္မပစ္စယော
၁၁၁. သဟေတုကော ဓမ္မော သဟေတုကဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – သဟေတုကာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော၊ ပဋိသန္ဓိက္ခဏေ။ပေ။. နာနာက္ခဏိကာ – သဟေတုကာ စေတနာ ဝိပါကာနံ သဟေတုကာနံ ခန္ဓာနံ ကမ္မပစ္စယေန ပစ္စယော. (၁)
သဟေတုကော ဓမ္မော အဟေတုကဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – သဟေတုကာ စေတနာ စိတ္တသမုဋ္ဌာနာနံ ရူပါနံ ကမ္မပစ္စယေန ပစ္စယော၊ ပဋိသန္ဓိက္ခဏေ။ပေ။. နာနာက္ခဏိကာ – သဟေတုကာ စေတနာ ဝိပါကာနံ အဟေတုကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော. (၂)
သဟေတုကော ဓမ္မော သဟေတုကဿ စ အဟေတုကဿ စ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – သဟေတုကာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော. နာနာက္ခဏိကာ – သဟေတုကာ စေတနာ ဝိပါကာနံ သဟေတုကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော. (၃)
အဟေတုကော ဓမ္မော အဟေတုကဿ ဓမ္မဿ ကမ္မပစ္စယေန ပစ္စယော – အဟေတုကာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော၊ ပဋိသန္ဓိက္ခဏေ။ပေ။. (၁)
ဝိပါကပစ္စယော
၁၁၂. သဟေတုကော ဓမ္မော သဟေတုကဿ ဓမ္မဿ ဝိပါကပစ္စယေန ပစ္စယော – ဝိပါကော သဟေတုကော ဧကော ခန္ဓော တိဏ္ဏန္နံ ခန္ဓာနံ။ပေ။ ဒွေ ခန္ဓာ။ပေ။ ပဋိသန္ဓိက္ခဏေ။ပေ။. (၁)
သဟေတုကော ဓမ္မော အဟေတုကဿ ဓမ္မဿ ဝိပါကပစ္စယေန ပစ္စယော – ဝိပါကာ သဟေတုကာ ခန္ဓာ စိတ္တသမုဋ္ဌာနာနံ ရူပါနံ ဝိပါကပစ္စယေန ပစ္စယော၊ ပဋိသန္ဓိက္ခဏေ။ပေ။. (၂)
သဟေတုကော ဓမ္မော သဟေတုကဿ စ အဟေတုကဿ စ ဓမ္မဿ ဝိပါကပစ္စယေန ပစ္စယော – ဝိပါကော သဟေတုကော ဧကော ခန္ဓော တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ။ပေ။ ဒွေ ခန္ဓာ။ပေ။ ပဋိသန္ဓိက္ခဏေ။ပေ။. (၃)
အဟေတုကော ဓမ္မော အဟေတုကဿ ဓမ္မဿ ဝိပါကပစ္စယေန ပစ္စယော – ဝိပါကော အဟေတုကော ဧကော ခန္ဓော တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ။ပေ။ ဒွေ ခန္ဓာ။ပေ။ ပဋိသန္ဓိက္ခဏေ။ပေ။ ခန္ဓာ ဝတ္ထုဿ ဝိပါကပစ္စယေန ပစ္စယော. (၁)
အာဟာရပစ္စယော
၁၁၃. သဟေတုကော ဓမ္မော သဟေတုကဿ ဓမ္မဿ အာဟာရပစ္စယေန ပစ္စယော။ တီဏိ.
အဟေတုကော ဓမ္မော အဟေတုကဿ ဓမ္မဿ အာဟာရပစ္စယေန ပစ္စယော – အဟေတုကာ အာဟာရာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ။ပေ။ ပဋိသန္ဓိက္ခဏေ။ပေ။ ကဗဠီကာရော အာဟာရော ဣမဿ ကာယဿ အာဟာရပစ္စယေန ပစ္စယော. (၁)
ဣန္ဒြိယပစ္စယာဒိ
၁၁၄. သဟေတုကော ဓမ္မော သဟေတုကဿ ဓမ္မဿ ဣန္ဒြိယပစ္စယေန ပစ္စယော။ တီဏိ.
အဟေတုကော ဓမ္မော အဟေတုကဿ ဓမ္မဿ ဣန္ဒြိယပစ္စယေန ပစ္စယော – အဟေတုကာ ဣန္ဒြိယာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ။ပေ။ ပဋိသန္ဓိက္ခဏေ။ပေ။ စက္ခုန္ဒြိယံ စက္ခုဝိညာဏဿ။ပေ။ ကာယိန္ဒြိယံ ကာယဝိညာဏဿ ဣန္ဒြိယပစ္စယေန ပစ္စယော၊ ရူပဇီဝိတိန္ဒြိယံ ကဋတ္တာရူပါနံ ဣန္ဒြိယပစ္စယေန ပစ္စယော. (၁)
သဟေတုကော ဓမ္မော သဟေတုကဿ ဓမ္မဿ ဈာနပစ္စယေန ပစ္စယော။ တီဏိ.
အဟေတုကော ဓမ္မော အဟေတုကဿ ဓမ္မဿ ဈာနပစ္စယေန ပစ္စယော – အဟေတုကာနိ ဈာနင်္ဂါနိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ။ပေ။ ပဋိသန္ဓိက္ခဏေ။ပေ။. (၁)
သဟေတုကော ဓမ္မော သဟေတုကဿ ဓမ္မဿ မဂ္ဂပစ္စယေန ပစ္စယော။ တီဏိ.
သဟေတုကော ဓမ္မော သဟေတုကဿ ဓမ္မဿ သမ္ပယုတ္တပစ္စယေန ပစ္စယော (ပဋိစ္စဝါရေ သမ္ပယုတ္တသဒိသာ ဆ ပဉှာ).
ဝိပ္ပယုတ္တပစ္စယော
၁၁၅. သဟေတုကော ဓမ္မော အဟေတုကဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ. သဟဇာတာ – သဟေတုကာ ခန္ဓာ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော၊ ပဋိသန္ဓိက္ခဏေ သဟေတုကာ ခန္ဓာ ကဋတ္တာရူပါနံ ဝိပ္ပယုတ္တပစ္စယေန ပစ္စယော. ပစ္ဆာဇာတာ – သဟေတုကာ ခန္ဓာ ပုရေဇာတဿ ဣမဿ ကာယဿ ဝိပ္ပယုတ္တပစ္စယေန ပစ္စယော. (၁)
အဟေတုကော ဓမ္မော အဟေတုကဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ. သဟဇာတာ – အဟေတုကာ ခန္ဓာ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော၊ ပဋိသန္ဓိက္ခဏေ အဟေတုကာ ခန္ဓာ ကဋတ္တာရူပါနံ ဝိပ္ပယုတ္တပစ္စယေန ပစ္စယော၊ ခန္ဓာ ဝတ္ထုဿ ဝိပ္ပယုတ္တပစ္စယေန ပစ္စယော၊ ဝတ္ထု ခန္ဓာနံ ဝိပ္ပယုတ္တပစ္စယေန ပစ္စယော. ပုရေဇာတံ – စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ။ ဝတ္ထု အဟေတုကာနံ ခန္ဓာနံ မောဟဿ စ ဝိပ္ပယုတ္တပစ္စယေန ပစ္စယော. ပစ္ဆာဇာတာ – အဟေတုကာ ခန္ဓာ စ မောဟော စ ပုရေဇာတဿ ဣမဿ ကာယဿ ဝိပ္ပယုတ္တပစ္စယေန ပစ္စယော. (၁)
အဟေတုကော ဓမ္မော သဟေတုကဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ. သဟဇာတံ – ပဋိသန္ဓိက္ခဏေ ဝတ္ထု သဟေတုကာနံ ခန္ဓာနံ ဝိပ္ပယုတ္တပစ္စယေန ပစ္စယော. ပုရေဇာတံ – ဝတ္ထု သဟေတုကာနံ ခန္ဓာနံ ဝိပ္ပယုတ္တပစ္စယေန ပစ္စယော. (၂)
အဟေတုကော ဓမ္မော သဟေတုကဿ စ အဟေတုကဿ စ ဓမ္မဿ ဝိပ္ပယုတ္တပစ္စယေန ပစ္စယော. ပုရေဇာတံ – ဝတ္ထု ဝိစိကိစ္ဆာသဟဂတာနံ ဥဒ္ဓစ္စသဟဂတာနံ ခန္ဓာနံ မောဟဿ စ ဝိပ္ပယုတ္တပစ္စယေန ပစ္စယော. (၃)
သဟေတုကော စ အဟေတုကော စ ဓမ္မာ အဟေတုကဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ. သဟဇာတာ – ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော. ပစ္ဆာဇာတာ – ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ ပုရေဇာတဿ ဣမဿ ကာယဿ ဝိပ္ပယုတ္တပစ္စယေန ပစ္စယော. (၁)
အတ္ထိပစ္စယော
၁၁၆. သဟေတုကော ဓမ္မော သဟေတုကဿ ဓမ္မဿ အတ္ထိပစ္စယေန ပစ္စယော – သဟေတုကော ဧကော ခန္ဓော တိဏ္ဏန္နံ ခန္ဓာနံ။ပေ။ ဒွေ ခန္ဓာ။ပေ။ ပဋိသန္ဓိက္ခဏေ။ပေ။. (၁)
သဟေတုကော ဓမ္မော အဟေတုကဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ. သဟဇာတာ – သဟေတုကာ ခန္ဓာ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော၊ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ မောဟဿ စ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော၊ ပဋိသန္ဓိက္ခဏေ။ပေ။. ပစ္ဆာဇာတာ – သဟေတုကာ ခန္ဓာ ပုရေဇာတဿ ဣမဿ ကာယဿ အတ္ထိပစ္စယေန ပစ္စယော. (၂)
သဟေတုကော ဓမ္မော သဟေတုကဿ စ အဟေတုကဿ စ ဓမ္မဿ အတ္ထိပစ္စယေန ပစ္စယော – သဟေတုကော ဧကော ခန္ဓော တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော၊ ဝိစိကိစ္ဆာသဟဂတော ဥဒ္ဓစ္စသဟဂတော ဧကော ခန္ဓော တိဏ္ဏန္နံ ခန္ဓာနံ မောဟဿ စ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော။ပေ။ ဒွေ ခန္ဓာ။ပေ။ ပဋိသန္ဓိက္ခဏေ သဟေတုကော။ပေ။. (၃)
၁၁၇. အဟေတုကော ဓမ္မော အဟေတုကဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. သဟဇာတော – အဟေတုကော ဧကော ခန္ဓော တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော။ပေ။ ဒွေ ခန္ဓာ။ပေ။ ဝိစိကိစ္ဆာသဟဂတော ဥဒ္ဓစ္စသဟဂတော မောဟော စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော၊ ပဋိသန္ဓိက္ခဏေ။ပေ။ (ယာဝ အသညသတ္တာ ကာတဗ္ဗံ). ပုရေဇာတံ – စက္ခုံ။ပေ။ ဝတ္ထုံ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ကုသလာကုသလေ နိရုဒ္ဓေ အဟေတုကော ဝိပါကော တဒါရမ္မဏတာ ဥပ္ပဇ္ဇတိ၊ ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ။ပေ။ စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ အတ္ထိပစ္စယေန ပစ္စယော၊ ဝတ္ထု အဟေတုကာနံ ခန္ဓာနံ မောဟဿ စ အတ္ထိပစ္စယေန ပစ္စယော. ပစ္ဆာဇာတာ – အဟေတုကာ ခန္ဓာ စ မောဟော စ ပုရေဇာတဿ ဣမဿ ကာယဿ အတ္ထိပစ္စယေန ပစ္စယော၊ ကဗဠီကာရော အာဟာရော ဣမဿ ကာယဿ အတ္ထိပစ္စယေန ပစ္စယော၊ ရူပဇီဝိတိန္ဒြိယံ ကဋတ္တာရူပါနံ အတ္ထိပစ္စယေန ပစ္စယော. (၁)
အဟေတုကော ဓမ္မော သဟေတုကဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – ဝိစိကိစ္ဆာသဟဂတော ဥဒ္ဓစ္စသဟဂတော မောဟော သမ္ပယုတ္တကာနံ ခန္ဓာနံ အတ္ထိပစ္စယေန ပစ္စယော၊ ပဋိသန္ဓိက္ခဏေ ဝတ္ထု သဟေတုကာနံ ခန္ဓာနံ အတ္ထိပစ္စယေန ပစ္စယော. ပုရေဇာတံ – စက္ခုံ။ပေ။ ဝတ္ထုံ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ကုသလာကုသလေ နိရုဒ္ဓေ သဟေတုကော ဝိပါကော တဒါရမ္မဏတာ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ၊ ဝတ္ထု သဟေတုကာနံ ခန္ဓာနံ အတ္ထိပစ္စယေန ပစ္စယော. (၂)
အဟေတုကော ဓမ္မော သဟေတုကဿ စ အဟေတုကဿ စ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – ဝိစိကိစ္ဆာသဟဂတော ဥဒ္ဓစ္စသဟဂတော မောဟော သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော. ပုရေဇာတံ – စက္ခုံ။ပေ။ ဝတ္ထုံ အာရဗ္ဘ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ ဥပ္ပဇ္ဇန္တိ၊ ဝတ္ထု ဝိစိကိစ္ဆာသဟဂတာနံ ဥဒ္ဓစ္စသဟဂတာနံ ခန္ဓာနံ မောဟဿ စ အတ္ထိပစ္စယေန ပစ္စယော. (၃)
၁၁၈. သဟေတုကော စ အဟေတုကော စ ဓမ္မာ သဟေတုကဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – ဝိစိကိစ္ဆာသဟဂတော ဥဒ္ဓစ္စသဟဂတော ဧကော ခန္ဓော စ မောဟော စ တိဏ္ဏန္နံ ခန္ဓာနံ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။ ပဋိသန္ဓိက္ခဏေ သဟေတုကော ဧကော ခန္ဓော စ ဝတ္ထု စ တိဏ္ဏန္နံ ခန္ဓာနံ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။. သဟဇာတော – သဟေတုကော ဧကော ခန္ဓော စ ဝတ္ထု စ တိဏ္ဏန္နံ ခန္ဓာနံ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။. (၁)
သဟေတုကော စ အဟေတုကော စ ဓမ္မာ အဟေတုကဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. သဟဇာတာ – သဟေတုကာ ခန္ဓာ စ မဟာဘူတာ စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော၊ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော၊ ပဋိသန္ဓိက္ခဏေ သဟေတုကာ ခန္ဓာ စ မဟာဘူတာ စ ကဋတ္တာရူပါနံ အတ္ထိပစ္စယေန ပစ္စယော. သဟဇာတာ – ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ ဝတ္ထု စ မောဟဿ အတ္ထိပစ္စယေန ပစ္စယော. ပစ္ဆာဇာတာ – ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ စ မောဟော စ ပုရေဇာတဿ ဣမဿ ကာယဿ အတ္ထိပစ္စယေန ပစ္စယော. ပစ္ဆာဇာတာ – သဟေတုကာ ခန္ဓာ စ ကဗဠီကာရော အာဟာရော စ ဣမဿ ကာယဿ အတ္ထိပစ္စယေန ပစ္စယော. ပစ္ဆာဇာတာ – သဟေတုကာ ခန္ဓာ စ ရူပဇီဝိတိန္ဒြိယဉ္စ ကဋတ္တာရူပါနံ အတ္ထိပစ္စယေန ပစ္စယော. (၂)
သဟေတုကော စ အဟေတုကော စ ဓမ္မာ သဟေတုကဿ စ အဟေတုကဿ စ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – ဝိစိကိစ္ဆာသဟဂတော ဥဒ္ဓစ္စသဟဂတော ဧကော ခန္ဓော စ မောဟော စ တိဏ္ဏန္နံ ခန္ဓာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော။ပေ။. သဟဇာတော – ဝိစိကိစ္ဆာသဟဂတော ဥဒ္ဓစ္စသဟဂတော ဧကော ခန္ဓော စ ဝတ္ထု စ တိဏ္ဏန္နံ ခန္ဓာနံ မောဟဿ စ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။. (၃)