၁. ဝိဘင်္ဂဝါရော

ဟေတုပစ္စယော

၈၆. သဟေတုကံ ဓမ္မံ သံသဋ္ဌော သဟေတုကော ဓမ္မော ဥပ္ပဇ္ဇတိ ဟေတုပစ္စယာ – သဟေတုကံ ဧကံ ခန္ဓံ သံသဋ္ဌာ တယော ခန္ဓာ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. (၁)

အဟေတုကံ ဓမ္မံ သံသဋ္ဌော သဟေတုကော ဓမ္မော ဥပ္ပဇ္ဇတိ ဟေတုပစ္စယာ – ဝိစိကိစ္ဆာသဟဂတံ ဥဒ္ဓစ္စသဟဂတံ မောဟံ သံသဋ္ဌာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ. (၁)

သဟေတုကဉ္စ အဟေတုကဉ္စ ဓမ္မံ သံသဋ္ဌော သဟေတုကော ဓမ္မော ဥပ္ပဇ္ဇတိ ဟေတုပစ္စယာ – ဝိစိကိစ္ဆာသဟဂတံ ဥဒ္ဓစ္စသဟဂတံ ဧကံ ခန္ဓဉ္စ မောဟဉ္စ သံသဋ္ဌာ တယော ခန္ဓာ။ပေ။ ဒွေ ခန္ဓေ။ပေ။. (၁)

အာရမ္မဏပစ္စယော

၈၇. သဟေတုကံ ဓမ္မံ သံသဋ္ဌော သဟေတုကော ဓမ္မော ဥပ္ပဇ္ဇတိ အာရမ္မဏပစ္စယာ – သဟေတုကံ ဧကံ ခန္ဓံ သံသဋ္ဌာ တယော ခန္ဓာ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. (၁)

သဟေတုကံ ဓမ္မံ သံသဋ္ဌော အဟေတုကော ဓမ္မော ဥပ္ပဇ္ဇတိ အာရမ္မဏပစ္စယာ – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ သံသဋ္ဌော ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၂)

သဟေတုကံ ဓမ္မံ သံသဋ္ဌော သဟေတုကော စ အဟေတုကော စ ဓမ္မာ ဥပ္ပဇ္ဇန္တိ အာရမ္မဏပစ္စယာ – ဝိစိကိစ္ဆာသဟဂတံ ဥဒ္ဓစ္စသဟဂတံ ဧကံ ခန္ဓံ သံသဋ္ဌာ တယော ခန္ဓာ မောဟော စ။ပေ။ ဒွေ ခန္ဓေ။ပေ။. (၃)

၈၈. အဟေတုကံ ဓမ္မံ သံသဋ္ဌော အဟေတုကော ဓမ္မော ဥပ္ပဇ္ဇတိ အာရမ္မဏပစ္စယာ – အဟေတုကံ ဧကံ ခန္ဓံ သံသဋ္ဌာ တယော ခန္ဓာ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. (၁)

အဟေတုကံ ဓမ္မံ သံသဋ္ဌော သဟေတုကော ဓမ္မော ဥပ္ပဇ္ဇတိ အာရမ္မဏပစ္စယာ – ဝိစိကိစ္ဆာသဟဂတံ ဥဒ္ဓစ္စသဟဂတံ မောဟံ သံသဋ္ဌာ ဝိစိကိစ္ဆာသဟဂတာ ဥဒ္ဓစ္စသဟဂတာ ခန္ဓာ. (၂)

သဟေတုကဉ္စ အဟေတုကဉ္စ ဓမ္မံ သံသဋ္ဌော သဟေတုကော ဓမ္မော ဥပ္ပဇ္ဇတိ အာရမ္မဏပစ္စယာ – ဝိစိကိစ္ဆာသဟဂတံ ဥဒ္ဓစ္စသဟဂတံ ဧကံ ခန္ဓဉ္စ မောဟဉ္စ သံသဋ္ဌာ တယော ခန္ဓာ။ပေ။ ဒွေ ခန္ဓေ။ပေ။. (၁)

အဓိပတိပစ္စယော

၈၉. သဟေတုကံ ဓမ္မံ သံသဋ္ဌော သဟေတုကော ဓမ္မော ဥပ္ပဇ္ဇတိ အဓိပတိပစ္စယာ – သဟေတုကံ ဧကံ ခန္ဓံ သံသဋ္ဌာ တယော ခန္ဓာ။ပေ။ ဒွေ ခန္ဓေ။ပေ။. (၁)

အနန္တရပစ္စယာဒိ

၉၀. သဟေတုကံ ဓမ္မံ သံသဋ္ဌော သဟေတုကော ဓမ္မော ဥပ္ပဇ္ဇတိ အနန္တရပစ္စယာ။ သမနန္တရပစ္စယာ။ သဟဇာတပစ္စယာ။ပေ။ ဝိပါကပစ္စယာ – ဝိပါကံ သဟေတုကံ ဧကံ ခန္ဓံ သံသဋ္ဌာ တယော ခန္ဓာ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။.

အဟေတုကံ ဓမ္မံ သံသဋ္ဌော အဟေတုကော ဓမ္မော ဥပ္ပဇ္ဇတိ ဝိပါကပစ္စယာ – ဝိပါကံ အဟေတုကံ ဧကံ ခန္ဓံ သံသဋ္ဌာ တယော ခန္ဓာ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ ဈာနပစ္စယာ။ပေ။ အဝိဂတပစ္စယာ.