၁. ဝိဘင်္ဂဝါရော

ဟေတုပစ္စယော

၁. ဟေတုံ ဓမ္မံ ပဋိစ္စ ဟေတု ဓမ္မော ဥပ္ပဇ္ဇတိ ဟေတုပစ္စယာ – အလောဘံ ပဋိစ္စ အဒေါသော အမောဟော၊ အဒေါသံ ပဋိစ္စ အလောဘော အမောဟော၊ အမောဟံ ပဋိစ္စ အလောဘော အဒေါသော၊ လောဘံ ပဋိစ္စ မောဟော၊ မောဟံ ပဋိစ္စ လောဘော၊ ဒေါသံ ပဋိစ္စ မောဟော၊ မောဟံ ပဋိစ္စ ဒေါသော၊ ပဋိသန္ဓိက္ခဏေ။ပေ။. (၁)

ဟေတုံ ဓမ္မံ ပဋိစ္စ နဟေတု ဓမ္မော ဥပ္ပဇ္ဇတိ ဟေတုပစ္စယာ – ဟေတုံ ဓမ္မံ ပဋိစ္စ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ၊ ပဋိသန္ဓိက္ခဏေ။ပေ။. (၂)

ဟေတုံ ဓမ္မံ ပဋိစ္စ ဟေတု စ နဟေတု စ ဓမ္မာ ဥပ္ပဇ္ဇန္တိ ဟေတုပစ္စယာ – အလောဘံ ပဋိစ္စ အဒေါသော အမောဟော သမ္ပယုတ္တကာ စ ခန္ဓာ စိတ္တသမုဋ္ဌာနဉ္စ ရူပံ (စက္ကံ). လောဘံ ပဋိစ္စ မောဟော သမ္ပယုတ္တကာ စ ခန္ဓာ စိတ္တသမုဋ္ဌာနဉ္စ ရူပံ။ပေ။ ပဋိသန္ဓိက္ခဏေ။ပေ။. (၃)

၂. နဟေတုံ ဓမ္မံ ပဋိစ္စ နဟေတု ဓမ္မော ဥပ္ပဇ္ဇတိ ဟေတုပစ္စယာ – နဟေတုံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ရူပံ၊ ပဋိသန္ဓိက္ခဏေ။ပေ။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဧကံ မဟာဘူတံ။ပေ။. (၁)

နဟေတုံ ဓမ္မံ ပဋိစ္စ ဟေတု ဓမ္မော ဥပ္ပဇ္ဇတိ ဟေတုပစ္စယာ – နဟေတူ ခန္ဓေ ပဋိစ္စ ဟေတူ၊ ပဋိသန္ဓိက္ခဏေ။ပေ။ ဝတ္ထုံ ပဋိစ္စ ဟေတူ. (၂)

နဟေတုံ ဓမ္မံ ပဋိစ္စ ဟေတု စ နဟေတု စ ဓမ္မာ ဥပ္ပဇ္ဇန္တိ ဟေတုပစ္စယာ – နဟေတုံ ဧကံ ခန္ဓံ ပဋိစ္စ တယော ခန္ဓာ ဟေတု စ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ ပဋိစ္စ ဒွေ ခန္ဓာ ဟေတု စ စိတ္တသမုဋ္ဌာနဉ္စ ရူပံ၊ ပဋိသန္ဓိက္ခဏေ။ပေ။ ပဋိသန္ဓိက္ခဏေ ဝတ္ထုံ ပဋိစ္စ ဟေတူ သမ္ပယုတ္တကာ စ ခန္ဓာ. (၃)

၃. ဟေတုဉ္စ နဟေတုဉ္စ ဓမ္မံ ပဋိစ္စ ဟေတု ဓမ္မော ဥပ္ပဇ္ဇတိ ဟေတုပစ္စယာ – အလောဘဉ္စ သမ္ပယုတ္တကေ စ ခန္ဓေ ပဋိစ္စ အဒေါသော အမောဟော (စက္ကံ). လောဘဉ္စ သမ္ပယုတ္တကေ စ ခန္ဓေ ပဋိစ္စ မောဟော၊ ဒေါသဉ္စ သမ္ပယုတ္တကေ စ ခန္ဓေ ပဋိစ္စ မောဟော။ပေ။ ပဋိသန္ဓိက္ခဏေ။ပေ။ အလောဘဉ္စ ဝတ္ထုဉ္စ ပဋိစ္စ အဒေါသော အမောဟော။ပေ။. (၁)

ဟေတုဉ္စ နဟေတုဉ္စ ဓမ္မံ ပဋိစ္စ နဟေတု ဓမ္မော ဥပ္ပဇ္ဇတိ ဟေတုပစ္စယာ – နဟေတုံ ဧကံ ခန္ဓဉ္စ ဟေတုဉ္စ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ စ ဟေတုဉ္စ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ရူပံ၊ ပဋိသန္ဓိက္ခဏေ။ပေ။ ပဋိသန္ဓိက္ခဏေ ဝတ္ထုဉ္စ ဟေတုဉ္စ ပဋိစ္စ သမ္ပယုတ္တကာ ခန္ဓာ. (၂)

ဟေတုဉ္စ နဟေတုဉ္စ ဓမ္မံ ပဋိစ္စ ဟေတု စ နဟေတု စ ဓမ္မာ ဥပ္ပဇ္ဇန္တိ ဟေတုပစ္စယာ – နဟေတုံ ဧကံ ခန္ဓဉ္စ အလောဘဉ္စ ပဋိစ္စ တယော ခန္ဓာ အဒေါသော အမောဟော စ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ စ အလောဘဉ္စ ပဋိစ္စ ဒွေ ခန္ဓာ အဒေါသော အမောဟော စ စိတ္တသမုဋ္ဌာနဉ္စ ရူပံ (စက္ကံ). နဟေတုံ ဧကံ ခန္ဓဉ္စ လောဘဉ္စ ပဋိစ္စ တယော ခန္ဓာ မောဟော စ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ ဝတ္ထုဉ္စ အလောဘဉ္စ ပဋိစ္စ အဒေါသော အမောဟော သမ္ပယုတ္တကာ စ ခန္ဓာ. (၃)

အာရမ္မဏပစ္စယာဒိ

၄. ဟေတုံ ဓမ္မံ ပဋိစ္စ ဟေတု ဓမ္မော ဥပ္ပဇ္ဇတိ အာရမ္မဏပစ္စယာ (ရူပံ ဆဍ္ဍေတွာ အရူပေယေဝ နဝ ပဉှာ)။ အဓိပတိပစ္စယာ (ပဋိသန္ဓိ နတ္ထိ၊ ပရိပုဏ္ဏံ) ဧကံ မဟာဘူတံ ပဋိစ္စ။ပေ။ မဟာဘူတေ ပဋိစ္စ စိတ္တသမုဋ္ဌာနံ ရူပံ ဥပါဒါရူပံ။ (ဣမံ နာနံ) အနန္တရပစ္စယာ။ သမနန္တရပစ္စယာ။ သဟဇာတပစ္စယာ (သဗ္ဗေ မဟာဘူတာ ယာဝ အသညသတ္တာ)။ အညမညပစ္စယာ။ နိဿယပစ္စယာ။ ဥပနိဿယပစ္စယာ။ ပုရေဇာတပစ္စယာ။ အာသေဝနပစ္စယာ (ဒွီသုပိ ပဋိသန္ဓိ နတ္ထိ)။ ကမ္မပစ္စယာ။ ဝိပါကပစ္စယာ (သံခိတ္တံ)။ အဝိဂတပစ္စယာ.