၁-၄. ပစ္စယာနုလောမာဒိ

၁၆၉. နဟေတုံ သဟေတုကံ ဓမ္မံ ပစ္စယာ နဟေတု သဟေတုကော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

နဟေတုံ အဟေတုကံ ဓမ္မံ ပစ္စယာ နဟေတု အဟေတုကော ဓမ္မော ဥပ္ပဇ္ဇတိ ဟေတုပစ္စယာ – ဧကံ မဟာဘူတံ ပစ္စယာ တယော မဟာဘူတာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ၊ ကဋတ္တာရူပံ၊ ဥပါဒါရူပံ. (၁)

နဟေတုံ အဟေတုကံ ဓမ္မံ ပစ္စယာ နဟေတု သဟေတုကော ဓမ္မော ဥပ္ပဇ္ဇတိ ဟေတုပစ္စယာ – ဝတ္ထုံ ပစ္စယာ နဟေတူ သဟေတုကာ ခန္ဓာ၊ ပဋိသန္ဓိက္ခဏေ။ပေ။ (၂)

နဟေတုံ အဟေတုကံ ဓမ္မံ ပစ္စယာ နဟေတု သဟေတုကော စ နဟေတု အဟေတုကော စ ဓမ္မာ ဥပ္ပဇ္ဇန္တိ ဟေတုပစ္စယာ – ဝတ္ထုံ ပစ္စယာ နဟေတူ သဟေတုကာ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။(၃)

နဟေတုံ သဟေတုကဉ္စ နဟေတုံ အဟေတုကဉ္စ ဓမ္မံ ပစ္စယာ နဟေတု သဟေတုကော ဓမ္မော ဥပ္ပဇ္ဇတိ ဟေတုပစ္စယာ (ဃဋနာ တီဏိ၊ ပဝတ္တိပဋိသန္ဓိ ပရိပုဏ္ဏံ. သံခိတ္တံ).

၁၇၀. ဟေတုယာ နဝ၊ အာရမ္မဏေ စတ္တာရိ။ပေ။ အညမညေ ဆ။ပေ။ ပုရေဇာတေ အာသေဝနေ စတ္တာရိ။ပေ။ အဝိဂတေ နဝ (ဧဝံ ဂဏေတဗ္ဗံ).

အနုလောမံ.

၁၇၁. နဟေတုယာ ဧကံ၊ နအာရမ္မဏေ တီဏိ။ပေ။ နောဝိဂတေ တီဏိ.

ပစ္စနီယံ.