၁. ဝိဘင်္ဂဝါရော
နဟေတုပစ္စယော
၁၇. ဒဿနေန ပဟာတဗ္ဗဟေတုကံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ခန္ဓေ ပဋိစ္စ ဝိစိကိစ္ဆာသဟဂတော မောဟော. (၁)
ဘာဝနာယ ပဟာတဗ္ဗဟေတုကံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ နဟေတုပစ္စယာ – ဥဒ္ဓစ္စသဟဂတေ ခန္ဓေ ပဋိစ္စ ဥဒ္ဓစ္စသဟဂတော မောဟော. (၁)
နေဝဒဿနေန နဘာဝနာယ ပဟာတဗ္ဗဟေတုကံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ နေဝဒဿနေန နဘာဝနာယ ပဟာတဗ္ဗဟေတုကံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓာ၊ အဟေတုကပဋိသန္ဓိက္ခဏေ။ပေ။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဧကံ မဟာဘူတံ ပဋိစ္စ။ပေ။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ။ပေ။. (၁)
နအာရမ္မဏပစ္စယော
၁၈. ဒဿနေန ပဟာတဗ္ဗဟေတုကံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ နအာရမ္မဏပစ္စယာ – ဒဿနေန ပဟာတဗ္ဗဟေတုကေ ခန္ဓေ ပဋိစ္စ စိတ္တသမုဋ္ဌာနံ ရူပံ. (၁)
ဘာဝနာယ ပဟာတဗ္ဗဟေတုကံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ နအာရမ္မဏပစ္စယာ – ဘာဝနာယ ပဟာတဗ္ဗဟေတုကေ ခန္ဓေ ပဋိစ္စ စိတ္တသမုဋ္ဌာနံ ရူပံ. (၁)
နေဝဒဿနေန နဘာဝနာယ ပဟာတဗ္ဗဟေတုကံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ နအာရမ္မဏပစ္စယာ – နေဝဒဿနေန နဘာဝနာယ ပဟာတဗ္ဗဟေတုကေ ခန္ဓေ ပဋိစ္စ စိတ္တသမုဋ္ဌာနံ ရူပံ၊ ဝိစိကိစ္ဆာသဟဂတံ ဥဒ္ဓစ္စသဟဂတံ မောဟံ ပဋိစ္စ စိတ္တသမုဋ္ဌာနံ ရူပံ. ပဋိသန္ဓိက္ခဏေ နေဝဒဿနေန နဘာဝနာယ ပဟာတဗ္ဗဟေတုကေ ခန္ဓေ ပဋိစ္စ ကဋတ္တာရူပံ၊ ခန္ဓေ ပဋိစ္စ ဝတ္ထု။ပေ။ ဧကံ မဟာဘူတံ။ပေ။ အသညသတ္တာနံ။ပေ။. (၁)
၁၉. ဒဿနေန ပဟာတဗ္ဗဟေတုကဉ္စ နေဝဒဿနေန နဘာဝနာယ ပဟာတဗ္ဗဟေတုကဉ္စ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ နအာရမ္မဏပစ္စယာ – ဒဿနေန ပဟာတဗ္ဗဟေတုကေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ၊ ဝိစိကိစ္ဆာသဟဂတေ ခန္ဓေ စ မောဟဉ္စ ပဋိစ္စ စိတ္တသမုဋ္ဌာနံ ရူပံ. (၁)
ဘာဝနာယ ပဟာတဗ္ဗဟေတုကဉ္စ နေဝဒဿနေန နဘာဝနာယ ပဟာတဗ္ဗဟေတုကဉ္စ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ နအာရမ္မဏပစ္စယာ – ဘာဝနာယ ပဟာတဗ္ဗဟေတုကေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ၊ ဥဒ္ဓစ္စသဟဂတေ ခန္ဓေ စ မောဟဉ္စ ပဋိစ္စ စိတ္တသမုဋ္ဌာနံ ရူပံ. (၁)
နအဓိပတိပစ္စယာဒိ
၂၀. ဒဿနေန ပဟာတဗ္ဗဟေတုကံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ နအဓိပတိပစ္စယာ။ (သဟဇာတသဒိသံ) နအနန္တရပစ္စယာ။ နသမနန္တရပစ္စယာ။ နအညမညပစ္စယာ။ နဥပနိဿယပစ္စယာ.
နပုရေဇာတပစ္စယော
၂၁. ဒဿနေန ပဟာတဗ္ဗဟေတုကံ ဓမ္မံ ပဋိစ္စ ဒဿနေန ပဟာတဗ္ဗဟေတုကော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ ဒဿနေန ပဟာတဗ္ဗဟေတုကံ ဧကံ ခန္ဓံ ပဋိစ္စ။ပေ။. (၁)
ဒဿနေန ပဟာတဗ္ဗဟေတုကံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ ဝိစိကိစ္ဆာသဟဂတေ ခန္ဓေ ပဋိစ္စ ဝိစိကိစ္ဆာသဟဂတော မောဟော၊ ဒဿနေန ပဟာတဗ္ဗဟေတုကေ ခန္ဓေ ပဋိစ္စ စိတ္တသမုဋ္ဌာနံ ရူပံ. (၂)
ဒဿနေန ပဟာတဗ္ဗဟေတုကံ ဓမ္မံ ပဋိစ္စ ဒဿနေန ပဟာတဗ္ဗဟေတုကော စ နေဝဒဿနေန နဘာဝနာယ ပဟာတဗ္ဗဟေတုကော စ ဓမ္မာ ဥပ္ပဇ္ဇန္တိ နပုရေဇာတပစ္စယာ – အရူပေ ဝိစိကိစ္ဆာသဟဂတံ ဧကံ ခန္ဓံ ပဋိစ္စ တယော ခန္ဓာ မောဟော စ။ပေ။ ဒွေ ခန္ဓေ။ပေ။. (၃)
ဘာဝနာယ ပဟာတဗ္ဗဟေတုကံ ဓမ္မံ။ တီဏိ (ဒဿနေန သဒိသံ).
၂၂. နေဝဒဿနေန နဘာဝနာယ ပဟာတဗ္ဗဟေတုကံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ နေဝဒဿနေန နဘာဝနာယ ပဟာတဗ္ဗဟေတုကံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓာ၊ နေဝဒဿနေန နဘာဝနာယ ပဟာတဗ္ဗဟေတုကေ ခန္ဓေ ပဋိစ္စ စိတ္တသမုဋ္ဌာနံ ရူပံ၊ ဝိစိကိစ္ဆာသဟဂတံ ဥဒ္ဓစ္စသဟဂတံ မောဟံ ပဋိစ္စ စိတ္တသမုဋ္ဌာနံ ရူပံ. ပဋိသန္ဓိက္ခဏေ။ပေ။ အသညသတ္တာနံ။ပေ။. (၁)
နေဝဒဿနေန နဘာဝနာယ ပဟာတဗ္ဗဟေတုကံ ဓမ္မံ ပဋိစ္စ ဒဿနေန ပဟာတဗ္ဗဟေတုကော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ ဝိစိကိစ္ဆာသဟဂတံ မောဟံ ပဋိစ္စ သမ္ပယုတ္တကာ ခန္ဓာ. (၂)
နေဝဒဿနေန နဘာဝနာယ ပဟာတဗ္ဗဟေတုကံ ဓမ္မံ ပဋိစ္စ ဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ ဥဒ္ဓစ္စသဟဂတံ မောဟံ ပဋိစ္စ သမ္ပယုတ္တကာ ခန္ဓာ. (၃)
၂၃. ဒဿနေန ပဟာတဗ္ဗဟေတုကဉ္စ နေဝဒဿနေန နဘာဝနာယ ပဟာတဗ္ဗဟေတုကဉ္စ ဓမ္မံ ပဋိစ္စ ဒဿနေန ပဟာတဗ္ဗဟေတုကော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ ဝိစိကိစ္ဆာသဟဂတံ ဧကံ ခန္ဓဉ္စ မောဟဉ္စ ပဋိစ္စ တယော ခန္ဓာ။ပေ။. (၁)
ဒဿနေန ပဟာတဗ္ဗဟေတုကဉ္စ နေဝဒဿနေန နဘာဝနာယ ပဟာတဗ္ဗဟေတုကဉ္စ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ နပုရေဇာတပစ္စယာ – ဒဿနေန ပဟာတဗ္ဗဟေတုကေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ၊ ဝိစိကိစ္ဆာသဟဂတေ ခန္ဓေ စ မောဟဉ္စ ပဋိစ္စ စိတ္တသမုဋ္ဌာနံ ရူပံ. (၂)
ဘာဝနာယ ပဟာတဗ္ဗဟေတုကဉ္စ နေဝဒဿနေန နဘာဝနာယ ပဟာတဗ္ဗဟေတုကဉ္စ ဓမ္မံ ပဋိစ္စ ဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ နပုရေဇာတပစ္စယာ (ဣမေပိ ဒွေ ကာတဗ္ဗာ).
နပစ္ဆာဇာတပစ္စယာဒိ
၂၄. ဒဿနေန ပဟာတဗ္ဗဟေတုကံ ဓမ္မံ ပဋိစ္စ ဒဿနေန ပဟာတဗ္ဗဟေတုကော ဓမ္မော ဥပ္ပဇ္ဇတိ နပစ္ဆာဇာတပစ္စယာ။ နအာသေဝနပစ္စယာ.
နကမ္မပစ္စယော
၂၅. ဒဿနေန ပဟာတဗ္ဗဟေတုကံ ဓမ္မံ ပဋိစ္စ ဒဿနေန ပဟာတဗ္ဗဟေတုကော ဓမ္မော ဥပ္ပဇ္ဇတိ နကမ္မပစ္စယာ – ဒဿနေန ပဟာတဗ္ဗဟေတုကေ ခန္ဓေ ပဋိစ္စ ဒဿနေန ပဟာတဗ္ဗဟေတုကာ စေတနာ. (၁)
ဘာဝနာယ ပဟာတဗ္ဗဟေတုကံ ဓမ္မံ ပဋိစ္စ ဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ နကမ္မပစ္စယာ – ဘာဝနာယ ပဟာတဗ္ဗဟေတုကေ ခန္ဓေ ပဋိစ္စ ဘာဝနာယ ပဟာတဗ္ဗဟေတုကာ စေတနာ. (၁)
နေဝဒဿနေန နဘာဝနာယ ပဟာတဗ္ဗဟေတုကံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ နကမ္မပစ္စယာ – နေဝဒဿနေန နဘာဝနာယ ပဟာတဗ္ဗဟေတုကေ ခန္ဓေ ပဋိစ္စ နေဝဒဿနေန နဘာဝနာယ ပဟာတဗ္ဗဟေတုကာ စေတနာ၊ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ပေ။. (၁)
နေဝဒဿနေန နဘာဝနာယ ပဟာတဗ္ဗဟေတုကံ ဓမ္မံ ပဋိစ္စ ဒဿနေန ပဟာတဗ္ဗဟေတုကော ဓမ္မော ဥပ္ပဇ္ဇတိ နကမ္မပစ္စယာ – ဝိစိကိစ္ဆာသဟဂတံ မောဟံ ပဋိစ္စ သမ္ပယုတ္တကာ စေတနာ. (၂)
နေဝဒဿနေန နဘာဝနာယ ပဟာတဗ္ဗဟေတုကံ ဓမ္မံ ပဋိစ္စ ဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ နကမ္မပစ္စယာ – ဥဒ္ဓစ္စသဟဂတံ မောဟံ ပဋိစ္စ သမ္ပယုတ္တကာ စေတနာ. (၃)
၂၆. ဒဿနေန ပဟာတဗ္ဗဟေတုကဉ္စ နေဝဒဿနေန နဘာဝနာယ ပဟာတဗ္ဗဟေတုကဉ္စ ဓမ္မံ ပဋိစ္စ ဒဿနေန ပဟာတဗ္ဗဟေတုကော ဓမ္မော ဥပ္ပဇ္ဇတိ နကမ္မပစ္စယာ – ဝိစိကိစ္ဆာသဟဂတေ ခန္ဓေ စ မောဟဉ္စ ပဋိစ္စ သမ္ပယုတ္တကာ စေတနာ. (၁)
ဘာဝနာယ ပဟာတဗ္ဗဟေတုကဉ္စ နေဝဒဿနေန နဘာဝနာယ ပဟာတဗ္ဗဟေတုကဉ္စ ဓမ္မံ ပဋိစ္စ ဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ နကမ္မပစ္စယာ – ဥဒ္ဓစ္စသဟဂတေ ခန္ဓေ စ မောဟဉ္စ ပဋိစ္စ သမ္ပယုတ္တကာ စေတနာ. (၁)
နဝိပါကပစ္စယော
၂၇. ဒဿနေန ပဟာတဗ္ဗဟေတုကံ ဓမ္မံ ပဋိစ္စ ဒဿနေန ပဟာတဗ္ဗဟေတုကော ဓမ္မော ဥပ္ပဇ္ဇတိ နဝိပါကပစ္စယာ (ပဋိသန္ဓိ နတ္ထိ).
နအာဟာရပစ္စယာဒိ
၂၈. နေဝဒဿနေန နဘာဝနာယ ပဟာတဗ္ဗဟေတုကံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ နအာဟာရပစ္စယာ – ဗာဟိရံ။ ဥတုသမုဋ္ဌာနံ။ အသညသတ္တာနံ။ပေ။ နဣန္ဒြိယပစ္စယာ – ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ၊ အသညသတ္တာနံ။ပေ။ မဟာဘူတေ ပဋိစ္စ ရူပဇီဝိတိန္ဒြိယံ။ နဈာနပစ္စယာ – ပဉ္စဝိညာဏံ။ပေ။ (မဟာဘူတာ ကာတဗ္ဗာ) နမဂ္ဂပစ္စယာ – အဟေတုကံ နေဝဒဿနေန နဘာဝနာယ ပဟာတဗ္ဗဟေတုကံ ဧကံ ခန္ဓံ။ပေ။ အသညသတ္တာနံ။ပေ။ နသမ္ပယုတ္တပစ္စယာ.
နဝိပ္ပယုတ္တပစ္စယာဒိ
၂၉. ဒဿနေန ပဟာတဗ္ဗဟေတုကံ ဓမ္မံ ပဋိစ္စ ဒဿနေန ပဟာတဗ္ဗဟေတုကော ဓမ္မော ဥပ္ပဇ္ဇတိ နဝိပ္ပယုတ္တပစ္စယာ – အရူပေ ဒဿနေန ပဟာတဗ္ဗဟေတုကံ ဧကံ ခန္ဓံ ပဋိစ္စ တယော ခန္ဓာ။ပေ။. (၁)
ဒဿနေန ပဟာတဗ္ဗဟေတုကံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ နဝိပ္ပယုတ္တပစ္စယာ – အရူပေ ဝိစိကိစ္ဆာသဟဂတေ ခန္ဓေ ပဋိစ္စ ဝိစိကိစ္ဆာသဟဂတော မောဟော. (၂)
ဒဿနေန ပဟာတဗ္ဗဟေတုကံ ဓမ္မံ ပဋိစ္စ ဒဿနေန ပဟာတဗ္ဗဟေတုကော စ နေဝဒဿနေန နဘာဝနာယ ပဟာတဗ္ဗဟေတုကော စ ဓမ္မာ ဥပ္ပဇ္ဇန္တိ နဝိပ္ပယုတ္တပစ္စယာ – အရူပေ ဝိစိကိစ္ဆာသဟဂတံ ဧကံ ခန္ဓံ ပဋိစ္စ တယော ခန္ဓာ မောဟော စ။ပေ။ ဒွေ ခန္ဓေ။ပေ။. (၃)
ဘာဝနာယ ပဟာတဗ္ဗဟေတုကံ ဓမ္မံ ပဋိစ္စ ဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ နဝိပ္ပယုတ္တပစ္စယာ – အရူပေ ဘာဝနာယ။ တီဏိ.
၃၀. နေဝဒဿနေန နဘာဝနာယ ပဟာတဗ္ဗဟေတုကံ ဓမ္မံ ပဋိစ္စ နေဝဒဿနေန နဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ နဝိပ္ပယုတ္တပစ္စယာ – အရူပေ နေဝဒဿနေန နဘာဝနာယ ပဟာတဗ္ဗဟေတုကံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ၊ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ။ပေ။. (၁)
နေဝဒဿနေန နဘာဝနာယ ပဟာတဗ္ဗဟေတုကံ ဓမ္မံ ပဋိစ္စ ဒဿနေန ပဟာတဗ္ဗဟေတုကော ဓမ္မော ဥပ္ပဇ္ဇတိ နဝိပ္ပယုတ္တပစ္စယာ – အရူပေ ဝိစိကိစ္ဆာသဟဂတံ မောဟံ ပဋိစ္စ သမ္ပယုတ္တကာ ခန္ဓာ. (၂)
နေဝဒဿနေန နဘာဝနာယ ပဟာတဗ္ဗဟေတုကံ ဓမ္မံ ပဋိစ္စ ဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ နဝိပ္ပယုတ္တပစ္စယာ – အရူပေ ဥဒ္ဓစ္စသဟဂတံ မောဟံ ပဋိစ္စ သမ္ပယုတ္တကာ ခန္ဓာ. (၃)
၃၁. ဒဿနေန ပဟာတဗ္ဗဟေတုကဉ္စ နေဝဒဿနေန နဘာဝနာယ ပဟာတဗ္ဗဟေတုကဉ္စ ဓမ္မံ ပဋိစ္စ ဒဿနေန ပဟာတဗ္ဗဟေတုကော ဓမ္မော ဥပ္ပဇ္ဇတိ နဝိပ္ပယုတ္တပစ္စယာ – အရူပေ ဝိစိကိစ္ဆာသဟဂတံ ဧကံ ခန္ဓဉ္စ မောဟဉ္စ ပဋိစ္စ တယော ခန္ဓာ။ပေ။ ဒွေ ခန္ဓာ. (၁)
ဘာဝနာယ ပဟာတဗ္ဗဟေတုကဉ္စ နေဝဒဿနေန နဘာဝနာယ ပဟာတဗ္ဗဟေတုကဉ္စ ဓမ္မံ ပဋိစ္စ ဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ နဝိပ္ပယုတ္တပစ္စယာ – အရူပေ ဥဒ္ဓစ္စသဟဂတံ ဧကံ ခန္ဓဉ္စ မောဟဉ္စ ပဋိစ္စ တယော ခန္ဓာ။ပေ။ ဒွေ ခန္ဓာ။ နောနတ္ထိပစ္စယာ။ နောဝိဂတပစ္စယာ.