၁. ဝိဘင်္ဂဝါရော

နဟေတုပစ္စယော

၆. ပီတိသဟဂတံ ဓမ္မံ ပဋိစ္စ ပီတိသဟဂတော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ ပီတိသဟဂတံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. (၁)

ပီတိသဟဂတံ ဓမ္မံ ပဋိစ္စ သုခသဟဂတော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ ပီတိသဟဂတံ ဧကံ ခန္ဓံ ပဋိစ္စ သုခသဟဂတာ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. (၂)

ပီတိသဟဂတံ ဓမ္မံ ပဋိစ္စ ပီတိသဟဂတော စ သုခသဟဂတော စ ဓမ္မာ ဥပ္ပဇ္ဇန္တိ နဟေတုပစ္စယာ – အဟေတုကံ ပီတိသဟဂတံ ဧကံ ခန္ဓံ ပဋိစ္စ ပီတိသဟဂတာ စ သုခသဟဂတာ စ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. (၃)

၇. သုခသဟဂတံ ဓမ္မံ ပဋိစ္စ သုခသဟဂတော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ သုခသဟဂတံ ဧကံ ခန္ဓံ ပဋိစ္စ ဒွေ ခန္ဓာ၊ ဒွေ ခန္ဓေ ပဋိစ္စ ဧကော ခန္ဓော. (၁)

သုခသဟဂတံ ဓမ္မံ ပဋိစ္စ ပီတိသဟဂတော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ သုခသဟဂတံ ဧကံ ခန္ဓံ ပဋိစ္စ ပီတိသဟဂတာ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. (၂)

သုခသဟဂတံ ဓမ္မံ ပဋိစ္စ ပီတိသဟဂတော စ သုခသဟဂတော စ ဓမ္မာ ဥပ္ပဇ္ဇန္တိ နဟေတုပစ္စယာ – အဟေတုကံ သုခသဟဂတံ ဧကံ ခန္ဓံ ပဋိစ္စ ပီတိသဟဂတာ စ သုခသဟဂတာ စ ဒွေ ခန္ဓာ၊ ဒွေ ခန္ဓေ ပဋိစ္စ ဧကော ခန္ဓော. (၃)

၈. ဥပေက္ခာသဟဂတံ ဓမ္မံ ပဋိစ္စ ဥပေက္ခာသဟဂတော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ ဥပေက္ခာသဟဂတံ ဧကံ ခန္ဓံ ပဋိစ္စ ဒွေ ခန္ဓာ၊ ဒွေ ခန္ဓေ ပဋိစ္စ ဧကော ခန္ဓော. အဟေတုကပဋိသန္ဓိက္ခဏေ ဥပေက္ခာသဟဂတံ ဧကံ ခန္ဓံ ပဋိစ္စ ဒွေ ခန္ဓာ၊ ဒွေ ခန္ဓေ ပဋိစ္စ ဧကော ခန္ဓော. ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

၉. ပီတိသဟဂတဉ္စ သုခသဟဂတဉ္စ ဓမ္မံ ပဋိစ္စ ပီတိသဟဂတော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ ပီတိသဟဂတဉ္စ သုခသဟဂတဉ္စ ဧကံ ခန္ဓံ ပဋိစ္စ ပီတိသဟဂတာ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. (၁)

ပီတိသဟဂတဉ္စ သုခသဟဂတဉ္စ ဓမ္မံ ပဋိစ္စ သုခသဟဂတော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ ပီတိသဟဂတဉ္စ သုခသဟဂတဉ္စ ဧကံ ခန္ဓံ ပဋိစ္စ သုခသဟဂတာ ဒွေ ခန္ဓာ၊ ဒွေ ခန္ဓေ ပဋိစ္စ ဧကော ခန္ဓော. (၂)

ပီတိသဟဂတဉ္စ သုခသဟဂတဉ္စ ဓမ္မံ ပဋိစ္စ ပီတိသဟဂတော စ သုခသဟဂတော စ ဓမ္မာ ဥပ္ပဇ္ဇန္တိ နဟေတုပစ္စယာ – အဟေတုကံ ပီတိသဟဂတဉ္စ သုခသဟဂတဉ္စ ဧကံ ခန္ဓံ ပဋိစ္စ ပီတိသဟဂတာ စ သုခသဟဂတာ စ ဒွေ ခန္ဓာ၊ ဒွေ ခန္ဓေ ပဋိစ္စ ဧကော ခန္ဓော. (၃)

နအဓိပတိ-နအာသေဝနပစ္စယာ

၁၀. ပီတိသဟဂတံ ဓမ္မံ ပဋိစ္စ ပီတိသဟဂတော ဓမ္မော ဥပ္ပဇ္ဇတိ နအဓိပတိပစ္စယာ (နအဓိပတိပဋိသန္ဓိက္ခဏေ ပရိပုဏ္ဏံ)။ နပုရေဇာတပစ္စယာ။ (‘‘အရူပေ’’တိ နိယာမေတဗ္ဗံ ‘‘ပဋိသန္ဓိက္ခဏေ’’တိ စ) နပစ္ဆာဇာတပစ္စယာ။ နအာသေဝနပစ္စယာ.

နကမ္မပစ္စယော

၁၁. ပီတိသဟဂတံ ဓမ္မံ ပဋိစ္စ ပီတိသဟဂတော ဓမ္မော ဥပ္ပဇ္ဇတိ နကမ္မပစ္စယာ – ပီတိသဟဂတေ ခန္ဓေ ပဋိစ္စ ပီတိသဟဂတာ စေတနာ.

ပီတိသဟဂတံ ဓမ္မံ ပဋိစ္စ သုခသဟဂတော ဓမ္မော ဥပ္ပဇ္ဇတိ နကမ္မပစ္စယာ – ပီတိသဟဂတေ ခန္ဓေ ပဋိစ္စ သုခသဟဂတာ စေတနာ.

(ဣမိနာ ကာရဏေန ဒသ ပဉှာ ဝိတ္ထာရေတဗ္ဗာ.)

နဝိပါကပစ္စယော

၁၂. ပီတိသဟဂတံ ဓမ္မံ ပဋိစ္စ ပီတိသဟဂတော ဓမ္မော ဥပ္ပဇ္ဇတိ နဝိပါကပစ္စယာ။ပေ။ (ပရိပုဏ္ဏံ၊ ပဋိသန္ဓိ နတ္ထိ).

နဈာနပစ္စယာဒိ

၁၃. သုခသဟဂတံ ဓမ္မံ ပဋိစ္စ သုခသဟဂတော ဓမ္မော ဥပ္ပဇ္ဇတိ နဈာနပစ္စယာ – သုခသဟဂတံ ကာယဝိညာဏသဟဂတံ ဧကံ ခန္ဓံ ပဋိစ္စ ဒွေ ခန္ဓာ၊ ဒွေ ခန္ဓေ ပဋိစ္စ ဧကော ခန္ဓော. (၁)

ဥပေက္ခာသဟဂတံ ဓမ္မံ ပဋိစ္စ ဥပေက္ခာသဟဂတော ဓမ္မော ဥပ္ပဇ္ဇတိ နဈာနပစ္စယာ – စတုဝိညာဏသဟဂတံ ဧကံ ခန္ဓံ ပဋိစ္စ ဒွေ ခန္ဓာ၊ ဒွေ ခန္ဓေ ပဋိစ္စ ဧကော ခန္ဓော. (၁)

(နမဂ္ဂပစ္စယာ နဟေတုပစ္စယသဒိသံ. မောဟော နတ္ထိ. နဝိပ္ပယုတ္တပစ္စယာ ပရိပုဏ္ဏံ အရူပပဉှမေဝ.)