၁. ဝိဘင်္ဂဝါရော

ဟေတုပစ္စယော

၁. ပီတိသဟဂတံ ဓမ္မံ ပဋိစ္စ ပီတိသဟဂတော ဓမ္မော ဥပ္ပဇ္ဇတိ ဟေတုပစ္စယာ – ပီတိသဟဂတံ ဧကံ ခန္ဓံ ပဋိစ္စ တယော ခန္ဓာ၊ တယော ခန္ဓေ ပဋိစ္စ ဧကော ခန္ဓော၊ ဒွေ ခန္ဓေ ပဋိစ္စ ဒွေ ခန္ဓာ. ပဋိသန္ဓိက္ခဏေ ပီတိသဟဂတံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. (၁)

ပီတိသဟဂတံ ဓမ္မံ ပဋိစ္စ သုခသဟဂတော ဓမ္မော ဥပ္ပဇ္ဇတိ ဟေတုပစ္စယာ – ပီတိသဟဂတံ ဧကံ ခန္ဓံ ပဋိစ္စ သုခသဟဂတာ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. ပဋိသန္ဓိက္ခဏေ ပီတိသဟဂတံ ဧကံ ခန္ဓံ ပဋိစ္စ သုခသဟဂတာ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. (၂)

ပီတိသဟဂတံ ဓမ္မံ ပဋိစ္စ ပီတိသဟဂတော စ သုခသဟဂတော စ ဓမ္မာ ဥပ္ပဇ္ဇန္တိ ဟေတုပစ္စယာ – ပီတိသဟဂတံ ဧကံ ခန္ဓံ ပဋိစ္စ ပီတိသဟဂတာ စ သုခသဟဂတာ စ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. ပဋိသန္ဓိက္ခဏေ ပီတိသဟဂတံ ဧကံ ခန္ဓံ ပဋိစ္စ ပီတိသဟဂတာ စ သုခသဟဂတာ စ တယော ခန္ဓာ ။ပေ။ ဒွေ ခန္ဓေ ပဋိစ္စ ဒွေ ခန္ဓာ. (၃)

၂. သုခသဟဂတံ ဓမ္မံ ပဋိစ္စ သုခသဟဂတော ဓမ္မော ဥပ္ပဇ္ဇတိ ဟေတုပစ္စယာ – သုခသဟဂတံ ဧကံ ခန္ဓံ ပဋိစ္စ ဒွေ ခန္ဓာ၊ ဒွေ ခန္ဓေ ပဋိစ္စ ဧကော ခန္ဓော. ပဋိသန္ဓိက္ခဏေ သုခသဟဂတံ ဧကံ ခန္ဓံ ပဋိစ္စ ဒွေ ခန္ဓာ၊ ဒွေ ခန္ဓေ ပဋိစ္စ ဧကော ခန္ဓော. (၁)

သုခသဟဂတံ ဓမ္မံ ပဋိစ္စ ပီတိသဟဂတော ဓမ္မော ဥပ္ပဇ္ဇတိ ဟေတုပစ္စယာ – သုခသဟဂတံ ဧကံ ခန္ဓံ ပဋိစ္စ ပီတိသဟဂတာ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. ပဋိသန္ဓိက္ခဏေ သုခသဟဂတံ ဧကံ ခန္ဓံ ပဋိစ္စ ပီတိသဟဂတာ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. (၂)

သုခသဟဂတံ ဓမ္မံ ပဋိစ္စ ပီတိသဟဂတော စ သုခသဟဂတော စ ဓမ္မာ ဥပ္ပဇ္ဇန္တိ ဟေတုပစ္စယာ – သုခသဟဂတံ ဧကံ ခန္ဓံ ပဋိစ္စ ပီတိသဟဂတာ စ သုခသဟဂတာ စ ဒွေ ခန္ဓာ၊ ဒွေ ခန္ဓေ ပဋိစ္စ ဧကော ခန္ဓော. ပဋိသန္ဓိက္ခဏေ သုခသဟဂတံ ဧကံ ခန္ဓံ ပဋိစ္စ ပီတိသဟဂတာ စ သုခသဟဂတာ စ ဒွေ ခန္ဓာ၊ ဒွေ ခန္ဓေ ပဋိစ္စ ဧကော ခန္ဓော. (၃)

၃. ဥပေက္ခာသဟဂတံ ဓမ္မံ ပဋိစ္စ ဥပေက္ခာသဟဂတော ဓမ္မော ဥပ္ပဇ္ဇတိ ဟေတုပစ္စယာ – ဥပေက္ခာသဟဂတံ ဧကံ ခန္ဓံ ပဋိစ္စ ဒွေ ခန္ဓာ၊ ဒွေ ခန္ဓေ ပဋိစ္စ ဧကော ခန္ဓော. ပဋိသန္ဓိက္ခဏေ။ပေ။. (၁)

ပီတိသဟဂတဉ္စ သုခသဟဂတဉ္စ ဓမ္မံ ပဋိစ္စ ပီတိသဟဂတော ဓမ္မော ဥပ္ပဇ္ဇတိ ဟေတုပစ္စယာ – ပီတိသဟဂတဉ္စ သုခသဟဂတဉ္စ ဧကံ ခန္ဓံ ပဋိစ္စ ပီတိသဟဂတာ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. ပဋိသန္ဓိက္ခဏေ ပီတိသဟဂတဉ္စ သုခသဟဂတဉ္စ ဧကံ ခန္ဓံ ပဋိစ္စ ပီတိသဟဂတာ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. (၁)

ပီတိသဟဂတဉ္စ သုခသဟဂတဉ္စ ဓမ္မံ ပဋိစ္စ သုခသဟဂတော ဓမ္မော ဥပ္ပဇ္ဇတိ ဟေတုပစ္စယာ – ပီတိသဟဂတဉ္စ သုခသဟဂတဉ္စ ဧကံ ခန္ဓံ ပဋိစ္စ သုခသဟဂတာ ဒွေ ခန္ဓာ၊ ဒွေ ခန္ဓေ ပဋိစ္စ ဧကော ခန္ဓော. ပဋိသန္ဓိက္ခဏေ ပီတိသဟဂတဉ္စ သုခသဟဂတဉ္စ ဧကံ ခန္ဓံ ပဋိစ္စ သုခသဟဂတာ ဒွေ ခန္ဓာ၊ ဒွေ ခန္ဓေ ပဋိစ္စ ဧကော ခန္ဓော. (၂)

ပီတိသဟဂတဉ္စ သုခသဟဂတဉ္စ ဓမ္မံ ပဋိစ္စ ပီတိသဟဂတော စ သုခသဟဂတော စ ဓမ္မာ ဥပ္ပဇ္ဇန္တိ ဟေတုပစ္စယာ – ပီတိသဟဂတဉ္စ သုခသဟဂတဉ္စ ဧကံ ခန္ဓံ ပဋိစ္စ ပီတိသဟဂတာ စ သုခသဟဂတာ စ ဒွေ ခန္ဓာ၊ ဒွေ ခန္ဓေ ပဋိစ္စ ဧကော ခန္ဓော. ပဋိသန္ဓိက္ခဏေ ပီတိသဟဂတဉ္စ သုခသဟဂတဉ္စ ဧကံ ခန္ဓံ ပဋိစ္စ ပီတိသဟဂတာ စ သုခသဟဂတာ စ ဒွေ ခန္ဓာ၊ ဒွေ ခန္ဓေ ပဋိစ္စ ဧကော ခန္ဓော. (၃)

အာရမ္မဏပစ္စယာဒိ

၄. ပီတိသဟဂတံ ဓမ္မံ ပဋိစ္စ ပီတိသဟဂတော ဓမ္မော ဥပ္ပဇ္ဇတိ အာရမ္မဏပစ္စယာ။ အဓိပတိပစ္စယာ။ (ပဋိသန္ဓိက္ခဏေ နတ္ထိ) အနန္တရပစ္စယာ။ သမနန္တရပစ္စယာ။ သဟဇာတပစ္စယာ။ အညမညပစ္စယာ။ နိဿယပစ္စယာ။ ဥပနိဿယပစ္စယာ။ ပုရေဇာတပစ္စယာ။ (ပုရေဇာတေ ပဋိသန္ဓိက္ခဏေ နတ္ထိ) အာသေဝနပစ္စယာ။ (အာသေဝနေ ဝိပါကံ နတ္ထိ) ကမ္မပစ္စယာ။ ဝိပါကပစ္စယာ။ အာဟာရ။ပေ။ ဣန္ဒြိယ။ ဈာန။ မဂ္ဂ။ သမ္ပယုတ္တ။ ဝိပ္ပယုတ္တ။ အတ္ထိ။ နတ္ထိ။ ဝိဂတ။ အဝိဂတပစ္စယာ.