၁. ဝိဘင်္ဂဝါရော

ဟေတုပစ္စယော

၁. သဝိတက္ကသဝိစာရံ ဓမ္မံ ပဋိစ္စ သဝိတက္ကသဝိစာရော ဓမ္မော ဥပ္ပဇ္ဇတိ ဟေတုပစ္စယာ – သဝိတက္ကသဝိစာရံ ဧကံ ခန္ဓံ ပဋိစ္စ တယော ခန္ဓာ၊ တယော ခန္ဓေ ပဋိစ္စ ဧကော ခန္ဓော၊ ဒွေ ခန္ဓေ ပဋိစ္စ ဒွေ ခန္ဓာ. ပဋိသန္ဓိက္ခဏေ သဝိတက္ကသဝိစာရံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. (၁)

သဝိတက္ကသဝိစာရံ ဓမ္မံ ပဋိစ္စ အဝိတက္ကဝိစာရမတ္တော ဓမ္မော ဥပ္ပဇ္ဇတိ ဟေတုပစ္စယာ – သဝိတက္ကသဝိစာရေ ခန္ဓေ ပဋိစ္စ ဝိတက္ကော. ပဋိသန္ဓိက္ခဏေ သဝိတက္ကသဝိစာရေ ခန္ဓေ ပဋိစ္စ ဝိတက္ကော. (၂)

သဝိတက္ကသဝိစာရံ ဓမ္မံ ပဋိစ္စ အဝိတက္ကအဝိစာရော ဓမ္မော ဥပ္ပဇ္ဇတိ ဟေတုပစ္စယာ – သဝိတက္ကသဝိစာရေ ခန္ဓေ ပဋိစ္စ စိတ္တသမုဋ္ဌာနံ ရူပံ. ပဋိသန္ဓိက္ခဏေ သဝိတက္ကသဝိစာရေ ခန္ဓေ ပဋိစ္စ ကဋတ္တာရူပံ. (၃)

သဝိတက္ကသဝိစာရံ ဓမ္မံ ပဋိစ္စ သဝိတက္ကသဝိစာရော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ ဟေတုပစ္စယာ – သဝိတက္ကသဝိစာရံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ရူပံ. ပဋိသန္ဓိက္ခဏေ သဝိတက္ကသဝိစာရံ ဧကံ ခန္ဓံ ပဋိစ္စ တယော ခန္ဓာ ကဋတ္တာ စ ရူပံ။ပေ။ ဒွေ ခန္ဓေ ပဋိစ္စ ဒွေ ခန္ဓာ ကဋတ္တာ စ ရူပံ. (၄)

သဝိတက္ကသဝိစာရံ ဓမ္မံ ပဋိစ္စ အဝိတက္ကဝိစာရမတ္တော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ ဟေတုပစ္စယာ – သဝိတက္ကသဝိစာရေ ခန္ဓေ ပဋိစ္စ ဝိတက္ကော စိတ္တသမုဋ္ဌာနဉ္စ ရူပံ. ပဋိသန္ဓိက္ခဏေ သဝိတက္ကသဝိစာရေ ခန္ဓေ ပဋိစ္စ ဝိတက္ကော ကဋတ္တာ စ ရူပံ. (၅)

သဝိတက္ကသဝိစာရံ ဓမ္မံ ပဋိစ္စ သဝိတက္ကသဝိစာရော စ အဝိတက္ကဝိစာရမတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ – သဝိတက္ကသဝိစာရံ ဧကံ ခန္ဓံ ပဋိစ္စ တယော ခန္ဓာ ဝိတက္ကော စ။ပေ။ ဒွေ ခန္ဓေ ပဋိစ္စ ဒွေ ခန္ဓာ ဝိတက္ကော စ. ပဋိသန္ဓိက္ခဏေ သဝိတက္ကသဝိစာရံ ဧကံ ခန္ဓံ ပဋိစ္စ တယော ခန္ဓာ ဝိတက္ကော စ။ပေ။ ဒွေ ခန္ဓေ ပဋိစ္စ ဒွေ ခန္ဓာ ဝိတက္ကော စ. (၆)

သဝိတက္ကသဝိစာရံ ဓမ္မံ ပဋိစ္စ သဝိတက္ကသဝိစာရော စ အဝိတက္ကဝိစာရမတ္တော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ ဟေတုပစ္စယာ – သဝိတက္ကသဝိစာရံ ဧကံ ခန္ဓံ ပဋိစ္စ တယော ခန္ဓာ ဝိတက္ကော စ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ ပဋိစ္စ ဒွေ ခန္ဓာ ဝိတက္ကော စ စိတ္တသမုဋ္ဌာနဉ္စ ရူပံ. ပဋိသန္ဓိက္ခဏေ သဝိတက္ကသဝိစာရံ ဧကံ ခန္ဓံ ပဋိစ္စ တယော ခန္ဓာ ဝိတက္ကော စ ကဋတ္တာ စ ရူပံ။ပေ။ ဒွေ ခန္ဓေ ပဋိစ္စ ဒွေ ခန္ဓာ ဝိတက္ကော စ ကဋတ္တာ စ ရူပံ. (၇)

၂. အဝိတက္ကဝိစာရမတ္တံ ဓမ္မံ ပဋိစ္စ အဝိတက္ကဝိစာရမတ္တော ဓမ္မော ဥပ္ပဇ္ဇတိ ဟေတုပစ္စယာ – အဝိတက္ကဝိစာရမတ္တံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. ပဋိသန္ဓိက္ခဏေ အဝိတက္ကဝိစာရမတ္တံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. (၁)

အဝိတက္ကဝိစာရမတ္တံ ဓမ္မံ ပဋိစ္စ သဝိတက္ကသဝိစာရော ဓမ္မော ဥပ္ပဇ္ဇတိ ဟေတုပစ္စယာ – ဝိတက္ကံ ပဋိစ္စ သဝိတက္ကသဝိစာရာ ခန္ဓာ. ပဋိသန္ဓိက္ခဏေ ဝိတက္ကံ ပဋိစ္စ သဝိတက္ကသဝိစာရာ ခန္ဓာ. (၂)

အဝိတက္ကဝိစာရမတ္တံ ဓမ္မံ ပဋိစ္စ အဝိတက္ကအဝိစာရော ဓမ္မော ဥပ္ပဇ္ဇတိ ဟေတုပစ္စယာ – အဝိတက္ကဝိစာရမတ္တေ ခန္ဓေ ပဋိစ္စ ဝိစာရော စိတ္တသမုဋ္ဌာနဉ္စ ရူပံ၊ ဝိတက္ကံ ပဋိစ္စ စိတ္တသမုဋ္ဌာနံ ရူပံ. ပဋိသန္ဓိက္ခဏေ အဝိတက္ကဝိစာရမတ္တေ ခန္ဓေ ပဋိစ္စ ဝိစာရော ကဋတ္တာ စ ရူပံ. ပဋိသန္ဓိက္ခဏေ ဝိတက္ကံ ပဋိစ္စ ကဋတ္တာရူပံ. (၃)

အဝိတက္ကဝိစာရမတ္တံ ဓမ္မံ ပဋိစ္စ သဝိတက္ကသဝိစာရော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ ဟေတုပစ္စယာ – ဝိတက္ကံ ပဋိစ္စ သဝိတက္ကသဝိစာရာ ခန္ဓာ စိတ္တသမုဋ္ဌာနဉ္စ ရူပံ. ပဋိသန္ဓိက္ခဏေ ဝိတက္ကံ ပဋိစ္စ သဝိတက္ကသဝိစာရာ ခန္ဓာ ကဋတ္တာ စ ရူပံ. (၄)

အဝိတက္ကဝိစာရမတ္တံ ဓမ္မံ ပဋိစ္စ အဝိတက္ကဝိစာရမတ္တော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ ဟေတုပစ္စယာ – အဝိတက္ကဝိစာရမတ္တံ ဧကံ ခန္ဓံ ပဋိစ္စ တယော ခန္ဓာ ဝိစာရော စ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ ပဋိစ္စ ဒွေ ခန္ဓာ ဝိစာရော စ စိတ္တသမုဋ္ဌာနဉ္စ ရူပံ. ပဋိသန္ဓိက္ခဏေ အဝိတက္ကဝိစာရမတ္တံ ဧကံ ခန္ဓံ ပဋိစ္စ တယော ခန္ဓာ ဝိစာရော စ ကဋတ္တာ စ ရူပံ။ပေ။ ဒွေ ခန္ဓေ ပဋိစ္စ ဒွေ ခန္ဓာ ဝိစာရော စ ကဋတ္တာ စ ရူပံ. (၅)

၃. အဝိတက္ကအဝိစာရံ ဓမ္မံ ပဋိစ္စ အဝိတက္ကအဝိစာရော ဓမ္မော ဥပ္ပဇ္ဇတိ ဟေတုပစ္စယာ – အဝိတက္ကအဝိစာရံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ရူပံ၊ ဝိစာရံ ပဋိစ္စ စိတ္တသမုဋ္ဌာနံ ရူပံ. ပဋိသန္ဓိက္ခဏေ အဝိတက္ကအဝိစာရံ ဧကံ ခန္ဓံ ပဋိစ္စ တယော ခန္ဓာ ကဋတ္တာ စ ရူပံ။ပေ။ ဒွေ ခန္ဓေ ပဋိစ္စ ဒွေ ခန္ဓာ ကဋတ္တာ စ ရူပံ. ပဋိသန္ဓိက္ခဏေ ဝိစာရံ ပဋိစ္စ ကဋတ္တာရူပံ၊ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဝိစာရံ ပဋိစ္စ ဝတ္ထု၊ ဝတ္ထုံ ပဋိစ္စ ဝိစာရော. ဧကံ မဟာဘူတံ ပဋိစ္စ တယော မဟာဘူတာ။ပေ။ မဟာဘူတေ ပဋိစ္စ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ. (၁)

အဝိတက္ကအဝိစာရံ ဓမ္မံ ပဋိစ္စ သဝိတက္ကသဝိစာရော ဓမ္မော ဥပ္ပဇ္ဇတိ ဟေတုပစ္စယာ – ပဋိသန္ဓိက္ခဏေ ဝတ္ထုံ ပဋိစ္စ သဝိတက္ကသဝိစာရာ ခန္ဓာ. (၂)

အဝိတက္ကအဝိစာရံ ဓမ္မံ ပဋိစ္စ အဝိတက္ကဝိစာရမတ္တော ဓမ္မော ဥပ္ပဇ္ဇတိ ဟေတုပစ္စယာ – ဝိစာရံ ပဋိစ္စ အဝိတက္ကဝိစာရမတ္တာ ခန္ဓာ. ပဋိသန္ဓိက္ခဏေ ဝိစာရံ ပဋိစ္စ အဝိတက္ကဝိစာရမတ္တာ ခန္ဓာ. ပဋိသန္ဓိက္ခဏေ ဝတ္ထုံ ပဋိစ္စ အဝိတက္ကဝိစာရမတ္တာ ခန္ဓာ. ပဋိသန္ဓိက္ခဏေ ဝတ္ထုံ ပဋိစ္စ ဝိတက္ကော. (၃)

အဝိတက္ကအဝိစာရံ ဓမ္မံ ပဋိစ္စ သဝိတက္ကသဝိစာရော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ ဟေတုပစ္စယာ – ပဋိသန္ဓိက္ခဏေ ဝတ္ထုံ ပဋိစ္စ သဝိတက္ကသဝိစာရာ ခန္ဓာ၊ မဟာဘူတေ ပဋိစ္စ ကဋတ္တာရူပံ. (၄)

အဝိတက္ကအဝိစာရံ ဓမ္မံ ပဋိစ္စ အဝိတက္ကဝိစာရမတ္တော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ ဟေတုပစ္စယာ – ဝိစာရံ ပဋိစ္စ အဝိတက္ကဝိစာရမတ္တာ ခန္ဓာ စိတ္တသမုဋ္ဌာနဉ္စ ရူပံ. ပဋိသန္ဓိက္ခဏေ ဝိစာရံ ပဋိစ္စ အဝိတက္ကဝိစာရမတ္တာ ခန္ဓာ ကဋတ္တာ စ ရူပံ. ပဋိသန္ဓိက္ခဏေ ဝတ္ထုံ ပဋိစ္စ အဝိတက္ကဝိစာရမတ္တာ ခန္ဓာ၊ မဟာဘူတေ ပဋိစ္စ ကဋတ္တာရူပံ. ပဋိသန္ဓိက္ခဏေ ဝတ္ထုံ ပဋိစ္စ ဝိတက္ကော၊ မဟာဘူတေ ပဋိစ္စ ကဋတ္တာရူပံ. ပဋိသန္ဓိက္ခဏေ ဝတ္ထုံ ပဋိစ္စ အဝိတက္ကဝိစာရမတ္တာ ခန္ဓာ စ ဝိစာရော စ. (၅)

အဝိတက္ကအဝိစာရံ ဓမ္မံ ပဋိစ္စ သဝိတက္ကသဝိစာရော စ အဝိတက္ကဝိစာရမတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ – ပဋိသန္ဓိက္ခဏေ ဝတ္ထုံ ပဋိစ္စ သဝိတက္ကသဝိစာရာ ခန္ဓာ စ ဝိတက္ကော စ. (၆)

အဝိတက္ကအဝိစာရံ ဓမ္မံ ပဋိစ္စ သဝိတက္ကသဝိစာရော စ အဝိတက္ကဝိစာရမတ္တော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ ဟေတုပစ္စယာ – ပဋိသန္ဓိက္ခဏေ ဝတ္ထုံ ပဋိစ္စ သဝိတက္ကသဝိစာရာ ခန္ဓာ စ ဝိတက္ကော စ၊ မဟာဘူတေ ပဋိစ္စ ကဋတ္တာရူပံ. (၇)

၄. သဝိတက္ကသဝိစာရဉ္စ အဝိတက္ကအဝိစာရဉ္စ ဓမ္မံ ပဋိစ္စ သဝိတက္ကသဝိစာရော ဓမ္မော ဥပ္ပဇ္ဇတိ ဟေတုပစ္စယာ – ပဋိသန္ဓိက္ခဏေ သဝိတက္ကသဝိစာရံ ဧကံ ခန္ဓဉ္စ ဝတ္ထုဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ ဝတ္ထုဉ္စ ပဋိစ္စ ဒွေ ခန္ဓာ. (၁)

သဝိတက္ကသဝိစာရဉ္စ အဝိတက္ကအဝိစာရဉ္စ ဓမ္မံ ပဋိစ္စ အဝိတက္ကဝိစာရမတ္တော ဓမ္မော ဥပ္ပဇ္ဇတိ ဟေတုပစ္စယာ – ပဋိသန္ဓိက္ခဏေ သဝိတက္ကသဝိစာရေ ခန္ဓေ စ ဝတ္ထုဉ္စ ပဋိစ္စ ဝိတက္ကော. (၂)

သဝိတက္ကသဝိစာရဉ္စ အဝိတက္ကအဝိစာရဉ္စ ဓမ္မံ ပဋိစ္စ အဝိတက္ကအဝိစာရော ဓမ္မော ဥပ္ပဇ္ဇတိ ဟေတုပစ္စယာ – သဝိတက္ကသဝိစာရေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ. ပဋိသန္ဓိက္ခဏေ သဝိတက္ကသဝိစာရေ ခန္ဓေ စ မဟာဘူတေ စ ပဋိစ္စ ကဋတ္တာရူပံ. (၃)

သဝိတက္ကသဝိစာရဉ္စ အဝိတက္ကအဝိစာရဉ္စ ဓမ္မံ ပဋိစ္စ သဝိတက္ကသဝိစာရော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ ဟေတုပစ္စယာ – ပဋိသန္ဓိက္ခဏေ သဝိတက္ကသဝိစာရံ ဧကံ ခန္ဓဉ္စ ဝတ္ထုဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ ဝတ္ထုဉ္စ ပဋိစ္စ ဒွေ ခန္ဓာ၊ သဝိတက္ကသဝိစာရေ ခန္ဓေ စ မဟာဘူတေ စ ပဋိစ္စ ကဋတ္တာရူပံ. (၄)

သဝိတက္ကသဝိစာရဉ္စ အဝိတက္ကအဝိစာရဉ္စ ဓမ္မံ ပဋိစ္စ အဝိတက္ကဝိစာရမတ္တော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ ဟေတုပစ္စယာ – ပဋိသန္ဓိက္ခဏေ သဝိတက္ကသဝိစာရေ ခန္ဓေ စ ဝတ္ထုဉ္စ ပဋိစ္စ ဝိတက္ကော၊ သဝိတက္ကသဝိစာရေ ခန္ဓေ စ မဟာဘူတေ စ ပဋိစ္စ ကဋတ္တာရူပံ. (၅)

သဝိတက္ကသဝိစာရဉ္စ အဝိတက္ကအဝိစာရဉ္စ ဓမ္မံ ပဋိစ္စ သဝိတက္ကသဝိစာရော စ အဝိတက္ကဝိစာရမတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ – ပဋိသန္ဓိက္ခဏေ သဝိတက္ကသဝိစာရံ ဧကံ ခန္ဓဉ္စ ဝတ္ထုဉ္စ ပဋိစ္စ တယော ခန္ဓာ ဝိတက္ကော စ။ပေ။ ဒွေ ခန္ဓေ စ ဝတ္ထုဉ္စ ပဋိစ္စ ဒွေ ခန္ဓာ ဝိတက္ကော စ. (၆)

သဝိတက္ကသဝိစာရဉ္စ အဝိတက္ကအဝိစာရဉ္စ ဓမ္မံ ပဋိစ္စ သဝိတက္ကသဝိစာရော စ အဝိတက္ကဝိစာရမတ္တော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ ဟေတုပစ္စယာ – ပဋိသန္ဓိက္ခဏေ သဝိတက္ကသဝိစာရံ ဧကံ ခန္ဓဉ္စ ဝတ္ထုဉ္စ ပဋိစ္စ တယော ခန္ဓာ ဝိတက္ကော စ။ပေ။ ဒွေ ခန္ဓေ စ ဝတ္ထုဉ္စ ပဋိစ္စ ဒွေ ခန္ဓာ ဝိတက္ကော စ၊ သဝိတက္ကသဝိစာရေ ခန္ဓေ စ မဟာဘူတေ စ ပဋိစ္စ ကဋတ္တာရူပံ. (၇)

၅. အဝိတက္ကဝိစာရမတ္တဉ္စ အဝိတက္ကအဝိစာရဉ္စ ဓမ္မံ ပဋိစ္စ သဝိတက္ကသဝိစာရော ဓမ္မော ဥပ္ပဇ္ဇတိ ဟေတုပစ္စယာ – ပဋိသန္ဓိက္ခဏေ ဝိတက္ကဉ္စ ဝတ္ထုဉ္စ ပဋိစ္စ သဝိတက္ကသဝိစာရာ ခန္ဓာ. (၁)

အဝိတက္ကဝိစာရမတ္တဉ္စ အဝိတက္ကအဝိစာရဉ္စ ဓမ္မံ ပဋိစ္စ အဝိတက္ကဝိစာရမတ္တော ဓမ္မော ဥပ္ပဇ္ဇတိ ဟေတုပစ္စယာ – အဝိတက္ကဝိစာရမတ္တံ ဧကံ ခန္ဓဉ္စ ဝိစာရဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ ဝိစာရဉ္စ ပဋိစ္စ ဒွေ ခန္ဓာ. ပဋိသန္ဓိက္ခဏေ အဝိတက္ကဝိစာရမတ္တံ ဧကံ ခန္ဓဉ္စ ဝိစာရဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ ဝိစာရဉ္စ ပဋိစ္စ ဒွေ ခန္ဓာ. ပဋိသန္ဓိက္ခဏေ အဝိတက္ကဝိစာရမတ္တံ ဧကံ ခန္ဓဉ္စ ဝတ္ထုဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ ဝတ္ထုဉ္စ ပဋိစ္စ ဒွေ ခန္ဓာ. (၂)

အဝိတက္ကဝိစာရမတ္တဉ္စ အဝိတက္ကအဝိစာရဉ္စ ဓမ္မံ ပဋိစ္စ အဝိတက္ကအဝိစာရော ဓမ္မော ဥပ္ပဇ္ဇတိ ဟေတုပစ္စယာ – အဝိတက္ကဝိစာရမတ္တေ ခန္ဓေ စ ဝိစာရဉ္စ ပဋိစ္စ စိတ္တသမုဋ္ဌာနံ ရူပံ၊ အဝိတက္ကဝိစာရမတ္တေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ၊ ဝိတက္ကဉ္စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ. ပဋိသန္ဓိက္ခဏေ အဝိတက္ကဝိစာရမတ္တေ ခန္ဓေ စ ဝိစာရဉ္စ ပဋိစ္စ ကဋတ္တာရူပံ. ပဋိသန္ဓိက္ခဏေ အဝိတက္ကဝိစာရမတ္တေ ခန္ဓေ စ မဟာဘူတေ စ ပဋိစ္စ ကဋတ္တာရူပံ. ပဋိသန္ဓိက္ခဏေ ဝိတက္ကဉ္စ မဟာဘူတေ စ ပဋိစ္စ ကဋတ္တာရူပံ. ပဋိသန္ဓိက္ခဏေ အဝိတက္ကဝိစာရမတ္တေ ခန္ဓေ စ ဝတ္ထုဉ္စ ပဋိစ္စ ဝိစာရော. (၃)

အဝိတက္ကဝိစာရမတ္တဉ္စ အဝိတက္ကအဝိစာရဉ္စ ဓမ္မံ ပဋိစ္စ သဝိတက္ကသဝိစာရော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ ဟေတုပစ္စယာ – ပဋိသန္ဓိက္ခဏေ ဝိတက္ကဉ္စ ဝတ္ထုဉ္စ ပဋိစ္စ သဝိတက္ကသဝိစာရာ ခန္ဓာ၊ ဝိတက္ကဉ္စ မဟာဘူတေ စ ပဋိစ္စ ကဋတ္တာရူပံ. (၄)

အဝိတက္ကဝိစာရမတ္တဉ္စ အဝိတက္ကအဝိစာရဉ္စ ဓမ္မံ ပဋိစ္စ အဝိတက္ကဝိစာရမတ္တော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ ဟေတုပစ္စယာ – အဝိတက္ကဝိစာရမတ္တံ ဧကံ ခန္ဓဉ္စ ဝိစာရဉ္စ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ စ ဝိစာရဉ္စ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ရူပံ. ပဋိသန္ဓိက္ခဏေ အဝိတက္ကဝိစာရမတ္တံ ဧကံ ခန္ဓဉ္စ ဝိစာရဉ္စ ပဋိစ္စ တယော ခန္ဓာ ကဋတ္တာ စ ရူပံ။ပေ။ ဒွေ ခန္ဓေ စ ဝိစာရဉ္စ ပဋိစ္စ ဒွေ ခန္ဓာ ကဋတ္တာ စ ရူပံ. ပဋိသန္ဓိက္ခဏေ အဝိတက္ကဝိစာရမတ္တံ ဧကံ ခန္ဓဉ္စ ဝတ္ထုဉ္စ ပဋိစ္စ တယော ခန္ဓာ ဝိစာရော စ။ပေ။ ဒွေ ခန္ဓေ စ ဝတ္ထုဉ္စ ပဋိစ္စ ဒွေ ခန္ဓာ ဝိစာရော စ. (၅)

၆. သဝိတက္ကသဝိစာရဉ္စ အဝိတက္ကဝိစာရမတ္တဉ္စ ဓမ္မံ ပဋိစ္စ သဝိတက္ကသဝိစာရော ဓမ္မော ဥပ္ပဇ္ဇတိ ဟေတုပစ္စယာ – သဝိတက္ကသဝိစာရံ ဧကံ ခန္ဓဉ္စ ဝိတက္ကဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ ဝိတက္ကဉ္စ ပဋိစ္စ ဒွေ ခန္ဓာ. ပဋိသန္ဓိက္ခဏေ သဝိတက္ကသဝိစာရံ ဧကံ ခန္ဓဉ္စ ဝိတက္ကဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ ဝိတက္ကဉ္စ ပဋိစ္စ ဒွေ ခန္ဓာ. (၁)

သဝိတက္ကသဝိစာရဉ္စ အဝိတက္ကဝိစာရမတ္တဉ္စ ဓမ္မံ ပဋိစ္စ အဝိတက္ကအဝိစာရော ဓမ္မော ဥပ္ပဇ္ဇတိ ဟေတုပစ္စယာ – သဝိတက္ကသဝိစာရေ ခန္ဓေ စ ဝိတက္ကဉ္စ ပဋိစ္စ စိတ္တသမုဋ္ဌာနံ ရူပံ. ပဋိသန္ဓိက္ခဏေ သဝိတက္ကသဝိစာရေ ခန္ဓေ စ ဝိတက္ကဉ္စ ပဋိစ္စ ကဋတ္တာရူပံ. (၂)

သဝိတက္ကသဝိစာရဉ္စ အဝိတက္ကဝိစာရမတ္တဉ္စ ဓမ္မံ ပဋိစ္စ သဝိတက္ကသဝိစာရော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ ဟေတုပစ္စယာ – သဝိတက္ကသဝိစာရံ ဧကံ ခန္ဓဉ္စ ဝိတက္ကဉ္စ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ စ ဝိတက္ကဉ္စ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ရူပံ. ပဋိသန္ဓိက္ခဏေ သဝိတက္ကသဝိစာရံ ဧကံ ခန္ဓဉ္စ ဝိတက္ကဉ္စ ပဋိစ္စ တယော ခန္ဓာ ကဋတ္တာ စ ရူပံ။ပေ။ ဒွေ ခန္ဓေ စ ဝိတက္ကဉ္စ ပဋိစ္စ ဒွေ ခန္ဓာ ကဋတ္တာ စ ရူပံ. (၃)

၇. သဝိတက္ကသဝိစာရဉ္စ အဝိတက္ကဝိစာရမတ္တဉ္စ အဝိတက္ကအဝိစာရဉ္စ ဓမ္မံ ပဋိစ္စ သဝိတက္ကသဝိစာရော ဓမ္မော ဥပ္ပဇ္ဇတိ ဟေတုပစ္စယာ – ပဋိသန္ဓိက္ခဏေ သဝိတက္ကသဝိစာရံ ဧကံ ခန္ဓဉ္စ ဝိတက္ကဉ္စ ဝတ္ထုဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ ဝိတက္ကဉ္စ ဝတ္ထုဉ္စ ပဋိစ္စ ဒွေ ခန္ဓာ. (၁)

သဝိတက္ကသဝိစာရဉ္စ အဝိတက္ကဝိစာရမတ္တဉ္စ အဝိတက္ကအဝိစာရဉ္စ ဓမ္မံ ပဋိစ္စ အဝိတက္ကအဝိစာရော ဓမ္မော ဥပ္ပဇ္ဇတိ ဟေတုပစ္စယာ – သဝိတက္ကသဝိစာရေ ခန္ဓေ စ ဝိတက္ကဉ္စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ. ပဋိသန္ဓိက္ခဏေ သဝိတက္ကသဝိစာရေ ခန္ဓေ စ ဝိတက္ကဉ္စ မဟာဘူတေ စ ပဋိစ္စ ကဋတ္တာရူပံ. (၂)

သဝိတက္ကသဝိစာရဉ္စ အဝိတက္ကဝိစာရမတ္တဉ္စ အဝိတက္ကအဝိစာရဉ္စ ဓမ္မံ ပဋိစ္စ သဝိတက္ကသဝိစာရော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ ဟေတုပစ္စယာ – ပဋိသန္ဓိက္ခဏေ သဝိတက္ကသဝိစာရံ ဧကံ ခန္ဓဉ္စ ဝိတက္ကဉ္စ ဝတ္ထုဉ္စ ပဋိစ္စ တယော ခန္ဓာ၊ တယော ခန္ဓေ စ ဝိတက္ကဉ္စ ဝတ္ထုဉ္စ ပဋိစ္စ ဧကော ခန္ဓော၊ ဒွေ ခန္ဓေ စ ဝိတက္ကဉ္စ ဝတ္ထုဉ္စ ပဋိစ္စ ဒွေ ခန္ဓာ၊ သဝိတက္ကသဝိစာရေ ခန္ဓေ စ ဝိတက္ကဉ္စ မဟာဘူတေ စ ပဋိစ္စ ကဋတ္တာရူပံ. (၃)

အာရမ္မဏပစ္စယော

၈. သဝိတက္ကသဝိစာရံ ဓမ္မံ ပဋိစ္စ သဝိတက္ကသဝိစာရော ဓမ္မော ဥပ္ပဇ္ဇတိ အာရမ္မဏပစ္စယာ – သဝိတက္ကသဝိစာရံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. ပဋိသန္ဓိက္ခဏေ။ပေ။. (၁)

သဝိတက္ကသဝိစာရံ ဓမ္မံ ပဋိစ္စ အဝိတက္ကဝိစာရမတ္တော ဓမ္မော ဥပ္ပဇ္ဇတိ အာရမ္မဏပစ္စယာ – သဝိတက္ကသဝိစာရေ ခန္ဓေ ပဋိစ္စ ဝိတက္ကော. ပဋိသန္ဓိက္ခဏေ။ပေ။. (၂)

သဝိတက္ကသဝိစာရံ ဓမ္မံ ပဋိစ္စ သဝိတက္ကသဝိစာရော စ အဝိတက္ကဝိစာရမတ္တော စ ဓမ္မာ ဥပ္ပဇ္ဇန္တိ အာရမ္မဏပစ္စယာ – သဝိတက္ကသဝိစာရံ ဧကံ ခန္ဓံ ပဋိစ္စ တယော ခန္ဓာ ဝိတက္ကော စ။ပေ။ ဒွေ ခန္ဓေ ပဋိစ္စ ဒွေ ခန္ဓာ ဝိတက္ကော စ. ပဋိသန္ဓိက္ခဏေ။ပေ။. (၃)

၉. အဝိတက္ကဝိစာရမတ္တံ ဓမ္မံ ပဋိစ္စ အဝိတက္ကဝိစာရမတ္တော ဓမ္မော ဥပ္ပဇ္ဇတိ အာရမ္မဏပစ္စယာ – အဝိတက္ကဝိစာရမတ္တံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. ပဋိသန္ဓိက္ခဏေ။ပေ။. (၁)

အဝိတက္ကဝိစာရမတ္တံ ဓမ္မံ ပဋိစ္စ သဝိတက္ကသဝိစာရော ဓမ္မော ဥပ္ပဇ္ဇတိ အာရမ္မဏပစ္စယာ – ဝိတက္ကံ ပဋိစ္စ သဝိတက္ကသဝိစာရာ ခန္ဓာ. ပဋိသန္ဓိက္ခဏေ။ပေ။. (၂)

အဝိတက္ကဝိစာရမတ္တံ ဓမ္မံ ပဋိစ္စ အဝိတက္ကအဝိစာရော ဓမ္မော ဥပ္ပဇ္ဇတိ အာရမ္မဏပစ္စယာ – အဝိတက္ကဝိစာရမတ္တေ ခန္ဓေ ပဋိစ္စ ဝိစာရော. ပဋိသန္ဓိက္ခဏေ။ပေ။. (၃)

အဝိတက္ကဝိစာရမတ္တံ ဓမ္မံ ပဋိစ္စ အဝိတက္ကဝိစာရမတ္တော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ အာရမ္မဏပစ္စယာ – အဝိတက္ကဝိစာရမတ္တံ ဧကံ ခန္ဓံ ပဋိစ္စ တယော ခန္ဓာ ဝိစာရော စ။ပေ။ ဒွေ ခန္ဓေ ပဋိစ္စ ဒွေ ခန္ဓာ ဝိစာရော စ ပဋိသန္ဓိက္ခဏေ။ပေ။. (၄)

၁၀. အဝိတက္ကအဝိစာရံ ဓမ္မံ ပဋိစ္စ အဝိတက္ကအဝိစာရော ဓမ္မော ဥပ္ပဇ္ဇတိ အာရမ္မဏပစ္စယာ – အဝိတက္ကအဝိစာရံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. ပဋိသန္ဓိက္ခဏေ အဝိတက္ကအဝိစာရံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ ပဋိစ္စ ဒွေ ခန္ဓာ. ပဋိသန္ဓိက္ခဏေ ဝတ္ထုံ ပဋိစ္စ ခန္ဓာ၊ ဝတ္ထုံ ပဋိစ္စ ဝိစာရော. (၁)

အဝိတက္ကအဝိစာရံ ဓမ္မံ ပဋိစ္စ သဝိတက္ကသဝိစာရော ဓမ္မော ဥပ္ပဇ္ဇတိ အာရမ္မဏပစ္စယာ – ပဋိသန္ဓိက္ခဏေ ဝတ္ထုံ ပဋိစ္စ သဝိတက္ကသဝိစာရာ ခန္ဓာ. (၂)

အဝိတက္ကအဝိစာရံ ဓမ္မံ ပဋိစ္စ အဝိတက္ကဝိစာရမတ္တော ဓမ္မော ဥပ္ပဇ္ဇတိ အာရမ္မဏပစ္စယာ – ဝိစာရံ ပဋိစ္စ အဝိတက္ကဝိစာရမတ္တာ ခန္ဓာ. ပဋိသန္ဓိက္ခဏေ ဝိစာရံ ပဋိစ္စ အဝိတက္ကဝိစာရမတ္တာ ခန္ဓာ. ပဋိသန္ဓိက္ခဏေ ဝတ္ထုံ ပဋိစ္စ အဝိတက္ကဝိစာရမတ္တာ ခန္ဓာ. ပဋိသန္ဓိက္ခဏေ ဝတ္ထုံ ပဋိစ္စ ဝိတက္ကော. (၃)

အဝိတက္ကအဝိစာရံ ဓမ္မံ ပဋိစ္စ အဝိတက္ကဝိစာရမတ္တော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ အာရမ္မဏပစ္စယာ – ပဋိသန္ဓိက္ခဏေ ဝတ္ထုံ ပဋိစ္စ အဝိတက္ကဝိစာရမတ္တာ ခန္ဓာ ဝိစာရော စ. (၄)

အဝိတက္ကအဝိစာရံ ဓမ္မံ ပဋိစ္စ သဝိတက္ကသဝိစာရော စ အဝိတက္ကဝိစာရမတ္တော စ ဓမ္မာ ဥပ္ပဇ္ဇန္တိ အာရမ္မဏပစ္စယာ – ပဋိသန္ဓိက္ခဏေ ဝတ္ထုံ ပဋိစ္စ သဝိတက္ကသဝိစာရာ ခန္ဓာ စ ဝိတက္ကော စ. (၅)

၁၁. သဝိတက္ကသဝိစာရဉ္စ အဝိတက္ကအဝိစာရဉ္စ ဓမ္မံ ပဋိစ္စ သဝိတက္ကသဝိစာရော ဓမ္မော ဥပ္ပဇ္ဇတိ အာရမ္မဏပစ္စယာ – ပဋိသန္ဓိက္ခဏေ သဝိတက္ကသဝိစာရံ ဧကံ ခန္ဓဉ္စ ဝတ္ထုဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ ဝတ္ထုဉ္စ ပဋိစ္စ ဒွေ ခန္ဓာ. (၁)

သဝိတက္ကသဝိစာရဉ္စ အဝိတက္ကအဝိစာရဉ္စ ဓမ္မံ ပဋိစ္စ အဝိတက္ကဝိစာရမတ္တော ဓမ္မော ဥပ္ပဇ္ဇတိ အာရမ္မဏပစ္စယာ – ပဋိသန္ဓိက္ခဏေ သဝိတက္ကသဝိစာရေ ခန္ဓေ စ ဝတ္ထုဉ္စ ပဋိစ္စ ဝိတက္ကော. (၂)

သဝိတက္ကသဝိစာရဉ္စ အဝိတက္ကအဝိစာရဉ္စ ဓမ္မံ ပဋိစ္စ သဝိတက္ကသဝိစာရော စ အဝိတက္ကဝိစာရမတ္တော စ ဓမ္မာ ဥပ္ပဇ္ဇန္တိ အာရမ္မဏပစ္စယာ – ပဋိသန္ဓိက္ခဏေ သဝိတက္ကသဝိစာရံ ဧကံ ခန္ဓဉ္စ ဝတ္ထုဉ္စ ပဋိစ္စ တယော ခန္ဓာ ဝိတက္ကော စ။ပေ။ ဒွေ ခန္ဓေ စ ဝတ္ထုဉ္စ ပဋိစ္စ ဒွေ ခန္ဓာ ဝိတက္ကော စ. (၃)

၁၂. အဝိတက္ကဝိစာရမတ္တဉ္စ အဝိတက္ကအဝိစာရဉ္စ ဓမ္မံ ပဋိစ္စ သဝိတက္ကသဝိစာရော ဓမ္မော ဥပ္ပဇ္ဇတိ အာရမ္မဏပစ္စယာ – ပဋိသန္ဓိက္ခဏေ ဝိတက္ကဉ္စ ဝတ္ထုဉ္စ ပဋိစ္စ သဝိတက္ကသဝိစာရာ ခန္ဓာ. (၁)

အဝိတက္ကဝိစာရမတ္တဉ္စ အဝိတက္ကအဝိစာရဉ္စ ဓမ္မံ ပဋိစ္စ အဝိတက္ကဝိစာရမတ္တော ဓမ္မော ဥပ္ပဇ္ဇတိ အာရမ္မဏပစ္စယာ – အဝိတက္ကဝိစာရမတ္တံ ဧကံ ခန္ဓဉ္စ ဝိစာရဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ ဝိစာရဉ္စ ပဋိစ္စ ဒွေ ခန္ဓာ. ပဋိသန္ဓိက္ခဏေ အဝိတက္ကဝိစာရမတ္တံ ဧကံ ခန္ဓဉ္စ ဝိစာရဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ ဝိစာရဉ္စ ပဋိစ္စ ဒွေ ခန္ဓာ. ပဋိသန္ဓိက္ခဏေ အဝိတက္ကဝိစာရမတ္တံ ဧကံ ခန္ဓဉ္စ ဝတ္ထုဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ ဝတ္ထုဉ္စ ပဋိစ္စ ဒွေ ခန္ဓာ. (၂)

အဝိတက္ကဝိစာရမတ္တဉ္စ အဝိတက္ကအဝိစာရဉ္စ ဓမ္မံ ပဋိစ္စ အဝိတက္ကအဝိစာရော ဓမ္မော ဥပ္ပဇ္ဇတိ အာရမ္မဏပစ္စယာ – ပဋိသန္ဓိက္ခဏေ အဝိတက္ကဝိစာရမတ္တေ ခန္ဓေ စ ဝတ္ထုဉ္စ ပဋိစ္စ ဝိစာရော. (၃)

အဝိတက္ကဝိစာရမတ္တဉ္စ အဝိတက္ကအဝိစာရဉ္စ ဓမ္မံ ပဋိစ္စ အဝိတက္ကဝိစာရမတ္တော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ အာရမ္မဏပစ္စယာ – ပဋိသန္ဓိက္ခဏေ အဝိတက္ကဝိစာရမတ္တံ ဧကံ ခန္ဓဉ္စ ဝတ္ထုဉ္စ ပဋိစ္စ တယော ခန္ဓာ ဝိစာရော စ။ပေ။ ဒွေ ခန္ဓေ စ ဝတ္ထုဉ္စ ပဋိစ္စ ဒွေ ခန္ဓာ ဝိစာရော စ. (၄)

၁၃. သဝိတက္ကသဝိစာရဉ္စ အဝိတက္ကဝိစာရမတ္တဉ္စ ဓမ္မံ ပဋိစ္စ သဝိတက္ကသဝိစာရော ဓမ္မော ဥပ္ပဇ္ဇတိ အာရမ္မဏပစ္စယာ – သဝိတက္ကသဝိစာရံ ဧကံ ခန္ဓဉ္စ ဝိတက္ကဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ ဝိတက္ကဉ္စ ပဋိစ္စ ဒွေ ခန္ဓာ. ပဋိသန္ဓိက္ခဏေ။ပေ။. (၁)

သဝိတက္ကသဝိစာရဉ္စ အဝိတက္ကဝိစာရမတ္တဉ္စ အဝိတက္ကအဝိစာရဉ္စ ဓမ္မံ ပဋိစ္စ သဝိတက္ကသဝိစာရော ဓမ္မော ဥပ္ပဇ္ဇတိ အာရမ္မဏပစ္စယာ – ပဋိသန္ဓိက္ခဏေ သဝိတက္ကသဝိစာရံ ဧကံ ခန္ဓဉ္စ ဝိတက္ကဉ္စ ဝတ္ထုဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ ဝိတက္ကဉ္စ ဝတ္ထုဉ္စ ပဋိစ္စ ဒွေ ခန္ဓာ. (၁)

(ဒွေ ပစ္စယာ သဇ္ဈာယမဂ္ဂေန ဝိဘတ္တာ၊ ဧဝံ အဝသေသာ ဝီသတိပစ္စယာ ဝိဘဇိတဗ္ဗာ.)

ဝိပ္ပယုတ္တပစ္စယော

၁၄. သဝိတက္ကသဝိစာရံ ဓမ္မံ ပဋိစ္စ သဝိတက္ကသဝိစာရော ဓမ္မော ဥပ္ပဇ္ဇတိ ဝိပ္ပယုတ္တပစ္စယာ – သဝိတက္ကသဝိစာရံ ဧကံ ခန္ဓံ ပဋိစ္စ တယော ခန္ဓာ။ပေ။ ဝတ္ထုံ ဝိပ္ပယုတ္တပစ္စယာ. ပဋိသန္ဓိက္ခဏေ သဝိတက္ကသဝိစာရံ ဧကံ ခန္ဓံ ပဋိစ္စ တယော ခန္ဓာ။ပေ။ ဝတ္ထုံ ဝိပ္ပယုတ္တပစ္စယာ. (၁)

သဝိတက္ကသဝိစာရံ ဓမ္မံ ပဋိစ္စ အဝိတက္ကဝိစာရမတ္တော ဓမ္မော ဥပ္ပဇ္ဇတိ ဝိပ္ပယုတ္တပစ္စယာ – သဝိတက္ကသဝိစာရေ ခန္ဓေ ပဋိစ္စ ဝိတက္ကော၊ ဝတ္ထုံ ဝိပ္ပယုတ္တပစ္စယာ. ပဋိသန္ဓိက္ခဏေ။ပေ။. (၂)

သဝိတက္ကသဝိစာရံ ဓမ္မံ ပဋိစ္စ အဝိတက္ကအဝိစာရော ဓမ္မော ဥပ္ပဇ္ဇတိ ဝိပ္ပယုတ္တပစ္စယာ – သဝိတက္ကသဝိစာရေ ခန္ဓေ ပဋိစ္စ စိတ္တသမုဋ္ဌာနံ ရူပံ၊ ခန္ဓေ ဝိပ္ပယုတ္တပစ္စယာ. ပဋိသန္ဓိက္ခဏေ။ပေ။. (၃)

သဝိတက္ကသဝိစာရံ ဓမ္မံ ပဋိစ္စ သဝိတက္ကသဝိစာရော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ ဝိပ္ပယုတ္တပစ္စယာ – သဝိတက္ကသဝိစာရံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ခန္ဓာ ဝတ္ထုံ ဝိပ္ပယုတ္တပစ္စယာ. စိတ္တသမုဋ္ဌာနံ ရူပံ ခန္ဓေ ဝိပ္ပယုတ္တပစ္စယာ. ပဋိသန္ဓိက္ခဏေ။ပေ။. (၄)

သဝိတက္ကသဝိစာရံ ဓမ္မံ ပဋိစ္စ အဝိတက္ကဝိစာရမတ္တော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ ဝိပ္ပယုတ္တပစ္စယာ – သဝိတက္ကသဝိစာရေ ခန္ဓေ ပဋိစ္စ ဝိတက္ကော စ စိတ္တသမုဋ္ဌာနဉ္စ ရူပံ. ဝိတက္ကော ဝတ္ထုံ ဝိပ္ပယုတ္တပစ္စယာ. စိတ္တသမုဋ္ဌာနံ ရူပံ ခန္ဓေ ဝိပ္ပယုတ္တပစ္စယာ. ပဋိသန္ဓိက္ခဏေ။ပေ။. (၅)

သဝိတက္ကသဝိစာရံ ဓမ္မံ ပဋိစ္စ သဝိတက္ကသဝိစာရော စ အဝိတက္ကဝိစာရမတ္တော စ ဓမ္မာ ဥပ္ပဇ္ဇန္တိ ဝိပ္ပယုတ္တပစ္စယာ – သဝိတက္ကသဝိစာရံ ဧကံ ခန္ဓံ ပဋိစ္စ တယော ခန္ဓာ ဝိတက္ကော စ။ပေ။ ဒွေ ခန္ဓေ ပဋိစ္စ ဒွေ ခန္ဓာ ဝိတက္ကော စ၊ ဝတ္ထုံ ဝိပ္ပယုတ္တပစ္စယာ. ပဋိသန္ဓိက္ခဏေ။ပေ။. (၆)

သဝိတက္ကသဝိစာရံ ဓမ္မံ ပဋိစ္စ သဝိတက္ကသဝိစာရော စ အဝိတက္ကဝိစာရမတ္တော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ ဝိပ္ပယုတ္တပစ္စယာ – သဝိတက္ကသဝိစာရံ ဧကံ ခန္ဓံ ပဋိစ္စ တယော ခန္ဓာ ဝိတက္ကော စ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ ပဋိစ္စ ဒွေ ခန္ဓာ ဝိတက္ကော စ စိတ္တသမုဋ္ဌာနဉ္စ ရူပံ. ခန္ဓာ စ ဝိတက္ကော စ ဝတ္ထုံ ဝိပ္ပယုတ္တပစ္စယာ. စိတ္တသမုဋ္ဌာနံ ရူပံ ခန္ဓေ ဝိပ္ပယုတ္တပစ္စယာ. ပဋိသန္ဓိက္ခဏေ။ပေ။. (၇)

၁၅. အဝိတက္ကဝိစာရမတ္တံ ဓမ္မံ ပဋိစ္စ အဝိတက္ကဝိစာရမတ္တော ဓမ္မော ဥပ္ပဇ္ဇတိ။ပေ။ အဝိတက္ကဝိစာရမတ္တံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ ဝတ္ထုံ ဝိပ္ပယုတ္တပစ္စယာ. ပဋိသန္ဓိက္ခဏေ။ပေ။. (၁)

အဝိတက္ကဝိစာရမတ္တံ ဓမ္မံ ပဋိစ္စ သဝိတက္ကသဝိစာရော ဓမ္မော ဥပ္ပဇ္ဇတိ ဝိပ္ပယုတ္တပစ္စယာ – ဝိတက္ကံ ပဋိစ္စ သဝိတက္ကသဝိစာရာ ခန္ဓာ၊ ဝတ္ထုံ ဝိပ္ပယုတ္တပစ္စယာ. ပဋိသန္ဓိက္ခဏေ။ပေ။. (၂)

အဝိတက္ကဝိစာရမတ္တံ ဓမ္မံ ပဋိစ္စ အဝိတက္ကအဝိစာရော ဓမ္မော ဥပ္ပဇ္ဇတိ ဝိပ္ပယုတ္တပစ္စယာ – အဝိတက္ကဝိစာရမတ္တေ ခန္ဓေ ပဋိစ္စ ဝိစာရော စ စိတ္တသမုဋ္ဌာနဉ္စ ရူပံ၊ ဝိစာရော ဝတ္ထုံ ဝိပ္ပယုတ္တပစ္စယာ. စိတ္တသမုဋ္ဌာနံ ရူပံ ခန္ဓေ ဝိပ္ပယုတ္တပစ္စယာ. ဝိတက္ကံ ပဋိစ္စ စိတ္တသမုဋ္ဌာနံ ရူပံ၊ ဝိတက္ကံ ဝိပ္ပယုတ္တပစ္စယာ. ပဋိသန္ဓိက္ခဏေ။ပေ။. (၃)

အဝိတက္ကဝိစာရမတ္တံ ဓမ္မံ ပဋိစ္စ သဝိတက္ကသဝိစာရော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ ဝိပ္ပယုတ္တပစ္စယာ – ဝိတက္ကံ ပဋိစ္စ သဝိတက္ကသဝိစာရာ ခန္ဓာ စိတ္တသမုဋ္ဌာနဉ္စ ရူပံ၊ ခန္ဓာ ဝတ္ထုံ ဝိပ္ပယုတ္တပစ္စယာ. စိတ္တသမုဋ္ဌာနံ ရူပံ ဝိတက္ကံ ဝိပ္ပယုတ္တပစ္စယာ. ပဋိသန္ဓိက္ခဏေ။ပေ။. (၄)

အဝိတက္ကဝိစာရမတ္တံ ဓမ္မံ ပဋိစ္စ အဝိတက္ကဝိစာရမတ္တော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ ဝိပ္ပယုတ္တပစ္စယာ – အဝိတက္ကဝိစာရမတ္တံ ဧကံ ခန္ဓံ ပဋိစ္စ တယော ခန္ဓာ ဝိစာရော စ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ ပဋိစ္စ ဒွေ ခန္ဓာ ဝိစာရော စ စိတ္တသမုဋ္ဌာနဉ္စ ရူပံ. ခန္ဓာ စ ဝိစာရော စ ဝတ္ထုံ ဝိပ္ပယုတ္တပစ္စယာ. စိတ္တသမုဋ္ဌာနံ ရူပံ ခန္ဓေ ဝိပ္ပယုတ္တပစ္စယာ. ပဋိသန္ဓိက္ခဏေ။ပေ။. (၅)

၁၆. အဝိတက္ကအဝိစာရံ ဓမ္မံ ပဋိစ္စ အဝိတက္ကအဝိစာရော ဓမ္မော ဥပ္ပဇ္ဇတိ ဝိပ္ပယုတ္တပစ္စယာ – အဝိတက္ကအဝိစာရံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ခန္ဓာ ဝတ္ထုံ ဝိပ္ပယုတ္တပစ္စယာ၊ စိတ္တသမုဋ္ဌာနံ ရူပံ ခန္ဓေ ဝိပ္ပယုတ္တပစ္စယာ. ဝိစာရံ ပဋိစ္စ စိတ္တသမုဋ္ဌာနံ ရူပံ၊ ဝိစာရံ ဝိပ္ပယုတ္တပစ္စယာ. ပဋိသန္ဓိက္ခဏေ။ပေ။ ပဋိသန္ဓိက္ခဏေ ဝိစာရံ ပဋိစ္စ ကဋတ္တာရူပံ၊ ဝိစာရံ ဝိပ္ပယုတ္တပစ္စယာ. ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ. ခန္ဓာ ဝတ္ထုံ ဝိပ္ပယုတ္တပစ္စယာ. ဝတ္ထု ခန္ဓေ ဝိပ္ပယုတ္တပစ္စယာ. ဝိစာရံ ပဋိစ္စ ဝတ္ထု၊ ဝတ္ထုံ ပဋိစ္စ ဝိစာရော၊ ဝိစာရော ဝတ္ထုံ ဝိပ္ပယုတ္တပစ္စယာ. ဝတ္ထု ဝိစာရံ ဝိပ္ပယုတ္တပစ္စယာ၊ ဧကံ မဟာဘူတံ ပဋိစ္စ တယော မဟာဘူတာ။ပေ။ မဟာဘူတေ ပဋိစ္စ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ၊ ခန္ဓေ ဝိပ္ပယုတ္တပစ္စယာ. (၁)

အဝိတက္ကအဝိစာရံ ဓမ္မံ ပဋိစ္စ သဝိတက္ကသဝိစာရော ဓမ္မော ဥပ္ပဇ္ဇတိ ဝိပ္ပယုတ္တပစ္စယာ – ပဋိသန္ဓိက္ခဏေ ဝတ္ထုံ ပဋိစ္စ သဝိတက္ကသဝိစာရာ ခန္ဓာ၊ ဝတ္ထုံ ဝိပ္ပယုတ္တပစ္စယာ. (၂)

အဝိတက္ကအဝိစာရံ ဓမ္မံ ပဋိစ္စ အဝိတက္ကဝိစာရမတ္တော ဓမ္မော ဥပ္ပဇ္ဇတိ ဝိပ္ပယုတ္တပစ္စယာ – ဝိစာရံ ပဋိစ္စ အဝိတက္ကဝိစာရမတ္တာ ခန္ဓာ၊ ဝတ္ထုံ ဝိပ္ပယုတ္တပစ္စယာ. ပဋိသန္ဓိက္ခဏေ ဝိစာရံ ပဋိစ္စ အဝိတက္ကဝိစာရမတ္တာ ခန္ဓာ၊ ဝတ္ထုံ ဝိပ္ပယုတ္တပစ္စယာ. ပဋိသန္ဓိက္ခဏေ ဝတ္ထုံ ပဋိစ္စ အဝိတက္ကဝိစာရမတ္တာ ခန္ဓာ၊ ဝတ္ထုံ ဝိပ္ပယုတ္တပစ္စယာ. ပဋိသန္ဓိက္ခဏေ ဝတ္ထုံ ပဋိစ္စ ဝိတက္ကော၊ ဝတ္ထုံ ဝိပ္ပယုတ္တပစ္စယာ. (၃)

အဝိတက္ကအဝိစာရံ ဓမ္မံ ပဋိစ္စ သဝိတက္ကသဝိစာရော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ ဝိပ္ပယုတ္တပစ္စယာ – ပဋိသန္ဓိက္ခဏေ ဝတ္ထုံ ပဋိစ္စ သဝိတက္ကသဝိစာရာ ခန္ဓာ၊ မဟာဘူတေ ပဋိစ္စ ကဋတ္တာရူပံ၊ ခန္ဓာ ဝတ္ထုံ ဝိပ္ပယုတ္တပစ္စယာ. ကဋတ္တာရူပံ ခန္ဓေ ဝိပ္ပယုတ္တပစ္စယာ. (၄)

အဝိတက္ကအဝိစာရံ ဓမ္မံ ပဋိစ္စ အဝိတက္ကဝိစာရမတ္တော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ ဝိပ္ပယုတ္တပစ္စယာ – ဝိစာရံ ပဋိစ္စ အဝိတက္ကဝိစာရမတ္တာ ခန္ဓာ စ စိတ္တသမုဋ္ဌာနဉ္စ ရူပံ။ပေ။ ခန္ဓာ ဝတ္ထုံ ဝိပ္ပယုတ္တပစ္စယာ. စိတ္တသမုဋ္ဌာနံ ရူပံ ဝိစာရံ ဝိပ္ပယုတ္တပစ္စယာ. ပဋိသန္ဓိက္ခဏေ ဝိစာရံ ပဋိစ္စ အဝိတက္ကဝိစာရမတ္တာ ခန္ဓာ စ ကဋတ္တာ စ ရူပံ၊ ခန္ဓာ ဝတ္ထုံ ဝိပ္ပယုတ္တပစ္စယာ. ကဋတ္တာရူပံ ဝိစာရံ ဝိပ္ပယုတ္တပစ္စယာ. ပဋိသန္ဓိက္ခဏေ ဝတ္ထုံ ပဋိစ္စ အဝိတက္ကဝိစာရမတ္တာ ခန္ဓာ မဟာဘူတေ ပဋိစ္စ ကဋတ္တာရူပံ၊ ခန္ဓာ ဝတ္ထုံ ဝိပ္ပယုတ္တပစ္စယာ. ကဋတ္တာရူပံ ခန္ဓေ ဝိပ္ပယုတ္တပစ္စယာ. ပဋိသန္ဓိက္ခဏေ ဝတ္ထုံ ပဋိစ္စ ဝိတက္ကော၊ မဟာဘူတေ ပဋိစ္စ ကဋတ္တာရူပံ၊ ဝိတက္ကော ဝတ္ထုံ ဝိပ္ပယုတ္တပစ္စယာ. ကဋတ္တာရူပံ ခန္ဓေ ဝိပ္ပယုတ္တပစ္စယာ. ပဋိသန္ဓိက္ခဏေ ဝတ္ထုံ ပဋိစ္စ အဝိတက္ကဝိစာရမတ္တာ ခန္ဓာ စ ဝိစာရော စ၊ ဝတ္ထုံ ဝိပ္ပယုတ္တပစ္စယာ. (၅)

အဝိတက္ကအဝိစာရံ ဓမ္မံ ပဋိစ္စ သဝိတက္ကသဝိစာရော စ အဝိတက္ကဝိစာရမတ္တော စ ဓမ္မာ ဥပ္ပဇ္ဇန္တိ ဝိပ္ပယုတ္တပစ္စယာ – ပဋိသန္ဓိက္ခဏေ ဝတ္ထုံ ပဋိစ္စ သဝိတက္ကသဝိစာရာ ခန္ဓာ စ ဝိတက္ကော စ၊ ဝတ္ထုံ ဝိပ္ပယုတ္တပစ္စယာ. (၆)

အဝိတက္ကအဝိစာရံ ဓမ္မံ ပဋိစ္စ သဝိတက္ကသဝိစာရော စ အဝိတက္ကဝိစာရမတ္တော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ ဝိပ္ပယုတ္တပစ္စယာ – ပဋိသန္ဓိက္ခဏေ ဝတ္ထုံ ပဋိစ္စ သဝိတက္ကသဝိစာရာ ခန္ဓာ စ ဝိတက္ကော စ၊ မဟာဘူတေ ပဋိစ္စ ကဋတ္တာရူပံ၊ ခန္ဓာ စ ဝိတက္ကော စ၊ ဝတ္ထုံ ဝိပ္ပယုတ္တပစ္စယာ. ကဋတ္တာရူပံ ခန္ဓေ ဝိပ္ပယုတ္တပစ္စယာ. (၇)

၁၇. သဝိတက္ကသဝိစာရဉ္စ အဝိတက္ကအဝိစာရဉ္စ ဓမ္မံ ပဋိစ္စ သဝိတက္ကသဝိစာရော ဓမ္မော ဥပ္ပဇ္ဇတိ ဝိပ္ပယုတ္တပစ္စယာ – ပဋိသန္ဓိက္ခဏေ သဝိတက္ကသဝိစာရံ ဧကံ ခန္ဓဉ္စ ဝတ္ထုဉ္စ ပဋိစ္စ တယော ခန္ဓာ၊ ဝတ္ထုံ ဝိပ္ပယုတ္တပစ္စယာ. (၁)

သဝိတက္ကသဝိစာရဉ္စ အဝိတက္ကအဝိစာရဉ္စ ဓမ္မံ ပဋိစ္စ အဝိတက္ကဝိစာရမတ္တော ဓမ္မော။ပေ။ ပဋိသန္ဓိက္ခဏေ သဝိတက္ကသဝိစာရေ ခန္ဓေ စ ဝတ္ထုဉ္စ ပဋိစ္စ ဝိတက္ကော၊ ဝတ္ထုံ ဝိပ္ပယုတ္တပစ္စယာ. (၂)

သဝိတက္ကသဝိစာရဉ္စ အဝိတက္ကအဝိစာရဉ္စ ဓမ္မံ ပဋိစ္စ အဝိတက္ကအဝိစာရော ဓမ္မော။ပေ။ သဝိတက္ကသဝိစာရေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ၊ ခန္ဓေ ဝိပ္ပယုတ္တပစ္စယာ. ပဋိသန္ဓိက္ခဏေ။ပေ။. (၃)

သဝိတက္ကသဝိစာရဉ္စ အဝိတက္ကအဝိစာရဉ္စ ဓမ္မံ ပဋိစ္စ သဝိတက္ကသဝိစာရော စ အဝိတက္ကအဝိစာရော စ ဓမ္မာ။ပေ။ ပဋိသန္ဓိက္ခဏေ သဝိတက္ကသဝိစာရံ ဧကံ ခန္ဓဉ္စ ဝတ္ထုဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ ဝတ္ထုဉ္စ ပဋိစ္စ ဒွေ ခန္ဓာ၊ သဝိတက္ကသဝိစာရေ ခန္ဓေ စ မဟာဘူတေ စ ပဋိစ္စ ကဋတ္တာရူပံ၊ ခန္ဓာ ဝတ္ထုံ ဝိပ္ပယုတ္တပစ္စယာ. ကဋတ္တာရူပံ ခန္ဓေ ဝိပ္ပယုတ္တပစ္စယာ. (၄)

သဝိတက္ကသဝိစာရဉ္စ အဝိတက္ကအဝိစာရဉ္စ ဓမ္မံ ပဋိစ္စ အဝိတက္ကဝိစာရမတ္တော စ အဝိတက္ကအဝိစာရော စ ဓမ္မာ။ပေ။ ပဋိသန္ဓိက္ခဏေ သဝိတက္ကသဝိစာရေ ခန္ဓေ စ ဝတ္ထုဉ္စ ပဋိစ္စ ဝိတက္ကော၊ သဝိတက္ကသဝိစာရေ ခန္ဓေ စ မဟာဘူတေ စ ပဋိစ္စ ကဋတ္တာရူပံ၊ ဝိတက္ကော ဝတ္ထုံ ဝိပ္ပယုတ္တပစ္စယာ. ကဋတ္တာရူပံ ခန္ဓေ ဝိပ္ပယုတ္တပစ္စယာ. (၅)

သဝိတက္ကသဝိစာရဉ္စ အဝိတက္ကအဝိစာရဉ္စ ဓမ္မံ ပဋိစ္စ သဝိတက္ကသဝိစာရော စ အဝိတက္ကဝိစာရမတ္တော စ ဓမ္မာ။ပေ။ ပဋိသန္ဓိက္ခဏေ သဝိတက္ကသဝိစာရံ ဧကံ ခန္ဓဉ္စ ဝတ္ထုဉ္စ ပဋိစ္စ တယော ခန္ဓာ ဝိတက္ကော စ။ပေ။ ဒွေ ခန္ဓေ စ ဝတ္ထုဉ္စ ပဋိစ္စ ဒွေ ခန္ဓာ ဝိတက္ကော စ၊ ဝတ္ထုံ ဝိပ္ပယုတ္တပစ္စယာ. (၆)

သဝိတက္ကသဝိစာရဉ္စ အဝိတက္ကအဝိစာရဉ္စ ဓမ္မံ ပဋိစ္စ သဝိတက္ကသဝိစာရော စ အဝိတက္ကဝိစာရမတ္တော စ အဝိတက္ကအဝိစာရော စ ဓမ္မာ။ပေ။ ပဋိသန္ဓိက္ခဏေ သဝိတက္ကသဝိစာရံ ဧကံ ခန္ဓဉ္စ ဝတ္ထုဉ္စ ပဋိစ္စ တယော ခန္ဓာ ဝိတက္ကော စ။ပေ။ ဒွေ ခန္ဓေ စ ဝတ္ထုဉ္စ ပဋိစ္စ ဒွေ ခန္ဓာ ဝိတက္ကော စ. သဝိတက္ကသဝိစာရေ ခန္ဓေ စ မဟာဘူတေ စ ပဋိစ္စ ကဋတ္တာရူပံ. ခန္ဓာ စ ဝိတက္ကော စ၊ ဝတ္ထုံ ဝိပ္ပယုတ္တပစ္စယာ. ကဋတ္တာရူပံ ခန္ဓေ ဝိပ္ပယုတ္တပစ္စယာ. (၇)

၁၈. အဝိတက္ကဝိစာရမတ္တဉ္စ အဝိတက္ကအဝိစာရဉ္စ ဓမ္မံ ပဋိစ္စ သဝိတက္ကသဝိစာရော ဓမ္မော။ပေ။ ပဋိသန္ဓိက္ခဏေ ဝိတက္ကဉ္စ ဝတ္ထုဉ္စ ပဋိစ္စ သဝိတက္ကသဝိစာရာ ခန္ဓာ၊ ဝတ္ထုံ ဝိပ္ပယုတ္တပစ္စယာ. (၁)

အဝိတက္ကဝိစာရမတ္တဉ္စ အဝိတက္ကအဝိစာရဉ္စ ဓမ္မံ ပဋိစ္စ အဝိတက္ကဝိစာရမတ္တော ဓမ္မော။ပေ။ အဝိတက္ကဝိစာရမတ္တံ ဧကံ ခန္ဓဉ္စ ဝိစာရဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ။ပေ။ ဝတ္ထုံ ဝိပ္ပယုတ္တပစ္စယာ. ပဋိသန္ဓိက္ခဏေ အဝိတက္ကဝိစာရမတ္တံ ဧကံ ခန္ဓဉ္စ ဝိစာရဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ။ပေ။ ဝတ္ထုံ ဝိပ္ပယုတ္တပစ္စယာ. ပဋိသန္ဓိက္ခဏေ အဝိတက္ကဝိစာရမတ္တံ ဧကံ ခန္ဓဉ္စ ဝတ္ထုဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ။ပေ။ ဝတ္ထုံ ဝိပ္ပယုတ္တပစ္စယာ. (၂)

အဝိတက္ကဝိစာရမတ္တဉ္စ အဝိတက္ကအဝိစာရဉ္စ ဓမ္မံ ပဋိစ္စ အဝိတက္ကအဝိစာရော ဓမ္မော။ပေ။ အဝိတက္ကဝိစာရမတ္တေ ခန္ဓေ စ ဝိစာရဉ္စ ပဋိစ္စ စိတ္တသမုဋ္ဌာနံ ရူပံ. ခန္ဓေ စ ဝိစာရဉ္စ ဝိပ္ပယုတ္တပစ္စယာ. အဝိတက္ကဝိစာရမတ္တေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ. ခန္ဓေ ဝိပ္ပယုတ္တပစ္စယာ. ဝိတက္ကဉ္စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ. ဝိတက္ကံ ဝိပ္ပယုတ္တပစ္စယာ. ပဋိသန္ဓိက္ခဏေ အဝိတက္ကဝိစာရမတ္တေ ခန္ဓေ စ ဝိစာရဉ္စ ပဋိစ္စ ကဋတ္တာရူပံ. ခန္ဓေ စ ဝိစာရဉ္စ ဝိပ္ပယုတ္တပစ္စယာ. ပဋိသန္ဓိက္ခဏေ အဝိတက္ကဝိစာရမတ္တေ ခန္ဓေ စ မဟာဘူတေ စ ပဋိစ္စ ကဋတ္တာရူပံ. ခန္ဓေ ဝိပ္ပယုတ္တပစ္စယာ. ပဋိသန္ဓိက္ခဏေ ဝိတက္ကဉ္စ မဟာဘူတေ စ ပဋိစ္စ ကဋတ္တာရူပံ. ဝိတက္ကံ ဝိပ္ပယုတ္တပစ္စယာ. ပဋိသန္ဓိက္ခဏေ အဝိတက္ကဝိစာရမတ္တေ ခန္ဓေ စ ဝတ္ထုဉ္စ ပဋိစ္စ ဝိစာရော. ဝတ္ထုံ ဝိပ္ပယုတ္တပစ္စယာ. (၃)

အဝိတက္ကဝိစာရမတ္တဉ္စ အဝိတက္ကအဝိစာရဉ္စ ဓမ္မံ ပဋိစ္စ သဝိတက္ကသဝိစာရော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ ဝိပ္ပယုတ္တပစ္စယာ – ပဋိသန္ဓိက္ခဏေ ဝိတက္ကဉ္စ ဝတ္ထုဉ္စ ပဋိစ္စ သဝိတက္ကသဝိစာရာ ခန္ဓာ. ဝိတက္ကဉ္စ မဟာဘူတေ စ ပဋိစ္စ ကဋတ္တာရူပံ. ခန္ဓာ ဝတ္ထုံ ဝိပ္ပယုတ္တပစ္စယာ. ကဋတ္တာရူပံ ဝိတက္ကံ ဝိပ္ပယုတ္တပစ္စယာ. (၄)

အဝိတက္ကဝိစာရမတ္တဉ္စ အဝိတက္ကအဝိစာရဉ္စ ဓမ္မံ ပဋိစ္စ အဝိတက္ကဝိစာရမတ္တော စ အဝိတက္ကအဝိစာရော စ ဓမ္မာ။ပေ။ အဝိတက္ကဝိစာရမတ္တံ ဧကံ ခန္ဓဉ္စ ဝိစာရဉ္စ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ခန္ဓာ ဝတ္ထုံ ဝိပ္ပယုတ္တပစ္စယာ. စိတ္တသမုဋ္ဌာနံ ရူပံ ခန္ဓေ စ ဝိစာရဉ္စ ဝိပ္ပယုတ္တပစ္စယာ. ပဋိသန္ဓိက္ခဏေ အဝိတက္ကဝိစာရမတ္တံ ဧကံ ခန္ဓဉ္စ ဝိစာရဉ္စ ပဋိစ္စ တယော ခန္ဓာ ကဋတ္တာ စ ရူပံ။ပေ။ ခန္ဓာ ဝတ္ထုံ ဝိပ္ပယုတ္တပစ္စယာ. ကဋတ္တာရူပံ ခန္ဓေ စ ဝိစာရဉ္စ ဝိပ္ပယုတ္တပစ္စယာ. ပဋိသန္ဓိက္ခဏေ အဝိတက္ကဝိစာရမတ္တံ ဧကံ ခန္ဓဉ္စ ဝတ္ထုဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ။ပေ။ အဝိတက္ကဝိစာရမတ္တေ ခန္ဓေ စ မဟာဘူတေ စ ပဋိစ္စ ကဋတ္တာရူပံ. ခန္ဓာ ဝတ္ထုံ ဝိပ္ပယုတ္တပစ္စယာ. ကဋတ္တာရူပံ ခန္ဓေ ဝိပ္ပယုတ္တပစ္စယာ. ပဋိသန္ဓိက္ခဏေ အဝိတက္ကဝိစာရမတ္တံ ဧကံ ခန္ဓဉ္စ ဝတ္ထုဉ္စ ပဋိစ္စ တယော ခန္ဓာ ဝိစာရော စ။ပေ။ ဒွေ ခန္ဓေ စ။ပေ။ ဝတ္ထုံ ဝိပ္ပယုတ္တပစ္စယာ. (၅)

၁၉. သဝိတက္ကသဝိစာရဉ္စ အဝိတက္ကဝိစာရမတ္တဉ္စ ဓမ္မံ ပဋိစ္စ သဝိတက္ကသဝိစာရော ဓမ္မော ဥပ္ပဇ္ဇတိ။ပေ။ သဝိတက္ကသဝိစာရံ ဧကံ ခန္ဓဉ္စ ဝိတက္ကဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ။ပေ။ ဝတ္ထုံ ဝိပ္ပယုတ္တပစ္စယာ. ပဋိသန္ဓိက္ခဏေ။ပေ။ ဝတ္ထုံ ဝိပ္ပယုတ္တပစ္စယာ. (၁)

သဝိတက္ကသဝိစာရဉ္စ အဝိတက္ကဝိစာရမတ္တဉ္စ ဓမ္မံ ပဋိစ္စ အဝိတက္ကအဝိစာရော ဓမ္မော ဥပ္ပဇ္ဇတိ။ပေ။ သဝိတက္ကသဝိစာရေ ခန္ဓေ စ ဝိတက္ကဉ္စ ပဋိစ္စ စိတ္တသမုဋ္ဌာနံ ရူပံ. ခန္ဓေ စ ဝိတက္ကဉ္စ ဝိပ္ပယုတ္တပစ္စယာ. ပဋိသန္ဓိက္ခဏေ။ပေ။ ခန္ဓေ စ ဝိတက္ကဉ္စ ဝိပ္ပယုတ္တပစ္စယာ. (၂)

သဝိတက္ကသဝိစာရဉ္စ အဝိတက္ကဝိစာရမတ္တဉ္စ ဓမ္မံ ပဋိစ္စ သဝိတက္ကသဝိစာရော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ။ပေ။ သဝိတက္ကသဝိစာရံ ဧကံ ခန္ဓဉ္စ ဝိတက္ကဉ္စ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ခန္ဓာ ဝတ္ထုံ ဝိပ္ပယုတ္တပစ္စယာ. စိတ္တသမုဋ္ဌာနံ ရူပံ ခန္ဓေ စ ဝိတက္ကဉ္စ ဝိပ္ပယုတ္တပစ္စယာ. ပဋိသန္ဓိက္ခဏေ။ပေ။ ခန္ဓာ ဝတ္ထုံ ဝိပ္ပယုတ္တပစ္စယာ. ကဋတ္တာရူပံ ခန္ဓေ စ ဝိတက္ကဉ္စ ဝိပ္ပယုတ္တပစ္စယာ. (၃)

၂၀. သဝိတက္ကသဝိစာရဉ္စ အဝိတက္ကဝိစာရမတ္တဉ္စ အဝိတက္ကအဝိစာရဉ္စ ဓမ္မံ ပဋိစ္စ သဝိတက္ကသဝိစာရော ဓမ္မော ဥပ္ပဇ္ဇတိ။ပေ။ ပဋိသန္ဓိက္ခဏေ သဝိတက္ကသဝိစာရံ ဧကံ ခန္ဓဉ္စ ဝိတက္ကဉ္စ ဝတ္ထုဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ ခန္ဓာ ဝတ္ထုံ ဝိပ္ပယုတ္တပစ္စယာ. (၁)

သဝိတက္ကသဝိစာရဉ္စ အဝိတက္ကဝိစာရမတ္တဉ္စ အဝိတက္ကအဝိစာရဉ္စ ဓမ္မံ ပဋိစ္စ အဝိတက္ကအဝိစာရော ဓမ္မော ဥပ္ပဇ္ဇတိ။ပေ။ သဝိတက္ကသဝိစာရေ ခန္ဓေ စ ဝိတက္ကဉ္စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ. ခန္ဓေ စ ဝိတက္ကဉ္စ ဝိပ္ပယုတ္တပစ္စယာ. ပဋိသန္ဓိက္ခဏေ။ပေ။ ခန္ဓေ စ ဝိတက္ကဉ္စ ဝိပ္ပယုတ္တပစ္စယာ. (၂)

သဝိတက္ကသဝိစာရဉ္စ အဝိတက္ကဝိစာရမတ္တဉ္စ အဝိတက္ကအဝိစာရဉ္စ ဓမ္မံ ပဋိစ္စ သဝိတက္ကသဝိစာရော စ အဝိတက္ကအဝိစာရော စ ဓမ္မာ ဥပ္ပဇ္ဇန္တိ ဝိပ္ပယုတ္တပစ္စယာ – ပဋိသန္ဓိက္ခဏေ သဝိတက္ကသဝိစာရံ ဧကံ ခန္ဓဉ္စ ဝိတက္ကဉ္စ ဝတ္ထုဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ။ပေ။ သဝိတက္ကသဝိစာရေ ခန္ဓေ စ ဝိတက္ကဉ္စ မဟာဘူတေ စ ပဋိစ္စ ကဋတ္တာရူပံ. ခန္ဓာ ဝတ္ထုံ ဝိပ္ပယုတ္တပစ္စယာ. ကဋတ္တာရူပံ ခန္ဓေ စ ဝိတက္ကဉ္စ ဝိပ္ပယုတ္တပစ္စယာ. (၃)

အတ္ထိ-အဝိဂတပစ္စယာ

၂၁. သဝိတက္ကသဝိစာရံ ဓမ္မံ ပဋိစ္စ သဝိတက္ကသဝိစာရော ဓမ္မော ဥပ္ပဇ္ဇတိ အတ္ထိပစ္စယာ။ပေ။ နတ္ထိပစ္စယာ၊ ဝိဂတပစ္စယာ၊ အဝိဂတပစ္စယာ (သံခိတ္တံ).