၁. ဝိဘင်္ဂဝါရော

နဟေတုပစ္စယော

၁၇. အနိဒဿနသပ္ပဋိဃံ ဓမ္မံ ပဋိစ္စ အနိဒဿနသပ္ပဋိဃော ဓမ္မော ဥပ္ပဇ္ဇတိ နဟေတုပစ္စယာ – အနိဒဿနသပ္ပဋိဃံ ဧကံ မဟာဘူတံ ပဋိစ္စ ဒွေ မဟာဘူတာ၊ ဒွေ မဟာဘူတေ ပဋိစ္စ ဧကံ မဟာဘူတံ. အနိဒဿနသပ္ပဋိဃေ မဟာဘူတေ ပဋိစ္စ အနိဒဿနသပ္ပဋိဃံ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ. ဖောဋ္ဌဗ္ဗာယတနံ ပဋိစ္စ စက္ခာယတနံ။ပေ။ ရသာယတနံ. ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ အနိဒဿနသပ္ပဋိဃံ ဧကံ မဟာဘူတံ ပဋိစ္စ ဒွေ မဟာဘူတာ၊ ဒွေ မဟာဘူတေ ပဋိစ္စ ဧကံ မဟာဘူတံ၊ မဟာဘူတေ ပဋိစ္စ။ပေ။.

(အနိဒဿနသပ္ပဋိဃမူလကေ ဣမိနာ ကာရဏေန သတ္တပိ ပဉှာ ဝိဘဇိတဗ္ဗာ.)

၁၈. အနိဒဿနအပ္ပဋိဃံ ဓမ္မံ ပဋိစ္စ အနိဒဿနအပ္ပဋိဃော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ အနိဒဿနအပ္ပဋိဃံ ဧကံ ခန္ဓံ ပဋိစ္စ တယော ခန္ဓာ အနိဒဿနအပ္ပဋိဃဉ္စ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ အဟေတုကပဋိသန္ဓိက္ခဏေ အနိဒဿနအပ္ပဋိဃံ ဧကံ ခန္ဓံ ပဋိစ္စ တယော ခန္ဓာ အနိဒဿနအပ္ပဋိဃဉ္စ ကဋတ္တာရူပံ။ပေ။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ. အာပေါဓာတုံ ပဋိစ္စ အနိဒဿနအပ္ပဋိဃံ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ. အာပေါဓာတုံ ပဋိစ္စ ဣတ္ထိန္ဒြိယံ။ပေ။ ကဗဠီကာရော အာဟာရော. ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ အာပေါဓာတုံ ပဋိစ္စ အနိဒဿနအပ္ပဋိဃံ ကဋတ္တာရူပံ ဥပါဒါရူပံ. ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော.

(အနိဒဿနအပ္ပဋိဃမူလကာ ဣမိနာ ကာရဏေန သတ္တ ပဉှာ ဝိဘဇိတဗ္ဗာ.)

၁၉. အနိဒဿနသပ္ပဋိဃဉ္စ အနိဒဿနအပ္ပဋိဃဉ္စ ဓမ္မံ ပဋိစ္စ သနိဒဿနသပ္ပဋိဃော ဓမ္မော ဥပ္ပဇ္ဇတိ နဟေတုပစ္စယာ – အဟေတုကေ အနိဒဿနအပ္ပဋိဃေ ခန္ဓေ စ မဟာဘူတေ စ ပဋိစ္စ သနိဒဿနသပ္ပဋိဃံ စိတ္တသမုဋ္ဌာနံ ရူပံ. အဟေတုကပဋိသန္ဓိက္ခဏေ အနိဒဿနအပ္ပဋိဃေ ခန္ဓေ စ မဟာဘူတေ စ ပဋိစ္စ သနိဒဿနသပ္ပဋိဃံ ကဋတ္တာရူပံ. အနိဒဿနသပ္ပဋိဃေ မဟာဘူတေ စ အာပေါဓာတုဉ္စ ပဋိစ္စ သနိဒဿနသပ္ပဋိဃံ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ. ဖောဋ္ဌဗ္ဗာယတနဉ္စ အာပေါဓာတုဉ္စ ပဋိစ္စ ရူပါယတနံ. ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ အနိဒဿနသပ္ပဋိဃေ မဟာဘူတေ စ အာပေါဓာတုဉ္စ ပဋိစ္စ သနိဒဿနသပ္ပဋိဃံ ကဋတ္တာရူပံ ဥပါဒါရူပံ.

(ဣမိနာ ကာရဏေန သတ္တ ပဉှာ ဝိတ္ထာရေတဗ္ဗာ အသမ္မောဟန္တေန.)

နအာရမ္မဏပစ္စယော

၂၀. အနိဒဿနသပ္ပဋိဃံ ဓမ္မံ ပဋိစ္စ အနိဒဿနသပ္ပဋိဃော ဓမ္မော ဥပ္ပဇ္ဇတိ နအာရမ္မဏပစ္စယာ – အနိဒဿနသပ္ပဋိဃံ ဧကံ မဟာဘူတံ ပဋိစ္စ ဒွေ မဟာဘူတာ၊ ဒွေ မဟာဘူတေ ပဋိစ္စ ဧကံ မဟာဘူတံ. အနိဒဿနသပ္ပဋိဃေ မဟာဘူတေ ပဋိစ္စ အနိဒဿနသပ္ပဋိဃံ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ. ဖောဋ္ဌဗ္ဗာယတနံ ပဋိစ္စ စက္ခာယတနံ။ပေ။ ရသာယတနံ. ဗာဟိရံ။ အာဟာရသမုဋ္ဌာနံ။၊ ဥတုသမုဋ္ဌာနံ။ အသညသတ္တာနံ အနိဒဿနသပ္ပဋိဃံ ဧကံ မဟာဘူတံ ပဋိစ္စ ဒွေ မဟာဘူတာ၊ ဒွေ မဟာဘူတေ ပဋိစ္စ ဧကံ မဟာဘူတံ။ပေ။.

(အနိဒဿနသပ္ပဋိဃမူလကာ ဣမိနာ ကာရဏေန သတ္တပိ ပဉှာ ဝိတ္ထာရေတဗ္ဗာ.)

၂၁. အနိဒဿနအပ္ပဋိဃံ ဓမ္မံ ပဋိစ္စ အနိဒဿနအပ္ပဋိဃော ဓမ္မော ဥပ္ပဇ္ဇတိ နအာရမ္မဏပစ္စယာ – အနိဒဿနအပ္ပဋိဃေ ခန္ဓေ ပဋိစ္စ အနိဒဿနအပ္ပဋိဃံ စိတ္တသမုဋ္ဌာနံ ရူပံ. ပဋိသန္ဓိက္ခဏေ အနိဒဿနအပ္ပဋိဃေ ခန္ဓေ ပဋိစ္စ အနိဒဿနအပ္ပဋိဃံ ကဋတ္တာရူပံ. ခန္ဓေ ပဋိစ္စ ဝတ္ထု။ပေ။ အာပေါဓာတုံ ပဋိစ္စ အနိဒဿနအပ္ပဋိဃံ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ. အာပေါဓာတုံ ပဋိစ္စ ဣတ္ထိန္ဒြိယံ။ပေ။ ကဗဠီကာရော အာဟာရော. ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ အာပေါဓာတုံ ပဋိစ္စ အနိဒဿနအပ္ပဋိဃံ ကဋတ္တာရူပံ ဥပါဒါရူပံ.

(အနိဒဿနအပ္ပဋိဃမူလကေ ဣမိနာ ကာရဏေန သတ္တပိ ပဉှာ ဝိတ္ထာရေတဗ္ဗာ.)

၂၂. အနိဒဿနသပ္ပဋိဃဉ္စ အနိဒဿနအပ္ပဋိဃဉ္စ ဓမ္မံ ပဋိစ္စ သနိဒဿနသပ္ပဋိဃော ဓမ္မော ဥပ္ပဇ္ဇတိ နအာရမ္မဏပစ္စယာ – အနိဒဿနအပ္ပဋိဃေ ခန္ဓေ စ မဟာဘူတေ စ ပဋိစ္စ သနိဒဿနသပ္ပဋိဃံ စိတ္တသမုဋ္ဌာနံ ရူပံ. ပဋိသန္ဓိက္ခဏေ အနိဒဿနအပ္ပဋိဃေ ခန္ဓေ စ မဟာဘူတေ စ ပဋိစ္စ သနိဒဿနသပ္ပဋိဃံ ကဋတ္တာရူပံ. အနိဒဿနသပ္ပဋိဃေ မဟာဘူတေ စ အာပေါဓာတုဉ္စ ပဋိစ္စ သနိဒဿနသပ္ပဋိဃံ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ. ဖောဋ္ဌဗ္ဗာယတနဉ္စ အာပေါဓာတုဉ္စ ပဋိစ္စ ရူပါယတနံ. ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ အနိဒဿနသပ္ပဋိဃေ မဟာဘူတေ စ အာပေါဓာတုဉ္စ ပဋိစ္စ သနိဒဿနသပ္ပဋိဃံ ကဋတ္တာရူပံ ဥပါဒါရူပံ.

(ဃဋနေ ဣမိနာ ကာရဏေန သတ္တပိ ပဉှာ ဝိဘဇိတဗ္ဗာ.)

နအဓိပတိပစ္စယာဒိ

၂၃. အနိဒဿနသပ္ပဋိဃံ ဓမ္မံ ပဋိစ္စ အနိဒဿနသပ္ပဋိဃော ဓမ္မော ဥပ္ပဇ္ဇတိ နအဓိပတိပစ္စယာ (သဟဇာတသဒိသံ)။ နအနန္တရပစ္စယာ။ နသမနန္တရပစ္စယာ။ နအညမညပစ္စယာ – အနိဒဿနသပ္ပဋိဃေ မဟာဘူတေ ပဋိစ္စ အနိဒဿနသပ္ပဋိဃံ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ. ဖောဋ္ဌဗ္ဗာယတနံ ပဋိစ္စ စက္ခာယတနံ။ပေ။ ရသာယတနံ။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ မဟာဘူတေ ပဋိစ္စ အနိဒဿနသပ္ပဋိဃံ ကဋတ္တာရူပံ ဥပါဒါရူပံ.

(ဣမိနာ ကာရဏေန ဧကဝီသ ပဉှာ ဝိဘဇိတဗ္ဗာ.)

နဥပနိဿယပစ္စယာ။ နပုရေဇာတပစ္စယာ။ နပစ္ဆာဇာတပစ္စယာ။ နအာသေဝနပစ္စယာ။ နကမ္မပစ္စယာ – ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အနိဒဿနသပ္ပဋိဃံ ဧကံ မဟာဘူတံ ပဋိစ္စ ဒွေ မဟာဘူတာ၊ ဒွေ မဟာဘူတေ ပဋိစ္စ ဧကံ မဟာဘူတံ. အနိဒဿနသပ္ပဋိဃေ မဟာဘူတေ ပဋိစ္စ အနိဒဿနသပ္ပဋိဃံ ဥပါဒါရူပံ (ကမ္မံ ဝိဘဇိတွာ နကမ္မေနေဝ ဧကဝီသ ပဉှာ ကာတဗ္ဗာ)၊ နဝိပါကပစ္စယာ (ပဋိသန္ဓိပိ ကဋတ္တာပိ နတ္ထိ၊ ပဉ္စဝေါကာရေယေဝ ကာတဗ္ဗာ)၊ နအာဟာရပစ္စယာ – ဗာဟိရံ။ ဥတုသမုဋ္ဌာနံ။ အသညသတ္တာနံ။ပေ။ (ဣမိနာ ကာရဏေန ဝိဘဇိတဗ္ဗာ ဧကဝီသာပိ).

နဣန္ဒြိယပစ္စယာဒိ

၂၄. အနိဒဿနသပ္ပဋိဃံ ဓမ္မံ ပဋိစ္စ အနိဒဿနသပ္ပဋိဃော ဓမ္မော ဥပ္ပဇ္ဇတိ နဣန္ဒြိယပစ္စယာ – ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အနိဒဿနသပ္ပဋိဃံ ဧကံ မဟာဘူတံ။ပေ။ အသညသတ္တာနံ မဟာဘူတေ ပဋိစ္စ ရူပဇီဝိတိန္ဒြိယံ (သံခိတ္တံ၊ သဗ္ဗေ ပဉှာ ဝိဘဇိတဗ္ဗာ)။ နဈာနပစ္စယာ – ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ ဧကံ မဟာဘူတံ (သံခိတ္တံ၊ သတ္တပိ ပဉှာ ဝိဘဇိတဗ္ဗာ).

အနိဒဿနအပ္ပဋိဃံ ဓမ္မံ ပဋိစ္စ အနိဒဿနအပ္ပဋိဃော ဓမ္မော ဥပ္ပဇ္ဇတိ နဈာနပစ္စယာ – ပဉ္စဝိညာဏသဟဂတံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ အာပေါဓာတုံ ပဋိစ္စ အနိဒဿနအပ္ပဋိဃံ ကဋတ္တာရူပံ ဥပါဒါရူပံ.

(ဧဝံ သတ္တပိ ပဉှာ ဝိဘဇိတဗ္ဗာ.)

၂၅. အနိဒဿနသပ္ပဋိဃဉ္စ အနိဒဿနအပ္ပဋိဃဉ္စ ဓမ္မံ ပဋိစ္စ သနိဒဿနသပ္ပဋိဃော ဓမ္မော ဥပ္ပဇ္ဇတိ နဈာနပစ္စယာ – ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။၊ အသညသတ္တာနံ။ပေ။ အနိဒဿနသပ္ပဋိဃေ မဟာဘူတေ စ အာပေါဓာတုဉ္စ ပဋိစ္စ သနိဒဿနသပ္ပဋိဃံ ကဋတ္တာရူပံ ဥပါဒါရူပံ.

(ဧဝံ သတ္တပိ ပဉှာ ဝိဘဇိတဗ္ဗာ)၊ နမဂ္ဂပစ္စယာ။ (နဟေတုသဒိသံ ကာတဗ္ဗံ. ပရိပုဏ္ဏံ. မောဟော နတ္ထိ). နသမ္ပယုတ္တပစ္စယာ။ နဝိပ္ပယုတ္တပစ္စယာ (ပရိပုဏ္ဏံ)။ နောနတ္ထိပစ္စယာ။ နောဝိဂတပစ္စယာ.