၁. ဝိဘင်္ဂဝါရော
ဟေတုပစ္စယော
၂၉. အနိဒဿနအပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ ဟေတုပစ္စယေန ပစ္စယော – အနိဒဿနအပ္ပဋိဃာ ဟေတူ သမ္ပယုတ္တကာနံ ခန္ဓာနံ အနိဒဿနအပ္ပဋိဃာနဉ္စ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော. ပဋိသန္ဓိက္ခဏေ အနိဒဿနအပ္ပဋိဃာ ဟေတူ သမ္ပယုတ္တကာနံ ခန္ဓာနံ အနိဒဿနအပ္ပဋိဃာနဉ္စ ကဋတ္တာရူပါနံ ဟေတုပစ္စယေန ပစ္စယော. (၁)
အနိဒဿနအပ္ပဋိဃော ဓမ္မော သနိဒဿနသပ္ပဋိဃဿ ဓမ္မဿ ဟေတုပစ္စယေန ပစ္စယော – အနိဒဿနအပ္ပဋိဃာ ဟေတူ သနိဒဿနသပ္ပဋိဃာနံ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော. ပဋိသန္ဓိက္ခဏေ။ပေ။. (၂)
(အနိဒဿနအပ္ပဋိဃမူလကေယေဝ ဣမိနာ ကာရဏေန သတ္တ ပဉှာ ဝိဘဇိတဗ္ဗာ.)
အာရမ္မဏပစ္စယော
၃၀. သနိဒဿနသပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ အာရမ္မဏပစ္စယေန ပစ္စယော – ရူပေ အနိစ္စတော ဒုက္ခတော အနတ္တတော ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဝိစိကိစ္ဆာ ဥပ္ပဇ္ဇတိ၊ ဥဒ္ဓစ္စံ ဥပ္ပဇ္ဇတိ၊ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ရူပါယတနံ စက္ခုဝိညာဏဿ အာရမ္မဏပစ္စယေန ပစ္စယော. သနိဒဿနသပ္ပဋိဃာ ခန္ဓာ ဣဒ္ဓိဝိဓဉာဏဿ၊ ပုဗ္ဗေနိဝါသာနုဿတိဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၁)
အနိဒဿနသပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ အာရမ္မဏပစ္စယေန ပစ္စယော. စက္ခုံ။ပေ။ ကာယံ။ သဒ္ဒေ။ ဂန္ဓေ။ ရသေ။ ဖောဋ္ဌဗ္ဗေ။ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗာယ သောတဓာတုယာ သဒ္ဒံ သုဏာတိ၊ သဒ္ဒါယတနံ သောတဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ။ပေ။ အနိဒဿနသပ္ပဋိဃာ ခန္ဓာ ဣဒ္ဓိဝိဓဉာဏဿ၊ ပုဗ္ဗေနိဝါသာနုဿတိဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၁)
၃၁. အနိဒဿနအပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ အာရမ္မဏပစ္စယေန ပစ္စယော – ဒါနံ ဒတွာ သီလံ သမာဒိယိတွာ ဥပေါသထကမ္မံ ကတွာ တံ ပစ္စဝေက္ခတိ၊ ပုဗ္ဗေ သုစိဏ္ဏာနိ ပစ္စဝေက္ခတိ၊ ဈာနာ။ပေ။ အရိယာ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခန္တိ၊ ဖလံ ပစ္စဝေက္ခန္တိ၊ နိဗ္ဗာနံ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ၊ အာဝဇ္ဇနာယ အာရမ္မဏပစ္စယေန ပစ္စယော. အရိယာ ပဟီနေ ကိလေသေ ပစ္စဝေက္ခန္တိ၊ ဝိက္ခမ္ဘိတေ ကိလေသေ ပစ္စဝေက္ခန္တိ၊ ပုဗ္ဗေ သမုဒါစိဏ္ဏေ ကိလေသေ ဇာနန္တိ။ပေ။ ဝတ္ထုံ။ ဣတ္ထိန္ဒြိယံ။ ပုရိသိန္ဒြိယံ။ ဇီဝိတိန္ဒြိယံ။ အာပေါဓာတုံ။ ကဗဠီကာရံ အာဟာရံ။ အနိဒဿနအပ္ပဋိဃေ ခန္ဓေ အနိစ္စတော။ပေ။ ဒေါမနဿံ ဥပ္ပဇ္ဇတိ၊ စေတောပရိယဉာဏေန အနိဒဿနအပ္ပဋိဃစိတ္တသမင်္ဂိဿ စိတ္တံ ဇာနာတိ၊ အာကာသာနဉ္စာယတနံ ဝိညာဏဉ္စာယတနဿ အာရမ္မဏပစ္စယေန ပစ္စယော. အာကိဉ္စညာယတနံ နေဝသညာနာသညာယတနဿ။ပေ။ အနိဒဿနအပ္ပဋိဃာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၁)
အဓိပတိပစ္စယော
၃၂. သနိဒဿနသပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ အဓိပတိပစ္စယေန ပစ္စယော. အာရမ္မဏာဓိပတိ – ရူပံ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. (၁)
အနိဒဿနသပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ အဓိပတိပစ္စယေန ပစ္စယော. အာရမ္မဏာဓိပတိ – စက္ခုံ။ပေ။ ကာယံ။ သဒ္ဒေ။ ဂန္ဓေ။ ရသေ။ ဖောဋ္ဌဗ္ဗေ။ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. (၁)
၃၃. အနိဒဿနအပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဒါနံ ဒတွာ သီလံ သမာဒိယိတွာ ဥပေါသထကမ္မံ ကတွာ တံ ဂရုံ ကတွာ။ပေ။ ဈာနာ ဝုဋ္ဌဟိတွာ။ပေ။ အရိယာ မဂ္ဂါ ဝုဋ္ဌဟိတွာ။ပေ။ ဖလာ ဝုဋ္ဌဟိတွာ။ပေ။ ဖလံ ဂရုံ ကတွာ။ပေ။ နိဗ္ဗာနံ ဂရုံ ကတွာ။ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ အဓိပတိပစ္စယေန ပစ္စယော. ဝတ္ထုံ။ ဣတ္ထိန္ဒြိယံ။ ပုရိသိန္ဒြိယံ။ ဇီဝိတိန္ဒြိယံ။ အာပေါဓာတုံ။ ကဗဠီကာရံ အာဟာရံ။ အနိဒဿနအပ္ပဋိဃေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. သဟဇာတာဓိပတိ – အနိဒဿနအပ္ပဋိဃာဓိပတိ သမ္ပယုတ္တကာနံ ခန္ဓာနံ အနိဒဿနအပ္ပဋိဃာနဉ္စ စိတ္တသမုဋ္ဌာနာနံ ရူပါနံ အဓိပတိပစ္စယေန ပစ္စယော. (၁)
အနိဒဿနအပ္ပဋိဃော ဓမ္မော သနိဒဿနသပ္ပဋိဃဿ ဓမ္မဿ အဓိပတိပစ္စယေန ပစ္စယော. သဟဇာတာဓိပတိ – အနိဒဿနအပ္ပဋိဃာဓိပတိ သနိဒဿနသပ္ပဋိဃာနံ စိတ္တသမုဋ္ဌာနာနံ ရူပါနံ အဓိပတိပစ္စယေန ပစ္စယော. (၂)
(အနိဒဿနအပ္ပဋိဃမူလကေ သတ္တပိ ပဉှာ ဝိဘဇိတဗ္ဗာ၊ အဓိပတိ တိဝိဓရူပသင်္ဂဟေန.)
အနန္တရပစ္စယော
၃၄. အနိဒဿနအပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ အနိဒဿနအပ္ပဋိဃာ ခန္ဓာ ပစ္ဆိမာနံ ပစ္ဆိမာနံ အနိဒဿနအပ္ပဋိဃာနံ ခန္ဓာနံ အနန္တရပစ္စယေန ပစ္စယော. အနုလောမံ ဂေါတြဘုဿ။ အနုလောမံ ဝေါဒါနဿ။ ဂေါတြဘု မဂ္ဂဿ။ ဝေါဒါနံ မဂ္ဂဿ။ မဂ္ဂေါ ဖလဿ။ ဖလံ ဖလဿ။ အနုလောမံ ဖလသမာပတ္တိယာ။ နိရောဓာ ဝုဋ္ဌဟန္တဿ နေဝသညာနာသညာယတနံ ဖလသမာပတ္တိယာ အနန္တရပစ္စယေန ပစ္စယော. (၁)
သမနန္တရပစ္စယော
၃၅. အနိဒဿနအပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ သမနန္တရပစ္စယေန ပစ္စယော (အနန္တရသဒိသံ).
သဟဇာတပစ္စယာဒိ
၃၆. အနိဒဿနသပ္ပဋိဃော ဓမ္မော အနိဒဿနသပ္ပဋိဃဿ ဓမ္မဿ သဟဇာတပစ္စယေန ပစ္စယော (ပဋိစ္စဝါရသဒိသံ သာဓုကံ ကာတဗ္ဗံ. အညမညပစ္စယေ ပဋိစ္စဝါရေ အညမညသဒိသံ၊ နိဿယပစ္စယေ ပဋိစ္စဝါရသဒိသံ).
ဥပနိဿယပစ္စယော
၃၇. သနိဒဿနသပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ ပကတူပနိဿယော။ပေ။. ပကတူပနိဿယော – ဝဏ္ဏသမ္ပဒံ ပတ္ထယမာနော ဒါနံ ဒေတိ၊ သီလံ သမာဒိယတိ၊ ဥပေါသထကမ္မံ။ပေ။ ဝဏ္ဏသမ္ပဒါ သဒ္ဓါယ။ပေ။ ပညာယ၊ ရာဂဿ။ပေ။ ပတ္ထနာယ၊ ကာယိကဿ သုခဿ၊ ကာယိကဿ ဒုက္ခဿ၊ မဂ္ဂဿ၊ ဖလသမာပတ္တိယာ ဥပနိဿယပစ္စယေန ပစ္စယော. (၁)
အနိဒဿနသပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ ပကတူပနိဿယော။ပေ။. ပကတူပနိဿယော – စက္ခုသမ္ပဒံ ပတ္ထယမာနော။ပေ။ ကာယသမ္ပဒံ။ သဒ္ဒသမ္ပဒံ။ပေ။ ဖောဋ္ဌဗ္ဗသမ္ပဒံ ပတ္ထယမာနော ဒါနံ ဒေတိ၊ သီလံ သမာဒိယတိ၊ ဥပေါသထကမ္မံ။ ဥတုံ။ သေနာသနံ ဥပနိဿာယ ဒါနံ ဒေတိ သီလံ သမာဒိယတိ. ဥပေါသထကမ္မံ၊ ဈာနံ။ ဝိပဿနံ။ မဂ္ဂံ။ အဘိညံ။ သမာပတ္တိံ ဥပ္ပါဒေတိ ပါဏံ ဟနတိ။ပေ။ သံဃံ ဘိန္ဒတိ. စက္ခုသမ္ပဒါ။ပေ။ ဖောဋ္ဌဗ္ဗသမ္ပဒါ၊ ဥတု၊ သေနာသနံ သဒ္ဓါယ။ပေ။ ပညာယ၊ ရာဂဿ။ပေ။ ပတ္ထနာယ၊ ကာယိကဿ သုခဿ၊ ကာယိကဿ ဒုက္ခဿ၊ မဂ္ဂဿ၊ ဖလသမာပတ္တိယာ ဥပနိဿယပစ္စယေန ပစ္စယော. (၁)
၃၈. အနိဒဿနအပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – သဒ္ဓံ ဥပနိဿာယ ဒါနံ ဒေတိ၊ သီလံ သမာဒိယတိ၊ ဥပေါသထကမ္မံ။ ဈာနံ။ သမာပတ္တိံ ဥပ္ပါဒေတိ၊ မာနံ ဇပ္ပေတိ၊ ဒိဋ္ဌိံ ဂဏှာတိ. သီလံ။ပေ။ ပညံ။ ရာဂံ။ပေ။ ပတ္ထနံ၊ ကာယိကံ သုခံ။ ကာယိကံ ဒုက္ခံ။ ဘောဇနံ ဥပနိဿာယ ဒါနံ ဒေတိ။ပေ။ သံဃံ ဘိန္ဒတိ. သဒ္ဓါ ။ပေ။ ပညာ၊ ရာဂေါ။ပေ။ ပတ္ထနာ၊ ကာယိကံ သုခံ။ ကာယိကံ ဒုက္ခံ။ ဘောဇနံ သဒ္ဓါယ။ပေ။ ပညာယ၊ မဂ္ဂဿ၊ ဖလသမာပတ္တိယာ ဥပနိဿယပစ္စယေန ပစ္စယော. (၁)
ပုရေဇာတပစ္စယော
၃၉. သနိဒဿနသပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ ပုရေဇာတပစ္စယေန ပစ္စယော. အာရမ္မဏပုရေဇာတံ – ရူပေ အနိစ္စတော ဒုက္ခတော အနတ္တတော ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ၊ ဒိဋ္ဌိ။ပေ။ ဝိစိကိစ္ဆာ။ပေ။ ဥဒ္ဓစ္စံ။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ရူပါယတနံ စက္ခုဝိညာဏဿ ပုရေဇာတပစ္စယေန ပစ္စယော. (၁)
အနိဒဿနသပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ကာယံ။ သဒ္ဒေ။ပေ။ ဖောဋ္ဌဗ္ဗေ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗာယ သောတဓာတုယာ သဒ္ဒံ သုဏာတိ၊ သဒ္ဒါယတနံ သောတဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ ပုရေဇာတပစ္စယေန ပစ္စယော. ဝတ္ထုပုရေဇာတံ – စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ ပုရေဇာတပစ္စယေန ပစ္စယော. (၁)
အနိဒဿနအပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – ဝတ္ထုံ။ ဣတ္ထိန္ဒြိယံ။ ပုရိသိန္ဒြိယံ။ ဇီဝိတိန္ဒြိယံ။ အာပေါဓာတုံ။ ကဗဠီကာရံ အာဟာရံ။ အနိစ္စတော။ပေ။ ဒေါမနဿံ ဥပ္ပဇ္ဇတိ. ဝတ္ထုပုရေဇာတံ – ဝတ္ထု အနိဒဿနအပ္ပဋိဃာနံ ခန္ဓာနံ ပုရေဇာတပစ္စယေန ပစ္စယော. (၁)
၄၀. သနိဒဿနသပ္ပဋိဃော စ အနိဒဿနအပ္ပဋိဃော စ ဓမ္မာ အနိဒဿနအပ္ပဋိဃဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. ရူပါယတနဉ္စ ဝတ္ထု စ အနိဒဿနအပ္ပဋိဃာနံ ခန္ဓာနံ ပုရေဇာတပစ္စယေန ပစ္စယော. (၁)
အနိဒဿနသပ္ပဋိဃော စ အနိဒဿနအပ္ပဋိဃော စ ဓမ္မာ အနိဒဿနအပ္ပဋိဃဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. စက္ခာယတနဉ္စ ဝတ္ထု စ။ပေ။ ဖောဋ္ဌဗ္ဗာယတနဉ္စ ဝတ္ထု စ အနိဒဿနအပ္ပဋိဃာနံ ခန္ဓာနံ ပုရေဇာတပစ္စယေန ပစ္စယော. (၁)
သနိဒဿနသပ္ပဋိဃော စ အနိဒဿနအပ္ပဋိဃော စ ဓမ္မာ အနိဒဿနအပ္ပဋိဃဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. ရူပါယတနဉ္စ စက္ခာယတနဉ္စ စက္ခုဝိညာဏဿ ပုရေဇာတပစ္စယေန ပစ္စယော. (၁)
ပစ္ဆာဇာတပစ္စယော
၄၁. အနိဒဿနအပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ အနိဒဿနအပ္ပဋိဃာ ခန္ဓာ ပုရေဇာတဿ ဣမဿ အနိဒဿနအပ္ပဋိဃဿ ကာယဿ ပစ္ဆာဇာတပစ္စယေန ပစ္စယော. (၁)
အနိဒဿနအပ္ပဋိဃော ဓမ္မော သနိဒဿနသပ္ပဋိဃဿ ဓမ္မဿ ပစ္ဆာဇာတပစ္စယေန ပစ္စယော – ပစ္ဆာဇာတာ အနိဒဿနအပ္ပဋိဃာ ခန္ဓာ ပုရေဇာတဿ ဣမဿ သနိဒဿနသပ္ပဋိဃဿ ကာယဿ ပစ္ဆာဇာတပစ္စယေန ပစ္စယော. (၂)
(ဧဝံ သတ္တ ပဉှာ ဝိဘဇိတဗ္ဗာ၊ တိဝိဓရူပသင်္ဂဟော.) (၇)
အာသေဝနပစ္စယော
၄၂. အနိဒဿနအပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ အာသေဝနပစ္စယေန ပစ္စယော – ပုရိမာ ပုရိမာ အနိဒဿနအပ္ပဋိဃာ ခန္ဓာ ပစ္ဆိမာနံ ပစ္ဆိမာနံ အနိဒဿနအပ္ပဋိဃာနံ ခန္ဓာနံ အာသေဝနပစ္စယေန ပစ္စယော. အနုလောမံ ဂေါတြဘုဿ။ အနုလောမံ ဝေါဒါနဿ။ ဂေါတြဘု မဂ္ဂဿ။ ဝေါဒါနံ မဂ္ဂဿ အာသေဝနပစ္စယေန ပစ္စယော. (၁)
ကမ္မပစ္စယော
၄၃. အနိဒဿနအပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – အနိဒဿနအပ္ပဋိဃာ စေတနာ သမ္ပယုတ္တကာနံ ခန္ဓာနံ အနိဒဿနအပ္ပဋိဃာနဉ္စ စိတ္တသမုဋ္ဌာနာနံ ရူပါနံ ကမ္မပစ္စယေန ပစ္စယော. ပဋိသန္ဓိက္ခဏေ။ပေ။. နာနာက္ခဏိကာ – အနိဒဿနအပ္ပဋိဃာ စေတနာ ဝိပါကာနံ ခန္ဓာနံ အနိဒဿနအပ္ပဋိဃာနဉ္စ ကဋတ္တာရူပါနံ ကမ္မပစ္စယေန ပစ္စယော. (၁)
အနိဒဿနအပ္ပဋိဃော ဓမ္မော သနိဒဿနသပ္ပဋိဃဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – အနိဒဿနအပ္ပဋိဃာ စေတနာ သနိဒဿနသပ္ပဋိဃာနံ စိတ္တသမုဋ္ဌာနာနံ ရူပါနံ ကမ္မပစ္စယေန ပစ္စယော. ပဋိသန္ဓိက္ခဏေ။ပေ။. နာနာက္ခဏိကာ – အနိဒဿနအပ္ပဋိဃာ စေတနာ သနိဒဿနသပ္ပဋိဃာနံ ကဋတ္တာရူပါနံ ကမ္မပစ္စယေန ပစ္စယော. (၂)
(ဧဝံ သတ္တ ပဉှာ သဟဇာတာ နာနာက္ခဏိကာ ဣမိနာ ကာရဏေန ဝိဘဇိတဗ္ဗာ၊ တိဝိဓရူပသင်္ဂဟော.) (၇)
ဝိပါကပစ္စယော
၄၄. အနိဒဿနအပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ ဝိပါကပစ္စယေန ပစ္စယော – ဝိပါကော အနိဒဿနအပ္ပဋိဃော ဧကော ခန္ဓော တိဏ္ဏန္နံ ခန္ဓာနံ အနိဒဿနအပ္ပဋိဃာနံ စိတ္တသမုဋ္ဌာနာနဉ္စ ရူပါနံ ဝိပါကပစ္စယေန ပစ္စယော။ပေ။ ဒွေ ခန္ဓာ။ပေ။ ပဋိသန္ဓိက္ခဏေ အနိဒဿနအပ္ပဋိဃော ဧကော ခန္ဓော တိဏ္ဏန္နံ ခန္ဓာနံ အနိဒဿနအပ္ပဋိဃာနဉ္စ ကဋတ္တာရူပါနံ ဝိပါကပစ္စယေန ပစ္စယော။ပေ။ ခန္ဓာ ဝတ္ထုဿ ဝိပါကပစ္စယေန ပစ္စယော. (၁)
အနိဒဿနအပ္ပဋိဃော ဓမ္မော သနိဒဿနသပ္ပဋိဃဿ ဓမ္မဿ ဝိပါကပစ္စယေန ပစ္စယော – ဝိပါကာ အနိဒဿနအပ္ပဋိဃာ ခန္ဓာ သနိဒဿနသပ္ပဋိဃာနံ စိတ္တသမုဋ္ဌာနာနံ ရူပါနံ ဝိပါကပစ္စယေန ပစ္စယော. ပဋိသန္ဓိက္ခဏေ အနိဒဿနအပ္ပဋိဃာ ခန္ဓာ သနိဒဿနသပ္ပဋိဃာနံ ကဋတ္တာရူပါနံ ဝိပါကပစ္စယေန ပစ္စယော. (၂)
(ဧဝံ သတ္တ ပဉှာ ဝိတ္ထာရေတဗ္ဗာ၊ ပဝတ္တိပဋိသန္ဓိ.) (၇)
အာဟာရပစ္စယော
၄၅. အနိဒဿနအပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ အာဟာရပစ္စယေန ပစ္စယော – အနိဒဿနအပ္ပဋိဃာ အာဟာရာ သမ္ပယုတ္တကာနံ ခန္ဓာနံ အနိဒဿနအပ္ပဋိဃာနဉ္စ စိတ္တသမုဋ္ဌာနာနံ ရူပါနံ အာဟာရပစ္စယေန ပစ္စယော. ပဋိသန္ဓိက္ခဏေ အနိဒဿနအပ္ပဋိဃာ အာဟာရာ သမ္ပယုတ္တကာနံ ခန္ဓာနံ အနိဒဿနအပ္ပဋိဃာနဉ္စ ကဋတ္တာရူပါနံ အာဟာရပစ္စယေန ပစ္စယော. ကဗဠီကာရော အာဟာရော ဣမဿ အနိဒဿနအပ္ပဋိဃဿ ကာယဿ အာဟာရပစ္စယေန ပစ္စယော. (၁)
အနိဒဿနအပ္ပဋိဃော ဓမ္မော သနိဒဿနသပ္ပဋိဃဿ ဓမ္မဿ အာဟာရပစ္စယေန ပစ္စယော – အနိဒဿနအပ္ပဋိဃာ အာဟာရာ သနိဒဿနသပ္ပဋိဃာနံ စိတ္တသမုဋ္ဌာနာနံ ရူပါနံ အာဟာရပစ္စယေန ပစ္စယော. ပဋိသန္ဓိက္ခဏေ အနိဒဿနအပ္ပဋိဃာ အာဟာရာ သနိဒဿနသပ္ပဋိဃာနံ ကဋတ္တာရူပါနံ အာဟာရပစ္စယေန ပစ္စယော. ကဗဠီကာရော အာဟာရော ဣမဿ သနိဒဿနသပ္ပဋိဃဿ ကာယဿ အာဟာရပစ္စယေန ပစ္စယော. (၂)
(ဧဝံ သတ္တ ပဉှာ ပဝတ္တိပဋိသန္ဓိ ဝိဘဇိတဗ္ဗာ၊ သတ္တသုပိ ကဗဠီကာရော အာဟာရော ကာတဗ္ဗော.) (၇)
ဣန္ဒြိယပစ္စယော
၄၆. အနိဒဿနသပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ ဣန္ဒြိယပစ္စယေန ပစ္စယော – စက္ခုန္ဒြိယံ စက္ခုဝိညာဏဿ။ပေ။ ကာယိန္ဒြိယံ ကာယဝိညာဏဿ ဣန္ဒြိယပစ္စယေန ပစ္စယော. (၁)
အနိဒဿနအပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ ဣန္ဒြိယပစ္စယေန ပစ္စယော – အနိဒဿနအပ္ပဋိဃာ ဣန္ဒြိယာ သမ္ပယုတ္တကာနံ ခန္ဓာနံ အနိဒဿနအပ္ပဋိဃာနံ စိတ္တသမုဋ္ဌာနာနဉ္စ ရူပါနံ ဣန္ဒြိယပစ္စယေန ပစ္စယော. ပဋိသန္ဓိက္ခဏေ အနိဒဿနအပ္ပဋိဃာ ဣန္ဒြိယာ သမ္ပယုတ္တကာနံ ခန္ဓာနံ အနိဒဿနအပ္ပဋိဃာနဉ္စ ကဋတ္တာရူပါနံ ဣန္ဒြိယပစ္စယေန ပစ္စယော. ရူပဇီဝိတိန္ဒြိယံ အနိဒဿနအပ္ပဋိဃာနံ ကဋတ္တာရူပါနံ ဣန္ဒြိယပစ္စယေန ပစ္စယော. (၁)
အနိဒဿနအပ္ပဋိဃော ဓမ္မော သနိဒဿနသပ္ပဋိဃဿ ဓမ္မဿ ဣန္ဒြိယပစ္စယေန ပစ္စယော – အနိဒဿနအပ္ပဋိဃာ ဣန္ဒြိယာ သနိဒဿနသပ္ပဋိဃာနံ စိတ္တသမုဋ္ဌာနာနံ ရူပါနံ ဣန္ဒြိယပစ္စယေန ပစ္စယော. ပဋိသန္ဓိက္ခဏေ အနိဒဿနအပ္ပဋိဃာ ဣန္ဒြိယာ သနိဒဿနသပ္ပဋိဃာနံ ကဋတ္တာရူပါနံ ဣန္ဒြိယပစ္စယေန ပစ္စယော. ရူပဇီဝိတိန္ဒြိယံ သနိဒဿနသပ္ပဋိဃာနံ ကဋတ္တာရူပါနံ ဣန္ဒြိယပစ္စယေန ပစ္စယော. (၂)
(ဧဝံ ပဝတ္တိပဋိသန္ဓိ သတ္တ ပဉှာ ဝိဘဇိတဗ္ဗာ၊ ရူပဇီဝိတိန္ဒြိယဉ္စ အန္တေ အန္တေ.) (၇)
၄၇. အနိဒဿနသပ္ပဋိဃော စ အနိဒဿနအပ္ပဋိဃော စ ဓမ္မာ အနိဒဿနအပ္ပဋိဃဿ ဓမ္မဿ ဣန္ဒြိယပစ္စယေန ပစ္စယော – စက္ခုန္ဒြိယဉ္စ စက္ခုဝိညာဏဉ္စ စက္ခုဝိညာဏသဟဂတာနံ ခန္ဓာနံ ဣန္ဒြိယပစ္စယေန ပစ္စယော။ပေ။ ကာယိန္ဒြိယဉ္စ ကာယဝိညာဏဉ္စ ကာယဝိညာဏသဟဂတာနံ ခန္ဓာနံ ဣန္ဒြိယပစ္စယေန ပစ္စယော. (၁)
ဈာနပစ္စယာဒိ
၄၈. အနိဒဿနအပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ ဈာနပစ္စယေန ပစ္စယော။ မဂ္ဂပစ္စယေန ပစ္စယော။ သမ္ပယုတ္တပစ္စယေန ပစ္စယော – အနိဒဿနအပ္ပဋိဃော ဧကော ခန္ဓော တိဏ္ဏန္နံ ခန္ဓာနံ သမ္ပယုတ္တပစ္စယေန ပစ္စယော။ပေ။ ဒွေ ခန္ဓာ။ပေ။ ပဋိသန္ဓိက္ခဏေ။ပေ။.
ဝိပ္ပယုတ္တပစ္စယော
၄၉. အနိဒဿနသပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ ဝိပ္ပယုတ္တပစ္စယေန ပစ္စယော. ပုရေဇာတံ – စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ ဝိပ္ပယုတ္တပစ္စယေန ပစ္စယော. (၁)
အနိဒဿနအပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ. သဟဇာတာ – အနိဒဿနအပ္ပဋိဃာ ခန္ဓာ အနိဒဿနအပ္ပဋိဃာနံ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော. ပဋိသန္ဓိက္ခဏေ အနိဒဿနအပ္ပဋိဃာ ခန္ဓာ အနိဒဿနအပ္ပဋိဃာနံ ကဋတ္တာရူပါနံ ဝိပ္ပယုတ္တပစ္စယေန ပစ္စယော. ခန္ဓာ ဝတ္ထုဿ ဝိပ္ပယုတ္တပစ္စယေန ပစ္စယော. ဝတ္ထု ခန္ဓာနံ ဝိပ္ပယုတ္တပစ္စယေန ပစ္စယော. ပုရေဇာတံ – ဝတ္ထု အနိဒဿနအပ္ပဋိဃာနံ ခန္ဓာနံ ဝိပ္ပယုတ္တပစ္စယေန ပစ္စယော. ပစ္ဆာဇာတာ – အနိဒဿနအပ္ပဋိဃာ ခန္ဓာ ပုရေဇာတဿ ဣမဿ အနိဒဿနအပ္ပဋိဃဿ ကာယဿ ဝိပ္ပယုတ္တပစ္စယေန ပစ္စယော. (၁)
အနိဒဿနအပ္ပဋိဃော ဓမ္မော သနိဒဿနသပ္ပဋိဃဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ. သဟဇာတာ – အနိဒဿနအပ္ပဋိဃာ ခန္ဓာ သနိဒဿနသပ္ပဋိဃာနံ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော. ပဋိသန္ဓိက္ခဏေ အနိဒဿနအပ္ပဋိဃာ ခန္ဓာ သနိဒဿနသပ္ပဋိဃာနံ ကဋတ္တာရူပါနံ ဝိပ္ပယုတ္တပစ္စယေန ပစ္စယော. ပစ္ဆာဇာတာ – အနိဒဿနအပ္ပဋိဃာ ခန္ဓာ ပုရေဇာတဿ ဣမဿ သနိဒဿနသပ္ပဋိဃဿ ကာယဿ ဝိပ္ပယုတ္တပစ္စယေန ပစ္စယော. (၂)
(အဝသေသာ ပဉ္စ ပဉှာ ဧဝံ ဝိတ္ထာရေတဗ္ဗာ. သဟဇာတာ၊ ပစ္ဆာဇာတာ.)
အတ္ထိပစ္စယော
၅၀. သနိဒဿနသပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ အတ္ထိပစ္စယေန ပစ္စယော. ပုရေဇာတံ – ရူပေ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ၊ ရူပါယတနံ စက္ခုဝိညာဏဿ အတ္ထိပစ္စယေန ပစ္စယော. (၁)
၅၁. အနိဒဿနသပ္ပဋိဃော ဓမ္မော အနိဒဿနသပ္ပဋိဃဿ ဓမ္မဿ အတ္ထိပစ္စယေန ပစ္စယော – အနိဒဿနသပ္ပဋိဃံ ဧကံ မဟာဘူတံ ဒွိန္နံ မဟာဘူတာနံ အတ္ထိပစ္စယေန ပစ္စယော. ဒွေ မဟာဘူတာ ဧကဿ မဟာဘူတဿ အတ္ထိပစ္စယေန ပစ္စယော. အနိဒဿနသပ္ပဋိဃာ မဟာဘူတာ အနိဒဿနသပ္ပဋိဃာနံ စိတ္တသမုဋ္ဌာနာနံ ရူပါနံ ကဋတ္တာရူပါနံ ဥပါဒါရူပါနံ အတ္ထိပစ္စယေန ပစ္စယော. ဖောဋ္ဌဗ္ဗာယတနံ စက္ခာယတနဿ။ပေ။ ရသာယတနဿ အတ္ထိပစ္စယေန ပစ္စယော. ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ ဧကံ မဟာဘူတံ ဒွိန္နံ မဟာဘူတာနံ အတ္ထိပစ္စယေန ပစ္စယော. ဒွေ မဟာဘူတာ ဧကဿ မဟာဘူတဿ အတ္ထိပစ္စယေန ပစ္စယော. ဥတုသမုဋ္ဌာနာ မဟာဘူတာ အနိဒဿနသပ္ပဋိဃာနံ ဥပါဒါရူပါနံ အတ္ထိပစ္စယေန ပစ္စယော. အသညသတ္တာနံ အနိဒဿနသပ္ပဋိဃံ ဧကံ မဟာဘူတံ ဒွိန္နံ မဟာဘူတာနံ အတ္ထိပစ္စယေန ပစ္စယော. ဒွေ မဟာဘူတာ။ပေ။. (၁)
အနိဒဿနသပ္ပဋိဃော ဓမ္မော သနိဒဿနသပ္ပဋိဃဿ ဓမ္မဿ အတ္ထိပစ္စယေန ပစ္စယော. (၂)
(ပဋိစ္စဝါရေ နိဿယပစ္စယသဒိသံ.)
အနိဒဿနသပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတာ – အနိဒဿနသပ္ပဋိဃာ မဟာဘူတာ အနိဒဿနအပ္ပဋိဃာနံ စိတ္တသမုဋ္ဌာနာနံ ရူပါနံ ကဋတ္တာရူပါနံ ဥပါဒါရူပါနံ အတ္ထိပစ္စယေန ပစ္စယော (ယာဝ အသညသတ္တာ ဝိတ္ထာရေတဗ္ဗာ). ပုရေဇာတံ – စက္ခုံ။ပေ။ ကာယံ၊ သဒ္ဒေ။ပေ။ ဖောဋ္ဌဗ္ဗေ အနိစ္စတော။ပေ။ ဒေါမနဿံ ဥပ္ပဇ္ဇတိ၊ စက္ခာယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ အတ္ထိပစ္စယေန ပစ္စယော. (၃)
(အဝသေသာ စတ္တာရော ပဉှာ ဝိတ္ထာရေတဗ္ဗာ. ပဋိစ္စဝါရေ သဟဇာတပစ္စယသဒိသာ၊ နိန္နာနာကရဏာ.) (၇)
၅၂. အနိဒဿနအပ္ပဋိဃော ဓမ္မော အနိဒဿနအပ္ပဋိဃဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. သဟဇာတော – အနိဒဿနအပ္ပဋိဃော ဧကော ခန္ဓော တိဏ္ဏန္နံ ခန္ဓာနံ အနိဒဿနအပ္ပဋိဃာနံ စိတ္တသမုဋ္ဌာနာနဉ္စ ရူပါနံ အတ္ထိပစ္စယေန ပစ္စယော. ဒွေ ခန္ဓာ။ပေ။ ပဋိသန္ဓိက္ခဏေ။ပေ။ အာပေါဓာတု အနိဒဿနအပ္ပဋိဃာနံ စိတ္တသမုဋ္ဌာနာနံ ရူပါနံ ကဋတ္တာရူပါနံ ဥပါဒါရူပါနံ။ပေ။ အာပေါဓာတု ဣတ္ထိန္ဒြိယဿ။ပေ။ ကဗဠီကာရာဟာရဿ စ အတ္ထိပစ္စယေန ပစ္စယော. ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ အာပေါဓာတု အနိဒဿနအပ္ပဋိဃာနံ ကဋတ္တာရူပါနံ ဥပါဒါရူပါနံ အတ္ထိပစ္စယေန ပစ္စယော. ပုရေဇာတံ – ဝတ္ထုံ။ ဣတ္ထိန္ဒြိယံ။ ပုရိသိန္ဒြိယံ။ ဇီဝိတိန္ဒြိယံ။ အာပေါဓာတုံ။ ကဗဠီကာရံ အာဟာရံ။ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဝတ္ထု အနိဒဿနအပ္ပဋိဃာနံ ခန္ဓာနံ အတ္ထိပစ္စယေန ပစ္စယော. ပစ္ဆာဇာတာ – အနိဒဿနအပ္ပဋိဃာ ခန္ဓာ ပုရေဇာတဿ ဣမဿ အနိဒဿနအပ္ပဋိဃဿ ကာယဿ အတ္ထိပစ္စယေန ပစ္စယော. ကဗဠီကာရော အာဟာရော ဣမဿ အနိဒဿနအပ္ပဋိဃဿ ကာယဿ အတ္ထိပစ္စယေန ပစ္စယော. ရူပဇီဝိတိန္ဒြိယံ အနိဒဿနအပ္ပဋိဃာနံ ကဋတ္တာရူပါနံ အတ္ထိပစ္စယေန ပစ္စယော (ဧဝံ အဝသေသာ ဆ ပဉှာ ဝိဘဇိတဗ္ဗာ. သဟဇာတံ၊ ပစ္ဆာဇာတံ၊ အာဟာရံ၊ ဣန္ဒြိယမ္ပိ ကာတဗ္ဗာ). (၇)
၅၃. သနိဒဿနသပ္ပဋိဃော စ အနိဒဿနအပ္ပဋိဃော စ ဓမ္မာ အနိဒဿနအပ္ပဋိဃဿ ဓမ္မဿ အတ္ထိပစ္စယေန ပစ္စယော. ပုရေဇာတံ – ရူပါယတနဉ္စ ဝတ္ထု စ အနိဒဿနအပ္ပဋိဃာနံ ခန္ဓာနံ အတ္ထိပစ္စယေန ပစ္စယော. (၁)
အနိဒဿနသပ္ပဋိဃော စ အနိဒဿနအပ္ပဋိဃော စ ဓမ္မာ သနိဒဿနသပ္ပဋိဃဿ ဓမ္မဿ အတ္ထိပစ္စယေန ပစ္စယော – အနိဒဿနအပ္ပဋိဃာ ခန္ဓာ စ မဟာဘူတာ စ သနိဒဿနသပ္ပဋိဃာနံ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော. ပဋိသန္ဓိက္ခဏေ။ (သံခိတ္တံ၊ အသညသတ္တာနဉ္စ ကာတဗ္ဗာ). (၁)
အနိဒဿနသပ္ပဋိဃော စ အနိဒဿနအပ္ပဋိဃော စ ဓမ္မာ အနိဒဿနသပ္ပဋိဃဿ ဓမ္မဿ အတ္ထိပစ္စယေန ပစ္စယော (သံခိတ္တံ). (၂)
၅၄. အနိဒဿနသပ္ပဋိဃော စ အနိဒဿနအပ္ပဋိဃော စ ဓမ္မာ အနိဒဿနအပ္ပဋိဃဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတာ – အနိဒဿနအပ္ပဋိဃာ ခန္ဓာ စ မဟာဘူတာ စ အနိဒဿနအပ္ပဋိဃာနံ စိတ္တသမုဋ္ဌာနာနံ ရူပါနံ။ပေ။ (ယာဝ အသညသတ္တာ ကာတဗ္ဗာ). ပုရေဇာတံ – စက္ခာယတနဉ္စ ဝတ္ထု စ။ပေ။ ဖောဋ္ဌဗ္ဗာယတနဉ္စ ဝတ္ထု စ အနိဒဿနအပ္ပဋိဃာနံ ခန္ဓာနံ အတ္ထိပစ္စယေန ပစ္စယော. (၃) (အဝသေသာ စတဿော ပဉှာ ဝိဘဇိတဗ္ဗာ.) (၇)
၅၅. သနိဒဿနသပ္ပဋိဃော စ အနိဒဿနသပ္ပဋိဃော စ ဓမ္မာ အနိဒဿနအပ္ပဋိဃဿ ဓမ္မဿ အတ္ထိပစ္စယေန ပစ္စယော. ပုရေဇာတံ – ရူပါယတနဉ္စ စက္ခာယတနဉ္စ စက္ခုဝိညာဏဿ အတ္ထိပစ္စယေန ပစ္စယော. (၁)
သနိဒဿနသပ္ပဋိဃော စ အနိဒဿနသပ္ပဋိဃော စ အနိဒဿနအပ္ပဋိဃော စ ဓမ္မာ အနိဒဿနအပ္ပဋိဃဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. ရူပါယတနဉ္စ စက္ခာယတနဉ္စ စက္ခုဝိညာဏဉ္စ စက္ခုဝိညာဏသဟဂတာနံ ခန္ဓာနံ အတ္ထိပစ္စယေန ပစ္စယော. (၁)
(နတ္ထိဝိဂတပစ္စယံ အနန္တရသဒိသံ. အဝိဂတပစ္စယံ အတ္ထိသဒိသံ.)