၁. ဝိဘင်္ဂဝါရော

ဟေတုပစ္စယော

၁. အဇ္ဈတ္တံ ဓမ္မံ ပဋိစ္စ အဇ္ဈတ္တော ဓမ္မော ဥပ္ပဇ္ဇတိ ဟေတုပစ္စယာ – အဇ္ဈတ္တံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ အဇ္ဈတ္တံ ဧကံ ခန္ဓံ ပဋိစ္စ တယော ခန္ဓာ ကဋတ္တာ စ ရူပံ။ပေ။ ဒွေ ခန္ဓေ။ပေ။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ. ဧကံ မဟာဘူတံ ပဋိစ္စ တယော မဟာဘူတာ။ပေ။ မဟာဘူတေ ပဋိစ္စ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ. (၁)

ဗဟိဒ္ဓါ ဓမ္မံ ပဋိစ္စ ဗဟိဒ္ဓါ ဓမ္မော ဥပ္ပဇ္ဇတိ ဟေတုပစ္စယာ – ဗဟိဒ္ဓါ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ ဗဟိဒ္ဓါ ဧကံ ခန္ဓံ ပဋိစ္စ တယော ခန္ဓာ ကဋတ္တာ စ ရူပံ။ပေ။ ဒွေ ခန္ဓေ ပဋိစ္စ ဒွေ ခန္ဓာ။ပေ။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ. ဧကံ မဟာဘူတံ ပဋိစ္စ တယော မဟာဘူတာ။ပေ။ မဟာဘူတေ ပဋိစ္စ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ. (၁)

အာရမ္မဏပစ္စယော

၂. အဇ္ဈတ္တံ ဓမ္မံ ပဋိစ္စ အဇ္ဈတ္တော ဓမ္မော ဥပ္ပဇ္ဇတိ အာရမ္မဏပစ္စယာ – အဇ္ဈတ္တံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ ပဋိစ္စ။ပေ။ ပဋိသန္ဓိက္ခဏေ အဇ္ဈတ္တံ ဧကံ ခန္ဓံ ပဋိစ္စ တယော ခန္ဓာ။ပေ။ ဝတ္ထုံ ပဋိစ္စ ခန္ဓာ. (၁)

ဗဟိဒ္ဓါ ဓမ္မံ ပဋိစ္စ ဗဟိဒ္ဓါ ဓမ္မော ဥပ္ပဇ္ဇတိ အာရမ္မဏပစ္စယာ – ဗဟိဒ္ဓါ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ ဝတ္ထုံ ပဋိစ္စ ခန္ဓာ. (၁)

အဓိပတိပစ္စယော

၃. အဇ္ဈတ္တံ ဓမ္မံ ပဋိစ္စ အဇ္ဈတ္တော ဓမ္မော ဥပ္ပဇ္ဇတိ အဓိပတိပစ္စယာ – အဇ္ဈတ္တံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ဧကံ မဟာဘူတံ ပဋိစ္စ။ပေ။ မဟာဘူတေ ပဋိစ္စ စိတ္တသမုဋ္ဌာနံ ရူပံ ဥပါဒါရူပံ. (၁)

ဗဟိဒ္ဓါ ဓမ္မံ ပဋိစ္စ ဗဟိဒ္ဓါ ဓမ္မော ဥပ္ပဇ္ဇတိ အဓိပတိပစ္စယာ – ဗဟိဒ္ဓါ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ဧကံ မဟာဘူတံ ပဋိစ္စ။ပေ။ မဟာဘူတေ ပဋိစ္စ စိတ္တသမုဋ္ဌာနံ ရူပံ ဥပါဒါရူပံ. (၁)

အနန္တရပစ္စယာဒိ

၄. အဇ္ဈတ္တံ ဓမ္မံ ပဋိစ္စ အဇ္ဈတ္တော ဓမ္မော ဥပ္ပဇ္ဇတိ အနန္တရပစ္စယာ၊ သမနန္တရပစ္စယာ၊ သဟဇာတပစ္စယာ – အဇ္ဈတ္တံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ အဇ္ဈတ္တံ ဧကံ ခန္ဓံ ပဋိစ္စ တယော ခန္ဓာ ကဋတ္တာ စ ရူပံ။ပေ။ ဒွေ ခန္ဓေ။ပေ။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ. ဧကံ မဟာဘူတံ ပဋိစ္စ တယော မဟာဘူတာ။ပေ။ မဟာဘူတေ ပဋိစ္စ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ. အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ ဧကံ မဟာဘူတံ ပဋိစ္စ။ပေ။ မဟာဘူတေ ပဋိစ္စ ကဋတ္တာရူပံ ဥပါဒါရူပံ. (၁)

ဗဟိဒ္ဓါ ဓမ္မံ ပဋိစ္စ ဗဟိဒ္ဓါ ဓမ္မော ဥပ္ပဇ္ဇတိ သဟဇာတပစ္စယာ – ဗဟိဒ္ဓါ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ ဗဟိဒ္ဓါ ဧကံ ခန္ဓံ ပဋိစ္စ တယော ခန္ဓာ ကဋတ္တာ စ ရူပံ။ပေ။ ဒွေ ခန္ဓေ။ပေ။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ. ဧကံ မဟာဘူတံ ပဋိစ္စ။ပေ။ မဟာဘူတေ ပဋိစ္စ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ. ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ ဧကံ မဟာဘူတံ ပဋိစ္စ။ပေ။ မဟာဘူတေ ပဋိစ္စ ကဋတ္တာရူပံ ဥပါဒါရူပံ. (၁)

အညမညပစ္စယာဒိ

၅. အဇ္ဈတ္တံ ဓမ္မံ ပဋိစ္စ အဇ္ဈတ္တော ဓမ္မော ဥပ္ပဇ္ဇတိ အညမညပစ္စယာ။ နိဿယပစ္စယာ။ ဥပနိဿယပစ္စယာ။ ပုရေဇာတပစ္စယာ။ အာသေဝနပစ္စယာ (ပုရေဇာတေပိ အာသေဝနေပိ ပဋိသန္ဓိ နတ္ထိ)။ ကမ္မပစ္စယာ။ ဝိပါကပစ္စယာ။ အာဟာရပစ္စယာ။ ဣန္ဒြိယပစ္စယာ။ ဈာနပစ္စယာ။ မဂ္ဂပစ္စယာ။ သမ္ပယုတ္တပစ္စယာ။ ဝိပ္ပယုတ္တပစ္စယာ။ အတ္ထိပစ္စယာ။ နတ္ထိပစ္စယာ။ ဝိဂတပစ္စယာ။ အဝိဂတပစ္စယာ.