၁. ဝိဘင်္ဂဝါရော

နဟေတုပစ္စယော

၆. အတီတာရမ္မဏံ ဓမ္မံ ပဋိစ္စ အတီတာရမ္မဏော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ အတီတာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ အဟေတုကပဋိသန္ဓိက္ခဏေ ။ပေ။ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

၇. အနာဂတာရမ္မဏံ ဓမ္မံ ပဋိစ္စ အနာဂတာရမ္မဏော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ အနာဂတာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

၈. ပစ္စုပ္ပန္နာရမ္မဏံ ဓမ္မံ ပဋိစ္စ ပစ္စုပ္ပန္နာရမ္မဏော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ ပစ္စုပ္ပန္နာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။ အဟေတုကပဋိသန္ဓိက္ခဏေ။ပေ။ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

နအဓိပတိပစ္စယော

၉. အတီတာရမ္မဏံ ဓမ္မံ ပဋိစ္စ အတီတာရမ္မဏော ဓမ္မော ဥပ္ပဇ္ဇတိ နအဓိပတိပစ္စယာ (အနုလောမသဟဇာတသဒိသံ).

နပုရေဇာတပစ္စယော

၁၀. အတီတာရမ္မဏံ ဓမ္မံ ပဋိစ္စ အတီတာရမ္မဏော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ အတီတာရမ္မဏံ ဧကံ ခန္ဓံ ပဋိစ္စ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. (၁)

အနာဂတာရမ္မဏံ ဓမ္မံ ပဋိစ္စ အနာဂတာရမ္မဏော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ အနာဂတာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။. (၁)

ပစ္စုပ္ပန္နာရမ္မဏံ ဓမ္မံ ပဋိစ္စ ပစ္စုပ္ပန္နာရမ္မဏော ဓမ္မော ဥပ္ပဇ္ဇတိ နပုရေဇာတပစ္စယာ – ပဋိသန္ဓိက္ခဏေ ပစ္စုပ္ပန္နာရမ္မဏံ ဧကံ ခန္ဓံ ပဋိစ္စ။ပေ။ ဒွေ ခန္ဓေ။ပေ။. (၁)

နပစ္ဆာဇာတပစ္စယာဒိ

၁၁. အတီတာရမ္မဏံ ဓမ္မံ ပဋိစ္စ အတီတာရမ္မဏော ဓမ္မော ဥပ္ပဇ္ဇတိ နပစ္ဆာဇာတပစ္စယာ။ နအာသေဝနပစ္စယာ (နအဓိပတိသဒိသာ)။ နကမ္မပစ္စယာ – အတီတာရမ္မဏေ ခန္ဓေ ပဋိစ္စ အတီတာရမ္မဏာ စေတနာ. (၁)

အနာဂတာရမ္မဏံ ဓမ္မံ ပဋိစ္စ အနာဂတာရမ္မဏော ဓမ္မော ဥပ္ပဇ္ဇတိ နကမ္မပစ္စယာ – အနာဂတာရမ္မဏေ ခန္ဓေ ပဋိစ္စ အနာဂတာရမ္မဏာ စေတနာ. (၁)

ပစ္စုပ္ပန္နာရမ္မဏံ ဓမ္မံ ပဋိစ္စ ပစ္စုပ္ပန္နာရမ္မဏော ဓမ္မော ဥပ္ပဇ္ဇတိ နကမ္မပစ္စယာ – ပစ္စုပ္ပန္နာရမ္မဏေ ခန္ဓေ ပဋိစ္စ ပစ္စုပ္ပန္နာရမ္မဏာ စေတနာ. (၁)

နဝိပါကပစ္စယော

၁၂. အတီတာရမ္မဏံ ဓမ္မံ ပဋိစ္စ အတီတာရမ္မဏော ဓမ္မော ဥပ္ပဇ္ဇတိ နဝိပါကပစ္စယာ။ပေ။ (နဝိပါကေ ပဋိသန္ဓိ နတ္ထိ).

နဈာနပစ္စယော

၁၃. ပစ္စုပ္ပန္နာရမ္မဏံ ဓမ္မံ ပဋိစ္စ ပစ္စုပ္ပန္နာရမ္မဏော ဓမ္မော ဥပ္ပဇ္ဇတိ နဈာနပစ္စယာ – ပဉ္စဝိညာဏသဟဂတံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။. (၁)

နမဂ္ဂပစ္စယော

၁၄. အတီတာရမ္မဏံ ဓမ္မံ ပဋိစ္စ အတီတာရမ္မဏော ဓမ္မော ဥပ္ပဇ္ဇတိ နမဂ္ဂပစ္စယာ – အဟေတုကံ အတီတာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။ (နဟေတုသဒိသာ တိဿော ပဉှာ၊ မောဟော နတ္ထိ ).

နဝိပ္ပယုတ္တပစ္စယော

၁၅. အတီတာရမ္မဏံ ဓမ္မံ ပဋိစ္စ အတီတာရမ္မဏော ဓမ္မော ဥပ္ပဇ္ဇတိ နဝိပ္ပယုတ္တပစ္စယာ – အရူပေ အတီတာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။. (၁)

အနာဂတာရမ္မဏံ ဓမ္မံ ပဋိစ္စ အနာဂတာရမ္မဏော ဓမ္မော ဥပ္ပဇ္ဇတိ နဝိပ္ပယုတ္တပစ္စယာ – အရူပေ အနာဂတာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။. (၁)