၂. သင်္ချာဝါရော

သုဒ္ဓံ

၃၉. ဟေတုယာ တီဏိ၊ အာရမ္မဏေ နဝ၊ အဓိပတိယာ သတ္တ၊ အနန္တရေ သတ္တ၊ သမနန္တရေ သတ္တ၊ သဟဇာတေ အညမညေ နိဿယေ တီဏိ၊ ဥပနိဿယေ နဝ၊ အာသေဝနေ တီဏိ၊ ကမ္မေ နဝ၊ ဝိပါကေ တီဏိ၊ အာဟာရေ တီဏိ၊ ဣန္ဒြိယေ ဈာနေ မဂ္ဂေ သမ္ပယုတ္တေ တီဏိ၊ အတ္ထိယာ တီဏိ၊ နတ္ထိယာ သတ္တ၊ ဝိဂတေ သတ္တ၊ အဝိဂတေ တီဏိ (ဧဝံ ဂဏေတဗ္ဗံ).

အနုလောမံ.

ပစ္စနီယုဒ္ဓါရော

၄၀. အတီတာရမ္မဏော ဓမ္မော အတီတာရမ္မဏဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ကမ္မပစ္စယေန ပစ္စယော. (၁)

အတီတာရမ္မဏော ဓမ္မော အနာဂတာရမ္မဏဿ ဓမ္မဿ အာရမ္မဏပစ္စယေန ပစ္စယော။ ဥပနိဿယပစ္စယေန ပစ္စယော။ ကမ္မပစ္စယေန ပစ္စယော. (၂)

အတီတာရမ္မဏော ဓမ္မော ပစ္စုပ္ပန္နာရမ္မဏဿ ဓမ္မဿ အာရမ္မဏပစ္စယေန ပစ္စယော။ ဥပနိဿယပစ္စယေန ပစ္စယော။ ကမ္မပစ္စယေန ပစ္စယော. (၃)

၄၁. အနာဂတာရမ္မဏော ဓမ္မော အနာဂတာရမ္မဏဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ကမ္မပစ္စယေန ပစ္စယော. (၁)

အနာဂတာရမ္မဏော ဓမ္မော အတီတာရမ္မဏဿ ဓမ္မဿ အာရမ္မဏပစ္စယေန ပစ္စယော။ ဥပနိဿယပစ္စယေန ပစ္စယော။ ကမ္မပစ္စယေန ပစ္စယော. (၂)

အနာဂတာရမ္မဏော ဓမ္မော ပစ္စုပ္ပန္နာရမ္မဏဿ ဓမ္မဿ အာရမ္မဏပစ္စယေန ပစ္စယော။ ဥပနိဿယပစ္စယေန ပစ္စယော။ ကမ္မပစ္စယေန ပစ္စယော. (၃)

၄၂. ပစ္စုပ္ပန္နာရမ္မဏော ဓမ္မော ပစ္စုပ္ပန္နာရမ္မဏဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ကမ္မပစ္စယေန ပစ္စယော. (၁)

ပစ္စုပ္ပန္နာရမ္မဏော ဓမ္မော အတီတာရမ္မဏဿ ဓမ္မဿ အာရမ္မဏပစ္စယေန ပစ္စယော။ ဥပနိဿယပစ္စယေန ပစ္စယော။ ကမ္မပစ္စယေန ပစ္စယော. (၂)

ပစ္စုပ္ပန္နာရမ္မဏော ဓမ္မော အနာဂတာရမ္မဏဿ ဓမ္မဿ အာရမ္မဏပစ္စယေန ပစ္စယော။ ဥပနိဿယပစ္စယေန ပစ္စယော။ ကမ္မပစ္စယေန ပစ္စယော. (၃)