၁. ဝိဘင်္ဂဝါရော

ဟေတုပစ္စယော

၁၉. အတီတာရမ္မဏော ဓမ္မော အတီတာရမ္မဏဿ ဓမ္မဿ ဟေတုပစ္စယေန ပစ္စယော – အတီတာရမ္မဏာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော. ပဋိသန္ဓိက္ခဏေ အတီတာရမ္မဏာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော. (၁)

အနာဂတာရမ္မဏော ဓမ္မော အနာဂတာရမ္မဏဿ ဓမ္မဿ ဟေတုပစ္စယေန ပစ္စယော – အနာဂတာရမ္မဏာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော. (၁)

ပစ္စုပ္ပန္နာရမ္မဏော ဓမ္မော ပစ္စုပ္ပန္နာရမ္မဏဿ ဓမ္မဿ ဟေတုပစ္စယေန ပစ္စယော – ပစ္စုပ္ပန္နာရမ္မဏာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော. ပဋိသန္ဓိက္ခဏေ ပစ္စုပ္ပန္နာရမ္မဏာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော. (၁)

အာရမ္မဏပစ္စယော

၂၀. အတီတာရမ္မဏော ဓမ္မော အတီတာရမ္မဏဿ ဓမ္မဿ အာရမ္မဏပစ္စယေန ပစ္စယော – အတီတံ ဝိညာဏဉ္စာယတနံ ပစ္စဝေက္ခတိ၊ နေဝသညာနာသညာယတနံ ပစ္စဝေက္ခတိ. အတီတာရမ္မဏံ အတီတံ ဣဒ္ဓိဝိဓဉာဏံ ပစ္စဝေက္ခတိ၊ စေတောပရိယဉာဏံ။ ပုဗ္ဗေနိဝါသာနုဿတိဉာဏံ။ ယထာကမ္မူပဂဉာဏံ ပစ္စဝေက္ခတိ. အရိယာ အတီတာရမ္မဏေ ပဟီနေ ကိလေသေ ပစ္စဝေက္ခန္တိ၊ ဝိက္ခမ္ဘိတေ ကိလေသေ ပစ္စဝေက္ခန္တိ၊ ပုဗ္ဗေ သမုဒါစိဏ္ဏေ ကိလေသေ ဇာနန္တိ. အတီတာရမ္မဏေ အတီတေ ခန္ဓေ အနိစ္စတော ဒုက္ခတော အနတ္တတော ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ အတီတာရမ္မဏော ရာဂေါ ဥပ္ပဇ္ဇတိ၊ ဒိဋ္ဌိ။ပေ။ ဝိစိကိစ္ဆာ။ပေ။ ဥဒ္ဓစ္စံ။ပေ။ ဒေါမနဿံ ဥပ္ပဇ္ဇတိ. အတီတာရမ္မဏာ အတီတာ ခန္ဓာ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၁)

အတီတာရမ္မဏော ဓမ္မော အနာဂတာရမ္မဏဿ ဓမ္မဿ အာရမ္မဏပစ္စယေန ပစ္စယော – အနာဂတံ ဝိညာဏဉ္စာယတနံ ပစ္စဝေက္ခတိ၊ နေဝသညာနာသညာယတနံ ပစ္စဝေက္ခတိ. အတီတာရမ္မဏံ အနာဂတံ ဣဒ္ဓိဝိဓဉာဏံ ပစ္စဝေက္ခတိ၊ စေတောပရိယဉာဏံ။ပေ။ ပုဗ္ဗေနိဝါသာနုဿတိဉာဏံ။ပေ။ ယထာကမ္မူပဂဉာဏံ ပစ္စဝေက္ခတိ. အတီတာရမ္မဏေ အနာဂတေ ခန္ဓေ အနိစ္စတော။ပေ။ ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ အနာဂတာရမ္မဏော ရာဂေါ ဥပ္ပဇ္ဇတိ။ပေ။ ဒေါမနဿံ ဥပ္ပဇ္ဇတိ. အတီတာရမ္မဏာ အနာဂတာ ခန္ဓာ စေတောပရိယဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၂)

အတီတာရမ္မဏော ဓမ္မော ပစ္စုပ္ပန္နာရမ္မဏဿ ဓမ္မဿ အာရမ္မဏပစ္စယေန ပစ္စယော – စေတောပရိယဉာဏေန အတီတာရမ္မဏပစ္စုပ္ပန္နစိတ္တသမင်္ဂိဿ စိတ္တံ ဇာနာတိ. အတီတာရမ္မဏာ ပစ္စုပ္ပန္နာ ခန္ဓာ စေတောပရိယဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၃)

၂၁. အနာဂတာရမ္မဏော ဓမ္မော အနာဂတာရမ္မဏဿ ဓမ္မဿ အာရမ္မဏပစ္စယေန ပစ္စယော – အနာဂတာရမ္မဏံ အနာဂတံ ဣဒ္ဓိဝိဓဉာဏံ ပစ္စဝေက္ခတိ၊ စေတောပရိယဉာဏံ။ပေ။ အနာဂတံသဉာဏံ။ပေ။ အနာဂတာရမ္မဏေ အနာဂတေ ခန္ဓေ အနိစ္စတော။ပေ။ ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ အနာဂတာရမ္မဏော ရာဂေါ ဥပ္ပဇ္ဇတိ။ပေ။ ဒေါမနဿံ ဥပ္ပဇ္ဇတိ. အနာဂတာရမ္မဏာ အနာဂတာ ခန္ဓာ စေတောပရိယဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၁)

အနာဂတာရမ္မဏော ဓမ္မော အတီတာရမ္မဏဿ ဓမ္မဿ အာရမ္မဏပစ္စယေန ပစ္စယော – အနာဂတာရမ္မဏံ အတီတံ ဣဒ္ဓိဝိဓဉာဏံ ပစ္စဝေက္ခတိ၊ စေတောပရိယဉာဏံ။ အနာဂတံသဉာဏံ။ပေ။ အရိယာ အနာဂတာရမ္မဏေ ပဟီနေ ကိလေသေ ပစ္စဝေက္ခန္တိ၊ ဝိက္ခမ္ဘိတေ ကိလေသေ ပစ္စဝေက္ခန္တိ. ပုဗ္ဗေ သမုဒါစိဏ္ဏေ ကိလေသေ ဇာနန္တိ. အနာဂတာရမ္မဏေ အတီတေ ခန္ဓေ အနိစ္စတော။ပေ။ ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ အတီတာရမ္မဏော ရာဂေါ ဥပ္ပဇ္ဇတိ။ပေ။ ဒေါမနဿံ ဥပ္ပဇ္ဇတိ. အနာဂတာရမ္မဏာ အတီတာ ခန္ဓာ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၂)

အနာဂတာရမ္မဏော ဓမ္မော ပစ္စုပ္ပန္နာရမ္မဏဿ ဓမ္မဿ အာရမ္မဏပစ္စယေန ပစ္စယော – စေတောပရိယဉာဏေန အနာဂတာရမ္မဏပစ္စုပ္ပန္နစိတ္တသမင်္ဂိဿ စိတ္တံ ဇာနာတိ. အနာဂတာရမ္မဏာ ပစ္စုပ္ပန္နာ ခန္ဓာ စေတောပရိယဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၃)

၂၂. ပစ္စုပ္ပန္နာရမ္မဏော ဓမ္မော ပစ္စုပ္ပန္နာရမ္မဏဿ ဓမ္မဿ အာရမ္မဏပစ္စယေန ပစ္စယော – စေတောပရိယဉာဏေန ပစ္စုပ္ပန္နာရမ္မဏပစ္စုပ္ပန္နစိတ္တသမင်္ဂိဿ စိတ္တံ ဇာနာတိ. ပစ္စုပ္ပန္နာရမ္မဏာ ပစ္စုပ္ပန္နာ ခန္ဓာ စေတောပရိယဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၁)

ပစ္စုပ္ပန္နာရမ္မဏော ဓမ္မော အတီတာရမ္မဏဿ ဓမ္မဿ အာရမ္မဏပစ္စယေန ပစ္စယော – အတီတံ ဒိဗ္ဗံ စက္ခုံ ပစ္စဝေက္ခတိ၊ ဒိဗ္ဗံ သောတဓာတုံ ပစ္စဝေက္ခတိ၊ ပစ္စုပ္ပန္နာရမ္မဏံ အတီတံ ဣဒ္ဓိဝိဓဉာဏံ ပစ္စဝေက္ခတိ၊ စေတောပရိယဉာဏံ ပစ္စဝေက္ခတိ. အရိယာ ပစ္စုပ္ပန္နာရမ္မဏေ ပဟီနေ ကိလေသေ ပစ္စဝေက္ခန္တိ၊ ဝိက္ခမ္ဘိတေ ကိလေသေ ပစ္စဝေက္ခန္တိ၊ ပုဗ္ဗေ သမုဒါစိဏ္ဏေ ကိလေသေ ဇာနန္တိ. ပစ္စုပ္ပန္နာရမ္မဏေ အတီတေ ခန္ဓေ အနိစ္စတော။ပေ။ ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ အတီတာရမ္မဏော ရာဂေါ ဥပ္ပဇ္ဇတိ။ပေ။ ဒေါမနဿံ ဥပ္ပဇ္ဇတိ. ပစ္စုပ္ပန္နာရမ္မဏာ အတီတာ ခန္ဓာ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၂)

ပစ္စုပ္ပန္နာရမ္မဏော ဓမ္မော အနာဂတာရမ္မဏဿ ဓမ္မဿ အာရမ္မဏပစ္စယေန ပစ္စယော – အနာဂတံ ဒိဗ္ဗံ စက္ခုံ ပစ္စဝေက္ခတိ၊ ဒိဗ္ဗံ သောတဓာတုံ ပစ္စဝေက္ခတိ၊ ပစ္စုပ္ပန္နာရမ္မဏံ အနာဂတံ ဣဒ္ဓိဝိဓဉာဏံ ပစ္စဝေက္ခတိ၊ စေတောပရိယဉာဏံ။ပေ။ ပစ္စုပ္ပန္နာရမ္မဏေ အနာဂတေ ခန္ဓေ အနိစ္စတော။ပေ။ ဝိပဿတိ။ပေ။ တံ အာရဗ္ဘ အနာဂတာရမ္မဏော ရာဂေါ ဥပ္ပဇ္ဇတိ။ပေ။ ဒေါမနဿံ ဥပ္ပဇ္ဇတိ. ပစ္စုပ္ပန္နာရမ္မဏာ အနာဂတာ ခန္ဓာ စေတောပရိယဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၃)

အဓိပတိပစ္စယော

၂၃. အတီတာရမ္မဏော ဓမ္မော အတီတာရမ္မဏဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – အတီတံ ဝိညာဏဉ္စာယတနံ ဂရုံ ကတွာ ပစ္စဝေက္ခတိ၊ နေဝသညာနာသညာယတနံ ဂရုံ ကတွာ ပစ္စဝေက္ခတိ. အတီတာရမ္မဏံ အတီတံ ဣဒ္ဓိဝိဓဉာဏံ ဂရုံ ကတွာ ပစ္စဝေက္ခတိ၊ စေတောပရိယဉာဏံ။ပေ။ ပုဗ္ဗေနိဝါသာနုဿတိဉာဏံ။ပေ။ ယထာကမ္မူပဂဉာဏံ ဂရုံ ကတွာ ပစ္စဝေက္ခတိ. အတီတာရမ္မဏေ အတီတေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ အတီတာရမ္မဏော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. သဟဇာတာဓိပတိ – အတီတာရမ္မဏာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော. (၁)

အတီတာရမ္မဏော ဓမ္မော အနာဂတာရမ္မဏဿ ဓမ္မဿ အဓိပတိပစ္စယေန ပစ္စယော. အာရမ္မဏာဓိပတိ – အနာဂတံ ဝိညာဏဉ္စာယတနံ ဂရုံ ကတွာ။ပေ။ နေဝသညာနာသညာယတနံ ။ပေ။ အတီတာရမ္မဏံ အနာဂတံ ဣဒ္ဓိဝိဓဉာဏံ ဂရုံ ကတွာ။ပေ။ စေတောပရိယဉာဏံ။ပေ။ ပုဗ္ဗေနိဝါသာနုဿတိဉာဏံ။ပေ။ ယထာကမ္မူပဂဉာဏံ။ပေ။ အတီတာရမ္မဏေ အနာဂတေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ အနာဂတာရမ္မဏော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. (၂)

၂၄. အနာဂတာရမ္မဏော ဓမ္မော အနာဂတာရမ္မဏဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – အနာဂတာရမ္မဏံ အနာဂတံ ဣဒ္ဓိဝိဓဉာဏံ ဂရုံ ကတွာ။ပေ။ စေတောပရိယဉာဏံ။ပေ။ အနာဂတံသဉာဏံ ဂရုံ ကတွာ ပစ္စဝေက္ခတိ. အနာဂတာရမ္မဏေ အနာဂတေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ အနာဂတာရမ္မဏော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. သဟဇာတာဓိပတိ – အနာဂတာရမ္မဏာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော. (၁)

အနာဂတာရမ္မဏော ဓမ္မော အတီတာရမ္မဏဿ ဓမ္မဿ အဓိပတိပစ္စယေန ပစ္စယော. အာရမ္မဏာဓိပတိ – အနာဂတာရမ္မဏံ အတီတံ ဣဒ္ဓိဝိဓဉာဏံ ဂရုံ ကတွာ။ပေ။ စေတောပရိယဉာဏံ။ပေ။ အနာဂတံသဉာဏံ ဂရုံ ကတွာ။ပေ။ အနာဂတာရမ္မဏေ အတီတေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ အတီတာရမ္မဏော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. (၂)

၂၅. ပစ္စုပ္ပန္နာရမ္မဏော ဓမ္မော ပစ္စုပ္ပန္နာရမ္မဏဿ ဓမ္မဿ အဓိပတိပစ္စယေန ပစ္စယော. သဟဇာတာဓိပတိ – ပစ္စုပ္ပန္နာရမ္မဏာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော. (၁)

ပစ္စုပ္ပန္နာရမ္မဏော ဓမ္မော အတီတာရမ္မဏဿ ဓမ္မဿ အဓိပတိပစ္စယေန ပစ္စယော. အာရမ္မဏာဓိပတိ – အတီတံ ဒိဗ္ဗံ စက္ခုံ ဂရုံ ကတွာ ပစ္စဝေက္ခတိ၊ ဒိဗ္ဗံ သောတဓာတုံ ဂရုံ ကတွာ ပစ္စဝေက္ခတိ၊ ပစ္စုပ္ပန္နာရမ္မဏံ အတီတံ ဣဒ္ဓိဝိဓဉာဏံ ဂရုံ ကတွာ။ပေ။ စေတောပရိယဉာဏံ ဂရုံ ကတွာ။ပေ။ ပစ္စုပ္ပန္နာရမ္မဏေ အတီတေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ အတီတာရမ္မဏော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. (၂)

ပစ္စုပ္ပန္နာရမ္မဏော ဓမ္မော အနာဂတာရမ္မဏဿ ဓမ္မဿ အဓိပတိပစ္စယေန ပစ္စယော. အာရမ္မဏာဓိပတိ – အနာဂတံ ဒိဗ္ဗံ စက္ခုံ ဂရုံ ကတွာ ပစ္စဝေက္ခတိ၊ ဒိဗ္ဗံ သောတဓာတုံ ဂရုံ ကတွာ ။ပေ။ ပစ္စုပ္ပန္နာရမ္မဏံ အနာဂတံ ဣဒ္ဓိဝိဓဉာဏံ ဂရုံ ကတွာ။ပေ။ စေတောပရိယဉာဏံ ဂရုံ ကတွာ။ပေ။ ပစ္စုပ္ပန္နာရမ္မဏေ အနာဂတေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ အနာဂတာရမ္မဏော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. (၃)

အနန္တရပစ္စယော

၂၆. အတီတာရမ္မဏော ဓမ္မော အတီတာရမ္မဏဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ အတီတာရမ္မဏာ ခန္ဓာ ပစ္ဆိမာနံ ပစ္ဆိမာနံ အတီတာရမ္မဏာနံ ခန္ဓာနံ အနန္တရပစ္စယေန ပစ္စယော. (၁)

အတီတာရမ္မဏော ဓမ္မော အနာဂတာရမ္မဏဿ ဓမ္မဿ အနန္တရပစ္စယေန ပစ္စယော – အတီတာရမ္မဏံ ဘဝင်္ဂံ အနာဂတာရမ္မဏာယ အာဝဇ္ဇနာယ အနန္တရပစ္စယေန ပစ္စယော. (၂)

အတီတာရမ္မဏော ဓမ္မော ပစ္စုပ္ပန္နာရမ္မဏဿ ဓမ္မဿ အနန္တရပစ္စယေန ပစ္စယော – အတီတာရမ္မဏံ စုတိစိတ္တံ ပစ္စုပ္ပန္နာရမ္မဏဿ ပဋိသန္ဓိစိတ္တဿ အနန္တရပစ္စယေန ပစ္စယော. အတီတာရမ္မဏံ ဘဝင်္ဂံ ပစ္စုပ္ပန္နာရမ္မဏာယ အာဝဇ္ဇနာယ အနန္တရပစ္စယေန ပစ္စယော. (၃)

၂၇. အနာဂတာရမ္မဏော ဓမ္မော အနာဂတာရမ္မဏဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ အနာဂတာရမ္မဏာ ခန္ဓာ ပစ္ဆိမာနံ ပစ္ဆိမာနံ အနာဂတာရမ္မဏာနံ ခန္ဓာနံ အနန္တရပစ္စယေန ပစ္စယော. (၁)

အနာဂတာရမ္မဏော ဓမ္မော အတီတာရမ္မဏဿ ဓမ္မဿ အနန္တရပစ္စယေန ပစ္စယော – အနာဂတာရမ္မဏံ ဣဒ္ဓိဝိဓဉာဏံ အတီတာရမ္မဏဿ ဝုဋ္ဌာနဿ။ပေ။ စေတောပရိယဉာဏံ အတီတာရမ္မဏဿ ဝုဋ္ဌာနဿ။ပေ။ အနာဂတံသဉာဏံ အတီတာရမ္မဏဿ ဝုဋ္ဌာနဿ။ပေ။ အနာဂတာရမ္မဏာ ခန္ဓာ အတီတာရမ္မဏဿ ဝုဋ္ဌာနဿ အနန္တရပစ္စယေန ပစ္စယော. (၂)

၂၈. ပစ္စုပ္ပန္နာရမ္မဏော ဓမ္မော ပစ္စုပ္ပန္နာရမ္မဏဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ပစ္စုပ္ပန္နာရမ္မဏာ ခန္ဓာ ပစ္ဆိမာနံ ပစ္ဆိမာနံ ပစ္စုပ္ပန္နာရမ္မဏာနံ ခန္ဓာနံ အနန္တရပစ္စယေန ပစ္စယော. ပစ္စုပ္ပန္နာရမ္မဏံ ပဋိသန္ဓိစိတ္တံ ပစ္စုပ္ပန္နာရမ္မဏဿ ဘဝင်္ဂဿ။ပေ။ ပစ္စုပ္ပန္နာရမ္မဏံ ဘဝင်္ဂံ ပစ္စုပ္ပန္နာရမ္မဏဿ ဘဝင်္ဂဿ အနန္တရပစ္စယေန ပစ္စယော. (၁)

ပစ္စုပ္ပန္နာရမ္မဏော ဓမ္မော အတီတာရမ္မဏဿ ဓမ္မဿ အနန္တရပစ္စယေန ပစ္စယော – ပစ္စုပ္ပန္နာရမ္မဏံ ပဋိသန္ဓိစိတ္တံ အတီတာရမ္မဏဿ ဘဝင်္ဂဿ။ပေ။ ပစ္စုပ္ပန္နာရမ္မဏံ ဘဝင်္ဂံ အတီတာရမ္မဏဿ ဘဝင်္ဂဿ။ပေ။ ပစ္စုပ္ပန္နာရမ္မဏာ ခန္ဓာ အတီတာရမ္မဏဿ ဝုဋ္ဌာနဿ အနန္တရပစ္စယေန ပစ္စယော. (၂)

သမနန္တရပစ္စယော

၂၉. အတီတာရမ္မဏော ဓမ္မော အတီတာရမ္မဏဿ ဓမ္မဿ သမနန္တရပစ္စယေန ပစ္စယော (အနန္တရသဒိသံ).

သဟဇာတပစ္စယာဒိ

၃၀. အတီတာရမ္မဏော ဓမ္မော အတီတာရမ္မဏဿ ဓမ္မဿ သဟဇာတပစ္စယေန ပစ္စယော။ အညမညပစ္စယေန ပစ္စယော။ နိဿယပစ္စယေန ပစ္စယော။(တယောပိ ပစ္စယာ ပဋိစ္စဝါရသဒိသာ).

ဥပနိဿယပစ္စယော

၃၁. အတီတာရမ္မဏော ဓမ္မော အတီတာရမ္မဏဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – အတီတာရမ္မဏာ အနိစ္စာနုပဿနာ၊ ဒုက္ခာနုပဿနာ၊ အနတ္တာနုပဿနာ အတီတာရမ္မဏာယ အနိစ္စာနုပဿနာယ၊ ဒုက္ခာနုပဿနာယ၊ အနတ္တာနုပဿနာယ ဥပနိဿယပစ္စယေန ပစ္စယော. (၁)

အတီတာရမ္မဏော ဓမ္မော အနာဂတာရမ္မဏဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – အတီတာရမ္မဏာ အနိစ္စာနုပဿနာ၊ ဒုက္ခာနုပဿနာ၊ အနတ္တာနုပဿနာ အနာဂတာရမ္မဏာယ အနိစ္စာနုပဿနာယ၊ ဒုက္ခာနုပဿနာယ၊ အနတ္တာနုပဿနာယ ဥပနိဿယပစ္စယေန ပစ္စယော. (၂)

အတီတာရမ္မဏော ဓမ္မော ပစ္စုပ္ပန္နာရမ္မဏဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။. ပကတူပနိဿယော – အတီတာရမ္မဏာ အနိစ္စာနုပဿနာ၊ ဒုက္ခာနုပဿနာ၊ အနတ္တာနုပဿနာ ပစ္စုပ္ပန္နာရမ္မဏာယ အနိစ္စာနုပဿနာယ၊ ဒုက္ခာနုပဿနာယ၊ အနတ္တာနုပဿနာယ ဥပနိဿယပစ္စယေန ပစ္စယော. (၃)

၃၂. အနာဂတာရမ္မဏော ဓမ္မော အနာဂတာရမ္မဏဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – အနာဂတာရမ္မဏာ အနိစ္စာနုပဿနာ၊ ဒုက္ခာနုပဿနာ၊ အနတ္တာနုပဿနာ အနာဂတာရမ္မဏာယ အနိစ္စာနုပဿနာယ၊ ဒုက္ခာနုပဿနာယ၊ အနတ္တာနုပဿနာယ ဥပနိဿယပစ္စယေန ပစ္စယော. (၁)

အနာဂတာရမ္မဏော ဓမ္မော အတီတာရမ္မဏဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – အနာဂတာရမ္မဏာ အနိစ္စာနုပဿနာ၊ ဒုက္ခာနုပဿနာ၊ အနတ္တာနုပဿနာ အတီတာရမ္မဏာယ အနိစ္စာနုပဿနာယ၊ ဒုက္ခာနုပဿနာယ၊ အနတ္တာနုပဿနာယ ဥပနိဿယပစ္စယေန ပစ္စယော. (၂)

အနာဂတာရမ္မဏော ဓမ္မော ပစ္စုပ္ပန္နာရမ္မဏဿ ဓမ္မဿ ဥပနိဿယပစ္စယေန ပစ္စယော. ပကတူပနိဿယော – အနာဂတာရမ္မဏာ အနိစ္စာနုပဿနာ၊ ဒုက္ခာနုပဿနာ၊ အနတ္တာနုပဿနာ ပစ္စုပ္ပန္နာရမ္မဏာယ အနိစ္စာနုပဿနာယ၊ ဒုက္ခာနုပဿနာယ၊ အနတ္တာနုပဿနာယ ဥပနိဿယပစ္စယေန ပစ္စယော. (၃)

၃၃. ပစ္စုပ္ပန္နာရမ္မဏော ဓမ္မော ပစ္စုပ္ပန္နာရမ္မဏဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ပစ္စုပ္ပန္နာရမ္မဏာ အနိစ္စာနုပဿနာ၊ ဒုက္ခာနုပဿနာ၊ အနတ္တာနုပဿနာ ပစ္စုပ္ပန္နာရမ္မဏာယ အနိစ္စာနုပဿနာယ၊ ဒုက္ခာနုပဿနာယ၊ အနတ္တာနုပဿနာယ ဥပနိဿယပစ္စယေန ပစ္စယော. (၁)

ပစ္စုပ္ပန္နာရမ္မဏော ဓမ္မော အတီတာရမ္မဏဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ပစ္စုပ္ပန္နာရမ္မဏာ အနိစ္စာနုပဿနာ၊ ဒုက္ခာနုပဿနာ၊ အနတ္တာနုပဿနာ အတီတာရမ္မဏာယ အနိစ္စာနုပဿနာယ၊ ဒုက္ခာနုပဿနာယ၊ အနတ္တာနုပဿနာယ ဥပနိဿယပစ္စယေန ပစ္စယော. (၂)

ပစ္စုပ္ပန္နာရမ္မဏော ဓမ္မော အနာဂတာရမ္မဏဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ ပကတူပနိဿယော။ပေ။. ပကတူပနိဿယော – ပစ္စုပ္ပန္နာရမ္မဏာ အနိစ္စာနုပဿနာ၊ ဒုက္ခာနုပဿနာ၊ အနတ္တာနုပဿနာ အနာဂတာရမ္မဏာယ အနိစ္စာနုပဿနာယ၊ ဒုက္ခာနုပဿနာယ၊ အနတ္တာနုပဿနာယ ဥပနိဿယပစ္စယေန ပစ္စယော. (၃)

အာသေဝနပစ္စယော

၃၄. အတီတာရမ္မဏော ဓမ္မော အတီတာရမ္မဏဿ ဓမ္မဿ အာသေဝနပစ္စယေန ပစ္စယော – ပုရိမာ ပုရိမာ အတီတာရမ္မဏာ ခန္ဓာ ပစ္ဆိမာနံ ပစ္ဆိမာနံ အတီတာရမ္မဏာနံ ခန္ဓာနံ အာသေဝနပစ္စယေန ပစ္စယော. (၁)

အနာဂတာရမ္မဏော ဓမ္မော အနာဂတာရမ္မဏဿ ဓမ္မဿ အာသေဝနပစ္စယေန ပစ္စယော – ပုရိမာ ပုရိမာ အနာဂတာရမ္မဏာ ခန္ဓာ ပစ္ဆိမာနံ ပစ္ဆိမာနံ အနာဂတာရမ္မဏာနံ ခန္ဓာနံ အာသေဝနပစ္စယေန ပစ္စယော. (၁)

ပစ္စုပ္ပန္နာရမ္မဏော ဓမ္မော ပစ္စုပ္ပန္နာရမ္မဏဿ ဓမ္မဿ အာသေဝနပစ္စယေန ပစ္စယော – ပုရိမာ ပုရိမာ ပစ္စုပ္ပန္နာရမ္မဏာ ခန္ဓာ ပစ္ဆိမာနံ ပစ္ဆိမာနံ ပစ္စုပ္ပန္နာရမ္မဏာနံ ခန္ဓာနံ အာသေဝနပစ္စယေန ပစ္စယော. (၁)

ကမ္မပစ္စယော

၃၅. အတီတာရမ္မဏော ဓမ္မော အတီတာရမ္မဏဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – အတီတာရမ္မဏာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော. ပဋိသန္ဓိက္ခဏေ။ပေ။. နာနာက္ခဏိကာ – အတီတာရမ္မဏာ စေတနာ ဝိပါကာနံ အတီတာရမ္မဏာနံ ခန္ဓာနံ ကမ္မပစ္စယေန ပစ္စယော. (၁)

အတီတာရမ္မဏော ဓမ္မော အနာဂတာရမ္မဏဿ ဓမ္မဿ ကမ္မပစ္စယေန ပစ္စယော. နာနာက္ခဏိကာ – အတီတာရမ္မဏာ စေတနာ ဝိပါကာနံ အနာဂတာရမ္မဏာနံ ခန္ဓာနံ ကမ္မပစ္စယေန ပစ္စယော. (၂)

အတီတာရမ္မဏော ဓမ္မော ပစ္စုပ္ပန္နာရမ္မဏဿ ဓမ္မဿ ကမ္မပစ္စယေန ပစ္စယော. နာနာက္ခဏိကာ – အတီတာရမ္မဏာ စေတနာ ဝိပါကာနံ ပစ္စုပ္ပန္နာရမ္မဏာနံ ခန္ဓာနံ ကမ္မပစ္စယေန ပစ္စယော. (၃)

၃၆. အနာဂတာရမ္မဏော ဓမ္မော အနာဂတာရမ္မဏဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – အနာဂတာရမ္မဏာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော. နာနာက္ခဏိကာ – အနာဂတာရမ္မဏာ စေတနာ ဝိပါကာနံ အနာဂတာရမ္မဏာနံ ခန္ဓာနံ ကမ္မပစ္စယေန ပစ္စယော. (၁)

အနာဂတာရမ္မဏော ဓမ္မော အတီတာရမ္မဏဿ ဓမ္မဿ ကမ္မပစ္စယေန ပစ္စယော. နာနာက္ခဏိကာ – အနာဂတာရမ္မဏာ စေတနာ ဝိပါကာနံ အတီတာရမ္မဏာနံ ခန္ဓာနံ ကမ္မပစ္စယေန ပစ္စယော. (၂)

အနာဂတာရမ္မဏော ဓမ္မော ပစ္စုပ္ပန္နာရမ္မဏဿ ဓမ္မဿ ကမ္မပစ္စယေန ပစ္စယော. နာနာက္ခဏိကာ – အနာဂတာရမ္မဏာ စေတနာ ဝိပါကာနံ ပစ္စုပ္ပန္နာရမ္မဏာနံ ခန္ဓာနံ ကမ္မပစ္စယေန ပစ္စယော. (၃)

၃၇. ပစ္စုပ္ပန္နာရမ္မဏော ဓမ္မော ပစ္စုပ္ပန္နာရမ္မဏဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – ပစ္စုပ္ပန္နာရမ္မဏာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော. ပဋိသန္ဓိက္ခဏေ။ပေ။ နာနာက္ခဏိကာ – ပစ္စုပ္ပန္နာရမ္မဏာ စေတနာ ဝိပါကာနံ ပစ္စုပ္ပန္နာရမ္မဏာနံ ခန္ဓာနံ ကမ္မပစ္စယေန ပစ္စယော. (၁)

ပစ္စုပ္ပန္နာရမ္မဏော ဓမ္မော အတီတာရမ္မဏဿ ဓမ္မဿ ကမ္မပစ္စယေန ပစ္စယော. နာနာက္ခဏိကာ – ပစ္စုပ္ပန္နာရမ္မဏာ စေတနာ ဝိပါကာနံ အတီတာရမ္မဏာနံ ခန္ဓာနံ ကမ္မပစ္စယေန ပစ္စယော. (၂)

ပစ္စုပ္ပန္နာရမ္မဏော ဓမ္မော အနာဂတာရမ္မဏဿ ဓမ္မဿ ကမ္မပစ္စယေန ပစ္စယော. နာနာက္ခဏိကာ – ပစ္စုပ္ပန္နာရမ္မဏာ စေတနာ ဝိပါကာနံ အနာဂတာရမ္မဏာနံ ခန္ဓာနံ ကမ္မပစ္စယေန ပစ္စယော. (၃)

ဝိပါကပစ္စယာဒိ

၃၈. အတီတာရမ္မဏော ဓမ္မော အတီတာရမ္မဏဿ ဓမ္မဿ ဝိပါကပစ္စယေန ပစ္စယော။ အာဟာရပစ္စယေန ပစ္စယော။ ဣန္ဒြိယပစ္စယေန ပစ္စယော။ ဈာနပစ္စယေန ပစ္စယော။ မဂ္ဂပစ္စယေန ပစ္စယော။ သမ္ပယုတ္တပစ္စယေန ပစ္စယော။ အတ္ထိပစ္စယေန ပစ္စယော။ နတ္ထိပစ္စယေန ပစ္စယော။ ဝိဂတပစ္စယေန ပစ္စယော။ အဝိဂတပစ္စယေန ပစ္စယော.