၂. သင်္ချာဝါရော

၁၇. ဟေတုယာ ဧကံ၊ အာရမ္မဏေ တီဏိ၊ အဓိပတိယာ တီဏိ၊ အနန္တရေ ဧကံ၊ သမနန္တရေ ဧကံ၊ သဟဇာတေ အညမညေ နိဿယေ ဧကံ၊ ဥပနိဿယေ တီဏိ၊ ပုရေဇာတေ ပစ္ဆာဇာတေ အာသေဝနေ ဧကံ၊ ကမ္မေ ဒွေ၊ ဝိပါကေ အာဟာရေ ဧကံ။ပေ။ အဝိဂတေ ဧကံ (ဧဝံ ဂဏေတဗ္ဗံ).

အနုလောမံ.

ပစ္စနီယုဒ္ဓါရော

၁၈. အတီတော ဓမ္မော ပစ္စုပ္ပန္နဿ ဓမ္မဿ အာရမ္မဏပစ္စယေန ပစ္စယော။ ဥပနိဿယပစ္စယေန ပစ္စယော။ ကမ္မပစ္စယေန ပစ္စယော. (၁)

အနာဂတော ဓမ္မော ပစ္စုပ္ပန္နဿ ဓမ္မဿ အာရမ္မဏပစ္စယေန ပစ္စယော။ ဥပနိဿယပစ္စယေန ပစ္စယော. (၁)

ပစ္စုပ္ပန္နော ဓမ္မော ပစ္စုပ္ပန္နဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော။ ပုရေဇာတပစ္စယေန ပစ္စယော။ ပစ္ဆာဇာတပစ္စယေန ပစ္စယော။ အာဟာရပစ္စယေန ပစ္စယော။ ဣန္ဒြိယပစ္စယေန ပစ္စယော. (၁)