၁. ဝိဘင်္ဂဝါရော

နဟေတုပစ္စယော

၄. ပရိတ္တာရမ္မဏံ ဓမ္မံ ပဋိစ္စ ပရိတ္တာရမ္မဏော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ ပရိတ္တာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓာ. အဟေတုကပဋိသန္ဓိက္ခဏေ ပရိတ္တာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓာ၊ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

မဟဂ္ဂတာရမ္မဏံ ဓမ္မံ ပဋိစ္စ မဟဂ္ဂတာရမ္မဏော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ မဟဂ္ဂတာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓာ၊ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

အပ္ပမာဏာရမ္မဏံ ဓမ္မံ ပဋိစ္စ အပ္ပမာဏာရမ္မဏော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ အပ္ပမာဏာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓာ. (၁)

နအဓိပတိပစ္စယော

၅. ပရိတ္တာရမ္မဏံ ဓမ္မံ ပဋိစ္စ ပရိတ္တာရမ္မဏော ဓမ္မော ဥပ္ပဇ္ဇတိ နအဓိပတိပစ္စယာ – ပရိတ္တာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓာ. ပဋိသန္ဓိက္ခဏေ။ပေ။. (၁)

မဟဂ္ဂတာရမ္မဏံ ဓမ္မံ ပဋိစ္စ မဟဂ္ဂတာရမ္မဏော ဓမ္မော ဥပ္ပဇ္ဇတိ နအဓိပတိပစ္စယာ – မဟဂ္ဂတာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓာ. ပဋိသန္ဓိက္ခဏေ။ပေ။. (၁)

အပ္ပမာဏာရမ္မဏံ ဓမ္မံ ပဋိစ္စ အပ္ပမာဏာရမ္မဏော ဓမ္မော ဥပ္ပဇ္ဇတိ နအဓိပတိပစ္စယာ – အပ္ပမာဏာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓာ. (၁)

နပုရေဇာတပစ္စယာဒိ

၆. ပရိတ္တာရမ္မဏံ ဓမ္မံ ပဋိစ္စ ပရိတ္တာရမ္မဏော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ ပရိတ္တာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။ ပဋိသန္ဓိက္ခဏေ။ပေ။. (၁)

မဟဂ္ဂတာရမ္မဏံ ဓမ္မံ ပဋိစ္စ မဟဂ္ဂတာရမ္မဏော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ မဟဂ္ဂတာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓာ (မဟဂ္ဂတာရမ္မဏေ ပဋိသန္ဓိ နတ္ထိ). (၁)

အပ္ပမာဏာရမ္မဏံ ဓမ္မံ ပဋိစ္စ အပ္ပမာဏာရမ္မဏော ဓမ္မော ဥပ္ပဇ္ဇတိ နပုရေဇာတပစ္စယာ – အရူပေ အပ္ပမာဏာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓာ (နပစ္ဆာဇာတပစ္စယဉ္စ နအာသေဝနပစ္စယဉ္စ နအဓိပတိသဒိသံ).

နကမ္မပစ္စယော

၇. ပရိတ္တာရမ္မဏံ ဓမ္မံ ပဋိစ္စ ပရိတ္တာရမ္မဏော ဓမ္မော ဥပ္ပဇ္ဇတိ နကမ္မပစ္စယာ – ပရိတ္တာရမ္မဏေ ခန္ဓေ ပဋိစ္စ ပရိတ္တာရမ္မဏာ စေတနာ. (၁)

မဟဂ္ဂတာရမ္မဏံ ဓမ္မံ ပဋိစ္စ မဟဂ္ဂတာရမ္မဏော ဓမ္မော ဥပ္ပဇ္ဇတိ နကမ္မပစ္စယာ – မဟဂ္ဂတာရမ္မဏေ ခန္ဓေ ပဋိစ္စ မဟဂ္ဂတာရမ္မဏာ စေတနာ. (၁)

အပ္ပမာဏာရမ္မဏံ ဓမ္မံ ပဋိစ္စ အပ္ပမာဏာရမ္မဏော ဓမ္မော ဥပ္ပဇ္ဇတိ နကမ္မပစ္စယာ – အပ္ပမာဏာရမ္မဏေ ခန္ဓေ ပဋိစ္စ အပ္ပမာဏာရမ္မဏာ စေတနာ. (၁)

နဝိပါကပစ္စယာဒိ

၈. ပရိတ္တာရမ္မဏံ ဓမ္မံ ပဋိစ္စ ပရိတ္တာရမ္မဏော ဓမ္မော ဥပ္ပဇ္ဇတိ နဝိပါကပစ္စယာ (ပဋိသန္ဓိ နတ္ထိ)။ နဈာနပစ္စယာ – ပဉ္စဝိညာဏသဟဂတံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓာ။နမဂ္ဂပစ္စယာ – အဟေတုကံ ပရိတ္တာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓာ၊ အဟေတုကပဋိသန္ဓိက္ခဏေ။ပေ။ ဒွေ ခန္ဓာ။ပေ။.

မဟဂ္ဂတာရမ္မဏံ ဓမ္မံ ပဋိစ္စ မဟဂ္ဂတာရမ္မဏော ဓမ္မော ဥပ္ပဇ္ဇတိ နမဂ္ဂပစ္စယာ – အဟေတုကံ မဟဂ္ဂတာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓာ. (၁)

အပ္ပမာဏာရမ္မဏံ ဓမ္မံ ပဋိစ္စ အပ္ပမာဏာရမ္မဏော ဓမ္မော ဥပ္ပဇ္ဇတိ နမဂ္ဂပစ္စယာ – အဟေတုကံ အပ္ပမာဏာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓာ. (၁)

နဝိပ္ပယုတ္တပစ္စယော

၉. ပရိတ္တာရမ္မဏံ ဓမ္မံ ပဋိစ္စ ပရိတ္တာရမ္မဏော ဓမ္မော ဥပ္ပဇ္ဇတိ နဝိပ္ပယုတ္တပစ္စယာ – အရူပေ ပရိတ္တာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။. (၁)

မဟဂ္ဂတာရမ္မဏံ ဓမ္မံ ပဋိစ္စ မဟဂ္ဂတာရမ္မဏော ဓမ္မော ဥပ္ပဇ္ဇတိ နဝိပ္ပယုတ္တပစ္စယာ – အရူပေ မဟဂ္ဂတာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။. (၁)

အပ္ပမာဏာရမ္မဏံ ဓမ္မံ ပဋိစ္စ အပ္ပမာဏာရမ္မဏော ဓမ္မော ဥပ္ပဇ္ဇတိ နဝိပ္ပယုတ္တပစ္စယာ – အရူပေ အပ္ပမာဏာရမ္မဏံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓာ. (၁)