၁. ဝိဘင်္ဂဝါရော

နဟေတုပစ္စယော

၃၆. နေဝသေက္ခနာသေက္ခံ ဓမ္မံ သံသဋ္ဌော နေဝသေက္ခနာသေက္ခော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ နေဝသေက္ခနာသေက္ခံ ဧကံ ခန္ဓံ သံသဋ္ဌာ တယော ခန္ဓာ။ပေ။ ဒွေ ခန္ဓေ။ပေ။ အဟေတုကပဋိသန္ဓိက္ခဏေ။ပေ။ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ သံသဋ္ဌော ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

နအဓိပတိပစ္စယော

၃၇. သေက္ခံ ဓမ္မံ သံသဋ္ဌော သေက္ခော ဓမ္မော ဥပ္ပဇ္ဇတိ နအဓိပတိပစ္စယာ – သေက္ခေ ခန္ဓေ သံသဋ္ဌော သေက္ခော အဓိပတိ. (၁)

အသေက္ခံ ဓမ္မံ သံသဋ္ဌော အသေက္ခော ဓမ္မော ဥပ္ပဇ္ဇတိ နအဓိပတိပစ္စယာ – အသေက္ခေ ခန္ဓေ သံသဋ္ဌော အသေက္ခော အဓိပတိ. (၁)

နေဝသေက္ခနာသေက္ခံ ဓမ္မံ သံသဋ္ဌော နေဝသေက္ခနာသေက္ခော ဓမ္မော ဥပ္ပဇ္ဇတိ နအဓိပတိပစ္စယာ (ပရိပုဏ္ဏံ၊ ဧကံ).

နပုရေဇာတပစ္စယာဒိ

၃၈. သေက္ခံ ဓမ္မံ သံသဋ္ဌော သေက္ခော ဓမ္မော ဥပ္ပဇ္ဇတိ နပုရေဇာတပစ္စယာ။ နပစ္ဆာဇာတပစ္စယာ။ နအာသေဝနပစ္စယာ။ နကမ္မပစ္စယာ (ဒွေ ကာတဗ္ဗာ)။ နဝိပါကပစ္စယာ (ဒွေ ကာတဗ္ဗာ)။ နဈာနပစ္စယာ။ နမဂ္ဂပစ္စယာ။ နဝိပ္ပယုတ္တပစ္စယာ။ပေ။.