၁. ဝိဘင်္ဂဝါရော

နဟေတုပစ္စယော

၂၅. နေဝသေက္ခနာသေက္ခံ ဓမ္မံ ပစ္စယာ နေဝသေက္ခနာသေက္ခော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ နေဝသေက္ခနာသေက္ခံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓာ. အဟေတုကပဋိသန္ဓိက္ခဏေ။ပေ။ ခန္ဓေ ပစ္စယာ ဝတ္ထု၊ ဝတ္ထုံ ပစ္စယာ ခန္ဓာ၊ ဧကံ မဟာဘူတံ ပစ္စယာ။ပေ။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ။ပေ။ စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ပစ္စယာ ကာယဝိညာဏံ၊ ဝတ္ထုံ ပစ္စယာ အဟေတုကာ နေဝသေက္ခနာသေက္ခာ ခန္ဓာ၊ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ ဝတ္ထုဉ္စ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

နအာရမ္မဏပစ္စယာဒိ

၂၆. သေက္ခံ ဓမ္မံ ပစ္စယာ နေဝသေက္ခနာသေက္ခော ဓမ္မော ဥပ္ပဇ္ဇတိ နအာရမ္မဏပစ္စယာ။ပေ။. (၁)

သေက္ခံ ဓမ္မံ ပစ္စယာ သေက္ခော ဓမ္မော ဥပ္ပဇ္ဇတိ နအဓိပတိပစ္စယာ – သေက္ခေ ခန္ဓေ ပစ္စယာ သေက္ခော အဓိပတိ. (၁)

အသေက္ခံ ဓမ္မံ ပစ္စယာ အသေက္ခော ဓမ္မော ဥပ္ပဇ္ဇတိ နအဓိပတိပစ္စယာ – အသေက္ခေ ခန္ဓေ ပစ္စယာ အသေက္ခော အဓိပတိ. (၁)

နေဝသေက္ခနာသေက္ခံ ဓမ္မံ ပစ္စယာ နေဝသေက္ခနာသေက္ခော ဓမ္မော ဥပ္ပဇ္ဇတိ နအဓိပတိပစ္စယာ (ပရိပုဏ္ဏံ) အသညသတ္တာနံ။ပေ။ စက္ခာယတနံ။ပေ။ ဝတ္ထုံ ပစ္စယာ နေဝသေက္ခနာသေက္ခာ ခန္ဓာ. (၁)

နေဝသေက္ခနာသေက္ခံ ဓမ္မံ ပစ္စယာ သေက္ခော ဓမ္မော ဥပ္ပဇ္ဇတိ နအဓိပတိပစ္စယာ – ဝတ္ထုံ ပစ္စယာ သေက္ခော အဓိပတိ. (၂)

နေဝသေက္ခနာသေက္ခံ ဓမ္မံ ပစ္စယာ အသေက္ခော ဓမ္မော ဥပ္ပဇ္ဇတိ နအဓိပတိပစ္စယာ – ဝတ္ထုံ ပစ္စယာ အသေက္ခော အဓိပတိ. (၃)

သေက္ခဉ္စ နေဝသေက္ခနာသေက္ခဉ္စ ဓမ္မံ ပစ္စယာ သေက္ခော ဓမ္မော ဥပ္ပဇ္ဇတိ နအဓိပတိပစ္စယာ – သေက္ခေ ခန္ဓေ စ ဝတ္ထုဉ္စ ပစ္စယာ သေက္ခော အဓိပတိ. (၁)

အသေက္ခဉ္စ နေဝသေက္ခနာသေက္ခဉ္စ ဓမ္မံ ပစ္စယာ အသေက္ခော ဓမ္မော ဥပ္ပဇ္ဇတိ နအဓိပတိပစ္စယာ – အသေက္ခေ ခန္ဓေ စ ဝတ္ထုဉ္စ ပစ္စယာ အသေက္ခော အဓိပတိ. (၁)

နအနန္တရပစ္စယာဒိ

၂၇. သေက္ခံ ဓမ္မံ ပစ္စယာ နေဝသေက္ခနာသေက္ခော ဓမ္မော ဥပ္ပဇ္ဇတိ နအနန္တရပစ္စယာ။ နသမနန္တရပစ္စယာ။ နအညမညပစ္စယာ။ နဥပနိဿယပစ္စယာ။ နပုရေဇာတပစ္စယာ။ နပစ္ဆာဇာတပစ္စယာ (သတ္တ)။ နအာသေဝနပစ္စယာ။ နကမ္မပစ္စယာ – သေက္ခေ ခန္ဓေ ပစ္စယာ သေက္ခာ စေတနာ.

နေဝသေက္ခနာသေက္ခံ ဓမ္မံ ပစ္စယာ နေဝသေက္ခနာသေက္ခော ဓမ္မော ဥပ္ပဇ္ဇတိ နကမ္မပစ္စယာ – နေဝသေက္ခနာသေက္ခေ ခန္ဓေ ပစ္စယာ နေဝသေက္ခနာသေက္ခာ စေတနာ. ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ပေ။ ဝတ္ထုံ ပစ္စယာ နေဝသေက္ခနာသေက္ခာ စေတနာ. (၁)

နေဝသေက္ခနာသေက္ခံ ဓမ္မံ ပစ္စယာ သေက္ခော ဓမ္မော ဥပ္ပဇ္ဇတိ နကမ္မပစ္စယာ – ဝတ္ထုံ ပစ္စယာ သေက္ခာ စေတနာ. (၂)

သေက္ခဉ္စ နေဝသေက္ခနာသေက္ခဉ္စ ဓမ္မံ ပစ္စယာ သေက္ခော ဓမ္မော ဥပ္ပဇ္ဇတိ နကမ္မပစ္စယာ – သေက္ခေ ခန္ဓေ စ ဝတ္ထုဉ္စ ပစ္စယာ သေက္ခာ စေတနာ. (၁)

နဝိပါကပစ္စယော

၂၈. သေက္ခံ ဓမ္မံ ပစ္စယာ သေက္ခော ဓမ္မော ဥပ္ပဇ္ဇတိ နဝိပါကပစ္စယာ (သေက္ခမူလကေ တီဏိ).

နေဝသေက္ခနာသေက္ခံ ဓမ္မံ ပစ္စယာ နေဝသေက္ခနာသေက္ခော ဓမ္မော ဥပ္ပဇ္ဇတိ နဝိပါကပစ္စယာ (နေဝသေက္ခနာသေက္ခမူလကေ တီဏိ).

သေက္ခဉ္စ နေဝသေက္ခနာသေက္ခဉ္စ ဓမ္မံ ပစ္စယာ သေက္ခော ဓမ္မော ဥပ္ပဇ္ဇတိ နဝိပါကပစ္စယာ (သေက္ခဃဋနေသု တီဏိ).

နအာဟာရပစ္စယာဒိ

၂၉. နေဝသေက္ခနာသေက္ခံ ဓမ္မံ ပစ္စယာ နေဝသေက္ခနာသေက္ခော ဓမ္မော ဥပ္ပဇ္ဇတိ နအာဟာရပစ္စယာ။ နဣန္ဒြိယပစ္စယာ။ နဈာနပစ္စယာ။ နမဂ္ဂပစ္စယာ။ နသမ္ပယုတ္တပစ္စယာ။ နဝိပ္ပယုတ္တပစ္စယာ။ နောနတ္ထိပစ္စယာ။ နောဝိဂတပစ္စယာ။ပေ။.