၁. ဝိဘင်္ဂဝါရော

နဟေတုပစ္စယော

၃၆. ဥပါဒိန္နုပါဒါနိယံ ဓမ္မံ ပစ္စယာ ဥပါဒိန္နုပါဒါနိယော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ ဥပါဒိန္နုပါဒါနိယံ ဧကံ ခန္ဓံ ပစ္စယာ။ပေ။ အဟေတုကပဋိသန္ဓိက္ခဏေ။ပေ။ အသညသတ္တာနံ ဧကံ မဟာဘူတံ။ပေ။ စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ပစ္စယာ ကာယဝိညာဏံ၊ ဝတ္ထုံ ပစ္စယာ အဟေတုကာ ဥပါဒိန္နုပါဒါနိယာ ခန္ဓာ. (၁)

ဥပါဒိန္နုပါဒါနိယံ ဓမ္မံ ပစ္စယာ အနုပါဒိန္နုပါဒါနိယော ဓမ္မော ဥပ္ပဇ္ဇတိ နဟေတုပစ္စယာ – အဟေတုကေ ဥပါဒိန္နုပါဒါနိယေ ခန္ဓေ ပစ္စယာ စိတ္တသမုဋ္ဌာနံ ရူပံ၊ ဝတ္ထုံ ပစ္စယာ အဟေတုကာ အနုပါဒိန္နုပါဒါနိယာ ခန္ဓာ၊ ဝတ္ထုံ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၂)

ဥပါဒိန္နုပါဒါနိယံ ဓမ္မံ ပစ္စယာ ဥပါဒိန္နုပါဒါနိယော စ အနုပါဒိန္နုပါဒါနိယော စ ဓမ္မာ ဥပ္ပဇ္ဇန္တိ နဟေတုပစ္စယာ – အဟေတုကံ ဥပါဒိန္နုပါဒါနိယံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။. (၃)

အနုပါဒိန္နုပါဒါနိယံ ဓမ္မံ ပစ္စယာ အနုပါဒိန္နုပါဒါနိယော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ အနုပါဒိန္နုပါဒါနိယံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ ဧကံ မဟာဘူတံ။ပေ။ ရူပံ၊ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

ဥပါဒိန္နုပါဒါနိယဉ္စ အနုပါဒိန္နုပါဒါနိယဉ္စ ဓမ္မံ ပစ္စယာ အနုပါဒိန္နုပါဒါနိယော ဓမ္မော ဥပ္ပဇ္ဇတိ နဟေတုပစ္စယာ – အဟေတုကေ ဥပါဒိန္နုပါဒါနိယေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ အဟေတုကံ အနုပါဒိန္နုပါဒါနိယံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ ဝတ္ထုဉ္စ ပစ္စယာ ဒွေ ခန္ဓာ၊ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ ဝတ္ထုဉ္စ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

နအာရမ္မဏပစ္စယော

၃၇. ဥပါဒိန္နုပါဒါနိယံ ဓမ္မံ ပစ္စယာ ဥပါဒိန္နုပါဒါနိယော ဓမ္မော ဥပ္ပဇ္ဇတိ နအာရမ္မဏပစ္စယာ (သံခိတ္တံ).

နအဓိပတိပစ္စယော

၃၈. ဥပါဒိန္နုပါဒါနိယံ ဓမ္မံ ပစ္စယာ ဥပါဒိန္နုပါဒါနိယော ဓမ္မော ဥပ္ပဇ္ဇတိ နအဓိပတိပစ္စယာ – ဥပါဒိန္နုပါဒါနိယံ ဧကံ ခန္ဓံ ပစ္စယာ။ပေ။. (၁)

ဥပါဒိန္နုပါဒါနိယံ ဓမ္မံ ပစ္စယာ အနုပါဒိန္နုပါဒါနိယော ဓမ္မော ဥပ္ပဇ္ဇတိ နအဓိပတိပစ္စယာ – ဥပါဒိန္နုပါဒါနိယေ ခန္ဓေ ပစ္စယာ စိတ္တသမုဋ္ဌာနံ ရူပံ၊ ဝတ္ထုံ ပစ္စယာ အနုပါဒိန္နုပါဒါနိယာ ခန္ဓာ. (၂)

ဥပါဒိန္နုပါဒါနိယံ ဓမ္မံ ပစ္စယာ အနုပါဒိန္နအနုပါဒါနိယော ဓမ္မော ဥပ္ပဇ္ဇတိ နအဓိပတိပစ္စယာ – ဝတ္ထုံ ပစ္စယာ အနုပါဒိန္နအနုပါဒါနိယာ အဓိပတိ. (၃)

ဥပါဒိန္နုပါဒါနိယံ ဓမ္မံ ပစ္စယာ ဥပါဒိန္နုပါဒါနိယော စ အနုပါဒိန္နုပါဒါနိယော စ ဓမ္မာ ဥပ္ပဇ္ဇန္တိ နအဓိပတိပစ္စယာ – ဥပါဒိန္နုပါဒါနိယံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။. (၄)

အနုပါဒိန္နုပါဒါနိယံ ဓမ္မံ ပစ္စယာ. (ဧကာ ပဉှာ.)

အနုပါဒိန္နအနုပါဒါနိယံ ဓမ္မံ ပစ္စယာ အနုပါဒိန္နအနုပါဒါနိယော ဓမ္မော ဥပ္ပဇ္ဇတိ နအဓိပတိပစ္စယာ – အနုပါဒိန္နအနုပါဒါနိယေ ခန္ဓေ ပစ္စယာ အနုပါဒိန္နအနုပါဒါနိယာ အဓိပတိ. (၁)

ဥပါဒိန္နုပါဒါနိယဉ္စ အနုပါဒိန္နအနုပါဒါနိယဉ္စ ဓမ္မံ ပစ္စယာ အနုပါဒိန္နအနုပါဒါနိယော ဓမ္မော ဥပ္ပဇ္ဇတိ န အဓိပတိပစ္စယာ – အနုပါဒိန္နအနုပါဒါနိယေ ခန္ဓေ စ ဝတ္ထုဉ္စ ပစ္စယာ အနုပါဒိန္နအနုပါဒါနိယာ အဓိပတိ. (၁)

ဥပါဒိန္နုပါဒါနိယဉ္စ အနုပါဒိန္နုပါဒါနိယဉ္စ ဓမ္မံ ပစ္စယာ အနုပါဒိန္နုပါဒါနိယော ဓမ္မော ဥပ္ပဇ္ဇတိ နအဓိပတိပစ္စယာ – ဥပါဒိန္နုပါဒါနိယေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ အနုပါဒိန္နုပါဒါနိယံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ ဝတ္ထုဉ္စ ပစ္စယာ ဒွေ ခန္ဓာ. (၁)

နအနန္တရပစ္စယာဒိ

၃၉. ဥပါဒိန္နုပါဒါနိယံ ဓမ္မံ ပစ္စယာ ဥပါဒိန္နုပါဒါနိယော ဓမ္မော ဥပ္ပဇ္ဇတိ နအနန္တရပစ္စယာ။ နသမနန္တရပစ္စယာ။ နအညမညပစ္စယာ။ နဥပနိဿယပစ္စယာ။ နပုရေဇာတပစ္စယာ။ နပစ္ဆာဇာတပစ္စယာ။ နအာသေဝနပစ္စယာ။ပေ။.

နကမ္မပစ္စယော

၄၀. ဥပါဒိန္နုပါဒါနိယံ ဓမ္မံ ပစ္စယာ အနုပါဒိန္နုပါဒါနိယော ဓမ္မော ဥပ္ပဇ္ဇတိ နကမ္မပစ္စယာ – ဝတ္ထုံ ပစ္စယာ အနုပါဒိန္နုပါဒါနိယာ စေတနာ. (၁)

ဥပါဒိန္နုပါဒါနိယံ ဓမ္မံ ပစ္စယာ အနုပါဒိန္နအနုပါဒါနိယော ဓမ္မော ဥပ္ပဇ္ဇတိ နကမ္မပစ္စယာ – ဝတ္ထုံ ပစ္စယာ ကုသလာ အနုပါဒိန္နအနုပါဒါနိယာ စေတနာ. (၂)

အနုပါဒိန္နုပါဒါနိယံ ဓမ္မံ ပစ္စယာ အနုပါဒိန္နုပါဒါနိယော ဓမ္မော ဥပ္ပဇ္ဇတိ နကမ္မပစ္စယာ – အနုပါဒိန္နုပါဒါနိယေ ခန္ဓေ ပစ္စယာ အနုပါဒိန္နုပါဒါနိယာ စေတနာ. ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ ဧကံ မဟာဘူတံ ပစ္စယာ။ပေ။. (၁)

အနုပါဒိန္နအနုပါဒါနိယံ ဓမ္မံ ပစ္စယာ အနုပါဒိန္နအနုပါဒါနိယော ဓမ္မော ဥပ္ပဇ္ဇတိ နကမ္မပစ္စယာ – ကုသလေ အနုပါဒိန္နအနုပါဒါနိယေ ခန္ဓေ ပစ္စယာ အနုပါဒိန္နအနုပါဒါနိယာ စေတနာ. (၁)

ဥပါဒိန္နုပါဒါနိယဉ္စ အနုပါဒိန္နအနုပါဒါနိယဉ္စ ဓမ္မံ ပစ္စယာ အနုပါဒိန္နအနုပါဒါနိယော ဓမ္မော ဥပ္ပဇ္ဇတိ နကမ္မပစ္စယာ – ကုသလေ အနုပါဒိန္နအနုပါဒါနိယေ ခန္ဓေ စ ဝတ္ထုဉ္စ ပစ္စယာ အနုပါဒိန္နအနုပါဒါနိယာ ကုသလာ စေတနာ. (၁)

ဥပါဒိန္နုပါဒါနိယဉ္စ အနုပါဒိန္နုပါဒါနိယဉ္စ ဓမ္မံ ပစ္စယာ အနုပါဒိန္နုပါဒါနိယော ဓမ္မော ဥပ္ပဇ္ဇတိ နကမ္မပစ္စယာ – အနုပါဒိန္နုပါဒါနိယေ ခန္ဓေ စ ဝတ္ထုဉ္စ ပစ္စယာ အနုပါဒိန္နုပါဒါနိယာ စေတနာ. (၁)

နဝိပါကပစ္စယော

၄၁. ဥပါဒိန္နုပါဒါနိယံ ဓမ္မံ ပစ္စယာ ဥပါဒိန္နုပါဒါနိယော ဓမ္မော ဥပ္ပဇ္ဇတိ နဝိပါကပစ္စယာ – အသညသတ္တာနံ ဧကံ မဟာဘူတံ ပစ္စယာ။ပေ။ (၁).

ဥပါဒိန္နုပါဒါနိယံ ဓမ္မံ ပစ္စယာ အနုပါဒိန္နုပါဒါနိယော ဓမ္မော ဥပ္ပဇ္ဇတိ နဝိပါကပစ္စယာ၊ ဝတ္ထုံ ပစ္စယာ အနုပါဒိန္နုပါဒါနိယာ ခန္ဓာ. (၂)

ဥပါဒိန္နုပါဒါနိယံ ဓမ္မံ ပစ္စယာ အနုပါဒိန္နအနုပါဒါနိယော ဓမ္မော ဥပ္ပဇ္ဇတိ နဝိပါကပစ္စယာ – ဝတ္ထုံ ပစ္စယာ ကုသလာ အနုပါဒိန္နအနုပါဒါနိယာ ခန္ဓာ. (၃)

အနုပါဒိန္နုပါဒါနိယံ ဓမ္မံ ပစ္စယာ။ ဧကာ.

အနုပါဒိန္နအနုပါဒါနိယံ ဓမ္မံ ပစ္စယာ။ တီဏိ.

ဥပါဒိန္နုပါဒါနိယဉ္စ အနုပါဒိန္နအနုပါဒါနိယဉ္စ ဓမ္မံ ပစ္စယာ အနုပါဒိန္နအနုပါဒါနိယော ဓမ္မော ဥပ္ပဇ္ဇတိ နဝိပါကပစ္စယာ. (သံခိတ္တံ.)

အနုပါဒိန္နုပါဒါနိယဉ္စ အနုပါဒိန္နအနုပါဒါနိယဉ္စ ဓမ္မံ ပစ္စယာ အနုပါဒိန္နုပါဒါနိယော ဓမ္မော ဥပ္ပဇ္ဇတိ နဝိပါကပစ္စယာ. (သံခိတ္တံ.)

ဥပါဒိန္နုပါဒါနိယဉ္စ အနုပါဒိန္နုပါဒါနိယဉ္စ ဓမ္မံ ပစ္စယာ အနုပါဒိန္နုပါဒါနိယော ဓမ္မော ဥပ္ပဇ္ဇတိ နဝိပါကပစ္စယာ – အနုပါဒိန္နုပါဒါနိယံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ ဝတ္ထုဉ္စ ပစ္စယာ ဒွေ ခန္ဓာ.

နအာဟာရပစ္စယာဒိ

၄၂. ဥပါဒိန္နုပါဒါနိယံ ဓမ္မံ ပစ္စယာ ဥပါဒိန္နုပါဒါနိယော ဓမ္မော ဥပ္ပဇ္ဇတိ နအာဟာရပစ္စယာ။ နဣန္ဒြိယပစ္စယာ။ နဈာနပစ္စယာ။ နမဂ္ဂပစ္စယာ။ နသမ္ပယုတ္တပစ္စယာ။ နဝိပ္ပယုတ္တပစ္စယာ။ နောနတ္ထိပစ္စယာ။ နောဝိဂတပစ္စယာ (သံခိတ္တံ).