၁. ဝိဘင်္ဂဝါရော

နဟေတုပစ္စယော

၃၃၄. အကုသလံ ဓမ္မံ နိဿာယ အကုသလော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ နိဿာယ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

အဗျာကတံ ဓမ္မံ နိဿာယ အဗျာကတော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ ဝိပါကာဗျာကတံ ကိရိယာဗျာကတံ ဧကံ ခန္ဓံ နိဿာယ တယော ခန္ဓာ စိတ္တသမုဋ္ဌာနဉ္စ ရူပံ၊ တယော ခန္ဓေ နိဿာယ ဧကော ခန္ဓော စိတ္တသမုဋ္ဌာနဉ္စ ရူပံ၊ ဒွေ ခန္ဓ နိဿာယ ဒွေ ခန္ဓာ စိတ္တသမုဋ္ဌာနဉ္စ ရူပံ၊ အဟေတုကပဋိသန္ဓိက္ခဏေ ဝိပါကာဗျာကတံ ဧကံ ခန္ဓံ နိဿာယ တယော ခန္ဓာ ကဋတ္တာ စ ရူပံ။ပေ။ ဒွေ ခန္ဓေ နိဿာယ ဒွေ ခန္ဓာ ကဋတ္တာ စ ရူပံ၊ ခန္ဓေ နိဿာယ ဝတ္ထု၊ ဝတ္ထုံ နိဿာယ ခန္ဓာ၊ ဧကံ မဟာဘူတံ နိဿာယ တယော မဟာဘူတာ။ပေ။ မဟာဘူတေ နိဿာယ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ၊ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ ဧကံ မဟာဘူတံ နိဿာယ တယော မဟာဘူတာ။ပေ။ မဟာဘူတေ နိဿာယ ကဋတ္တာရူပံ ဥပါဒါရူပံ၊ စက္ခာယတနံ နိဿာယ စက္ခုဝိညာဏံ။ပေ။ ကာယာယတနံ နိဿာယ ကာယဝိညာဏံ၊ ဝတ္ထုံ နိဿာယ အဟေတုကာ ဝိပါကာဗျာကတာ ကိရိယာဗျာကတာ ခန္ဓာ. (၁)

အဗျာကတံ ဓမ္မံ နိဿာယ အကုသလော ဓမ္မော ဥပ္ပဇ္ဇတိ နဟေတုပစ္စယာ – ဝတ္ထုံ နိဿာယ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၂)

အကုသလဉ္စ အဗျာကတဉ္စ ဓမ္မံ နိဿာယ အကုသလော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ ဝတ္ထုဉ္စ နိဿာယ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

(ယထာ ပစ္စယဝါရေ၊ ဧဝံ ဝိတ္ထာရေတဗ္ဗံ.)