၁. ဝိဘင်္ဂဝါရော

ဟေတုပစ္စယော

၃၂၉. ကုသလံ ဓမ္မံ နိဿာယ ကုသလော ဓမ္မော ဥပ္ပဇ္ဇတိ ဟေတုပစ္စယာ – ကုသလံ ဧကံ ခန္ဓံ နိဿာယ တယော ခန္ဓာ၊ တယော ခန္ဓေ နိဿာယ ဧကော ခန္ဓော၊ ဒွေ ခန္ဓေ နိဿာယ ဒွေ ခန္ဓာ. ကုသလံ ဓမ္မံ နိဿာယ အဗျာကတော ဓမ္မော ဥပ္ပဇ္ဇတိ ဟေတုပစ္စယာ – ကုသလေ ခန္ဓေ နိဿာယ စိတ္တသမုဋ္ဌာနံ ရူပံ. ကုသလံ ဓမ္မံ နိဿာယ ကုသလော စ အဗျာကတော စ ဓမ္မာ ဥပ္ပဇ္ဇန္တိ ဟေတုပစ္စယာ. ကုသလံ ဧကံ ခန္ဓံ နိဿာယ တယော ခန္ဓာ စိတ္တသမုဋ္ဌာနဉ္စ ရူပံ၊ တယော ခန္ဓေ နိဿာယ ဧကော ခန္ဓော စိတ္တသမုဋ္ဌာနဉ္စ ရူပံ၊ ဒွေ ခန္ဓေ နိဿာယ ဒွေ ခန္ဓာ စိတ္တသမုဋ္ဌာနဉ္စ ရူပံ. (၃)

၃၃၀. အကုသလံ ဓမ္မံ နိဿာယ အကုသလော ဓမ္မော ဥပ္ပဇ္ဇတိ ဟေတုပစ္စယာ – အကုသလံ ဧကံ ခန္ဓံ နိဿာယ တယော ခန္ဓာ။ပေ။ ဒွေ ခန္ဓေ နိဿာယ ဒွေ ခန္ဓာ. အကုသလံ ဓမ္မံ နိဿာယ အဗျာကတော ဓမ္မော ဥပ္ပဇ္ဇတိ ဟေတုပစ္စယာ – အကုသလေ ခန္ဓေ နိဿာယ စိတ္တသမုဋ္ဌာနံ ရူပံ. အကုသလံ ဓမ္မံ နိဿာယ အကုသလော စ အဗျာကတော စ ဓမ္မာ ဥပ္ပဇ္ဇန္တိ ဟေတုပစ္စယာ – အကုသလံ ဧကံ ခန္ဓံ နိဿာယ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ နိဿာယ ဒွေ ခန္ဓာ စိတ္တသမုဋ္ဌာနဉ္စ ရူပံ. (၃)

၃၃၁. အဗျာကတံ ဓမ္မံ နိဿာယ အဗျာကတော ဓမ္မော ဥပ္ပဇ္ဇတိ ဟေတုပစ္စယာ – ဝိပါကာဗျာကတံ ကိရိယာဗျာကတံ ဧကံ ခန္ဓံ နိဿာယ တယော ခန္ဓာ စိတ္တသမုဋ္ဌာနဉ္စ ရူပံ၊ တယော ခန္ဓေ နိဿာယ ဧကော ခန္ဓော စိတ္တသမုဋ္ဌာနဉ္စ ရူပံ၊ ဒွေ ခန္ဓေ နိဿာယ ဒွေ ခန္ဓာ စိတ္တသမုဋ္ဌာနဉ္စ ရူပံ၊ ပဋိသန္ဓိက္ခဏေ ဝိပါကာဗျာကတံ ဧကံ ခန္ဓံ နိဿာယ တယော ခန္ဓာ ကဋတ္တာ စ ရူပံ၊ တယော ခန္ဓေ နိဿာယ ဧကော ခန္ဓော ကဋတ္တာ စ ရူပံ၊ ဒွေ ခန္ဓေ နိဿာယ ဒွေ ခန္ဓာ ကဋတ္တာ စ ရူပံ၊ ခန္ဓေ နိဿာယ ဝတ္ထု၊ ဝတ္ထုံ နိဿာယ ခန္ဓာ၊ ဧကံ မဟာဘူတံ နိဿာယ တယော မဟာဘူတာ၊ တယော မဟာဘူတေ နိဿာယ ဧကံ မဟာဘူတံ၊ ဒွေ မဟာဘူတေ နိဿာယ ဒွေ မဟာဘူတာ၊ မဟာဘူတေ နိဿာယ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ၊ ဝတ္ထုံ နိဿာယ ဝိပါကာဗျာကတာ ကိရိယာဗျာကတာ ခန္ဓာ. (၁)

အဗျာကတံ ဓမ္မံ နိဿာယ ကုသလော ဓမ္မော ဥပ္ပဇ္ဇတိ ဟေတုပစ္စယာ – ဝတ္ထုံ နိဿာယ ကုသလာ ခန္ဓာ. (၂)

အဗျာကတံ ဓမ္မံ နိဿာယ အကုသလော ဓမ္မော ဥပ္ပဇ္ဇတိ ဟေတုပစ္စယာ – ဝတ္ထုံ နိဿာယ အကုသလာ ခန္ဓာ. (၃)

အဗျာကတံ ဓမ္မံ နိဿာယ ကုသလော စ အဗျာကတော စ ဓမ္မာ ဥပ္ပဇ္ဇန္တိ ဟေတုပစ္စယာ – ဝတ္ထုံ နိဿာယ ကုသလာ ခန္ဓာ၊ မဟာဘူတေ နိဿာယ စိတ္တသမုဋ္ဌာနံ ရူပံ. (၄)

အဗျာကတံ ဓမ္မံ နိဿာယ အကုသလော စ အဗျာကတော စ ဓမ္မာ ဥပ္ပဇ္ဇန္တိ ဟေတုပစ္စယာ – ဝတ္ထုံ နိဿာယ အကုသလာ ခန္ဓာ၊ မဟာဘူတေ နိဿာယ စိတ္တသမုဋ္ဌာနံ ရူပံ. (၅)

၃၃၂. ကုသလဉ္စ အဗျာကတဉ္စ ဓမ္မံ နိဿာယ ကုသလော ဓမ္မော ဥပ္ပဇ္ဇတိ ဟေတုပစ္စယာ – ကုသလံ ဧကံ ခန္ဓဉ္စ ဝတ္ထုဉ္စ နိဿာယ တယော ခန္ဓာ။ပေ။ ဒွေ ခန္ဓေ စ ဝတ္ထုဉ္စ နိဿာယ ဒွေ ခန္ဓာ. ကုသလဉ္စ အဗျာကတဉ္စ ဓမ္မံ နိဿာယ အဗျာကတော ဓမ္မော ဥပ္ပဇ္ဇတိ ဟေတုပစ္စယာ – ကုသလေ ခန္ဓေ စ မဟာဘူတေ စ နိဿာယ စိတ္တသမုဋ္ဌာနံ ရူပံ. ကုသလဉ္စ အဗျာကတဉ္စ ဓမ္မံ နိဿာယ ကုသလော စ အဗျာကတော စ ဓမ္မာ ဥပ္ပဇ္ဇန္တိ ဟေတုပစ္စယာ – ကုသလံ ဧကံ ခန္ဓဉ္စ ဝတ္ထုဉ္စ နိဿာယ တယော ခန္ဓာ။ပေ။ ဒွေ ခန္ဓေ စ ဝတ္ထုဉ္စ နိဿာယ ဒွေ ခန္ဓာ၊ ကုသလေ ခန္ဓေ စ မဟာဘူတေ စ နိဿာယ စိတ္တသမုဋ္ဌာနံ ရူပံ. (၃)

အကုသလဉ္စ အဗျာကတဉ္စ ဓမ္မံ နိဿာယ အကုသလော ဓမ္မော ဥပ္ပဇ္ဇတိ ဟေတုပစ္စယာ – အကုသလံ ဧကံ ခန္ဓဉ္စ ဝတ္ထုဉ္စ နိဿာယ တယော ခန္ဓာ ။ပေ။ ဒွေ ခန္ဓေ စ ဝတ္ထုဉ္စ နိဿာယ ဒွေ ခန္ဓာ. အကုသလဉ္စ အဗျာကတဉ္စ ဓမ္မံ နိဿာယ အဗျာကတော ဓမ္မော ဥပ္ပဇ္ဇတိ ဟေတုပစ္စယာ – အကုသလေ ခန္ဓေ စ မဟာဘူတေ စ နိဿာယ စိတ္တသမုဋ္ဌာနံ ရူပံ. အကုသလဉ္စ အဗျာကတဉ္စ ဓမ္မံ နိဿာယ အကုသလော စ အဗျာကတော စ ဓမ္မာ ဥပ္ပဇ္ဇန္တိ ဟေတုပစ္စယာ – အကုသလံ ဧကံ ခန္ဓဉ္စ ဝတ္ထုဉ္စ နိဿာယ တယော ခန္ဓာ။ပေ။ ဒွေ ခန္ဓေ စ ဝတ္ထုဉ္စ နိဿာယ ဒွေ ခန္ဓာ၊ အကုသလေ ခန္ဓေ စ မဟာဘူတေ စ နိဿာယ စိတ္တသမုဋ္ဌာနံ ရူပံ. (၃)

(ယထာ ပစ္စယဝါရေ၊ ဧဝံ ဝိတ္ထာရေတဗ္ဗံ.)