၂. ပစ္စယပစ္စနီယံ

၁. ဝိဘင်္ဂဝါရော

နဟေတုပစ္စယော

၂၇၇. အကုသလံ ဓမ္မံ ပစ္စယာ အကုသလော ဓမ္မော ဥပ္ပဇ္ဇတိ န ဟေတုပစ္စယာ – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

အဗျာကတံ ဓမ္မံ ပစ္စယာ အဗျာကတော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ ဝိပါကာဗျာကတံ ကိရိယာဗျာကတံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ ပစ္စယာ ဒွေ ခန္ဓာ စိတ္တသမုဋ္ဌာနဉ္စ ရူပံ၊ အဟေတုကပဋိသန္ဓိက္ခဏေ ဝိပါကာဗျာကတံ ဧကံ ခန္ဓံ ပစ္စယာ တယော ခန္ဓာ ကဋတ္တာ စ ရူပံ။ပေ။ ဒွေ ခန္ဓေ ပစ္စယာ ဒွေ ခန္ဓာ ကဋတ္တာ စ ရူပံ၊ ခန္ဓေ ပစ္စယာ ဝတ္ထု၊ ဝတ္ထုံ ပစ္စယာ ခန္ဓာ၊ ဧကံ မဟာဘူတံ ပစ္စယာ တယော မဟာဘူတာ။ပေ။ မဟာဘူတေ ပစ္စယာ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ၊ ဗာဟိရံ ။ အာဟာရသမုဋ္ဌာနံ။ ဥတုသမုဋ္ဌာနံ ။ အသညသတ္တာနံ ဧကံ မဟာဘူတံ ပစ္စယာ တယော မဟာဘူတာ။ပေ။ မဟာဘူတေ ပစ္စယာ ကဋတ္တာရူပံ ဥပါဒါရူပံ. စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ပစ္စယာ ကာယဝိညာဏံ၊ ဝတ္ထုံ ပစ္စယာ အဟေတုကာ ဝိပါကာဗျာကတာ ကိရိယာဗျာကတာ ခန္ဓာ. (၁)

အဗျာကတံ ဓမ္မံ ပစ္စယာ အကုသလော ဓမ္မော ဥပ္ပဇ္ဇတိ နဟေတုပစ္စယာ – ဝတ္ထုံ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၂)

အကုသလဉ္စ အဗျာကတဉ္စ ဓမ္မံ ပစ္စယာ အကုသလော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ ဝတ္ထုဉ္စ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

နအာရမ္မဏပစ္စယော

၂၇၈. ကုသလံ ဓမ္မံ ပစ္စယာ အဗျာကတော ဓမ္မော ဥပ္ပဇ္ဇတိ နအာရမ္မဏပစ္စယာ – ကုသလေ ခန္ဓေ ပစ္စယာ စိတ္တသမုဋ္ဌာနံ ရူပံ.

(ယထာ ပဋိစ္စဝါရေ နအာရမ္မဏပစ္စယာ၊ ဧဝံ ဝိတ္ထာရေတဗ္ဗံ.)

နအဓိပတိပစ္စယော

၂၇၉. ကုသလံ ဓမ္မံ ပစ္စယာ ကုသလော ဓမ္မော ဥပ္ပဇ္ဇတိ နအဓိပတိပစ္စယာ – ကုသလံ ဧကံ ခန္ဓံ ပစ္စယာ။ တီဏိ.

အကုသလံ ဓမ္မံ ပစ္စယာ။ တီဏိ.

အဗျာကတံ ဓမ္မံ ပစ္စယာ။ပေ။ ပဋိသန္ဓိက္ခဏေ။ပေ။ (အဗျာကတံ ပရိပုဏ္ဏံ ကာတဗ္ဗံ). ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ ဧကံ မဟာဘူတံ ပစ္စယာ။ပေ။ စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ပစ္စယာ ကာယဝိညာဏံ၊ ဝတ္ထုံ ပစ္စယာ ဝိပါကာဗျာကတာ ကိရိယာဗျာကတာ ခန္ဓာ.

အဗျာကတံ ဓမ္မံ ပစ္စယာ ကုသလော ဓမ္မော ဥပ္ပဇ္ဇတိ နအဓိပတိပစ္စယာ၊ ဝတ္ထုံ ပစ္စယာ ကုသလာ ခန္ဓာ။ပေ။.

(ယထာ အနုလောမေ သဟဇာတပစ္စယံ၊ ဧဝံ ဂဏေတဗ္ဗံ.)

နအနန္တရာဒိပစ္စယာ

၂၈၀. ကုသလံ ဓမ္မံ ပစ္စယာ အဗျာကတော ဓမ္မော ဥပ္ပဇ္ဇတိ နအနန္တရပစ္စယာ။ နသမနန္တရပစ္စယာ။ နအညမညပစ္စယာ။ နဥပနိဿယပစ္စယာ။ နပုရေဇာတပစ္စယာ.

(ယထာ ပဋိစ္စဝါရေ၊ ဧဝံ ဝိတ္ထာရေတဗ္ဗံ.)

နပစ္ဆာဇာတာဒိပစ္စယာ

၂၈၁. ကုသလံ ဓမ္မံ ပစ္စယာ ကုသလော ဓမ္မော ဥပ္ပဇ္ဇတိ နပစ္ဆာဇာတပစ္စယာ။ နအာသေဝနပစ္စယာ။ပေ။ စက္ခာယတနံ ပစ္စယာ။ပေ။ (နပစ္ဆာဇာတပစ္စယမ္ပိ နအာသေဝနပစ္စယမ္ပိ ပရိပုဏ္ဏံ၊ သတ္တရသ.)

(ယထာ အနုလောမေ သဟဇာတပစ္စယံ၊ ဧဝံ ဝိတ္ထာရေတဗ္ဗံ.)

နကမ္မပစ္စယော

၂၈၂. ကုသလံ ဓမ္မံ ပစ္စယာ ကုသလော ဓမ္မော ဥပ္ပဇ္ဇတိ နကမ္မပစ္စယာ – ကုသလေ ခန္ဓေ ပစ္စယာ ကုသလာ စေတနာ. (၁)

အကုသလံ ဓမ္မံ ပစ္စယာ အကုသလော ဓမ္မော ဥပ္ပဇ္ဇတိ နကမ္မပစ္စယာ – အကုသလေ ခန္ဓေ ပစ္စယာ အကုသလာ စေတနာ. (၁)

အဗျာကတံ ဓမ္မံ ပစ္စယာ အဗျာကတော ဓမ္မော ဥပ္ပဇ္ဇတိ နကမ္မပစ္စယာ၊ ကိရိယာဗျာကတေ ခန္ဓေ ပစ္စယာ ကိရိယာဗျာကတာ စေတနာ၊ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ ဧကံ မဟာဘူတံ ပစ္စယာ။ပေ။ ဥပါဒါရူပံ၊ ဝတ္ထုံ ပစ္စယာ ကိရိယာဗျာကတာ စေတနာ. (၁)

အဗျာကတံ ဓမ္မံ ပစ္စယာ ကုသလော ဓမ္မော ဥပ္ပဇ္ဇတိ နကမ္မပစ္စယာ – ဝတ္ထုံ ပစ္စယာ ကုသလာ စေတနာ. (၂)

အဗျာကတံ ဓမ္မံ ပစ္စယာ အကုသလော ဓမ္မော ဥပ္ပဇ္ဇတိ နကမ္မပစ္စယာ – ဝတ္ထုံ ပစ္စယာ အကုသလာ စေတနာ. (၃)

ကုသလဉ္စ အဗျာကတဉ္စ ဓမ္မံ ပစ္စယာ ကုသလော ဓမ္မော ဥပ္ပဇ္ဇတိ နကမ္မပစ္စယာ – ကုသလေ ခန္ဓေ စ ဝတ္ထုဉ္စ ပစ္စယာ ကုသလာ စေတနာ. (၁)

အကုသလဉ္စ အဗျာကတဉ္စ ဓမ္မံ ပစ္စယာ အကုသလော ဓမ္မော ဥပ္ပဇ္ဇတိ နကမ္မပစ္စယာ – အကုသလေ ခန္ဓေ စ ဝတ္ထုဉ္စ ပစ္စယာ အကုသလာ စေတနာ. (၁)

နဝိပါကပစ္စယော

၂၈၃. ကုသလံ ဓမ္မံ ပစ္စယာ ကုသလော ဓမ္မော ဥပ္ပဇ္ဇတိ နဝိပါကပစ္စယာ – ကုသလံ ဧကံ ခန္ဓံ ပစ္စယာ။ တီဏိ.

အကုသလံ ဓမ္မံ ပစ္စယာ။ တီဏိ.

အဗျာကတံ ဓမ္မံ ပစ္စယာ အဗျာကတော ဓမ္မော ဥပ္ပဇ္ဇတိ နဝိပါကပစ္စယာ – ကိရိယာဗျာကတံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ ပစ္စယာ ဒွေ ခန္ဓာ စိတ္တသမုဋ္ဌာနဉ္စ ရူပံ၊ ဧကံ မဟာဘူတံ ပစ္စယာ တယော မဟာဘူတာ။ပေ။ မဟာဘူတေ ပစ္စယာ စိတ္တသမုဋ္ဌာနံ ရူပံ ဥပါဒါရူပံ၊ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ ဧကံ မဟာဘူတံ ပစ္စယာ တယော မဟာဘူတာ။ပေ။ မဟာဘူတေ ပစ္စယာ ကဋတ္တာရူပံ ဥပါဒါရူပံ၊ ဝတ္ထုံ ပစ္စယာ ကိရိယာဗျာကတာ ခန္ဓာ.

အဗျာကတံ ဓမ္မံ ပစ္စယာ ကုသလော ဓမ္မော ဥပ္ပဇ္ဇတိ နဝိပါကပစ္စယာ – ဝတ္ထုံ ပစ္စယာ ကုသလာ ခန္ဓာ.

(ဝိပါကံ ဌပေတွာ သဗ္ဗတ္ထ ဝိတ္ထာရေတဗ္ဗံ.)

နအာဟာရာဒိပစ္စယာ

၂၈၄. အဗျာကတံ ဓမ္မံ ပစ္စယာ အဗျာကတော ဓမ္မော ဥပ္ပဇ္ဇတိ နအာဟာရပစ္စယာ။ နဣန္ဒြိယပစ္စယာ။ နဈာနပစ္စယာ။ပေ။ စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ပစ္စယာ ကာယဝိညာဏံ. (န ဈာနေ ဣဒံ နာနာကရဏံ.) နမဂ္ဂပစ္စယာ။ စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ပစ္စယာ ကာယဝိညာဏံ. ဝတ္ထုံ ပစ္စယာ အဟေတုကဝိပါကာဗျာကတာ ကိရိယာဗျာကတာ ခန္ဓာ. (နမဂ္ဂေ ဣဒံ နာနာကရဏံ.)

(အဝသေသံ ယထာ ပဋိစ္စဝါရေ ပစ္စနီယံ၊ ဧဝံ ဝိတ္ထာရေတဗ္ဗံ.)

နသမ္ပယုတ္တာဒိပစ္စယာ

၂၈၅. နသမ္ပယုတ္တပစ္စယာ ။ နဝိပ္ပယုတ္တပစ္စယာ။ နောနတ္ထိပစ္စယာ။ ကုသလံ ဓမ္မံ ပစ္စယာ အဗျာကတော ဓမ္မော ဥပ္ပဇ္ဇတိ နောဝိဂတပစ္စယာ – ကုသလေ ခန္ဓေ ပစ္စယာ စိတ္တသမုဋ္ဌာနံ ရူပံ.

(ယထာ ပဋိစ္စဝါရေ၊ ဧဝံ ဝိတ္ထာရေတဗ္ဗံ.)