၂. ပစ္စယပစ္စနီယံ

၁. ဝိဘင်္ဂဝါရော

နဟေတုပစ္စယော

၂၃၉. အကုသလံ ဓမ္မံ သဟဇာတော အကုသလော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ သဟဇာတော ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

အဗျာကတံ ဓမ္မံ သဟဇာတော အဗျာကတော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ ဝိပါကာဗျာကတံ ကိရိယာဗျာကတံ ဧကံ ခန္ဓံ သဟဇာတာ တယော ခန္ဓာ စိတ္တသမုဋ္ဌာနဉ္စ ရူပံ၊ တယော ခန္ဓေ သဟဇာတော ဧကော ခန္ဓော စိတ္တသမုဋ္ဌာနဉ္စ ရူပံ၊ ဒွေ ခန္ဓေ သဟဇာတာ ဒွေ ခန္ဓာ စိတ္တသမုဋ္ဌာနဉ္စ ရူပံ၊ အဟေတုကပဋိသန္ဓိက္ခဏေ ဝိပါကာဗျာကတံ ဧကံ ခန္ဓံ သဟဇာတာ တယော ခန္ဓာ ကဋတ္တာ စ ရူပံ၊ တယော ခန္ဓေ သဟဇာတော ဧကော ခန္ဓော ကဋတ္တာ စ ရူပံ၊ ဒွေ ခန္ဓေ သဟဇာတာ ဒွေ ခန္ဓာ ကဋတ္တာ စ ရူပံ၊ ခန္ဓေ သဟဇာတံ ဝတ္ထု၊ ဝတ္ထုံ သဟဇာတာ ခန္ဓာ၊ ဧကံ မဟာဘူတံ သဟဇာတာ တယော မဟာဘူတာ၊ တယော မဟာဘူတေ သဟဇာတံ ဧကံ မဟာဘူတံ၊ ဒွေ မဟာဘူတေ သဟဇာတာ ဒွေ မဟာဘူတာ၊ မဟာဘူတေ သဟဇာတံ စိတ္တသမုဋ္ဌာနံ ရူပံ ကဋတ္တာရူပံ ဥပါဒါရူပံ၊ ဗာဟိရံ။ အာဟာရသမုဋ္ဌာနံ။ ဥတုသမုဋ္ဌာနံ။ အသညသတ္တာနံ ဧကံ မဟာဘူတံ သဟဇာတာ တယော မဟာဘူတာ။ပေ။ မဟာဘူတေ သဟဇာတံ ကဋတ္တာရူပံ ဥပါဒါရူပံ. (၁)

(ယထာ ပဋိစ္စဝါရေ၊ ဧဝံ ဝိတ္ထာရေတဗ္ဗံ.)