၂. ပစ္စယပစ္စနီယံ

နဟေတုပစ္စယော

၄. သံကိလိဋ္ဌသံကိလေသိကံ ဓမ္မံ ပဋိစ္စ သံကိလိဋ္ဌသံကိလေသိကော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

အသံကိလိဋ္ဌသံကိလေသိကံ ဓမ္မံ ပဋိစ္စ အသံကိလိဋ္ဌသံကိလေသိကော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ အသံကိလိဋ္ဌသံကိလေသိကံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ အဟေတုကပဋိသန္ဓိက္ခဏေ။ပေ။ အသညသတ္တာနံ ဧကံ မဟာဘူတံ. (သံခိတ္တံ.) (၁)

(ယထာ ကုသလတ္တိကေ ဝိဘတ္တံ၊ ဧဝံ ဝိဘဇိတဗ္ဗံ.)

သုဒ္ဓံ

၅. နဟေတုယာ ဒွေ၊ နအာရမ္မဏေ ပဉ္စ၊ နအဓိပတိယာ ဆ၊ နအနန္တရေ ပဉ္စ။ပေ။ နဥပနိဿယေ ပဉ္စ၊ နပုရေဇာတေ သတ္တ၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ တီဏိ၊ နဝိပါကေ နဝ၊ နအာဟာရေ ဧကံ။ပေ။ နမဂ္ဂေ ဧကံ၊ နသမ္ပယုတ္တေ ပဉ္စ၊ နဝိပ္ပယုတ္တေ တီဏိ၊ နောနတ္ထိယာ ပဉ္စ၊ နောဝိဂတေ ပဉ္စ. (သံခိတ္တံ.)