၂. သုတ္တသာဓနံ

၂၉၈. န ဝတ္တဗ္ဗံ – ‘‘အတီတာနာဂတာ ခန္ဓာ ဓာတု အာယတနံ နတ္ထိ စေတေ’’တိ? အာမန္တာ. နနု ဝုတ္တံ ဘဂဝတာ – ‘‘တယောမေ၊ ဘိက္ခဝေ၊ နိရုတ္တိပထာ အဓိဝစနပထာ ပညတ္တိ။ပေ။ ဝိညူဟီတိ။ပေ။’’. အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘အတီတာနာဂတာ ခန္ဓာ ဓာတု အာယတနံ နတ္ထိ စေတေ’’တိ.

အတီတာနာဂတာ ခန္ဓာ ဓာတု အာယတနံ နတ္ထိ စေတေတိ? အာမန္တာ. နနု ဝုတ္တံ ဘဂဝတာ – ‘‘ယံ ကိဉ္စိ၊ ဘိက္ခဝေ၊ ရူပံ အတီတာနာဂတပစ္စုပ္ပန္နံ အဇ္ဈတ္တံ ဝါ ဗဟိဒ္ဓါ ဝါ ဩဠာရိကံ ဝါ သုခုမံ ဝါ ဟီနံ ဝါ ပဏီတံ ဝါ ယံ ဒူရေ သန္တိကေ ဝါ၊ အယံ ဝုစ္စတိ ရူပက္ခန္ဓော. ယာ ကာစိ ဝေဒနာ။ ယာ ကာစိ သညာ။ ယေ ကေစိ သင်္ခါရာ။ ယံ ကိဉ္စိ ဝိညာဏံ အတီတာနာဂတပစ္စုပ္ပန္နံ။ပေ။ အယံ ဝုစ္စတိ ဝိညာဏက္ခန္ဓော’’တိ. အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘အတီတာနာဂတာ ခန္ဓာ ဓာတု အာယတနံ နတ္ထိ စေတေ’’တိ.

အတီတက္ခန္ဓာဒိကထာ နိဋ္ဌိတာ.