၂. ကာလသံသန္ဒနာ

၂၈၃. အတီတံ အတ္ထီတိ? အာမန္တာ. နနု အတီတံ နိရုဒ္ဓံ ဝိဂတံ ဝိပရိဏတံ အတ္ထင်္ဂတံ အဗ္ဘတ္ထင်္ဂတန္တိ? အာမန္တာ. ဟဉ္စိ အတီတံ နိရုဒ္ဓံ ဝိဂတံ ဝိပရိဏတံ အတ္ထင်္ဂတံ အဗ္ဘတ္ထင်္ဂတံ၊ နော စ ဝတ ရေ ဝတ္တဗ္ဗေ – ‘‘အတီတံ အတ္ထီ’’တိ.

အနာဂတံ အတ္ထီတိ? အာမန္တာ. နနု အနာဂတံ အဇာတံ အဘူတံ အသဉ္ဇာတံ အနိဗ္ဗတ္တံ အနဘိနိဗ္ဗတ္တံ အပါတုဘူတန္တိ? အာမန္တာ. ဟဉ္စိ အနာဂတံ အဇာတံ အဘူတံ အသဉ္ဇာတံ အနိဗ္ဗတ္တံ အနဘိနိဗ္ဗတ္တံ အပါတုဘူတံ၊ နော စ ဝတ ရေ ဝတ္တဗ္ဗေ – ‘‘အနာဂတံ အတ္ထီ’’တိ.

ပစ္စုပ္ပန္နံ အတ္ထိ ပစ္စုပ္ပန္နံ အနိရုဒ္ဓံ အဝိဂတံ အဝိပရိဏတံ န အတ္ထင်္ဂတံ န အဗ္ဘတ္ထင်္ဂတန္တိ? အာမန္တာ. အတီတံ အတ္ထိ အတီတံ အနိရုဒ္ဓံ အဝိဂတံ အဝိပရိဏတံ န အတ္ထင်္ဂတံ န အဗ္ဘတ္ထင်္ဂတန္တိ? န ဟေဝံ ဝတ္တဗ္ဗေ။ပေ။ ပစ္စုပ္ပန္နံ အတ္ထိ ပစ္စုပ္ပန္နံ ဇာတံ ဘူတံ သဉ္ဇာတံ နိဗ္ဗတ္တံ အဘိနိဗ္ဗတ္တံ ပါတုဘူတန္တိ? အာမန္တာ. အနာဂတံ အတ္ထိ အနာဂတံ ဇာတံ ဘူတံ သဉ္ဇာတံ နိဗ္ဗတ္တံ အဘိနိဗ္ဗတ္တံ ပါတုဘူတန္တိ? န ဟေဝံ ဝတ္တဗ္ဗေ။ပေ။.

အတီတံ အတ္ထိ အတီတံ နိရုဒ္ဓံ ဝိဂတံ ဝိပရိဏတံ အတ္ထင်္ဂတံ အဗ္ဘတ္ထင်္ဂတန္တိ? အာမန္တာ. ပစ္စုပ္ပန္နံ အတ္ထိ ပစ္စုပ္ပန္နံ နိရုဒ္ဓံ ဝိဂတံ ဝိပရိဏတံ အတ္ထင်္ဂတံ အဗ္ဘတ္ထင်္ဂတန္တိ? န ဟေဝံ ဝတ္တဗ္ဗေ။ပေ။ အနာဂတံ အတ္ထိ အနာဂတံ အဇာတံ အဘူတံ အသဉ္ဇာတံ အနိဗ္ဗတ္တံ အနဘိနိဗ္ဗတ္တံ အပါတုဘူတန္တိ? အာမန္တာ. ပစ္စုပ္ပန္နံ အတ္ထိ ပစ္စုပ္ပန္နံ အဇာတံ အဘူတံ အသဉ္ဇာတံ အနိဗ္ဗတ္တံ အနဘိနိဗ္ဗတ္တံ အပါတုဘူတန္တိ? န ဟေဝံ ဝတ္တဗ္ဗေ.

၂၈၄. အတီတံ ရူပံ အတ္ထီတိ? အာမန္တာ. နနု အတီတံ ရူပံ နိရုဒ္ဓံ ဝိဂတံ ဝိပရိဏတံ အတ္ထင်္ဂတံ အဗ္ဘတ္ထင်္ဂတန္တိ? အာမန္တာ. ဟဉ္စိ အတီတံ ရူပံ နိရုဒ္ဓံ။ပေ။ အဗ္ဘတ္ထင်္ဂတံ၊ နော စ ဝတ ရေ ဝတ္တဗ္ဗေ – ‘‘အတီတံ ရူပံ အတ္ထီ’’တိ.

အနာဂတံ ရူပံ အတ္ထီတိ? အာမန္တာ. နနု အနာဂတံ ရူပံ အဇာတံ အဘူတံ အသဉ္ဇာတံ အနိဗ္ဗတ္တံ အနဘိနိဗ္ဗတ္တံ အပါတုဘူတန္တိ? အာမန္တာ. ဟဉ္စိ အနာဂတံ ရူပံ အဇာတံ။ပေ။ အပါတုဘူတံ၊ နော စ ဝတ ရေ ဝတ္တဗ္ဗေ – ‘‘အနာဂတံ ရူပံ အတ္ထီ’’တိ.

ပစ္စုပ္ပန္နံ ရူပံ အတ္ထိ ပစ္စုပ္ပန္နံ ရူပံ အနိရုဒ္ဓံ အဝိဂတံ အဝိပရိဏတံ န အတ္ထင်္ဂတံ န အဗ္ဘတ္ထင်္ဂတန္တိ? အာမန္တာ. အတီတံ ရူပံ အတ္ထိ အတီတံ ရူပံ အနိရုဒ္ဓံ အဝိဂတံ အဝိပရိဏတံ န အတ္ထင်္ဂတံ န အဗ္ဘတ္ထင်္ဂတန္တိ? န ဟေဝံ ဝတ္တဗ္ဗေ.

ပစ္စုပ္ပန္နံ ရူပံ အတ္ထိ ပစ္စုပ္ပန္နံ ရူပံ ဇာတံ ဘူတံ သဉ္ဇာတံ နိဗ္ဗတ္တံ အဘိနိဗ္ဗတ္တံ ပါတုဘူတန္တိ? အာမန္တာ. အနာဂတံ ရူပံ အတ္ထိ အနာဂတံ ရူပံ ဇာတံ ဘူတံ သဉ္ဇာတံ နိဗ္ဗတ္တံ အဘိနိဗ္ဗတ္တံ ပါတုဘူတန္တိ? န ဟေဝံ ဝတ္တဗ္ဗေ.

အတီတံ ရူပံ အတ္ထိ အတီတံ ရူပံ နိရုဒ္ဓံ ဝိဂတံ ဝိပရိဏတံ အတ္ထင်္ဂတံ အဗ္ဘတ္ထင်္ဂတန္တိ? အာမန္တာ. ပစ္စုပ္ပန္နံ ရူပံ အတ္ထိ ပစ္စုပ္ပန္နံ ရူပံ နိရုဒ္ဓံ ဝိဂတံ ဝိပရိဏတံ အတ္ထင်္ဂတံ အဗ္ဘတ္ထင်္ဂတန္တိ? န ဟေဝံ ဝတ္တဗ္ဗေ.

အနာဂတံ ရူပံ အတ္ထိ အနာဂတံ ရူပံ အဇာတံ အဘူတံ အသဉ္ဇာတံ အနိဗ္ဗတ္တံ အနဘိနိဗ္ဗတ္တံ အပါတုဘူတန္တိ? အာမန္တာ. ပစ္စုပ္ပန္နံ ရူပံ အတ္ထိ ပစ္စုပ္ပန္နံ ရူပံ အဇာတံ အဘူတံ အသဉ္ဇာတံ အနိဗ္ဗတ္တံ အနဘိနိဗ္ဗတ္တံ အပါတုဘူတန္တိ? န ဟေဝံ ဝတ္တဗ္ဗေ.

အတီတာ ဝေဒနာ အတ္ထိ။ပေ။ သညာ အတ္ထိ၊ သင်္ခါရာ အတ္ထိ၊ ဝိညာဏံ အတ္ထီတိ? အာမန္တာ. နနု အတီတံ ဝိညာဏံ နိရုဒ္ဓံ ဝိဂတံ ဝိပရိဏတံ အတ္ထင်္ဂတံ အဗ္ဘတ္ထင်္ဂတန္တိ? အာမန္တာ. ဟဉ္စိ အတီတံ ဝိညာဏံ နိရုဒ္ဓံ။ပေ။ အဗ္ဘတ္ထင်္ဂတံ၊ နော စ ဝတ ရေ ဝတ္တဗ္ဗေ – ‘‘အတီတံ ဝိညာဏံ အတ္ထီ’’တိ.

အနာဂတံ ဝိညာဏံ အတ္ထီတိ? အာမန္တာ. နနု အနာဂတံ ဝိညာဏံ အဇာတံ အဘူတံ အသဉ္ဇာတံ အနိဗ္ဗတ္တံ အနဘိနိဗ္ဗတ္တံ အပါတုဘူတန္တိ? အာမန္တာ. ဟဉ္စိ အနာဂတံ ဝိညာဏံ အဇာတံ။ပေ။ အပါတုဘူတံ၊ နော စ ဝတ ရေ ဝတ္တဗ္ဗေ – ‘‘အနာဂတံ ဝိညာဏံ အတ္ထီ’’တိ.

ပစ္စုပ္ပန္နံ ဝိညာဏံ အတ္ထိ ပစ္စုပ္ပန္နံ ဝိညာဏံ အနိရုဒ္ဓံ။ပေ။ န အဗ္ဘတ္ထင်္ဂတန္တိ? အာမန္တာ. အတီတံ ဝိညာဏံ အတ္ထိ အတီတံ ဝိညာဏံ အနိရုဒ္ဓံ။ပေ။ န အဗ္ဘတ္ထင်္ဂတန္တိ? န ဟေဝံ ဝတ္တဗ္ဗေ.

ပစ္စုပ္ပန္နံ ဝိညာဏံ အတ္ထိ ပစ္စုပ္ပန္နံ ဝိညာဏံ ဇာတံ။ပေ။ ပါတုဘူတန္တိ? အာမန္တာ. အနာဂတံ ဝိညာဏံ အတ္ထိ အနာဂတံ ဝိညာဏံ ဇာတံ။ပေ။ ပါတုဘူတန္တိ? န ဟေဝံ ဝတ္တဗ္ဗေ.

အတီတံ ဝိညာဏံ အတ္ထိ အတီတံ ဝိညာဏံ နိရုဒ္ဓံ။ပေ။ အဗ္ဘတ္ထင်္ဂတန္တိ? အာမန္တာ. ပစ္စုပ္ပန္နံ ဝိညာဏံ အတ္ထိ ပစ္စုပ္ပန္နံ ဝိညာဏံ နိရုဒ္ဓံ။ပေ။ အဗ္ဘတ္ထင်္ဂတန္တိ? န ဟေဝံ ဝတ္တဗ္ဗေ. အနာဂတံ ဝိညာဏံ အတ္ထိ အနာဂတံ ဝိညာဏံ အဇာတံ။ပေ။ အပါတုဘူတန္တိ? အာမန္တာ.

ပစ္စုပ္ပန္နံ ဝိညာဏံ အတ္ထိ ပစ္စုပ္ပန္နံ ဝိညာဏံ အဇာတံ။ပေ။ အပါတုဘူတန္တိ? န ဟေဝံ ဝတ္တဗ္ဗေ.

၂၈၅. ‘‘ပစ္စုပ္ပန္နန္တိ ဝါ ရူပ’’န္တိ ဝါ၊ ‘‘ရူပန္တိ ဝါ ပစ္စုပ္ပန္န’’န္တိ ဝါ ပစ္စုပ္ပန္နံ ရူပံ အပ္ပိယံ ကရိတွာ ဧသေသေ ဧကဋ္ဌေ သမေ သမဘာဂေ တဇ္ဇာတေတိ? အာမန္တာ. ပစ္စုပ္ပန္နံ ရူပံ နိရုဇ္ဈမာနံ ပစ္စုပ္ပန္နဘာဝံ ဇဟတီတိ? အာမန္တာ. ရူပဘာဝံ ဇဟတီတိ? န ဟေဝံ ဝတ္တဗ္ဗေ။ပေ။.

‘‘ပစ္စုပ္ပန္နန္တိ ဝါ ရူပ’’န္တိ ဝါ၊ ‘‘ရူပန္တိ ဝါ ပစ္စုပ္ပန္န’’န္တိ ဝါ ပစ္စုပ္ပန္နံ ရူပံ အပ္ပိယံ ကရိတွာ ဧသေသေ ဧကဋ္ဌေ သမေ သမဘာဂေ တဇ္ဇာတေတိ? အာမန္တာ. ပစ္စုပ္ပန္နံ ရူပံ နိရုဇ္ဈမာနံ ရူပဘာဝံ န ဇဟတီတိ? အာမန္တာ. ပစ္စုပ္ပန္နဘာဝံ န ဇဟတီတိ? န ဟေဝံ ဝတ္တဗ္ဗေ။ပေ။.

‘‘ဩဒါတန္တိ ဝါ ဝတ္ထ’’န္တိ ဝါ၊ ‘‘ဝတ္ထန္တိ ဝါ ဩဒါတ’’န္တိ ဝါ ဩဒါတံ ဝတ္ထံ အပ္ပိယံ ကရိတွာ ဧသေသေ ဧကဋ္ဌေ သမေ သမဘာဂေ တဇ္ဇာတေတိ? အာမန္တာ. ဩဒါတံ ဝတ္ထံ ရဇ္ဇမာနံ ဩဒါတဘာဝံ ဇဟတီတိ? အာမန္တာ. ဝတ္ထဘာဝံ ဇဟတီတိ? န ဟေဝံ ဝတ္တဗ္ဗေ.

‘‘ဩဒါတန္တိ ဝါ ဝတ္ထ’’န္တိ ဝါ၊ ‘‘ဝတ္ထန္တိ ဝါ ဩဒါတ’’န္တိ ဝါ ဩဒါတံ ဝတ္ထံ အပ္ပိယံ ကရိတွာ ဧသေသေ ဧကဋ္ဌေ သမေ သမဘာဂေ တဇ္ဇာတေတိ? အာမန္တာ. ဩဒါတံ ဝတ္ထံ ရဇ္ဇမာနံ ဝတ္ထဘာဝံ န ဇဟတီတိ? အာမန္တာ. ဩဒါတဘာဝံ န ဇဟတီတိ? န ဟေဝံ ဝတ္တဗ္ဗေ.။ပေ။.

၂၈၆. ရူပံ ရူပဘာဝံ န ဇဟတီတိ? အာမန္တာ. ရူပံ နိစ္စံ ဓုဝံ သဿတံ အဝိပရိဏာမဓမ္မန္တိ? န ဟေဝံ ဝတ္တဗ္ဗေ. နနု ရူပံ ရူပဘာဝံ န ဇဟတီတိ ရူပံ အနိစ္စံ အဓုဝံ အသဿတံ ဝိပရိဏာမဓမ္မန္တိ? အာမန္တာ. ဟဉ္စိ ရူပံ အနိစ္စံ အဓုဝံ အသဿတံ ဝိပရိဏာမဓမ္မံ၊ နော စ ဝတ ရေ ဝတ္တဗ္ဗေ – ‘‘ရူပံ ရူပဘာဝံ န ဇဟတီ’’တိ.

နိဗ္ဗာနံ နိဗ္ဗာနဘာဝံ န ဇဟတီတိ နိဗ္ဗာနံ နိစ္စံ ဓုဝံ သဿတံ အဝိပရိဏာမဓမ္မန္တိ? အာမန္တာ. ရူပံ ရူပဘာဝံ န ဇဟတီတိ [န ဇဟတိ (သီ. က.)] ရူပံ နိစ္စံ ဓုဝံ သဿတံ အဝိပရိဏာမဓမ္မန္တိ? န ဟေဝံ ဝတ္တဗ္ဗေ။ပေ။ ရူပံ ရူပဘာဝံ န ဇဟတိ ရူပံ အနိစ္စံ အဓုဝံ အသဿတံ ဝိပရိဏာမဓမ္မန္တိ? အာမန္တာ. နိဗ္ဗာနံ နိဗ္ဗာနဘာဝံ န ဇဟတိ နိဗ္ဗာနံ အနိစ္စံ အဓုဝံ အသဿတံ ဝိပရိဏာမဓမ္မန္တိ? န ဟေဝံ ဝတ္တဗ္ဗေ။ပေ။.

အတီတံ အတ္ထိ အတီတံ အတီတဘာဝံ န ဇဟတီတိ? အာမန္တာ. အနာဂတံ အတ္ထိ အနာဂတံ အနာဂတဘာဝံ န ဇဟတီတိ? န ဟေဝံ ဝတ္တဗ္ဗေ. အတီတံ အတ္ထိ အတီတံ အတီတဘာဝံ န ဇဟတီတိ? အာမန္တာ. ပစ္စုပ္ပန္နံ အတ္ထိ ပစ္စုပ္ပန္နံ ပစ္စုပ္ပန္နဘာဝံ န ဇဟတီတိ? န ဟေဝံ ဝတ္တဗ္ဗေ။ပေ။.

အနာဂတံ အတ္ထိ အနာဂတံ အနာဂတဘာဝံ ဇဟတီတိ [န ဇဟတီတိ (ဗဟူသု) အဋ္ဌကထာ ဩလောကေတဗ္ဗာ]? အာမန္တာ. အတီတံ အတ္ထိ အတီတံ အတီတဘာဝံ ဇဟတီတိ [န ဇဟတီတိ (ဗဟူသု) အဋ္ဌကထာ ဩလောကေတဗ္ဗာ]? န ဟေဝံ ဝတ္တဗ္ဗေ။ပေ။.

ပစ္စုပ္ပန္နံ အတ္ထိ ပစ္စုပ္ပန္နံ ပစ္စုပ္ပန္နဘာဝံ ဇဟတီတိ [န ဇဟတီတိ (ဗဟူသု) အဋ္ဌကထာ ဩလောကေတဗ္ဗာ]? အာမန္တာ. အတီတံ အတ္ထိ အတီတံ အတီတဘာဝံ ဇဟတီတိ [န ဇဟတီတိ (ဗဟူသု) အဋ္ဌကထာ ဩလောကေတဗ္ဗာ]? န ဟေဝံ ဝတ္တဗ္ဗေ.

အတီတံ အတ္ထိ အတီတံ အတီတဘာဝံ န ဇဟတီတိ? အာမန္တာ. အတီတံ နိစ္စံ ဓုဝံ သဿတံ အဝိပရိဏာမဓမ္မန္တိ? န ဟေဝံ ဝတ္တဗ္ဗေ။ပေ။ နနု အတီတံ အနိစ္စံ အဓုဝံ အသဿတံ ဝိပရိဏာမဓမ္မန္တိ? အာမန္တာ. ဟဉ္စိ အတီတံ အနိစ္စံ အဓုဝံ အသဿတံ ဝိပရိဏာမဓမ္မံ၊ နော စ ဝတ ရေ ဝတ္တဗ္ဗေ – ‘‘အတီတံ အတ္ထိ အတီတံ အတီတဘာဝံ န ဇဟတီ’’တိ.

နိဗ္ဗာနံ အတ္ထိ နိဗ္ဗာနံ နိဗ္ဗာနဘာဝံ န ဇဟတီတိ နိဗ္ဗာနံ နိစ္စံ ဓုဝံ သဿတံ အဝိပရိဏာမဓမ္မန္တိ? အာမန္တာ. အတီတံ အတ္ထိ အတီတံ အတီတဘာဝံ န ဇဟတီတိ အတီတံ နိစ္စံ ဓုဝံ သဿတံ အဝိပရိဏာမဓမ္မန္တိ? န ဟေဝံ ဝတ္တဗ္ဗေ။ပေ။.

အတီတံ အတ္ထိ အတီတံ အတီတဘာဝံ န ဇဟတိ အတီတံ အနိစ္စံ အဓုဝံ အသဿတံ ဝိပရိဏာမဓမ္မန္တိ? အာမန္တာ. နိဗ္ဗာနံ အတ္ထိ နိဗ္ဗာနံ နိဗ္ဗာနဘာဝံ န ဇဟတိ နိဗ္ဗာနံ အနိစ္စံ အဓုဝံ အသဿတံ ဝိပရိဏာမဓမ္မန္တိ? န ဟေဝံ ဝတ္တဗ္ဗေ။ပေ။.

၂၈၇. အတီတံ ရူပံ အတ္ထိ အတီတံ ရူပံ အတီတဘာဝံ န ဇဟတီတိ? အာမန္တာ. အနာဂတံ ရူပံ အတ္ထိ အနာဂတံ ရူပံ အနာဂတဘာဝံ န ဇဟတီတိ? န ဟေဝံ ဝတ္တဗ္ဗေ။ပေ။ အတီတံ ရူပံ အတ္ထိ အတီတံ ရူပံ အတီတဘာဝံ န ဇဟတီတိ? အာမန္တာ. ပစ္စုပ္ပန္နံ ရူပံ အတ္ထိ ပစ္စုပ္ပန္နံ ရူပံ ပစ္စုပ္ပန္နဘာဝံ န ဇဟတီတိ? န ဟေဝံ ဝတ္တဗ္ဗေ။ပေ။.

အနာဂတံ ရူပံ အတ္ထိ အနာဂတံ ရူပံ အနာဂတဘာဝံ ဇဟတီတိ [န ဇဟတီတိ (ဗဟူသု) အနုလောမပဉှောယေဝ]? အာမန္တာ. အတီတံ ရူပံ အတ္ထိ အတီတံ ရူပံ အတီတဘာဝံ ဇဟတီတိ [န ဇဟတီတိ (ဗဟူသု) အနုလောမပဉှောယေဝ]? န ဟေဝံ ဝတ္တဗ္ဗေ။ပေ။.

ပစ္စုပ္ပန္နံ ရူပံ အတ္ထိ ပစ္စုပ္ပန္နံ ရူပံ ပစ္စုပ္ပန္နဘာဝံ ဇဟတီတိ [န ဇဟတီတိ (ဗဟူသု) အနုလောမပဉှောယေဝ]? အာမန္တာ. အတီတံ ရူပံ အတ္ထိ အတီတံ ရူပံ အတီတဘာဝံ ဇဟတီတိ [န ဇဟတီတိ (ဗဟူသု) အနုလောမပဉှောယေဝ]? န ဟေဝံ ဝတ္တဗ္ဗေ။ပေ။.

အတီတံ ရူပံ အတ္ထိ အတီတံ ရူပံ အတီတဘာဝံ န ဇဟတီတိ? အာမန္တာ. အတီတံ ရူပံ နိစ္စံ ဓုဝံ သဿတံ အဝိပရိဏာမဓမ္မန္တိ? န ဟေဝံ ဝတ္တဗ္ဗေ။ပေ။ နနု အတီတံ ရူပံ အနိစ္စံ အဓုဝံ အသဿတံ ဝိပရိဏာမဓမ္မန္တိ? အာမန္တာ. ဟဉ္စိ အတီတံ ရူပံ အနိစ္စံ။ပေ။ ဝိပရိဏာမဓမ္မံ၊ နော စ ဝတ ရေ ဝတ္တဗ္ဗေ – ‘‘အတီတံ ရူပံ အတ္ထိ အတီတံ ရူပံ အတီတဘာဝံ န ဇဟတီ’’တိ.

နိဗ္ဗာနံ အတ္ထိ နိဗ္ဗာနံ နိဗ္ဗာနဘာဝံ န ဇဟတိ [န ဇဟတီတိ (?) ပုရိမပဉှေဟိ သံသန္ဒေတဗ္ဗံ] နိဗ္ဗာနံ နိစ္စံ ဓုဝံ သဿတံ အဝိပရိဏာမဓမ္မန္တိ? အာမန္တာ. အတီတံ ရူပံ အတ္ထိ အတီတံ ရူပံ အတီတဘာဝံ န ဇဟတိ [န ဇဟတီတိ (?) ပုရိမဉှေဟိ သံသန္ဒေတဗ္ဗံ] အတီတံ ရူပံ နိစ္စံ ဓုဝံ သဿတံ အဝိပရိဏာမဓမ္မန္တိ? န ဟေဝံ ဝတ္တဗ္ဗေ။ပေ။.

အတီတံ ရူပံ အတ္ထိ အတီတံ ရူပံ အတီတဘာဝံ န ဇဟတိ အတီတံ ရူပံ အနိစ္စံ အဓုဝံ အသဿတံ ဝိပရိဏာမဓမ္မန္တိ? အာမန္တာ. နိဗ္ဗာနံ အတ္ထိ နိဗ္ဗာနံ နိဗ္ဗာနဘာဝံ န ဇဟတိ နိဗ္ဗာနံ အနိစ္စံ အဓုဝံ အသဿတံ ဝိပရိဏာမဓမ္မန္တိ? န ဟေဝံ ဝတ္တဗ္ဗေ။ပေ။.

အတီတာ ဝေဒနာ အတ္ထိ။ အတီတာ သညာ အတ္ထိ။ အတီတာ သင်္ခါရာ အတ္ထိ။ အတီတံ ဝိညာဏံ အတ္ထိ အတီတံ ဝိညာဏံ အတီတဘာဝံ န ဇဟတီတိ? အာမန္တာ. အနာဂတံ ဝိညာဏံ အတ္ထိ အနာဂတံ ဝိညာဏံ အနာဂတဘာဝံ န ဇဟတီတိ? န ဟေဝံ ဝတ္တဗ္ဗေ။ပေ။ အတီတံ ဝိညာဏံ အတ္ထိ အတီတံ ဝိညာဏံ အတီတဘာဝံ န ဇဟတီတိ? အာမန္တာ. ပစ္စုပ္ပန္နံ ဝိညာဏံ အတ္ထိ ပစ္စုပ္ပန္နံ ဝိညာဏံ ပစ္စုပ္ပန္နဘာဝံ န ဇဟတီတိ? န ဟေဝံ ဝတ္တဗ္ဗေ။ပေ။.

အနာဂတံ ဝိညာဏံ အတ္ထိ အနာဂတံ ဝိညာဏံ အနာဂတဘာဝံ ဇဟတီတိ? အာမန္တာ. အတီတံ ဝိညာဏံ အတ္ထိ အတီတံ ဝိညာဏံ အတီတဘာဝံ ဇဟတီတိ? န ဟေဝံ ဝတ္တဗ္ဗေ။ပေ။.

ပစ္စုပ္ပန္နံ ဝိညာဏံ အတ္ထိ ပစ္စုပ္ပန္နံ ဝိညာဏံ ပစ္စုပ္ပန္နဘာဝံ ဇဟတီတိ [န ဇဟတီတိ (ဗဟူသု) အနုလောမပဉှောယေဝ]? အာမန္တာ. အတီတံ ဝိညာဏံ အတ္ထိ အတီတံ ဝိညာဏံ အတီတဘာဝံ ဇဟတီတိ [န ဇဟတီတိ (ဗဟူသု) အနုလောမပဉှောယေဝ]? န ဟေဝံ ဝတ္တဗ္ဗေ။ပေ။.

အတီတံ ဝိညာဏံ အတ္ထိ အတီတံ ဝိညာဏံ အတီတဘာဝံ န ဇဟတီတိ? အာမန္တာ. အတီတံ ဝိညာဏံ နိစ္စံ ဓုဝံ သဿတံ အဝိပရိဏာမဓမ္မန္တိ? န ဟေဝံ ဝတ္တဗ္ဗေ။ပေ။ နနု အတီတံ ဝိညာဏံ အနိစ္စံ အဓုဝံ အသဿတံ ဝိပရိဏာမဓမ္မန္တိ? အာမန္တာ. ဟဉ္စိ အတီတံ ဝိညာဏံ အနိစ္စံ အဓုဝံ အသဿတံ ဝိပရိဏာမဓမ္မံ၊ နော စ ဝတ ရေ ဝတ္တဗ္ဗေ – ‘‘အတီတံ ဝိညာဏံ အတ္ထိ အတီတံ ဝိညာဏံ အတီတဘာဝံ န ဇဟတီ’’တိ.

နိဗ္ဗာနံ အတ္ထိ နိဗ္ဗာနံ နိဗ္ဗာနဘာဝံ န ဇဟတိ [န ဇဟတီတိ (?) ပုရိမပဉှေဟိ သံသန္ဒေတဗ္ဗံ] နိဗ္ဗာနံ နိစ္စံ ဓုဝံ သဿတံ အဝိပရိဏာမဓမ္မန္တိ? အာမန္တာ. အတီတံ ဝိညာဏံ အတ္ထိ အတီတံ ဝိညာဏံ အတီတဘာဝံ န ဇဟတိ [န ဇဟတီတိ (?) ပုရိမပဉှေဟိ သံသန္ဒေတဗ္ဗံ] အတီတံ ဝိညာဏံ နိစ္စံ ဓုဝံ သဿတံ အဝိပရိဏာမဓမ္မန္တိ? န ဟေဝံ ဝတ္တဗ္ဗေ။ပေ။.

အတီတံ ဝိညာဏံ အတ္ထိ အတီတံ ဝိညာဏံ အတီတဘာဝံ န ဇဟတိ အတီတံ ဝိညာဏံ အနိစ္စံ အဓုဝံ အသဿတံ ဝိပရိဏာမဓမ္မန္တိ? အာမန္တာ. နိဗ္ဗာနံ အတ္ထိ နိဗ္ဗာနံ နိဗ္ဗာနဘာဝံ န ဇဟတိ နိဗ္ဗာနံ အနိစ္စံ အဓုဝံ အသဿတံ ဝိပရိဏာမဓမ္မန္တိ? န ဟေဝံ ဝတ္တဗ္ဗေ။ပေ။.

ဝစနသောဓနာ

၂၈၈. အတီတံ နွတ္ထီတိ? အာမန္တာ. ဟဉ္စိ အတီတံ နွတ္ထိ၊ အတီတံ အတ္ထီတိ မိစ္ဆာ. ဟဉ္စိ ဝါ ပန အတ္ထိ နွာတီတံ၊ အတ္ထိ အတီတန္တိ မိစ္ဆာ. အနာဂတံ နွတ္ထီတိ? အာမန္တာ. ဟဉ္စိ အနာဂတံ နွတ္ထိ၊ အနာဂတံ အတ္ထီတိ မိစ္ဆာ. ဟဉ္စိ ဝါ ပန အတ္ထိ နွာနာဂတံ၊ အတ္ထိ အနာဂတန္တိ မိစ္ဆာ.

အနာဂတံ ဟုတွာ ပစ္စုပ္ပန္နံ ဟောတီတိ? အာမန္တာ. တညေဝ အနာဂတံ တံ ပစ္စုပ္ပန္နန္တိ? န ဟေဝံ ဝတ္တဗ္ဗေ။ပေ။ တညေဝ အနာဂတံ တံ ပစ္စုပ္ပန္နန္တိ? အာမန္တာ. ဟုတွာ ဟောတိ ဟုတွာ ဟောတီတိ? န ဟေဝံ ဝတ္တဗ္ဗေ။ပေ။ ဟုတွာ ဟောတိ ဟုတွာ ဟောတီတိ? အာမန္တာ. န ဟုတွာ န ဟောတိ န ဟုတွာ န ဟောတီတိ? န ဟေဝံ ဝတ္တဗ္ဗေ။ပေ။.

ပစ္စုပ္ပန္နံ ဟုတွာ အတီတံ ဟောတီတိ? အာမန္တာ. တညေဝ ပစ္စုပ္ပန္နံ တံ အတီတန္တိ? န ဟေဝံ ဝတ္တဗ္ဗေ။ပေ။ တညေဝ ပစ္စုပ္ပန္နံ တံ အတီတန္တိ? အာမန္တာ. ဟုတွာ ဟောတိ ဟုတွာ ဟောတီတိ? န ဟေဝံ ဝတ္တဗ္ဗေ။ပေ။ ဟုတွာ ဟောတိ ဟုတွာ ဟောတီတိ? အာမန္တာ. န ဟုတွာ န ဟောတိ န ဟုတွာ န ဟောတီတိ? န ဟေဝံ ဝတ္တဗ္ဗေ။ပေ။.

အနာဂတံ ဟုတွာ ပစ္စုပ္ပန္နံ ဟောတိ၊ ပစ္စုပ္ပန္နံ ဟုတွာ အတီတံ ဟောတီတိ? အာမန္တာ. တညေဝ အနာဂတံ တံ ပစ္စုပ္ပန္နံ တံ အတီတန္တိ? န ဟေဝံ ဝတ္တဗ္ဗေ။ပေ။ တညေဝ အနာဂတံ တံ ပစ္စုပ္ပန္နံ တံ အတီတန္တိ? အာမန္တာ. ဟုတွာ ဟောတိ ဟုတွာ ဟောတီတိ? န ဟေဝံ ဝတ္တဗ္ဗေ။ပေ။ ဟုတွာ ဟောတိ ဟုတွာ ဟောတီတိ? အာမန္တာ. န ဟုတွာ န ဟောတိ န ဟုတွာ န ဟောတီတိ? န ဟေဝံ ဝတ္တဗ္ဗေ.

အတီတစက္ခုရူပါဒိကထာ

၂၈၉. အတီတံ စက္ခုံ အတ္ထိ ရူပါ အတ္ထိ စက္ခုဝိညာဏံ အတ္ထိ အာလောကော အတ္ထိ မနသိကာရော အတ္ထီတိ? အာမန္တာ. အတီတေန စက္ခုနာ အတီတံ ရူပံ ပဿတီတိ? န ဟေဝံ ဝတ္တဗ္ဗေ။ပေ။ အတီတံ သောတံ အတ္ထိ သဒ္ဒါ အတ္ထိ သောတဝိညာဏံ အတ္ထိ အာကာသော အတ္ထိ မနသိကာရော အတ္ထီတိ? အာမန္တာ. အတီတေန သောတေန အတီတံ သဒ္ဒံ သုဏာတီတိ? န ဟေဝံ ဝတ္တဗ္ဗေ။ပေ။ အတီတံ ဃာနံ အတ္ထိ ဂန္ဓာ အတ္ထိ ဃာနဝိညာဏံ အတ္ထိ ဝါယော အတ္ထိ မနသိကာရော အတ္ထီတိ? အာမန္တာ. အတီတေန ဃာနေန အတီတံ ဂန္ဓံ ဃာယတီတိ? န ဟေဝံ ဝတ္တဗ္ဗေ။ပေ။ အတီတာ ဇိဝှါ အတ္ထိ ရသာ အတ္ထိ ဇိဝှါဝိညာဏံ အတ္ထိ အာပေါ အတ္ထိ မနသိကာရော အတ္ထီတိ? အာမန္တာ. အတီတာယ ဇိဝှါယ အတီတံ ရသံ သာယတီတိ? န ဟေဝံ ဝတ္တဗ္ဗေ။ပေ။ အတီတော ကာယော အတ္ထိ ဖောဋ္ဌဗ္ဗာ အတ္ထိ ကာယဝိညာဏံ အတ္ထိ ပထဝီ အတ္ထိ မနသိကာရော အတ္ထီတိ? အာမန္တာ. အတီတေန ကာယေန အတီတံ ဖောဋ္ဌဗ္ဗံ ဖုသတီတိ? န ဟေဝံ ဝတ္တဗ္ဗေ။ပေ။ အတီတော မနော အတ္ထိ ဓမ္မာ အတ္ထိ မနောဝိညာဏံ အတ္ထိ ဝတ္ထုံ အတ္ထိ မနသိကာရော အတ္ထီတိ? အာမန္တာ. အတီတေန မနေန အတီတံ ဓမ္မံ ဝိဇာနာတီတိ? န ဟေဝံ ဝတ္တဗ္ဗေ။ပေ။.

အနာဂတံ စက္ခုံ အတ္ထိ ရူပါ အတ္ထိ စက္ခုဝိညာဏံ အတ္ထိ အာလောကော အတ္ထိ မနသိကာရော အတ္ထီတိ? အာမန္တာ. အနာဂတေန စက္ခုနာ အနာဂတံ ရူပံ ပဿတီတိ? န ဟေဝံ ဝတ္တဗ္ဗေ။ပေ။ အနာဂတံ သောတံ အတ္ထိ။ ဃာနံ အတ္ထိ။ ဇိဝှါ အတ္ထိ။ ကာယော အတ္ထိ ။ မနော အတ္ထိ ဓမ္မာ အတ္ထိ မနောဝိညာဏံ အတ္ထိ ဝတ္ထုံ အတ္ထိ မနသိကာရော အတ္ထီတိ? အာမန္တာ. အနာဂတေန မနေန အနာဂတံ ဓမ္မံ ဝိဇာနာတီတိ? န ဟေဝံ ဝတ္တဗ္ဗေ။ပေ။.

ပစ္စုပ္ပန္နံ စက္ခုံ အတ္ထိ ရူပါ အတ္ထိ စက္ခုဝိညာဏံ အတ္ထိ အာလောကော အတ္ထိ မနသိကာရော အတ္ထိ၊ ပစ္စုပ္ပန္နေန စက္ခုနာ ပစ္စုပ္ပန္နံ ရူပံ ပဿတီတိ? အာမန္တာ. အတီတံ စက္ခုံ အတ္ထိ ရူပါ အတ္ထိ စက္ခုဝိညာဏံ အတ္ထိ အာလောကော အတ္ထိ မနသိကာရော အတ္ထိ၊ အတီတေန စက္ခုနာ အတီတံ ရူပံ ပဿတီတိ? န ဟေဝံ ဝတ္တဗ္ဗေ။ပေ။. ပစ္စုပ္ပန္နံ သောတံ အတ္ထိ။ ဃာနံ အတ္ထိ။ ဇိဝှါ အတ္ထိ။ ကာယော အတ္ထိ။ မနော အတ္ထိ ဓမ္မာ အတ္ထိ မနောဝိညာဏံ အတ္ထိ ဝတ္ထုံ အတ္ထိ မနသိကာရော အတ္ထိ၊ ပစ္စုပ္ပန္နေန မနေန ပစ္စုပ္ပန္နံ ဓမ္မံ ဝိဇာနာတီတိ? အာမန္တာ. အတီတော မနော အတ္ထိ ဓမ္မာ အတ္ထိ မနောဝိညာဏံ အတ္ထိ ဝတ္ထုံ အတ္ထိ မနသိကာရော အတ္ထိ၊ အတီတေန မနေန အတီတံ ဓမ္မံ ဝိဇာနာတီတိ? န ဟေဝံ ဝတ္တဗ္ဗေ။ပေ။.

ပစ္စုပ္ပန္နံ စက္ခုံ အတ္ထိ ရူပါ အတ္ထိ စက္ခုဝိညာဏံ အတ္ထိ အာလောကော အတ္ထိ မနသိကာရော အတ္ထိ၊ ပစ္စုပ္ပန္နေန စက္ခုနာ ပစ္စုပ္ပန္နံ ရူပံ ပဿတီတိ? အာမန္တာ. အနာဂတံ စက္ခုံ အတ္ထိ ရူပါ အတ္ထိ စက္ခုဝိညာဏံ အတ္ထိ အာလောကော အတ္ထိ မနသိကာရော အတ္ထိ၊ အနာဂတေန စက္ခုနာ အနာဂတံ ရူပံ ပဿတီတိ? န ဟေဝံ ဝတ္တဗ္ဗေ။ပေ။ ပစ္စုပ္ပန္နံ သောတံ အတ္ထိ။ ဃာနံ အတ္ထိ။ ဇိဝှါ အတ္ထိ။ ကာယော အတ္ထိ။ မနော အတ္ထိ ဓမ္မာ အတ္ထိ မနောဝိညာဏံ အတ္ထိ ဝတ္ထုံ အတ္ထိ မနသိကာရော အတ္ထိ၊ ပစ္စုပ္ပန္နေန မနေန ပစ္စုပ္ပန္နံ ဓမ္မံ ဝိဇာနာတီတိ? အာမန္တာ. အနာဂတော မနော အတ္ထိ ဓမ္မာ အတ္ထိ မနောဝိညာဏံ အတ္ထိ ဝတ္ထုံ အတ္ထိ မနသိကာရော အတ္ထိ၊ အနာဂတေန မနေန အနာဂတံ ဓမ္မံ ဝိဇာနာတီတိ? န ဟေဝံ ဝတ္တဗ္ဗေ။ပေ။.

အတီတံ စက္ခုံ အတ္ထိ ရူပါ အတ္ထိ စက္ခုဝိညာဏံ အတ္ထိ အာလောကော အတ္ထိ မနသိကာရော အတ္ထိ၊ န စ အတီတေန စက္ခုနာ အတီတံ ရူပံ ပဿတီတိ? အာမန္တာ. ပစ္စုပ္ပန္နံ စက္ခုံ အတ္ထိ ရူပါ အတ္ထိ စက္ခုဝိညာဏံ အတ္ထိ အာလောကော အတ္ထိ မနသိကာရော အတ္ထိ၊ န စ ပစ္စုပ္ပန္နေန စက္ခုနာ ပစ္စုပ္ပန္နံ ရူပံ ပဿတီတိ? န ဟေဝံ ဝတ္တဗ္ဗေ။ပေ။ အတီတံ သောတံ အတ္ထိ။ ဃာနံ အတ္ထိ။ ဇိဝှါ အတ္ထိ။ ကာယော အတ္ထိ။ မနော အတ္ထိ ဓမ္မာ အတ္ထိ မနောဝိညာဏံ အတ္ထိ ဝတ္ထုံ အတ္ထိ မနသိကာရော အတ္ထိ၊ န စ အတီတေန မနေန အတီတံ ဓမ္မံ ဝိဇာနာတီတိ? အာမန္တာ. ပစ္စုပ္ပန္နော မနော အတ္ထိ ဓမ္မာ အတ္ထိ မနောဝိညာဏံ အတ္ထိ ဝတ္ထုံ အတ္ထိ မနသိကာရော အတ္ထိ၊ န စ ပစ္စုပ္ပန္နေန မနေန ပစ္စုပ္ပန္နံ ဓမ္မံ ဝိဇာနာတီတိ? န ဟေဝံ ဝတ္တဗ္ဗေ။ပေ။.

အနာဂတံ စက္ခုံ အတ္ထိ ရူပါ အတ္ထိ စက္ခုဝိညာဏံ အတ္ထိ အာလောကော အတ္ထိ မနသိကာရော အတ္ထိ၊ န စ အနာဂတေန စက္ခုနာ အနာဂတံ ရူပံ ပဿတီတိ? အာမန္တာ. ပစ္စုပ္ပန္နံ စက္ခုံ အတ္ထိ ရူပါ အတ္ထိ စက္ခုဝိညာဏံ အတ္ထိ အာလောကော အတ္ထိ မနသိကာရော အတ္ထိ၊ န စ ပစ္စုပ္ပန္နေန စက္ခုနာ ပစ္စုပ္ပန္နံ ရူပံ ပဿတီတိ? န ဟေဝံ ဝတ္တဗ္ဗေ။ပေ။ အနာဂတံ သောတံ အတ္ထိ။ ဃာနံ အတ္ထိ။ ဇိဝှါ အတ္ထိ။ ကာယော အတ္ထိ။ မနော အတ္ထိ ဓမ္မာ အတ္ထိ မနောဝိညာဏံ အတ္ထိ ဝတ္ထုံ အတ္ထိ မနသိကာရော အတ္ထိ၊ န စ အနာဂတေန မနေန အနာဂတံ ဓမ္မံ ဝိဇာနာတီတိ? အာမန္တာ. ပစ္စုပ္ပန္နော မနော အတ္ထိ ဓမ္မာ အတ္ထိ မနောဝိညာဏံ အတ္ထိ ဝတ္ထုံ အတ္ထိ မနသိကာရော အတ္ထိ၊ န စ ပစ္စုပ္ပန္နေန မနေန ပစ္စုပ္ပန္နံ ဓမ္မံ ဝိဇာနာတီတိ? န ဟေဝံ ဝတ္တဗ္ဗေ။ပေ။.

အတီတဉာဏာဒိကထာ

၂၉၀. အတီတံ ဉာဏံ အတ္ထီတိ? အာမန္တာ. တေန ဉာဏေန ဉာဏကရဏီယံ ကရောတီတိ? န ဟေဝံ ဝတ္တဗ္ဗေ။ပေ။ တေန ဉာဏေန ဉာဏကရဏီယံ ကရောတီတိ? အာမန္တာ. တေန ဉာဏေန ဒုက္ခံ ပရိဇာနာတိ၊ သမုဒယံ ပဇဟတိ၊ နိရောဓံ သစ္ဆိကရောတိ၊ မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ။.

အနာဂတံ ဉာဏံ အတ္ထီတိ? အာမန္တာ. တေန ဉာဏေန ဉာဏကရဏီယံ ကရောတီတိ? န ဟေဝံ ဝတ္တဗ္ဗေ။ပေ။ တေန ဉာဏေန ဉာဏကရဏီယံ ကရောတီတိ? အာမန္တာ. တေန ဉာဏေန ဒုက္ခံ ပရိဇာနာတိ၊ သမုဒယံ ပဇဟတိ၊ နိရောဓံ သစ္ဆိကရောတိ၊ မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ။.

ပစ္စုပ္ပန္နံ ဉာဏံ အတ္ထိ၊ တေန ဉာဏေန ဉာဏကရဏီယံ ကရောတီတိ? အာမန္တာ. အတီတံ ဉာဏံ အတ္ထိ၊ တေန ဉာဏေန ဉာဏကရဏီယံ ကရောတီတိ? န ဟေဝံ ဝတ္တဗ္ဗေ။ပေ။ ပစ္စုပ္ပန္နံ ဉာဏံ အတ္ထိ၊ တေန ဉာဏေန ဒုက္ခံ ပရိဇာနာတိ၊ သမုဒယံ ပဇဟတိ၊ နိရောဓံ သစ္ဆိကရောတိ၊ မဂ္ဂံ ဘာဝေတီတိ? အာမန္တာ. အတီတံ ဉာဏံ အတ္ထိ၊ တေန ဉာဏေန ဒုက္ခံ ပရိဇာနာတိ၊ သမုဒယံ ပဇဟတိ၊ နိရောဓံ သစ္ဆိကရောတိ၊ မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ။ ပစ္စုပ္ပန္နံ ဉာဏံ အတ္ထိ၊ တေန ဉာဏေန ဉာဏကရဏီယံ ကရောတီတိ? အာမန္တာ. အနာဂတံ ဉာဏံ အတ္ထိ၊ တေန ဉာဏေန ဉာဏကရဏီယံ ကရောတီတိ? န ဟေဝံ ဝတ္တဗ္ဗေ။ပေ။ ပစ္စုပ္ပန္နံ ဉာဏံ အတ္ထိ၊ တေန ဉာဏေန ဒုက္ခံ ပရိဇာနာတိ၊ သမုဒယံ ပဇဟတိ၊ နိရောဓံ သစ္ဆိကရောတိ၊ မဂ္ဂံ ဘာဝေတီတိ? အာမန္တာ. အနာဂတံ ဉာဏံ အတ္ထိ၊ တေန ဉာဏေန ဒုက္ခံ ပရိဇာနာတိ၊ သမုဒယံ ပဇဟတိ၊ နိရောဓံ သစ္ဆိကရောတိ၊ မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ။.

အတီတံ ဉာဏံ အတ္ထိ၊ န စ တေန ဉာဏေန ဉာဏကရဏီယံ ကရောတီတိ? အာမန္တာ. ပစ္စုပ္ပန္နံ ဉာဏံ အတ္ထိ၊ န စ တေန ဉာဏေန ဉာဏကရဏီယံ ကရောတီတိ? န ဟေဝံ ဝတ္တဗ္ဗေ။ပေ။ အတီတံ ဉာဏံ အတ္ထိ၊ န စ တေန ဉာဏေန ဒုက္ခံ ပရိဇာနာတိ၊ သမုဒယံ ပဇဟတိ၊ နိရောဓံ သစ္ဆိကရောတိ၊ မဂ္ဂံ ဘာဝေတီတိ? အာမန္တာ. ပစ္စုပ္ပန္နံ ဉာဏံ အတ္ထိ၊ န စ တေန ဉာဏေန ဒုက္ခံ ပရိဇာနာတိ၊ သမုဒယံ ပဇဟတိ၊ နိရောဓံ သစ္ဆိကရောတိ၊ မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ။.

အနာဂတံ ဉာဏံ အတ္ထိ၊ န စ တေန ဉာဏေန ဉာဏကရဏီယံ ကရောတီတိ? အာမန္တာ. ပစ္စုပ္ပန္နံ ဉာဏံ အတ္ထိ၊ န စ တေန ဉာဏေန ဉာဏကရဏီယံ ကရောတီတိ? န ဟေဝံ ဝတ္တဗ္ဗေ။ပေ။. အနာဂတံ ဉာဏံ အတ္ထိ၊ န စ တေန ဉာဏေန ဒုက္ခံ ပရိဇာနာတိ၊ သမုဒယံ ပဇဟတိ၊ နိရောဓံ သစ္ဆိကရောတိ၊ မဂ္ဂံ ဘာဝေတီတိ? အာမန္တာ. ပစ္စုပ္ပန္နံ ဉာဏံ အတ္ထိ၊ န စ တေန ဉာဏေန ဒုက္ခံ ပရိဇာနာတိ၊ သမုဒယံ ပဇဟတိ၊ နိရောဓံ သစ္ဆိကရောတိ၊ မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ။.

အရဟန္တာဒိကထာ

၂၉၁. အရဟတော အတီတော ရာဂေါ အတ္ထီတိ? အာမန္တာ. အရဟာ တေန ရာဂေန သရာဂေါတိ? န ဟေဝံ ဝတ္တဗ္ဗေ။ပေ။ အရဟတော အတီတော ဒေါသော အတ္ထီတိ? အာမန္တာ. အရဟာ တေန ဒေါသေန သဒေါသောတိ? န ဟေဝံ ဝတ္တဗ္ဗေ။ပေ။ အရဟတော အတီတော မောဟော အတ္ထီတိ? အာမန္တာ. အရဟာ တေန မောဟေန သမောဟောတိ? န ဟေဝံ ဝတ္တဗ္ဗေ။ပေ။ အရဟတော အတီတော မာနော အတ္ထီတိ? အာမန္တာ. အရဟာ တေန မာနေန သမာနောတိ? န ဟေဝံ ဝတ္တဗ္ဗေ။ပေ။ အရဟတော အတီတာ ဒိဋ္ဌိ အတ္ထီတိ? အာမန္တာ. အရဟာ တာယ ဒိဋ္ဌိယာ သဒိဋ္ဌိကောတိ? န ဟေဝံ ဝတ္တဗ္ဗေ။ပေ။ အရဟတော အတီတာ ဝိစိကိစ္ဆာ အတ္ထီတိ? အာမန္တာ. အရဟာ တာယ ဝိစိကိစ္ဆာယ သဝိစိကိစ္ဆောတိ? န ဟေဝံ ဝတ္တဗ္ဗေ။ပေ။ အရဟတော အတီတံ ထိနံ အတ္ထီတိ? အာမန္တာ. အရဟာ တေန ထိနေန သထိနောတိ? န ဟေဝံ ဝတ္တဗ္ဗေ။ပေ။ အရဟတော အတီတံ ဥဒ္ဓစ္စံ အတ္ထီတိ? အာမန္တာ. အရဟာ တေန ဥဒ္ဓစ္စေန သဥဒ္ဓစ္စောတိ? န ဟေဝံ ဝတ္တဗ္ဗေ။ပေ။ အရဟတော အတီတံ အဟိရိကံ အတ္ထီတိ? အာမန္တာ. အရဟာ တေန အဟိရိကေန သအဟိရိကောတိ? န ဟေဝံ ဝတ္တဗ္ဗေ။ပေ။ အရဟတော အတီတံ အနောတ္တပ္ပံ အတ္ထီတိ? အာမန္တာ. အရဟာ တေန အနောတ္တပ္ပေန သအနောတ္တပ္ပီတိ? န ဟေဝံ ဝတ္တဗ္ဗေ။ပေ။.

အနာဂါမိဿ အတီတာ သက္ကာယဒိဋ္ဌိ အတ္ထီတိ? အာမန္တာ. အနာဂါမီ တာယ ဒိဋ္ဌိယာ သဒိဋ္ဌိကောတိ? န ဟေဝံ ဝတ္တဗ္ဗေ။ပေ။ အနာဂါမိဿ အတီတာ ဝိစိကိစ္ဆာ အတ္ထိ။ အတီတော သီလဗ္ဗတပရာမာသော အတ္ထိ။ အတီတော အဏုသဟဂတော ကာမရာဂေါ အတ္ထိ။ အတီတော အဏုသဟဂတော ဗျာပါဒေါ အတ္ထီတိ? အာမန္တာ. အနာဂါမီ တေန ဗျာပါဒေန ဗျာပန္နစိတ္တောတိ? န ဟေဝံ ဝတ္တဗ္ဗေ။ပေ။.

သကဒါဂါမိဿ အတီတာ သက္ကာယဒိဋ္ဌိ အတ္ထီတိ? အာမန္တာ. သကဒါဂါမီ တာယ ဒိဋ္ဌိယာ သဒိဋ္ဌိကောတိ? န ဟေဝံ ဝတ္တဗ္ဗေ။ပေ။ သကဒါဂါမိဿ အတီတာ ဝိစိကိစ္ဆာ အတ္ထိ။ အတီတော သီလဗ္ဗတပရာမာသော အတ္ထိ။ အတီတော ဩဠာရိကော ကာမရာဂေါ အတ္ထိ။ အတီတော ဩဠာရိကော ဗျာပါဒေါ အတ္ထီတိ? အာမန္တာ. သကဒါဂါမီ တေန ဗျာပါဒေန ဗျာပန္နစိတ္တောတိ? န ဟေဝံ ဝတ္တဗ္ဗေ။ပေ။.

သောတာပန္နဿ အတီတာ သက္ကာယဒိဋ္ဌိ အတ္ထီတိ? အာမန္တာ. သောတာပန္နော တာယ ဒိဋ္ဌိယာ သဒိဋ္ဌိကောတိ? န ဟေဝံ ဝတ္တဗ္ဗေ။ပေ။ သောတာပန္နဿ အတီတာ ဝိစိကိစ္ဆာ အတ္ထိ။ အတီတော သီလဗ္ဗတပရာမာသော အတ္ထိ။ အတီတော အပါယဂမနီယော ရာဂေါ အတ္ထိ။ အတီတော အပါယဂမနီယော ဒေါသော အတ္ထိ။ အတီတော အပါယဂမနီယော မောဟော အတ္ထီတိ? အာမန္တာ. သောတာပန္နော တေန မောဟေန သမောဟောတိ? န ဟေဝံ ဝတ္တဗ္ဗေ။ပေ။.

၂၉၂. ပုထုဇ္ဇနဿ အတီတော ရာဂေါ အတ္ထိ၊ ပုထုဇ္ဇနော တေန ရာဂေန သရာဂေါတိ? အာမန္တာ. အရဟတော အတီတော ရာဂေါ အတ္ထိ၊ အရဟာ တေန ရာဂေန သရာဂေါတိ? န ဟေဝံ ဝတ္တဗ္ဗေ။ပေ။ ပုထုဇ္ဇနဿ အတီတော ဒေါသော အတ္ထိ။ပေ။ အတီတံ အနောတ္တပ္ပံ အတ္ထိ ပုထုဇ္ဇနော တေန အနောတ္တပ္ပေန အနောတ္တပ္ပီတိ? အာမန္တာ. အရဟတော အတီတံ အနောတ္တပ္ပံ အတ္ထိ၊ အရဟာ တေန အနောတ္တပ္ပေန အနောတ္တပ္ပီတိ? န ဟေဝံ ဝတ္တဗ္ဗေ။ပေ။.

ပုထုဇ္ဇနဿ အတီတာ သက္ကာယဒိဋ္ဌိ အတ္ထိ၊ ပုထုဇ္ဇနော တာယ ဒိဋ္ဌိယာ သဒိဋ္ဌိကောတိ? အာမန္တာ. အနာဂါမိဿ အတီတာ သက္ကာယဒိဋ္ဌိ အတ္ထိ၊ အနာဂါမီ တာယ ဒိဋ္ဌိယာ သဒိဋ္ဌိကောတိ? န ဟေဝံ ဝတ္တဗ္ဗေ။ပေ။ ပုထုဇ္ဇနဿ အတီတာ ဝိစိကိစ္ဆာ အတ္ထိ။ပေ။ အတီတော အဏုသဟဂတော ဗျာပါဒေါ အတ္ထိ၊ ပုထုဇ္ဇနော တေန ဗျာပါဒေန ဗျာပန္နစိတ္တောတိ? အာမန္တာ. အနာဂါမိဿ အတီတော အဏုသဟဂတော ဗျာပါဒေါ အတ္ထိ၊ အနာဂါမီ တေန ဗျာပါဒေန ဗျာပန္နစိတ္တောတိ? န ဟေဝံ ဝတ္တဗ္ဗေ။ပေ။.

ပုထုဇ္ဇနဿ အတီတာ သက္ကာယဒိဋ္ဌိ အတ္ထိ၊ ပုထုဇ္ဇနော တာယ ဒိဋ္ဌိယာ သဒိဋ္ဌိကောတိ? အာမန္တာ. သကဒါဂါမိဿ အတီတာ သက္ကာယဒိဋ္ဌိ အတ္ထိ၊ သကဒါဂါမီ တာယ ဒိဋ္ဌိယာ သဒိဋ္ဌိကောတိ? န ဟေဝံ ဝတ္တဗ္ဗေ။ပေ။ ပုထုဇ္ဇနဿ အတီတာ ဝိစိကိစ္ဆာ အတ္ထိ။ အတီတော ဩဠာရိကော ဗျာပါဒေါ အတ္ထိ၊ ပုထုဇ္ဇနော တေန ဗျာပါဒေန ဗျာပန္နစိတ္တောတိ? အာမန္တာ. သကဒါဂါမိဿ အတီတော ဩဠာရိကော ဗျာပါဒေါ အတ္ထိ၊ သကဒါဂါမီ တေန ဗျာပါဒေန ဗျာပန္နစိတ္တောတိ? န ဟေဝံ ဝတ္တဗ္ဗေ။ပေ။.

ပုထုဇ္ဇနဿ အတီတာ သက္ကာယဒိဋ္ဌိ အတ္ထိ၊ ပုထုဇ္ဇနော တာယ ဒိဋ္ဌိယာ သဒိဋ္ဌိကောတိ? အာမန္တာ. သောတာပန္နဿ အတီတာ သက္ကာယဒိဋ္ဌိ အတ္ထိ၊ သောတာပန္နော တာယ ဒိဋ္ဌိယာ သဒိဋ္ဌိကောတိ? န ဟေဝံ ဝတ္တဗ္ဗေ။ပေ။ ပုထုဇ္ဇနဿ အတီတာ ဝိစိကိစ္ဆာ အတ္ထိ။ပေ။ အတီတော အပါယဂမနီယော မောဟော အတ္ထိ၊ ပုထုဇ္ဇနော တေန မောဟေန သမောဟောတိ? အာမန္တာ. သောတာပန္နဿ အတီတော အပါယဂမနီယော မောဟော အတ္ထိ၊ သောတာပန္နော တေန မောဟေန သမောဟောတိ? န ဟေဝံ ဝတ္တဗ္ဗေ။ပေ။.

အရဟတော အတီတော ရာဂေါ အတ္ထိ၊ န စ အရဟာ တေန ရာဂေန သရာဂေါတိ? အာမန္တာ. ပုထုဇ္ဇနဿ အတီတော ရာဂေါ အတ္ထိ၊ န စ ပုထုဇ္ဇနော တေန ရာဂေန သရာဂေါတိ? န ဟေဝံ ဝတ္တဗ္ဗေ။ပေ။ အရဟတော အတီတော ဒေါသော အတ္ထိ။ပေ။ အတီတံ အနောတ္တပ္ပံ အတ္ထိ၊ န စ အရဟာ တေန အနောတ္တပ္ပေန အနောတ္တပ္ပီတိ? အာမန္တာ. ပုထုဇ္ဇနဿ အတီတံ အနောတ္တပ္ပံ အတ္ထိ၊ န စ ပုထုဇ္ဇနော တေန အနောတ္တပ္ပေန အနောတ္တပ္ပီတိ? န ဟေဝံ ဝတ္တဗ္ဗေ။ပေ။.

အနာဂါမိဿ အတီတာ သက္ကာယဒိဋ္ဌိ အတ္ထိ၊ န စ အနာဂါမီ တာယ ဒိဋ္ဌိယာ သဒိဋ္ဌိကောတိ? အာမန္တာ. ပုထုဇ္ဇနဿ အတီတာ သက္ကာယဒိဋ္ဌိ အတ္ထိ၊ န စ ပုထုဇ္ဇနော တာယ ဒိဋ္ဌိယာ သဒိဋ္ဌိကောတိ? န ဟေဝံ ဝတ္တဗ္ဗေ။ပေ။ အနာဂါမိဿ အတီတာ ဝိစိကိစ္ဆာ အတ္ထိ။ပေ။ အတီတော အဏုသဟဂတော ဗျာပါဒေါ အတ္ထိ၊ န စ အနာဂါမီ တေန ဗျာပါဒေန ဗျာပန္နစိတ္တောတိ? အာမန္တာ. ပုထုဇ္ဇနဿ အတီတော အဏုသဟဂတော ဗျာပါဒေါ အတ္ထိ၊ န စ ပုထုဇ္ဇနော တေန ဗျာပါဒေန ဗျာပန္နစိတ္တောတိ? န ဟေဝံ ဝတ္တဗ္ဗေ။ပေ။.

သကဒါဂါမိဿ အတီတာ သက္ကာယဒိဋ္ဌိ အတ္ထိ၊ န စ သကဒါဂါမီ တာယ ဒိဋ္ဌိယာ သဒိဋ္ဌိကောတိ? အာမန္တာ. ပုထုဇ္ဇနဿ အတီတာ သက္ကာယဒိဋ္ဌိ အတ္ထိ၊ န စ ပုထုဇ္ဇနော တာယ ဒိဋ္ဌိယာ သဒိဋ္ဌိကောတိ? န ဟေဝံ ဝတ္တဗ္ဗေ။ပေ။ သကဒါဂါမိဿ အတီတာ ဝိစိကိစ္ဆာ အတ္ထိ။ပေ။ အတီတော ဩဠာရိကော ဗျာပါဒေါ အတ္ထိ၊ န စ သကဒါဂါမီ တေန ဗျာပါဒေန ဗျာပန္နစိတ္တောတိ? အာမန္တာ. ပုထုဇ္ဇနဿ အတီတော ဩဠာရိကော ဗျာပါဒေါ အတ္ထိ၊ န စ ပုထုဇ္ဇနော တေန ဗျာပါဒေန ဗျာပန္နစိတ္တောတိ? န ဟေဝံ ဝတ္တဗ္ဗေ။ပေ။.

သောတာပန္နဿ အတီတာ သက္ကာယဒိဋ္ဌိ အတ္ထိ၊ န စ သောတာပန္နော တာယ ဒိဋ္ဌိယာ သဒိဋ္ဌိကောတိ? အာမန္တာ. ပုထုဇ္ဇနဿ အတီတာ သက္ကာယဒိဋ္ဌိ အတ္ထိ၊ န စ ပုထုဇ္ဇနော တာယ ဒိဋ္ဌိယာ သဒိဋ္ဌိကောတိ? န ဟေဝံ ဝတ္တဗ္ဗေ။ပေ။ သောတာပန္နဿ အတီတာ ဝိစိကိစ္ဆာ အတ္ထိ။ပေ။ အတီတော အပါယဂမနီယော မောဟော အတ္ထိ၊ န စ သောတာပန္နော တေန မောဟေန သမောဟောတိ? အာမန္တာ. ပုထုဇ္ဇနဿ အတီတော အပါယဂမနီယော မောဟော အတ္ထိ၊ န စ ပုထုဇ္ဇနော တေန မောဟေန သမောဟောတိ? န ဟေဝံ ဝတ္တဗ္ဗေ။ပေ။.

အတီတဟတ္ထာဒိကထာ

၂၉၃. အတီတာ ဟတ္ထာ အတ္ထီတိ? အာမန္တာ. အတီတေသု ဟတ္ထေသု သတိ အာဒါနနိက္ခေပနံ ပညာယတီတိ? န ဟေဝံ ဝတ္တဗ္ဗေ။ပေ။ အတီတာ ပါဒါ အတ္ထီတိ? အာမန္တာ. အတီတေသု ပါဒေသု သတိ အဘိက္ကမပဋိက္ကမော ပညာယတီတိ? န ဟေဝံ ဝတ္တဗ္ဗေ။ပေ။ အတီတာ ပဗ္ဗာ အတ္ထီတိ? အာမန္တာ. အတီတေသု ပဗ္ဗေသု သတိ သမိဉ္ဇနပသာရဏံ ပညာယတီတိ? န ဟေဝံ ဝတ္တဗ္ဗေ။ပေ။ အတီတော ကုစ္ဆိ အတ္ထီတိ? အာမန္တာ. အတီတသ္မိံ ကုစ္ဆိသ္မိံ သတိ ဇိဃစ္ဆာ ပိပါသာ ပညာယတီတိ? န ဟေဝံ ဝတ္တဗ္ဗေ။ပေ။.

အတီတော ကာယော အတ္ထီတိ? အာမန္တာ. အတီတော ကာယော ပဂ္ဂဟနိဂ္ဂဟုပဂေါ ဆေဒနဘေဒနုပဂေါ ကာကေဟိ ဂိဇ္ဈေဟိ ကုလလေဟိ သာဓာရဏောတိ? န ဟေဝံ ဝတ္တဗ္ဗေ။ပေ။ အတီတေ ကာယေ ဝိသံ ကမေယျ၊ သတ္ထံ ကမေယျ၊ အဂ္ဂိ ကမေယျာတိ? န ဟေဝံ ဝတ္တဗ္ဗေ။ပေ။ လဗ္ဘာ အတီတော ကာယော အဒ္ဒုဗန္ဓနေန ဗန္ဓိတုံ၊ ရဇ္ဇုဗန္ဓနေန ဗန္ဓိတုံ၊ သင်္ခလိကဗန္ဓနေန ဗန္ဓိတုံ၊ ဂါမဗန္ဓနေန ဗန္ဓိတုံ၊ နိဂမဗန္ဓနေန ဗန္ဓိတုံ၊ နဂရဗန္ဓနေန ဗန္ဓိတုံ၊ ဇနပဒဗန္ဓနေန ဗန္ဓိတုံ၊ ကဏ္ဌပဉ္စမေဟိ ဗန္ဓနေဟိ ဗန္ဓိတုန္တိ? န ဟေဝံ ဝတ္တဗ္ဗေ။ပေ။.

အတီတော အာပေါ အတ္ထီတိ? အာမန္တာ. တေန အာပေန အာပကရဏီယံ ကရောတီတိ? န ဟေဝံ ဝတ္တဗ္ဗေ။ပေ။ အတီတော တေဇော အတ္ထီတိ? အာမန္တာ. တေန တေဇေန တေဇကရဏီယံ ကရောတီတိ? န ဟေဝံ ဝတ္တဗ္ဗေ။ပေ။ အတီတော ဝါယော အတ္ထီတိ? အာမန္တာ. တေန ဝါယေန ဝါယကရဏီယံ ကရောတီတိ? န ဟေဝံ ဝတ္တဗ္ဗေ။ပေ။.

အတီတက္ခန္ဓာဒိသမောဓာနကထာ

၂၉၄. အတီတော ရူပက္ခန္ဓော အတ္ထိ၊ အနာဂတော ရူပက္ခန္ဓော အတ္ထိ၊ ပစ္စုပ္ပန္နော ရူပက္ခန္ဓော အတ္ထီတိ? အာမန္တာ. တယော ရူပက္ခန္ဓာတိ? န ဟေဝံ ဝတ္တဗ္ဗေ ။ပေ။ အတီတာ ပဉ္စက္ခန္ဓာ အတ္ထိ၊ အနာဂတာ ပဉ္စက္ခန္ဓာ အတ္ထိ၊ ပစ္စုပ္ပန္နာ ပဉ္စက္ခန္ဓာ အတ္ထီတိ? အာမန္တာ. ပန္နရသက္ခန္ဓာတိ? န ဟေဝံ ဝတ္တဗ္ဗေ။ပေ။.

အတီတံ စက္ခာယတနံ အတ္ထိ၊ အနာဂတံ စက္ခာယတနံ အတ္ထိ၊ ပစ္စုပ္ပန္နံ စက္ခာယတနံ အတ္ထီတိ? အာမန္တာ. တီဏိ စက္ခာယတနာနီတိ? န ဟေဝံ ဝတ္တဗ္ဗေ။ပေ။ အတီတာနိ ဒွါဒသာယတနာနိ အတ္ထိ၊ အနာဂတာနိ ဒွါဒသာယတနာနိ အတ္ထိ၊ ပစ္စုပ္ပန္နာနိ ဒွါဒသာယတနာနိ အတ္ထီတိ? အာမန္တာ. ဆတ္တိံသာယတနာနီတိ? န ဟေဝံ ဝတ္တဗ္ဗေ။ပေ။.

အတီတာ စက္ခုဓာတု အတ္ထိ၊ အနာဂတာ စက္ခုဓာတု အတ္ထိ၊ ပစ္စုပ္ပန္နာ စက္ခုဓာတု အတ္ထီတိ? အာမန္တာ. တိဿော စက္ခုဓာတုယောတိ? န ဟေဝံ ဝတ္တဗ္ဗေ။ပေ။ အတီတာ အဋ္ဌာရသ ဓာတုယော အတ္ထိ၊ အနာဂတာ အဋ္ဌာရသ ဓာတုယော အတ္ထိ၊ ပစ္စုပ္ပန္နာ အဋ္ဌာရသ ဓာတုယော အတ္ထီတိ? အာမန္တာ. စတုပညာသ ဓာတုယောတိ? န ဟေဝံ ဝတ္တဗ္ဗေ။ပေ။.

အတီတံ စက္ခုန္ဒြိယံ အတ္ထိ၊ အနာဂတံ စက္ခုန္ဒြိယံ အတ္ထိ၊ ပစ္စုပ္ပန္နံ စက္ခုန္ဒြိယံ အတ္ထီတိ? အာမန္တာ. တီဏိ စက္ခုန္ဒြိယာနီတိ? န ဟေဝံ ဝတ္တဗ္ဗေ။ပေ။ အတီတာနိ ဗာဝီသတိန္ဒြိယာနိ အတ္ထိ၊ အနာဂတာနိ ဗာဝီသတိန္ဒြိယာနိ အတ္ထိ၊ ပစ္စုပ္ပန္နာနိ ဗာဝီသတိန္ဒြိယာနိ အတ္ထီတိ? အာမန္တာ. ဆသဋ္ဌိန္ဒြိယာနီတိ? န ဟေဝံ ဝတ္တဗ္ဗေ။ပေ။.

အတီတော ရာဇာ စက္ကဝတ္တီ အတ္ထိ၊ အနာဂတော ရာဇာ စက္ကဝတ္တီ အတ္ထိ၊ ပစ္စုပ္ပန္နော ရာဇာ စက္ကဝတ္တီ အတ္ထီတိ? အာမန္တာ. တိဏ္ဏန္နံ ရာဇူနံ စက္ကဝတ္တီနံ သမ္မုခီဘာဝေါ ဟောတီတိ? န ဟေဝံ ဝတ္တဗ္ဗေ။ပေ။.

အတီတော သမ္မာသမ္မုဒ္ဓေါ အတ္ထိ၊ အနာဂတော သမ္မာသမ္ဗုဒ္ဓေါ အတ္ထိ၊ ပစ္စုပ္ပန္နော သမ္မာသမ္ဗုဒ္ဓေါ အတ္ထီတိ? အာမန္တာ. တိဏ္ဏန္နံ သမ္မာသမ္ဗုဒ္ဓါနံ သမ္မုခီဘာဝေါ ဟောတီတိ? န ဟေဝံ ဝတ္တဗ္ဗေ။ပေ။.

ပဒသောဓနကထာ

၂၉၅. အတီတံ အတ္ထီတိ? အာမန္တာ. အတ္ထိ အတီတန္တိ? အတ္ထိ သိယာ အတီတံ၊ သိယာ နွာတီတန္တိ.

အာဇာနာဟိ နိဂ္ဂဟံ. ဟဉ္စိ အတီတံ အတ္ထိ၊ အတ္ထိ သိယာ အတီတံ၊ သိယာ နွာတီတံ၊ တေနာတီတံ နွာတီတံ၊ နွာတီတံ အတီတန္တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘အတီတံ အတ္ထိ အတ္ထိ သိယာ အတီတံ၊ သိယာ နွာတီတံ၊ တေနာတီတံ နွာတီတံ၊ နွာတီတံ အတီတ’’’န္တိ မိစ္ဆာ.

နော စေ ပန အတီတံ နွာတီတံ နွာတီတံ အတီတန္တိ၊ နော စ ဝတ ရေ ဝတ္တဗ္ဗေ – ‘‘အတီတံ အတ္ထိ အတ္ထိ သိယာ အတီတံ၊ သိယာ နွာတီတ’’န္တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘အတီတံ အတ္ထိ အတ္ထိ သိယာ အတီတံ၊ သိယာ နွာတီတံ၊ တေနာတီတံ နွာတီတံ၊ နွာတီတံ အတီတ’’’န္တိ မိစ္ဆာ.

အနာဂတံ အတ္ထီတိ? အာမန္တာ. အတ္ထိ အနာဂတန္တိ? အတ္ထိ သိယာ အနာဂတံ၊ သိယာ နွာနာဂတန္တိ.

အာဇာနာဟိ နိဂ္ဂဟံ. ဟဉ္စိ အနာဂတံ အတ္ထိ အတ္ထိ သိယာ အနာဂတံ သိယာ နွာနာဂတံ၊ တေနာနာဂတံ နွာနာဂတံ၊ နွာနာဂတံ အနာဂတန္တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘အနာဂတံ အတ္ထိ အတ္ထိ သိယာ အနာဂတံ၊ သိယာ နွာနာဂတံ၊ တေနာနာဂတံ နွာနာဂတံ၊ နွာနာဂတံ အနာဂတ’’’န္တိ မိစ္ဆာ.

နော စေ ပနာနာဂတံ နွာနာဂတံ နွာနာဂတံ အနာဂတန္တိ၊ နော စ ဝတ ရေ ဝတ္တဗ္ဗေ – ‘‘အနာဂတံ အတ္ထိ အတ္ထိ သိယာ အနာဂတံ၊ သိယာ နွာနာဂတ’’န္တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘အနာဂတံ အတ္ထိ အတ္ထိ သိယာ အနာဂတံ၊ သိယာ နွာနာဂတံ၊ တေနာနာဂတံ နွာနာဂတံ၊ နွာနာဂတံ အနာဂတ’’’န္တိ မိစ္ဆာ.

ပစ္စုပ္ပန္နံ အတ္ထီတိ၊ အာမန္တာ. အတ္ထိ ပစ္စုပ္ပန္နန္တိ? အတ္ထိ သိယာ ပစ္စုပ္ပန္နံ၊ သိယာ နော ပစ္စုပ္ပန္နန္တိ.

အာဇာနာဟိ နိဂ္ဂဟံ. ဟဉ္စိ ပစ္စုပ္ပန္နံ အတ္ထိ အတ္ထိ သိယာ ပစ္စုပ္ပန္နံ၊ သိယာ နော ပစ္စုပ္ပန္နံ၊ တေန ပစ္စုပ္ပန္နံ၊ နော ပစ္စုပ္ပန္နံ၊ နော ပစ္စုပ္ပန္နံ ပစ္စုပ္ပန္နန္တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ပစ္စုပ္ပန္နံ အတ္ထိ အတ္ထိ သိယာ ပစ္စုပ္ပန္နံ၊ သိယာ နော ပစ္စုပ္ပန္နံ၊ တေန ပစ္စုပ္ပန္နံ နော ပစ္စုပ္ပန္နံ၊ နော ပစ္စုပ္ပန္နံ ပစ္စုပ္ပန္န’’’န္တိ မိစ္ဆာ.

နော စေ ပန ပစ္စုပ္ပန္နံ နော ပစ္စုပ္ပန္နံ၊ နော ပစ္စုပ္ပန္နံ ပစ္စုပ္ပန္နန္တိ၊ နော စ ဝတ ရေ ဝတ္တဗ္ဗေ – ‘‘ပစ္စုပ္ပန္နံ အတ္ထိ အတ္ထိ သိယာ ပစ္စုပ္ပန္နံ၊ သိယာ နော ပစ္စုပ္ပန္န’’န္တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ပစ္စုပ္ပန္နံ အတ္ထိ အတ္ထိ သိယာ ပစ္စုပ္ပန္နံ၊ သိယာ နော ပစ္စုပ္ပန္နံ၊ တေန ပစ္စုပ္ပန္နံ နော ပစ္စုပ္ပန္နံ၊ နော ပစ္စုပ္ပန္နံ ပစ္စုပ္ပန္န’’’န္တိ မိစ္ဆာ.

နိဗ္ဗာနံ အတ္ထီတိ? အာမန္တာ. အတ္ထိ နိဗ္ဗာနန္တိ? အတ္ထိ သိယာ နိဗ္ဗာနံ သိယာ နော နိဗ္ဗာနန္တိ.

အာဇာနာဟိ နိဂ္ဂဟံ. ဟဉ္စိ နိဗ္ဗာနံ အတ္ထိ အတ္ထိ သိယာ နိဗ္ဗာနံ၊ သိယာ နော နိဗ္ဗာနံ၊ တေန နိဗ္ဗာနံ နော နိဗ္ဗာနံ၊ နော နိဗ္ဗာနံ နိဗ္ဗာနန္တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘နိဗ္ဗာနံ အတ္ထိ အတ္ထိ သိယာ နိဗ္ဗာနံ၊ သိယာ နော နိဗ္ဗာနံ၊ တေန နိဗ္ဗာနံ နော နိဗ္ဗာနံ၊ နော နိဗ္ဗာနံ နိဗ္ဗာန’’’န္တိ မိစ္ဆာ.

နော စေ ပန နိဗ္ဗာနံ နော နိဗ္ဗာနံ၊ နော နိဗ္ဗာနံ နိဗ္ဗာနန္တိ၊ နော စ ဝတ ရေ ဝတ္တဗ္ဗေ – ‘‘နိဗ္ဗာနံ အတ္ထိ အတ္ထိ သိယာ နိဗ္ဗာနံ၊ သိယာ နော နိဗ္ဗာန’’န္တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘နိဗ္ဗာနံ အတ္ထိ အတ္ထိ သိယာ နိဗ္ဗာနံ၊ သိယာ နော နိဗ္ဗာနံ၊ တေန နိဗ္ဗာနံ နော နိဗ္ဗာနံ၊ နော နိဗ္ဗာနံ နိဗ္ဗာန’’’န္တိ မိစ္ဆာ.

သုတ္တသာဓနံ

၂၉၆. န ဝတ္တဗ္ဗံ – ‘‘အတီတံ အတ္ထိ၊ အနာဂတံ အတ္ထီ’’တိ? အာမန္တာ. နနု ဝုတ္တံ ဘဂဝတာ – ‘‘ယံ ကိဉ္စိ၊ ဘိက္ခဝေ၊ ရူပံ အတီတာနာဂတပစ္စုပ္ပန္နံ အဇ္ဈတ္တံ ဝါ ဗဟိဒ္ဓါ ဝါ ဩဠာရိကံ ဝါ သုခုမံ ဝါ ဟီနံ ဝါ ပဏီတံ ဝါ ယံ ဒူရေ သန္တိကေ ဝါ – အယံ ဝုစ္စတိ ရူပက္ခန္ဓော. ယာ ကာစိ ဝေဒနာ။ ယာ ကာစိ သညာ။ ယေ ကေစိ သင်္ခါရာ။ ယံ ကိဉ္စိ ဝိညာဏံ အတီတာနာဂတပစ္စုပ္ပန္နံ အဇ္ဈတ္တံ ဝါ ဗဟိဒ္ဓါ ဝါ ဩဠာရိကံ ဝါ သုခုမံ ဝါ ဟီနံ ဝါ ပဏီတံ ဝါ ယံ ဒူရေ သန္တိကေ ဝါ – အယံ ဝုစ္စတိ ဝိညာဏက္ခန္ဓော’’တိ [သံ. နိ. ၃.၄၈]. အတ္ထေဝ သုတ္တန္တောတိ? အာမန္တာ. တေန ဟိ အတီတံ အတ္ထိ၊ အနာဂတံ အတ္ထီတိ.

အတီတံ အတ္ထိ၊ အနာဂတံ အတ္ထီတိ? အာမန္တာ. နနု ဝုတ္တံ ဘဂဝတာ – ‘‘တယောမေ၊ ဘိက္ခဝေ၊ နိရုတ္တိပထာ အဓိဝစနပထာ ပညတ္တိပထာ အသင်္ကိဏ္ဏာ အသင်္ကိဏ္ဏပုဗ္ဗာ န သင်္ကိယန္တိ န သင်္ကိယိဿန္တိ အပ္ပဋိကုဋ္ဌာ သမဏေဟိ ဗြာဟ္မဏေဟိ ဝိညူဟိ. ကတမေ တယော? ယံ၊ ဘိက္ခဝေ၊ ရူပံ အတီတံ နိရုဒ္ဓံ ဝိဂတံ ဝိပရိဏတံ ‘အဟောသီ’တိ တဿ သင်္ခါ၊ ‘အဟောသီ’တိ တဿ သမညာ၊ ‘အဟောသီ’တိ တဿ ပညတ္တိ၊ န တဿ သင်္ခါ ‘အတ္ထီ’တိ၊ န တဿ သင်္ခါ ‘ဘဝိဿတီ’တိ. ယာ ဝေဒနာ။ပေ။ ယာ သညာ။ ယေ သင်္ခါရာ။ ယံ ဝိညာဏံ အတီတံ နိရုဒ္ဓံ ဝိဂတံ ဝိပရိဏတံ ‘အဟောသီ’တိ တဿ သင်္ခါ၊ ‘အဟောသီ’တိ တဿ သမညာ၊ ‘အဟောသီ’တိ တဿ ပညတ္တိ၊ န တဿ သင်္ခါ ‘အတ္ထီ’တိ၊ န တဿ သင်္ခါ ‘ဘဝိဿတီ’တိ.

‘‘ယံ၊ ဘိက္ခဝေ၊ ရူပံ အဇာတံ အပါတုဘူတံ ‘ဘဝိဿတီ’တိ တဿ သင်္ခါ၊ ‘ဘဝိဿတီ’တိ တဿ သမညာ၊ ‘ဘဝိဿတီ’တိ တဿ ပညတ္တိ၊ န တဿ သင်္ခါ ‘အတ္ထီ’တိ၊ န တဿ သင်္ခါ ‘အဟောသီ’တိ. ယာ ဝေဒနာ။ပေ။ ယာ သညာ။ ယေ သင်္ခါရာ။ ယံ ဝိညာဏံ အဇာတံ အပါတုဘူတံ ‘ဘဝိဿတီ’တိ တဿ သင်္ခါ၊ ‘ဘဝိဿတီ’တိ တဿ သမညာ၊ ‘ဘဝိဿတီ’တိ တဿ ပညတ္တိ၊ န တဿ သင်္ခါ ‘အတ္ထီ’တိ၊ န တဿ သင်္ခါ ‘အဟောသီ’တိ.

‘‘ယံ၊ ဘိက္ခဝေ၊ ရူပံ ဇာတံ ပါတုဘူတံ ‘အတ္ထီ’တိ တဿ သင်္ခါ၊ ‘အတ္ထီ’တိ တဿ သမညာ၊ ‘အတ္ထီ’တိ တဿ ပညတ္တိ၊ န တဿ သင်္ခါ ‘အဟောသီ’တိ၊ န တဿ သင်္ခါ ‘ဘဝိဿတီ’တိ. ယာ ဝေဒနာ။ပေ။ ယာ သညာ။ ယေ သင်္ခါရာ။ ယံ ဝိညာဏံ ဇာတံ ပါတုဘူတံ ‘အတ္ထီ’တိ တဿ သင်္ခါ၊ ‘အတ္ထီ’တိ တဿ သမညာ၊ ‘အတ္ထီ’တိ တဿ ပညတ္တိ၊ န တဿ သင်္ခါ ‘အဟောသီ’တိ၊ န တဿ သင်္ခါ ‘ဘဝိဿတီ’တိ. ဣမေ ခေါ၊ ဘိက္ခဝေ၊ တယော နိရုတ္တိပထာ အဓိဝစနပထာ ပညတ္တိပထာ အသင်္ကိဏ္ဏာ အသင်္ကိဏ္ဏပုဗ္ဗာ န သင်္ကိယန္တိ န သင်္ကိယိဿန္တိ အပ္ပဋိကုဋ္ဌာ သမဏေဟိ ဗြာဟ္မဏေဟိ ဝိညူဟိ.

‘‘ယေပိ တေ၊ ဘိက္ခဝေ၊ အဟေသုံ ဥက္ကလာ ဝဿဘညာ အဟေတုကဝါဒါ အကိရိယဝါဒါ နတ္ထိကဝါဒါ၊ တေပိမေ တယော နိရုတ္တိပထေ အဓိဝစနပထေ ပညတ္တိပထေ န ဂရဟိတဗ္ဗံ န ပဋိက္ကောသိတဗ္ဗံ အမညိံသု. တံ ကိဿ ဟေတု? နိန္ဒာဗျာရောသဥပါရမ္ဘဘယာ’’တိ [သံယုတ္တနိကာယေ]. အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘အတီတံ အတ္ထိ၊ အနာဂတံ အတ္ထီ’’တိ.

အတီတံ အတ္ထီတိ? အာမန္တာ. နနု အာယသ္မာ ဖဂ္ဂုနော ဘဂဝန္တံ ဧတဒဝေါစ – ‘‘အတ္ထိ နု ခေါ တံ၊ ဘန္တေ၊ စက္ခုံ ယေန စက္ခုနာ အတီတေ ဗုဒ္ဓေ ပရိနိဗ္ဗုတေ ဆိန္နပပဉ္စေ ဆိန္နဝဋုမေ ပရိယာဒိန္နဝဋ္ဋေ သဗ္ဗဒုက္ခဝီတိဝတ္တေ ပညာပယမာနော ပညာပေယျာတိ. အတ္ထိ နု ခေါ သာ၊ ဘန္တေ၊ ဇိဝှါ။ပေ။ အတ္ထိ နု ခေါ သော၊ ဘန္တေ၊ မနော ယေန မနေန အတီတေ ဗုဒ္ဓေ ပရိနိဗ္ဗုတေ ဆိန္နပပဉ္စေ ဆိန္နဝဋုမေ ပရိယာဒိန္နဝဋ္ဋေ သဗ္ဗဒုက္ခဝီတိဝတ္တေ ပညာပယမာနော ပညာပေယျာ’’တိ.

‘‘နတ္ထိ ခေါ တံ၊ ဖဂ္ဂုန၊ စက္ခုံ ယေန စက္ခုနာ အတီတေ ဗုဒ္ဓေ ပရိနိဗ္ဗုတေ ဆိန္နပပဉ္စေ ဆိန္နဝဋုမေ ပရိယာဒိန္နဝဋ္ဋေ သဗ္ဗဒုက္ခဝီတိဝတ္တေ ပညာပယမာနော ပညာပေယျ. နတ္ထိ ခေါ သာ၊ ဖဂ္ဂုန၊ ဇိဝှါ။ပေ။ နတ္ထိ နု ခေါ သော၊ ဖဂ္ဂုန၊ မနော ယေန မနေန အတီတေ ဗုဒ္ဓေ ပရိနိဗ္ဗုတေ ဆိန္နပပဉ္စေ ဆိန္နဝဋုမေ ပရိယာဒိန္နဝဋ္ဋေ သဗ္ဗဒုက္ခဝီတိဝတ္တေ ပညာပယမာနော ပညာပေယျာ’’တိ [သံ. နိ. ၄.၈၃]. အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘အတီတံ အတ္ထီ’’တိ.

အတီတံ အတ္ထီတိ? အာမန္တာ. နနု အာယသ္မာ နန္ဒကော ဧတဒဝေါစ – ‘‘အဟု ပုဗ္ဗေ လောဘော တဒဟု အကုသလံ၊ သော ဧတရဟိ နတ္ထိ၊ ဣစ္စေတံ ကုသလံ. အဟု ပုဗ္ဗေ ဒေါသော။ အဟု ပုဗ္ဗေ မောဟော၊ တဒဟု အကုသလံ၊ သော ဧတရဟိ နတ္ထိ၊ ဣစ္စေတံ ကုသလ’’န္တိ [အင်္ဂုတ္တရနိကာယေ]. အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘အတီတံ အတ္ထီ’’တိ.

န ဝတ္တဗ္ဗံ – ‘‘အနာဂတံ အတ္ထီ’’တိ? အာမန္တာ. နနု ဝုတ္တံ ဘဂဝတာ – ‘‘ကဗဠီကာရေ စေ၊ ဘိက္ခဝေ၊ အာဟာရေ အတ္ထိ ရာဂေါ၊ အတ္ထိ နန္ဒီ၊ အတ္ထိ တဏှာ၊ ပတိဋ္ဌိတံ တတ္ထ ဝိညာဏံ ဝိရူဠှံ. ယတ္ထ ပတိဋ္ဌိတံ ဝိညာဏံ ဝိရူဠှံ၊ အတ္ထိ တတ္ထ နာမရူပဿ အဝက္ကန္တိ. ယတ္ထ အတ္ထိ နာမရူပဿ အဝက္ကန္တိ၊ အတ္ထိ တတ္ထ သင်္ခါရာနံ ဝုဒ္ဓိ. ယတ္ထ အတ္ထိ သင်္ခါရာနံ ဝုဒ္ဓိ၊ အတ္ထိ တတ္ထ အာယတိံ ပုနဗ္ဘဝါဘိနိဗ္ဗတ္တိ. ယတ္ထ အတ္ထိ အာယတိံ ပုနဗ္ဘဝါဘိနိဗ္ဗတ္တိ၊ အတ္ထိ တတ္ထ အာယတိံ ဇာတိဇရာမရဏံ. ယတ္ထ အတ္ထိ အာယတိံ ဇာတိဇရာမရဏံ၊ သသောကံ တံ၊ ဘိက္ခဝေ၊ သရဇံ [သဒရံ (သံ. နိ. ၂.၆၄) တဒေဝ ယုတ္တတရံ] သဥပါယာသန္တိ ဝဒါမိ.

‘‘ဖဿေ စေ၊ ဘိက္ခဝေ၊ အာဟာရေ။ မနောသဉ္စေတနာယ စေ၊ ဘိက္ခဝေ၊ အာဟာရေ။ ဝိညာဏေ စေ၊ ဘိက္ခဝေ၊ အာဟာရေ အတ္ထိ ရာဂေါ၊ အတ္ထိ နန္ဒီ။ပေ။ သရဇံ သဥပါယာသန္တိ ဝဒါမီ’’တိ [သံ. နိ. ၂.၆၄]. အတ္ထေဝ သုတ္တန္တောတိ? အာမန္တာ. တေန ဟိ အနာဂတံ အတ္ထီတိ.

အနာဂတံ အတ္ထီတိ? အာမန္တာ. နနု ဝုတ္တံ ဘဂဝတာ – ‘‘ကဗဠီကာရေ စေ၊ ဘိက္ခဝေ၊ အာဟာရေ နတ္ထိ ရာဂေါ၊ နတ္ထိ နန္ဒီ၊ နတ္ထိ တဏှာ၊ အပ္ပတိဋ္ဌိတံ တတ္ထ ဝိညာဏံ အဝိရူဠှံ. ယတ္ထ ဝိညာဏံ အပ္ပတိဋ္ဌိတံ အဝိရူဠှံ၊ နတ္ထိ တတ္ထ နာမရူပဿ အဝက္ကန္တိ. ယတ္ထ နတ္ထိ နာမရူပဿ အဝက္ကန္တိ၊ နတ္ထိ တတ္ထ သင်္ခါရာနံ ဝုဒ္ဓိ. ယတ္ထ နတ္ထိ သင်္ခါရာနံ ဝုဒ္ဓိ၊ နတ္ထိ တတ္ထ အာယတိံ ပုနဗ္ဘဝါဘိနိဗ္ဗတ္တိ. ယတ္ထ နတ္ထိ အာယတိံ ပုနဗ္ဘဝါဘိနိဗ္ဗတ္တိ၊ နတ္ထိ တတ္ထ အာယတိံ ဇာတိဇရာမရဏံ. ယတ္ထ နတ္ထိ အာယတိံ ဇာတိဇရာမရဏံ၊ အသောကံ တံ၊ ဘိက္ခဝေ၊ အရဇံ အနုပါယာသန္တိ ဝဒါမိ.

‘‘ဖဿေ စေ၊ ဘိက္ခဝေ၊ အာဟာရေ။ မနောသဉ္စေတနာယ စေ၊ ဘိက္ခဝေ၊ အာဟာရေ။ ဝိညာဏေ စေ၊ ဘိက္ခဝေ၊ အာဟာရေ နတ္ထိ ရာဂေါ၊ နတ္ထိ နန္ဒီ။ပေ။ အရဇံ အနုပါယာသန္တိ ဝဒါမီ’’တိ [သံ. နိ. ၂.၆၄]. အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘အနာဂတံ အတ္ထီ’’တိ.

သဗ္ဗမတ္ထီတိကထာ နိဋ္ဌိတာ.