၂၃. တေဝီသတိမဝဂ္ဂေါ

(၂၂၅) ၈. ပတိရူပကထာ

၉၁၅. အတ္ထိ န ရာဂေါ ရာဂပတိရူပကောတိ? အာမန္တာ. အတ္ထိ န ဖဿော ဖဿပတိရူပကော၊ အတ္ထိ န ဝေဒနာ ဝေဒနာပတိရူပိကာ၊ အတ္ထိ န သညာ သညာပတိရူပိကာ၊ အတ္ထိ န စေတနာ စေတနာပတိရူပိကာ၊ အတ္ထိ န စိတ္တံ စိတ္တပတိရူပကံ၊ အတ္ထိ န သဒ္ဓါ သဒ္ဓါပတိရူပိကာ၊ အတ္ထိ န ဝီရိယံ ဝီရိယပတိရူပကံ၊ အတ္ထိ န သတိ သတိပတိရူပိကာ၊ အတ္ထိ န သမာဓိ သမာဓိပတိရူပကော၊ အတ္ထိ န ပညာ ပညာပတိရူပိကာတိ? န ဟေဝံ ဝတ္တဗ္ဗေ။ပေ။.

၉၁၆. အတ္ထိ န ဒေါသော ဒေါသပတိရူပကော၊ အတ္ထိ န မောဟော မောဟပတိရူပကော၊ အတ္ထိ န ကိလေသော ကိလေသပတိရူပကောတိ? အာမန္တာ. အတ္ထိ န ဖဿော ဖဿပတိရူပကော။ပေ။ အတ္ထိ န ပညာ ပညာပတိရူပိကာတိ? န ဟေဝံ ဝတ္တဗ္ဗေ။ပေ။.

ပတိရူပကထာ နိဋ္ဌိတာ.