(၂၀၈) ၁. ပရိနိဗ္ဗာနကထာ

၈၉၂. အတ္ထိ ကိဉ္စိ သံယောဇနံ အပ္ပဟာယ ပရိနိဗ္ဗာနန္တိ? အာမန္တာ. အတ္ထိ ကိဉ္စိ သက္ကာယဒိဋ္ဌိံ အပ္ပဟာယ။ပေ။ အနောတ္တပ္ပံ အပ္ပဟာယ ပရိနိဗ္ဗာနန္တိ? န ဟေဝံ ဝတ္တဗ္ဗေ။ပေ။.

အတ္ထိ ကိဉ္စိ သံယောဇနံ အပ္ပဟာယ ပရိနိဗ္ဗာနန္တိ? အာမန္တာ. အရဟာ သရာဂေါ။ပေ။ သကိလေသောတိ? န ဟေဝံ ဝတ္တဗ္ဗေ။ပေ။ နနု အရဟာ နိရာဂေါ။ပေ။ နိက္ကိလေသောတိ? အာမန္တာ. ဟဉ္စိ အရဟာ နိရာဂေါ။ပေ။ နိက္ကိလေသော၊ နော စ ဝတ ရေ ဝတ္တဗ္ဗေ – ‘‘အတ္ထိ ကိဉ္စိ သံယောဇနံ အပ္ပဟာယ ပရိနိဗ္ဗာန’’န္တိ.

၈၉၃. န ဝတ္တဗ္ဗံ – ‘‘အတ္ထိ ကိဉ္စိ သံယောဇနံ အပ္ပဟာယ ပရိနိဗ္ဗာန’’န္တိ? အာမန္တာ. အရဟာ သဗ္ဗံ ဗုဒ္ဓဝိသယံ ဇာနာတီတိ? န ဟေဝံ ဝတ္တဗ္ဗေ. တေန ဟိ အတ္ထိ ကိဉ္စိ သံယောဇနံ အပ္ပဟာယ ပရိနိဗ္ဗာနန္တိ.

ပရိနိဗ္ဗာနကထာ နိဋ္ဌိတာ.