၂၁. ဧကဝီသတိမဝဂ္ဂေါ

(၂၀၅) ၆. သဗ္ဗဒိသာကထာ

၈၈၆. သဗ္ဗာ ဒိသာ ဗုဒ္ဓါ တိဋ္ဌန္တီတိ? အာမန္တာ. ပုရတ္ထိမာယ ဒိသာယ ဗုဒ္ဓေါ တိဋ္ဌတီတိ? န ဟေဝံ ဝတ္တဗ္ဗေ။ပေ။ ပုရတ္ထိမာယ ဒိသာယ ဗုဒ္ဓေါ တိဋ္ဌတီတိ? အာမန္တာ. ကိန္နာမော သော ဘဂဝါ၊ ကိံဇစ္စော၊ ကိံဂေါတ္တော၊ ကိန္နာမာ တဿ ဘဂဝတော မာတာပိတရော၊ ကိန္နာမံ တဿ ဘဂဝတော သာဝကယုဂံ၊ ကောနာမော တဿ ဘဂဝတော ဥပဋ္ဌာကော၊ ကီဒိသံ စီဝရံ ဓာရေတိ၊ ကီဒိသံ ပတ္တံ ဓာရေတိ၊ ကတရသ္မိံ ဂါမေ ဝါ နိဂမေ ဝါ နဂရေ ဝါ ရဋ္ဌေ ဝါ ဇနပဒေ ဝါတိ? န ဟေဝံ ဝတ္တဗ္ဗေ။ပေ။.

ဒက္ခိဏာယ ဒိသာယ။ပေ။ ပစ္ဆိမာယ ဒိသာယ။ပေ။ ဥတ္တရာယ ဒိသာယ။ပေ။ ဟေဋ္ဌိမာယ ဒိသာယ ဗုဒ္ဓေါ တိဋ္ဌတီတိ? န ဟေဝံ ဝတ္တဗ္ဗေ။ပေ။ ဟေဋ္ဌိမာယ ဒိသာယ ဗုဒ္ဓေါ တိဋ္ဌတီတိ? အာမန္တာ. ကိန္နာမော သော ဘဂဝါ။ပေ။ ဇနပဒေ ဝါတိ? န ဟေဝံ ဝတ္တဗ္ဗေ။ပေ။.

ဥပရိမာယ ဒိသာယ ဗုဒ္ဓေါ တိဋ္ဌတီတိ? န ဟေဝံ ဝတ္တဗ္ဗေ။ပေ။. ဥပရိမာယ ဒိသာယ ဗုဒ္ဓေါ တိဋ္ဌတီတိ? အာမန္တာ. စာတုမဟာရာဇိကေ တိဋ္ဌတိ။ပေ။ တာဝတိံသေ တိဋ္ဌတိ။ပေ။ ယာမေ တိဋ္ဌတိ။ပေ။ တုသိတေ တိဋ္ဌတိ။ပေ။ နိမ္မာနရတိယာ တိဋ္ဌတိ။ပေ။ ပရနိမ္မိတဝသဝတ္တိယာ တိဋ္ဌတိ။ပေ။ ဗြဟ္မလောကေ တိဋ္ဌတီတိ? န ဟေဝံ ဝတ္တဗ္ဗေ။ပေ။.

သဗ္ဗဒိသာကထာ နိဋ္ဌိတာ.