၂၁. ဧကဝီသတိမဝဂ္ဂေါ

(၂၀၁) ၂. အဝိဝိတ္တကထာ

၈၇၉. ပုထုဇ္ဇနော တေဓာတုကေဟိ ဓမ္မေဟိ အဝိဝိတ္တောတိ? အာမန္တာ. ပုထုဇ္ဇနော တေဓာတုကေဟိ ဖဿေဟိ။ပေ။ တေဓာတုကာဟိ ဝေဒနာဟိ။ သညာဟိ ။ စေတနာဟိ။ စိတ္တေဟိ။ သဒ္ဓါဟိ။ ဝီရိယေဟိ။ သတီဟိ။ သမာဓီဟိ။ပေ။ တေဓာတုကာဟိ ပညာဟိ အဝိဝိတ္တောတိ? န ဟေဝံ ဝတ္တဗ္ဗေ။ပေ။.

ပုထုဇ္ဇနော တေဓာတုကေဟိ ကမ္မေဟိ အဝိဝိတ္တောတိ? အာမန္တာ. ယသ္မိံ ခဏေ ပုထုဇ္ဇနော စီဝရံ ဒေတိ၊ တသ္မိံ ခဏေ ပဌမံ ဈာနံ ဥပသမ္ပဇ္ဇ ဝိဟရတိ။ပေ။ အာကာသာနဉ္စာယတနံ ဥပသမ္ပဇ္ဇ ဝိဟရတီတိ? န ဟေဝံ ဝတ္တဗ္ဗေ။ပေ။ ယသ္မိံ ခဏေ ပုထုဇ္ဇနော ပိဏ္ဍပါတံ ဒေတိ။ပေ။ သေနာသနံ ဒေတိ။ပေ။ ဂိလာနပစ္စယဘေသဇ္ဇပရိက္ခာရံ ဒေတိ၊ တသ္မိံ ခဏေ စတုတ္ထံ ဈာနံ ဥပသမ္ပဇ္ဇ ဝိဟရတိ။ နေဝသညာနာသညာယတနံ ဥပသမ္ပဇ္ဇ ဝိဟရတီတိ? န ဟေဝံ ဝတ္တဗ္ဗေ။ပေ။.

၈၈၀. န ဝတ္တဗ္ဗံ – ‘‘ပုထုဇ္ဇနော တေဓာတုကေဟိ ကမ္မေဟိ အဝိဝိတ္တော’’တိ? အာမန္တာ. ပုထုဇ္ဇနဿ ရူပဓာတုအရူပဓာတူပဂံ ကမ္မံ ပရိညာတန္တိ? န ဟေဝံ ဝတ္တဗ္ဗေ. တေန ဟိ ပုထုဇ္ဇနော တေဓာတုကေဟိ ကမ္မေဟိ အဝိဝိတ္တောတိ။ပေ။.

အဝိဝိတ္တကထာ နိဋ္ဌိတာ.