၁၉. ဧကူနဝီသတိမဝဂ္ဂေါ

(၁၉၃) ၈. ဣန္ဒြိယကထာ

၈၅၃. နတ္ထိ လောကိယံ သဒ္ဓိန္ဒြိယန္တိ? အာမန္တာ. နတ္ထိ လောကိယာ သဒ္ဓါတိ? န ဟေဝံ ဝတ္တဗ္ဗေ။ပေ။ နတ္ထိ လောကိယံ ဝီရိယိန္ဒြိယံ။ပေ။ သတိန္ဒြိယံ။ပေ။ သမာဓိန္ဒြိယံ။ပေ။ ပညိန္ဒြိယန္တိ? အာမန္တာ. နတ္ထိ လောကိယာ ပညာတိ? န ဟေဝံ ဝတ္တဗ္ဗေ။ပေ။.

အတ္ထိ လောကိယာ သဒ္ဓါတိ? အာမန္တာ. အတ္ထိ လောကိယံ သဒ္ဓိန္ဒြိယန္တိ? န ဟေဝံ ဝတ္တဗ္ဗေ။ပေ။ အတ္ထိ လောကိယံ ဝီရိယံ။ပေ။ သတိ။ပေ။ သမာဓိ။ပေ။ ပညာတိ? အာမန္တာ. အတ္ထိ လောကိယံ ပညိန္ဒြိယန္တိ? န ဟေဝံ ဝတ္တဗ္ဗေ။ပေ။.

အတ္ထိ လောကိယော မနော၊ အတ္ထိ လောကိယံ မနိန္ဒြိယန္တိ? အာမန္တာ. အတ္ထိ လောကိယာ သဒ္ဓါ၊ အတ္ထိ လောကိယံ သဒ္ဓိန္ဒြိယန္တိ? န ဟေဝံ ဝတ္တဗ္ဗေ။ပေ။ အတ္ထိ လောကိယော မနော၊ အတ္ထိ လောကိယံ မနိန္ဒြိယန္တိ? အာမန္တာ. အတ္ထိ လောကိယာ ပညာ၊ အတ္ထိ လောကိယံ ပညိန္ဒြိယန္တိ? န ဟေဝံ ဝတ္တဗ္ဗေ။ပေ။.

အတ္ထိ လောကိယံ သောမနဿံ၊ အတ္ထိ လောကိယံ သောမနဿိန္ဒြိယံ။ပေ။ အတ္ထိ လောကိယံ ဇီဝိတံ၊ အတ္ထိ လောကိယံ ဇီဝိတိန္ဒြိယန္တိ? အာမန္တာ. အတ္ထိ လောကိယာ သဒ္ဓါ၊ အတ္ထိ လောကိယံ သဒ္ဓိန္ဒြိယန္တိ? န ဟေဝံ ဝတ္တဗ္ဗေ။ပေ။ အတ္ထိ လောကိယံ ဇီဝိတံ၊ အတ္ထိ လောကိယံ ဇီဝိတိန္ဒြိယန္တိ? အာမန္တာ. အတ္ထိ လောကိယာ ပညာ၊ အတ္ထိ လောကိယံ ပညိန္ဒြိယန္တိ? န ဟေဝံ ဝတ္တဗ္ဗေ။ပေ။.

၈၅၄. အတ္ထိ လောကိယာ သဒ္ဓါ၊ နတ္ထိ လောကိယံ သဒ္ဓိန္ဒြိယန္တိ? အာမန္တာ. အတ္ထိ လောကိယော မနော၊ နတ္ထိ လောကိယံ မနိန္ဒြိယန္တိ? န ဟေဝံ ဝတ္တဗ္ဗေ။ပေ။ အတ္ထိ လောကိယာ ပညာ၊ နတ္ထိ လောကိယံ ပညိန္ဒြိယန္တိ? အာမန္တာ. အတ္ထိ လောကိယော မနော၊ နတ္ထိ လောကိယံ မနိန္ဒြိယန္တိ? န ဟေဝံ ဝတ္တဗ္ဗေ။ပေ။.

အတ္ထိ လောကိယာ သဒ္ဓါ၊ နတ္ထိ လောကိယံ သဒ္ဓိန္ဒြိယန္တိ? အာမန္တာ. အတ္ထိ လောကိယံ သောမနဿံ၊ နတ္ထိ လောကိယံ သောမနဿိန္ဒြိယန္တိ။ အတ္ထိ လောကိယံ ဇီဝိတံ၊ နတ္ထိ လောကိယံ ဇီဝိတိန္ဒြိယန္တိ? န ဟေဝံ ဝတ္တဗ္ဗေ။ပေ။ အတ္ထိ လောကိယာ ပညာ၊ နတ္ထိ လောကိယံ ပညိန္ဒြိယန္တိ? အာမန္တာ. အတ္ထိ လောကိယော မနော၊ နတ္ထိ လောကိယံ မနိန္ဒြိယန္တိ။ပေ။ အတ္ထိ လောကိယံ ဇီဝိတံ၊ နတ္ထိ လောကိယံ ဇီဝိတိန္ဒြိယန္တိ? န ဟေဝံ ဝတ္တဗ္ဗေ။ပေ။.

၈၅၅. အတ္ထိ လောကုတ္တရာ သဒ္ဓါ၊ အတ္ထိ လောကုတ္တရံ သဒ္ဓိန္ဒြိယန္တိ? အာမန္တာ. အတ္ထိ လောကိယာ သဒ္ဓါ၊ အတ္ထိ လောကိယံ သဒ္ဓိန္ဒြိယန္တိ? န ဟေဝံ ဝတ္တဗ္ဗေ။ပေ။ အတ္ထိ လောကုတ္တရံ ဝီရိယံ။ပေ။ အတ္ထိ လောကုတ္တရာ ပညာ၊ အတ္ထိ လောကုတ္တရံ ပညိန္ဒြိယန္တိ? အာမန္တာ. အတ္ထိ လောကိယာ ပညာ၊ အတ္ထိ လောကိယံ ပညိန္ဒြိယန္တိ? န ဟေဝံ ဝတ္တဗ္ဗေ။ပေ။.

အတ္ထိ လောကိယာ သဒ္ဓါ၊ နတ္ထိ လောကိယံ သဒ္ဓိန္ဒြိယန္တိ? အာမန္တာ. အတ္ထိ လောကုတ္တရာ သဒ္ဓါ၊ နတ္ထိ လောကုတ္တရံ သဒ္ဓိန္ဒြိယန္တိ? န ဟေဝံ ဝတ္တဗ္ဗေ။ပေ။ အတ္ထိ လောကိယံ ဝီရိယံ။ပေ။ အတ္ထိ လောကိယာ ပညာ၊ နတ္ထိ လောကိယံ ပညိန္ဒြိယန္တိ? အာမန္တာ. အတ္ထိ လောကုတ္တရာ ပညာ၊ နတ္ထိ လောကုတ္တရံ ပညိန္ဒြိယန္တိ? န ဟေဝံ ဝတ္တဗ္ဗေ။ပေ။.

၈၅၆. နတ္ထိ လောကိယာနိ ပဉ္စိန္ဒြိယာနီတိ? အာမန္တာ. နနု ဝုတ္တံ ဘဂဝတာ – ‘‘အဒ္ဒသံ ခေါ အဟံ၊ ဘိက္ခဝေ၊ ဗုဒ္ဓစက္ခုနာ လောကံ ဝေါလောကေန္တော သတ္တေ အပ္ပရဇက္ခေ မဟာရဇက္ခေ၊ တိက္ခိန္ဒြိယေ မုဒိန္ဒြိယေ၊ သွာကာရေ၊ သုဝိညာပယေ၊ အပ္ပေကစ္စေ ပရလောကဝဇ္ဇဘယဒဿာဝိနော ဝိဟရန္တေ’’တိ [မ. နိ. ၁.၂၈၃ တတ္ထ ‘‘ဒွါကာရေ ဒုဝိညာပယေ’’ ဣစ္စာဒီနိပိ ပဒါနိ ဒိဿန္တိ]! အတ္ထေဝ သုတ္တန္တောတိ? အာမန္တာ. တေန ဟိ အတ္ထိ လောကိယာနိ ပဉ္စိန္ဒြိယာနီတိ.

ဣန္ဒြိယကထာ နိဋ္ဌိတာ.

ဧကူနဝီသတိမဝဂ္ဂေါ.

တဿုဒ္ဒါနံ –

အတီတေ ကိလေသေ ဇဟတိ အနာဂတေ ကိလေသေ ဇဟတိ ပစ္စုပ္ပန္နေ ကိလေသေ ဇဟတိ၊ သုညတာ သင်္ခါရက္ခန္ဓပရိယာပန္နာ၊ သာမညဖလံ အသင်္ခတံ၊ ပတ္တိ အသင်္ခတာ၊ သဗ္ဗဓမ္မာနံ တထတာ အသင်္ခတာ၊ နိဗ္ဗာနဓာတု ကုသလာ၊ အတ္ထိ ပုထုဇ္ဇနဿ အစ္စန္တနိယာမတာ၊ နတ္ထိ လောကိယာနိ ပဉ္စိန္ဒြိယာနီတိ.