(၁၈၀) ၄. ဂန္ဓဇာတိကထာ

၈၀၉. ဗုဒ္ဓဿ ဘဂဝတော ဥစ္စာရပဿာဝေါ အတိဝိယ အညေ ဂန္ဓဇာတေ အဓိဂ္ဂဏှာတီတိ? အာမန္တာ. ဘဂဝါ ဂန္ဓဘောဇီတိ? န ဟေဝံ ဝတ္တဗ္ဗေ။ပေ။ နနု ဘဂဝါ ဩဒနကုမ္မာသံ ဘုဉ္ဇတီတိ? အာမန္တာ. ဟဉ္စိ ဘဂဝါ ဩဒနကုမ္မာသံ ဘုဉ္ဇတိ၊ နော စ ဝတ ရေ ဝတ္တဗ္ဗေ – ‘‘ဗုဒ္ဓဿ ဘဂဝတော ဥစ္စာရပဿာဝေါ အတိဝိယ အညေ ဂန္ဓဇာတေ အဓိဂ္ဂဏှာတီ’’တိ.

ဗုဒ္ဓဿ ဘဂဝတော ဥစ္စာရပဿာဝေါ အတိဝိယ အညေ ဂန္ဓဇာတေ အဓိဂ္ဂဏှာတီတိ? အာမန္တာ. အတ္ထိ ကေစိ ဗုဒ္ဓဿ ဘဂဝတော ဥစ္စာရပဿာဝံ နှာယန္တိ ဝိလိမ္ပန္တိ ဥစ္ဆာဒေန္တိ [ဥစ္စာရေန္တိ (သီ. ပီ. က.)] ပေဠာယ ပဋိသာမေန္တိ ကရဏ္ဍာယ နိက္ခိပန္တိ အာပဏေ ပသာရေန္တိ၊ တေန စ ဂန္ဓေန ဂန္ဓကရဏီယံ ကရောန္တီတိ? န ဟေဝံ ဝတ္တဗ္ဗေ။ပေ။.

ဂန္ဓဇာတိကထာ နိဋ္ဌိတာ.